வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



ஐம்பது நாடுகளில் அன்னை தெரேசா பற்றிய திரைப்பட விழா

அருளாளர் அன்னை தெரேசா அவர்கள், செப்டம்பரில் புனிதராக அறிவிக்கப்படுவதை முன்னிட்டு, அன்னையின் வாழ்வு மற்றும் போதனைகளை மையப்படுத்திய திரைப்பட விழா ஒன்று, ஏறத்தாழ ஐம்பது நாடுகளில், நூறு இடங்களில் நடைபெறவிருக்கிறது.

இந்தியாவில் சமூகத்தொடர்புத்துறைக்கான, உலக கத்தோலிக்க கழகத்தால் ஏற்பாடு செய்யப்படும், அன்னை தெரேசா அனைத்துலக திரைப்பட விழா(MTIFF), ஆகஸ்ட் 26ம் தேதி கொல்கத்தாவில் ஆரம்பமாகியது. அதன்பின்னர், அடுத்த ஆறு மாதங்களுக்கு, உலகின் பல்வேறு பகுதிகளில் நடைபெறும் என அறிவிக்கப்பட்டுள்ளது. நொபெல் அமைதி விருது பெற்ற, அன்னை தெரேசா அவர்கள் வாழ்வால் தூண்டப்பட்டு எடுக்கப்பட்ட ஆவணப்படங்கள் மற்றும் சிறந்த திரைப்படங்கள், கொல்கத்தாவில் மூன்று நாள்களுக்குத் திரையிடப்படும் என்று, அதன் இயக்குனர் சுனில் லூக்காஸ் அவர்கள் கூறினார்.

அதன்பின்னர், இந்தியாவின் டெல்லி, மும்பை, சென்னை, பெங்களூரு, உதய்ப்பூர், குவாஹாட்டி, பாட்னா, இந்தோர், ராஞ்சி மற்றும் கேரளாவின் நான்கு நகரங்களில் திரையிடப்படும் என்று மேலும் கூறினார், சுனில் லூக்காஸ். பிரிட்டன், மலேசியா, அயர்லாந்து, இத்தாலி, ஆஸ்திரேலியா, தாய்லாந்து, மியன்மார், பங்களாதேஷ், இலங்கை, சீனா உட்பட 50 நாடுகளில் இவ்விழா நடைபெறும். வருகிற செப்டம்பர் 4ம் தேதி வத்திக்கானில் அன்னை தெரேசா அவர்கள் புனிதராக அறிவிக்கப்படுவார். அன்னை தெரேசா அனைத்துலக திரைப்பட விழா, அன்னை அருளாளராக அறிவிக்கப்பட்டவுடன், முதலில் 2003லும், பின்னர், 2007 மற்றும் 2010ம் ஆண்டுகளிலும் இடம்பெற்றது.

(ஆதாரம் : Business Standard / வத்திக்கான் வானொலி) [2016-09-01 23:19:00]


இந்தியாவில், கடுமையான சிறார் தொழில் சட்டத்திற்கு வரவேற்பு

இந்தியாவில் சிறார் குழந்தை தொழில்முறைக்கு எதிரான சட்டத்தை வலுப்படுத்தும் நோக்கக்தில் கொண்டுவரப்பட்டுள்ள சட்டச் சீர்திருத்தத்தை, திருஅவை அதிகாரிகளும், மனித உரிமை ஆர்வலர்களும் வரவேற்றுள்ளனர்.

இச்சட்டச் சீர்திருத்தம் பற்றி UCA செய்தி நிறுவனத்திடம் கருத்து தெரிவித்த, இந்திய ஆயர் பேரவையின் தொழில் பணிக்குழு செயலர் அருள்பணி ஜெய்சன் வடச்சேரி(Jaison Vadassery) அவர்கள், தொடர்புடைய அதிகாரிகள், இதைக் கண்டிப்பாய் அமல்படுத்துவார்கள் என்ற நம்பிக்கையை வெளியிட்டார்.ஜூலை மாதம் 19ம் தேதி இந்திய மேல் சபை அங்கீகரித்துள்ள இச்சட்டச் சீர்திருத்தத்தின்படி, 14 வயதுக்குட்பட்ட சிறார், குடும்பத் தொழில் தவிர, அனைத்துத் துறைகளிலும் வேலைக்கு அமர்த்தப்படுவது முழுவதுமாகத் தடை செய்யப்படுகிறது.

இந்த மசோதா, கீழ்சபையிலும் அங்கீகரிக்கப்பட்டு, குடியரசுத் தலைவர் கையெழுத்திட்ட பின்னரே சட்டமாக அமலுக்கு வரும். இச்சட்டம் அமலுக்கு வந்த பின்னர், இதை மீறுகிறவர்களுக்கு, ஈராண்டு வரைச் சிறைத் தண்டனை அல்லது ஐம்பதாயிரம் ரூபாய் வரை அபராதம் விதிக்கப்படும். இந்தியாவில், 5 வயதுக்கும், 14 வயதுக்கும் உட்பட்ட ஏறத்தாழ 43 இலட்சம் சிறார், முழுநேரத் தொழிலாளர்கள். இவர்களில் பெரும்பாலானவர்கள், வேளாண்மைத் தொழில் செய்பவர்கள்.

(ஆதாரம் : UCAN / வத்திக்கான் வானொலி) [2016-08-09 00:04:06]


கோவில்களைக் காக்க மும்பை கத்தோலிக்கர் போராட்டம்

அண்மையில் வெளியிடப்பட்ட மும்பை பெருநகர முன்னேற்ற திட்ட வரைவில், கத்தோலிக்க கோவில்களும், அவற்றைச் சார்ந்த இடங்களும் தவறுதலாகக் குறிக்கப்பட்டுள்ளன, அல்லது விடப்பட்டுள்ளன என்று, மும்பை நகர கத்தோலிக்கர்கள் போராட்டம் ஒன்றை மேற்கொண்டனர்.

திட்ட வரைவில் குறிக்கப்படாத கோவில்கள் சட்டத்திற்குப் புறம்பாக கட்டப்பட்டவை என்று கூறி, அவற்றை இடிப்பதற்கு நகர அரசு முயற்சிகள் மேற்கொள்ளக் கூடும் என்று, கத்தோலிக்கர்கள் கவலை தெரிவித்திருப்பதாக, UCAN செய்திக்குறிப்பொன்று கூறுகிறது. 400 ஆண்டுகள் பழமை வாய்ந்ததென கருதப்படும் மஹிம் கோவில், பெருநகர முன்னேற்ற திட்ட வரைவில் சரியாகக் குறிக்கப்படவில்லை என்று, இந்தப் போராட்டத்தை முன்னின்று நடத்திய ரீட்டா தாஸ் அவர்கள் UCAN செய்தியிடம் கூறினார்.

525,000 கத்தோலிக்கர்களைக் கொண்டுள்ள மும்பை உயர் மறைமாவட்டம், இந்தியாவிலேயே அதிக எண்ணிக்கையில் கத்தோலிக்கர்களைக் கொண்டது என்றும், இங்குள்ள கத்தோலிக்கர்களுக்கு பிரச்சனைகளைத் தரும் வகையில் பெரு நகர திட்டங்கள் வகுக்கப்படுகின்றன என்றும், மும்பை கத்தோலிக்கத் தலைவர், டால்பி டிசூசா (Dolphy D'Souza) அவர்கள் கூறினார்.

(ஆதாரம் : UCAN / வத்திக்கான் வானொலி) [2016-08-09 00:00:00]


குடியேற்றதாரர்களை வரவேற்கும் பங்களூரு உயர்மறைமாவட்டம்

இரக்கத்தின் சிறப்பு யூபிலி ஆண்டு நிகழ்வுகளின் ஒரு பகுதியாக, ஆப்ரிக்கக் குடியேற்றதாரர்களுடன், ஆன்மீகக் கூட்டம் ஒன்றை ஏற்பாடுச் செய்துள்ளது, பங்களூரு உயர் மறைமாவட்டம்.

பெரும்பான்மை ஆப்ரிக்க குடியேற்றதாரர்கள் பேசும் பிரெஞ்ச் மொழியிலேயே ஏற்பாடுச் செய்யப்பட்ட இந்த திருவழிபாட்டுச் சடங்குகள் குறித்து எடுத்துரைத்த பங்களூரு உயர்மறைமாவட்ட பேராயர் Bernard Moras அவர்கள், குடியேற்றதாரர்களை வரவேற்பதும், அவர்களின் தேவைகளுக்கு செவிமடுப்பதும், இரக்கத்தின் சிறப்பு யூபிலி ஆண்டின் முக்கியக் குறிக்கோள் என்றார்.

ஏழை நாடுகளிலிருந்து குடியேறியுள்ள மாணவர்களுக்கும், ஏழை மக்களுக்கும் உதவுவதற்கென பங்களூரு உயர்மறைமாவட்டம் பல்வேறு திட்டங்களை செயல்படுத்தி வருகிறது எனவும் கூறினார் பேராயர் Moras. இந்த உயர் மறைமாவட்டத்தில், குடியேற்றதாரர்களுக்கு என ஓர் அவை உருவாக்கப்பட்டுள்ளது, குறிப்பிடத்தக்கது.

(ஆதாரம் : வத்திக்கான் வானொலி) [2016-08-08 23:53:30]


கேரளாவில் கந்தமால் மறைசாட்சிகள் குறித்த ஆவணப்படம்

ஒடிசா மாநிலத்தின் கந்தமால் மாவட்டத்தில் மாவோயிஸ்ட்களுக்கு எதிரான நடவடிக்கையில் ஐந்து பேர் கொல்லப்பட்டுள்ளதற்கு கண்டனம் தெரிவித்துள்ளது தலத்திருஅவை. அரசின் இந்நடவடிக்கை குறித்து ஒடிசா தலத்திருஅவை சார்பில் அறிக்கை வெளியிட்டுள்ள, கட்டக்-புவனேஸ்வர் பேராயர் ஜான் பார்வா அவர்கள், இதில் பலியானவர்களின் குடும்பங்களுக்கு நீதி கிடைக்க வேண்டும் என்று வலியுறுத்தியுள்ளார்.

ஜூலை மாதம் 8ம் தேதி பாதுகாப்புப் படையினர் நடத்திய துப்பாக்கிச் சூட்டில், 2 வயது சிறுமி உட்பட 5 கிராமத்தவர் கொல்லப்பட்டனர் மற்றும் ஐந்து பேர் காயமடைந்தனர். மேலும், 2008ம் ஆண்டில் கந்தமால் மாவட்டத்தில், கிறிஸ்தவர்க்கெதிராக நடந்த வன்முறையில் உயிரிழந்த கிறிஸ்தவர்கள் பற்றிய ஆவணப்படம் ஒன்று, ஜூலை 17, ஞாயிறன்று திருச்சூரில் திரையிடப்பட்டது. “அழிவுகளிலிருந்து குரல்:நீதியைத் தேடி கந்தமால்” என்ற தலைப்பிலான 90 நிமிட ஆவணப்படத்தை, கே.பி.சாசி அவர்கள் இயக்கியுள்ளார். இது, ஜூலை 17, ஞாயிறு முதல், கேரளாவின் பல பகுதிகளில் திரையிடப்படுகிறது .

2008ம் ஆண்டில் கந்தமால் மாவட்டத்தில் இந்துத் தீவிரவாதிகள் நடத்திய வன்முறையில், 350க்கும் மேலான ஆலயங்களும், 6,500க்கும் அதிகமான வீடுகளும் அழிக்கப்பட்டன. மேலும், 56 ஆயிரத்துக்கு மேற்பட்ட மக்கள் புலம்பெயர்ந்தனர். 93க்கும் மேலான கிறிஸ்தவர்கள் இறந்தனர் மற்றும் 40க்கும் மேலான பெண்கள் பாலியல் வன்கொடுமைக்கு உள்ளானார்கள்.

(ஆதாரம் : India Today / வத்திக்கான் வானொலி) [2016-08-08 23:49:40]


இந்திய கத்தோலிக்கத் திருஅவையின் பன்மைத்தன்மைக்குப் பாராட்டு

இந்தியாவில், பன்மைத்தன்மையைக் கொண்டு செயல்பட்டுவரும் கத்தோலிக்கத் திருஅவையைப் பாராட்டியுள்ளார் அமெரிக்க ஐக்கிய நாட்டின் நியுயார்க் கர்தினால் திமோத்தி மைக்கிள் டோலன்.

கேரளாவுக்கு ஐந்து நாள் சுற்றுப்பயணம் மேற்கொண்டுள்ள கர்தினால் டோலன் அவர்கள், வன்முறை ஆதிக்கம் செலுத்தும் இக்காலத்தில், ஒற்றுமை என்ற விழுமியத்தை திருஅவை கொண்டிருப்பது ஊக்கமூட்டுவதாய் உள்ளது என்று கூறினார். இறையடியார் மார் இவான்யோஸ் அவர்கள் மரணமடைந்ததன் 63ம் ஆண்டு நிறைவோடு தொடர்புடைய நிகழ்ச்சி ஒன்றில் கலந்துகொண்ட கர்தினால் டோலன் அவர்கள் இவ்வாறு கூறினார். ஜாக்கபைட் கிறிஸ்தவ சபையிலிருந்து ஒரு குழுவினர், கத்தோலிக்கத் திருஅவையில் இணைவதற்கு உதவியவர் இறையடியார் மார் இவான்யோஸ்.

திருவனந்தபுரத்திலுள்ள கேரளாவின் சீரோ-மலங்கரா வழிபாட்டுமுறைத் திருஅவையின், புனித மரியா தலைமைப் பேராலயத்தில் கர்தினால் டோலன் அவர்களுடன், அத்திருஅவைத் தலைவர் கர்தினால் பசிலியோஸ் கிளீமிஸ், பத்து ஆயர்கள், இன்னும் ஏராளமான குருக்களும் இணைந்து கூட்டுத்திருப்பலி நிறைவேற்றினர். இந்திய கத்தோலிக்கத் திருஅவையில் இலத்தீன், சீரோ-மலபார், சீரோ-மலங்கரா ஆகிய மூன்று வழிபாட்டுமுறைகள் உள்ளன.

(ஆதாரம் : UCAN / வத்திக்கான் வானொலி) [2016-08-08 23:42:37]


உரையாடல் வழியாக தீர்க்கப்பட முடியாத விவகாரமே இல்லை

ஜம்மு-காஷ்மீர் மாநிலத்தில் இடம்பெறும் வன்முறைகள் நிறுத்தப்பட்டு, அமைதி காக்கப்படுமாறு இந்திய கத்தோலிக்க ஆயர்கள் அழைப்பு விடுத்துள்ளனர். ஜூலை மாதத்தில், புரட்சிக்குழுத் தலைவர் ஒருவர் சுட்டுக்கொல்லப்பட்டதையடுத்து வன்முறையுடன்கூடிய எதிர்ப்புகள் இடம்பெறுவதால் இவ்வாறு வேண்டுகோள் விடுத்துள்ளனர் ஆயர்கள்.

உரையாடல் வழியாக தீர்க்கப்பட முடியாத விவகாரமே உலகில் இல்லை என்றுரைத்துள்ள இந்திய ஆயர் பேரவையின் பொதுச்செயலர் ஆயர் தெயதோர் மஸ்கரேனஸ்(Theodore Mascarenhas) அவர்கள், வன்முறையிலிருந்து எந்த ஒரு தீர்வும் வெளிவராது என்றும் கூறியுள்ளார். ஜம்மு-காஷ்மீர் மாநிலத்தில், ஆயுத மோதல்களில் ஈடுபட்டுள்ள தரப்பினர் அனைவரும், உரையாடல் மற்றும் கலந்தாலோசனை வழியாக, பிரச்சனைகளுக்குத் தீர்வு காணுமாறு மேலும் கேட்டுள்ளார் ஆயர் மஸ்கரேனஸ்.

ஜம்மு-காஷ்மீர் மாநிலத்தில், ஜூலை மாதம் 8ம் தேதி இந்தியப் பாதுகாப்பு படைவீரர்களுக்கும், தீவிரவாதிகளுக்கும் இடையே நடந்த துப்பாக்கிச் சண்டையில், ஹிஸ்புல் முஜாஹிதீன் தளபதி அப்துல் புர்ஹன் வானி உள்பட தீவிரவாதிகள் மூன்று பேர் சுட்டுக்கொல்லப்பட்டனர். அப்துல் புர்ஹன் வானி, 15 வயதில் ஹிஸ்புல் முஜாஹிதீன் அமைப்பில் சேர்ந்து பல்வேறு தாக்குதல் சம்பவங்களுக்கு மூளையாகச் செயல்பட்டு வந்தார். இவர் அந்த அமைப்பின் தளபதியாக இருந்து வந்தார். சமூக வலைத்தளங்கள் மூலமாக படித்த இளைஞர்களை மூளைச்சலவை செய்து ஹிஸ்புல் அமைப்பிற்கு ஆள்சேர்த்தும் வந்தார் என்று கூறப்படுகிறது.

(ஆதாரம் : UCAN / வத்திக்கான் வானொலி) [2016-08-08 22:52:43]


அனைத்து மதங்களும் பங்குகொள்ளும் தேசிய கலந்துரையாடல் அவசியம்

மதத்தை அடிப்படையாகக் கொண்ட சட்டங்களை இரத்து செய்வதற்கு முன்னர், அனைத்து மதங்களையும் உள்ளடக்கிய, தேசிய அளவிலான ஒரு கலந்துரையாடல் அவசியம் என, இந்திய கத்தோலிக்க ஆயர்கள் கூறியுள்ளனர். இந்தியாவில் நடைமுறையில் இருந்துவரும் ஒவ்வொரு மதத்திற்கும் உரிய சட்டங்களுக்குப் பதிலாக, எல்லா மதத்தினருக்கும் பொதுவான ஒரு சட்டத்தை அமைப்பதற்கு, இந்திய சட்டக் குழுவை, பிரதமர் நரேந்திர மோடி அவர்கள் ஜூன் மாதத்தில் கேட்டுள்ளதையடுத்து இவ்வாறு கூறியுள்ளனர் கத்தோலிக்க ஆயர்கள்.

இது குறித்து அறிக்கை வெளியிட்டுள்ள இந்திய ஆயர் பேரவைத் தலைவர் கர்தினால் பசிலியோஸ் கிளீமிஸ் அவர்கள், இந்தியாவின் ஒற்றுமை, குறையற்ற முறையில் பாதுகாக்கப்பட வேண்டும் என்று குறிப்பிட்டுள்ளார். ஒரே பொதுவான சட்ட விதிமுறையைக் கொண்டுவருவது குறித்த அனைத்து விவாதங்களும், அரசியல் அமைப்பில் உறுதிசெய்யப்பட்டுள்ள சுதந்திரத்தின் அடிப்படையிலும், பல்வேறு மதத்தவரின் மத உணர்வுகளைப் புண்படுத்தாத வகையிலும் இடம்பெற வேண்டுமென்று கூறியுள்ளார் கர்தினால் கிளீமிஸ்.

திருமணம், திருமண முறிவு, சொத்துரிமை, தத்து எடுத்தல் போன்ற விவகாரங்களில், இந்து, இஸ்லாம், கிறிஸ்தவம் மற்றும் பார்சி மதத்தவர்க்கு வெவ்வேறு சட்டங்கள் உள்ளன. ஆனால், சீக்கியர்கள், புத்தர்கள் மற்றும் ஜைனர்கள், இந்துக்களுக்குரிய சட்டங்களைப் பின்பற்றுகின்றனர். இந்தியாவில் அனைத்து குடிமக்களும், எந்த மதத்தையும் அறிக்கையிட்டு, அதனைப் பரப்புவதற்கு அரசியல் அமைப்பு அனுமதிக்கின்றது என்றும், இந்த அடிப்படை சுதந்திரத்தை எந்தச் சட்டமும் நீக்க முடியாது என்றும் கூறியுள்ளார் கர்தினால் கிளீமிஸ்.

ஆதாரம் : UCAN / வத்திக்கான் வானொலி [2016-08-08 22:39:26]


உலக இளையோர் தினத்திற்குப் புறப்படும் இந்திய இளையோர்

இந்தியாவிலிருந்து ஏறக்குறைய 150 இளம் கத்தோலிக்கர், கிராக்கோவ் உலக இளையோர் தினத்தில் கலந்துகொள்வதற்குத் தயாராகி வருகின்றனர் என்று, UCA செய்தி நிறுவனம் கூறியது. இந்திய இளையோரின் இப்பயணம் பற்றிக் கூறிய Shradha Kujur அவர்கள், இந்த உலக இளையோர் தினம் தொடங்குவதற்கு முன்னர் நடைபெறும் ஐந்து நாள் கலாச்சாரப் பரிமாற்ற நிகழ்வு, பல்வேறு கலாச்சாரங்கள் மற்றும் வழிபாடுகள் குறித்த அறிவை விரிவாக்க உதவும் என்ற நம்பிக்கையைத் தெரிவித்தார்.

இந்திய கத்தோலிக்க ஆயர் பேரவையின் இளையோர் பணிக்குழுவின் ஏற்பாட்டால் கிராக்கோவ் செல்லும் குழுவில், நூறு இளையோர், ஐம்பது ஒருங்கிணைப்பாளர்கள் மற்றும் ஓர் ஆயர் என, 151 பேர் உள்ளனர். போலந்து செல்லும் இந்திய இளையோர், இந்த விழா நாள்களில், கிராக்கோவ் நகர் குடும்பங்களில் விருந்தினர்களாகத் தங்குவார்கள் என்றும், அந்நாள்களில் இந்தியக் கிறிஸ்தவப் பண்பை வெளிப்படுத்த முயற்சிப்பார்கள் என்றும் Kujur கூறினார். புனித திருத்தந்தை 2ம் ஜான் பால் அவர்களால், 1985ம் ஆண்டில் உலக இளையோர் தினம் உருவாக்கப்பட்டது.

(ஆதாரம் : UCAN /வத்திக்கான் வானொலி) [2016-08-08 22:34:54]


அமைதிப் பாலம் கட்டும் அவசியமானப் பணி - கர்தினால் கிரேசியஸ்

ஆசிய நாடுகளில் வாழும் அனைத்து மதத் தலைவர்களும் அமைதிப் பாலங்களைக் கட்டும் அவசியமானப் பணியில் ஈடுபடவேண்டும் என்று, கர்தினால் ஆசுவால்ட் கிரேசியஸ் அவர்கள் அழைப்பு விடுத்துள்ளார். ஆசிய ஆயர் பேரவைகளின் தலைவரும், மும்பை பேராயருமான கர்தினால் கிரேசியஸ் அவர்கள், இரமதான் மாத நோன்பினை நிறைவேற்றியுள்ள இஸ்லாமிய சமுதாயத்திற்கு, தன் வாழ்த்துக்களைத் தெரிவித்த வேளையில், இந்த அழைப்பினை விடுத்துள்ளார்.

பங்களாதேஷின் டாக்கா நகரில் நடைபெற்ற படுகொலையில் இறந்தோர், மற்றும் அவர்களது உறவினர்களை எண்ணி, ஆசியத் திருஅவை கண்ணீர் வடிக்கிறது என்று கூறிய கர்தினால் கிரேசியஸ் அவர்கள், வன்முறைகள் பெருகி வரும் இவ்வுலகில், இறைவனின் அளவற்ற இரக்கத்தில் நம்பிக்கை வைக்க நாம் அழைக்கப்பட்டுள்ளோம் என்று, தன் செய்தியில் குறிப்பிட்டுள்ளார்.

இஸ்லாமிய மதத்தைச் சார்ந்தவர்கள், ஆசியாவில் அதிக அளவில் உள்ளனர் என்பதைச் சுட்டிக்காட்டிய கர்தினால் கிரேசியஸ் அவர்கள், அமைதியை விரும்பும் ஆசிய மக்கள், உறவுப் பாலங்களைக் கட்டுவதில் தீவிர முயற்சிகள் மேற்கொள்ளவேண்டும் என்று கேட்டுக்கொண்டார்.

(ஆதாரம் : AsiaNews / வத்திக்கான் வானொலி) [2016-08-08 22:30:31]