வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



புனித அன்னை தெரேசாவைப் பற்றி, பூனே ஆயர் தாமஸ் தாப்ரே

மதம் என்பது, கண்களுக்குத் தெரியாத ஒரு கருத்து அல்ல, அது, நம்பிக்கையின் விளைவாக, கண்கூடாக வெளிப்படும் செயல்களில் அடங்கியுள்ளது என்பதை, புனித அன்னை தெரேசா உணர்த்திச் சென்றார் என்று, பூனே ஆயர் தாமஸ் தாப்ரே (Thomas Dabre) அவர்கள் கூறினார்.

ஏறத்தாழ 60 ஆண்டுகள் இந்தியாவில் பணியாற்றி, தன்னை ஓர் இந்தியராகவே மாற்றிக்கொண்ட அன்னை தெரேசா அவர்களைச் சந்தித்த அனைவரும், ஏதோ ஒருவகையில் பாதிக்கப்பட்டுள்ளனர் என்று கூறிய ஆயர் தாப்ரே அவர்கள், தான் இப்புனிதரைச் சந்தித்த நிகழ்வையும் நினைவுகூர்ந்தார். பாரத இரத்னா, அமைதியின் நொபெல் பரிசு போன்ற பல உயரிய விருதுகளைப் பெற்றிருந்தாலும், எளிமையின் ஓர் இலக்கணமாக வாழ்ந்த புனித அன்னை தெரேசாவிடமிருந்து நாம் கற்றுக்கொள்ள வேண்டிய பாடங்கள் பல உள்ளன என்று, ஆயர் தாப்ரே அவர்கள், எடுத்துரைத்தார்.

அவரது பணியின் வழியாக மக்களை மதமாற்றம் செய்தார் என்ற தவறான செய்திகளை பரப்பி வரும் அரசியல்வாதிகளுக்கு பதில் தரும் வகையில், பல்சமய உரையாடல் என்ற உயரிய விழுமியத்திற்கு அவர் ஒரு நடைமுறை எடுத்துக்காட்டாக விளங்கினார் என்று ஆயர் தாப்ரே அவர்கள், வலியுறுத்திக் கூறினார்.

(ஆதாரம் : AsiaNews / வத்திக்கான் வானொலி) [2016-11-01 20:23:08]


புனித அன்னை தெரேசா குறித்த ஒரிசா முதல்வரின் புகழஞ்சலி

அன்னை தெரேசாவின் இரக்கம் எனும் புத்தகத்தின் பக்கங்களை திறந்து, மனிதர் ஒவ்வொருவரின் மாண்புக்காக ஒன்றிணைந்து உழைக்கவேண்டியதைக் கற்றுக் கொள்ளவேண்டும் என அழைப்பு விடுத்தார், ஒரிசா முதல்வர், நவீன் பட்நாயக்.

அன்னை தெரேசா புனிதராக அறிவிக்கப்பட்ட அதே நாளில், புபனேஸ்வரின் பேராயர் இல்லத்திற்கு முன்னே உள்ள சாலையை, புனித அன்னை தெரேசா சாலை என பெயரிட்டு திறந்து வைத்த முதல்வர் பட்நாயக் அவர்கள், 1929ம் ஆண்டு இந்தியாவிற்கு வந்த இந்த அல்பேனிய துறவி அன்னை தெரேசா அவர்கள், ஏழைகளுக்கும், உதவித் தேவைப்படுவோருக்கும், மரணத் தறுவாயில் இருப்போருக்கும் உதவி செய்யும் நோக்கத்துடன் இந்தியாவைத் தேர்ந்துகொண்டார் என்றுரைத்தார்.

இதே நிகழ்ச்சியில் உரையாற்றிய கட்டாக் புபனேஸ்வர் பேராயர் ஜான் பார்வா அவர்கள், புனித அன்னை தெரேசாவின் வாழ்வுச் சம்பவங்கள் பலவற்றை எடுத்துரைத்ததுடன், இக்காலத்தை அன்னை தெரேசாவின் நூற்றாண்டு என குறிப்பிட்டார். கிறிஸ்தவர்கள் மீது பெருமளவான தாக்குதல்களை சந்தித்துள்ள ஒரிசா மாநிலத்தில் அன்னை தெரேசாவின் பிறரன்பு மறைப்பணியாளர்கள் துறவு சபை சகோதரிகள், உதவித் தேவைப்படும் மக்களுக்கென 18 பிறரன்பு இல்லங்கள் வழியாக சேவையாற்றி வருகின்றனர்.

(ஆதாரம் : AsiaNews / வத்திக்கான் வானொலி) [2016-11-01 20:19:30]


அனைத்துத் துறையினராலும் அங்கீகரிக்கப்பட்டவர் அன்னை தெரேசா

நொபெல் அமைதி விருது வழியாக உலக சமுதாயத்தாலும், பாரத ரத்னா விருது மூலம் இந்திய அரசாலும் கௌரவிக்கப்பட்டுள்ள அன்னை தெரேசா, தற்போது தன் விசுவாசத்திற்காக புனிதராக உயர்த்தப்பட்டுள்ளது, அனைத்துத் துறையிலும் அவர் அங்கீகரிக்கப்பட்டுள்ளதை காட்டுவதாக உள்ளது என்றார், இந்திய ஆயர் பேரவைத் தலைவர், கர்தினால் பசிலியோஸ் கிளீமிஸ்.

அன்னை தெரேசாவின் சமூகப் பணிகளில் நம்பிக்கைக் கொண்டோருக்கும், அவரின் விசுவாச வாழ்வில் நம்பிக்கைக் கொண்டோருக்கும் இந்த புனிதர் பட்டமளிப்பு, முக்கியத்துவம் நிறைந்த ஒன்று என CNA செய்தி நிறுவனத்திற்கு வழங்கிய பேட்டியில் எடுத்துரைத்த கர்தினால் கிளீமிஸ் அவர்கள், புனித அன்னை தெரேசா, ஏழைகளுக்குப் பணிபுரிவதோடு தன் சேவையை நிறுத்திவிடவில்லை, மாறாக, ஏழைகளுக்கு ஆற்றவேண்டியப் பணியில் ஒவ்வொருவரின் பங்களிப்பையும் வலியுறுத்தினார் என்று கூறினார். அன்னையின் கைகளில், ஆயுதங்களை விட வலிமையான ஒரு கருவியை அனைவரும் பார்த்தனர், அதுவே இறைவனின் அன்பும் கருணையும் எனவும் கூறினார் கர்தினால் கிளீமிஸ்.

புனித அன்னை தெரேசா பராமரித்த ஏழைகளிலும் நோயாளிகளிலும், அவர், மதம், இனம், மொழி என எந்த பாகுபாட்டையும் காணவில்லை என்ற கர்தினால், அதே செய்தியுடனேயே இன்றும் திருஅவை இந்தியாவில் தன் பணிகளைத் தொடர்ந்து ஆற்றுகின்றது என்று கூறினார். இரக்கம் என்பது நம் அனைவரையும் ஒன்றிணைத்துக் கொண்டு வருகிறது, ஏனெனில் இரக்கம் தேவைப்படாத மனிதர் என்று எவரும் இல்லை, இறைவனின் கொடையாகிய இரக்கமே நம் ஒவ்வொருவரையும் ஆறுதல்படுத்தி நமக்குப் பலத்தை வழங்குகிறது என மேலும் கூறினார் இந்திய ஆயர் பேரவைத் தலைவர், கர்தினால் கிளீமிஸ்.

(ஆதாரம் : CNA /வத்திக்கான் வானொலி) [2016-11-01 20:13:03]


இரக்கத்தின் மறுஉருவமாக அன்னை தெரேசா

திருத்தந்தை பிரான்சிஸ் அவர்கள், இரக்கத்தின் யூபிலி ஆண்டை அறிவித்ததற்கும், அன்னை தெரேசா அவர்களை, இரக்கத்தின் மறுஉருவமாகத் தேர்ந்தெடுத்திருப்பதற்கும் கடவுளுக்கும், திருத்தந்தைக்கும் நன்றி தெரிவிக்கிறோம் என்று, அருள்சகோதரி பிரேமா அவர்கள் கூறினார்.

ஒவ்வொரு மனிதரையும், குறிப்பாக, ஏழைகளையும், மிகவும் நம்பிக்கையிழந்து வாழ்பவர்களையும், இரக்கத்தின் அருள் சென்றடையும் என்று தங்கள் சபையினர் நம்புவதாகத் தெரிவித்தார் அருள்சகோதரி பிரேமா. உலகில், துன்பங்கள், அவமானப்படுத்தல், ஒதுக்கப்படுதல் ஆகியவை இருக்கும்வரை, அன்னை தெரேசாவின் செய்தியும், பணியும், முழுவதும் பிரசன்னமாக இருக்கும் என்றும் கூறினார் அருள்சகோதரி பிரேமா.

அருள்சகோதரி பிரேமா அவர்கள் வெளியிட்டுள்ள விபரங்களின்படி, அச்சபையின் 5,161 அருள்சகோதரிகள், 139 நாடுகளில், 758 இல்லங்களை நடத்துகின்றனர். மேலும், அன்னை தெரேசா தொடங்கிய பிறரன்பு சகோதரர்கள் சபையில், 397 அருள்பணியாளர்கள் உள்ளனர். இவர்கள் 29 நாடுகளில் 69 இல்லங்களில் பணியாற்றுகின்றனர். 63 வயது நிரம்பிய அருள்சகோதரி பிரேமா, ஜெர்மனி நாட்டைச் சேர்ந்தவர்.

(ஆதாரம் : Fides / வத்திக்கான் வானொலி) [2016-11-01 20:07:31]


அன்னை தெரேசா பற்றிய கருத்தரங்கிற்கு திருத்தந்தை செய்தி

அன்னை தெரேசா அவர்களின் எடுத்துக்காட்டான வாழ்வு, கிறிஸ்துவை மையமாக வைத்து வாழ்வதற்கு நமக்கு உதவுவதாக என்று, அன்னை தெரேசா பற்றிய ஒரு கருத்தரங்கிற்கு அனுப்பிய தந்திச் செய்தியில் கூறியுள்ளார் திருத்தந்தை பிரான்சிஸ்.

“அன்னை தெரேசா: ஆசியாவுக்கும், உலகுக்கும் இரக்கம்” என்ற தலைப்பில், ஆசியச் செய்தி நிறுவனம், உரோம் உர்பானியானம் பாப்பிறை பல்கலைகழகத்தில் நடத்திய கருத்தரங்கிற்கு, திருத்தந்தையின் பெயரில், திருப்பீடச் செயலர் கர்தினால் பியெத்ரோ பரோலின் அவர்கள் அனுப்பிய செய்தியில் இவ்வாறு கூறப்பட்டுள்ளது. கிறிஸ்துவை நம் வாழ்வில் மையமாக வைப்பதற்கும், இரக்கத்தின் பணிகளைத் தொடர்ந்து ஆற்றுவதில், சுதந்திரமாக நற்செய்தியை வாழ்வதற்கும், உண்மையின் ஒளியால் தூண்டப்பட்டு, நல்லதோர் உலகை அமைப்பவர்களாக மாறுவதற்கும், அன்னை தெரேசா அவர்களின் எடுத்துக்காட்டான வாழ்வு, நமக்கு உதவுவதாக என்றும், அச்செய்தி கூறுகிறது.

(ஆதாரம் : வத்திக்கான் வானொலி) [2016-11-01 19:57:59]


இளையோரில் பரவியுள்ள வன்முறையைப் புரிந்துகொள்ள அழைப்பு

ஜம்மு-காஷ்மீர் மாநிலத்தில் ஏற்பட்டுள்ள பதட்டநிலைகளையும், இவை இளையோர் மத்தியில் பரவியுள்ள முறையையும் இந்திய அரசு புரிந்துகொள்ளுமாறு, சமயத் தலைவர்கள் வலியுறுத்தியுள்ளனர்.

டெல்லி பேராயர் அனில் கூட்டோ உட்பட, இந்து, முஸ்லிம் மற்றும் கிறிஸ்தவ சமூகங்களின் ஏறத்தாழ ஐம்பது தலைவர்கள் புதுடெல்லியில் இவ்வாரத்தில் நடத்திய கூட்டத்தில் இவ்வாறு கேட்டுள்ளனர். சமய நல்லிணக்கம் மற்றும் உலகளாவிய அமைதி நிறுவனம் நடத்திய இக்கூட்டத்தில் உரையாற்றிய பேராயர் அனில் கூட்டோ அவர்கள், இளையோர் தங்களை, வன்முறைச் செயல்களுக்கு அர்ப்பணித்திருப்பதன் உண்மையான காரணம் கண்டுபிடிக்கப்பட வேண்டும் என்றார்.

உலகளாவிய அமைதிக்காகத் தங்களை அர்ப்பணித்திருக்கின்ற இந்தச் சமயத் தலைவர்கள் குழுவில் ஒருவரான பேராயர் அனில் கூட்டோ அவர்கள், நாட்டில் அமைதியைக் கொண்டு வருவதற்கு, அரசுக்கும் மக்களுக்கும் இடையே பாலமாக, சமயத் தலைவர்கள் செயல்பட வேண்டும் என்றும் கூறினார். முஸ்லிம்கள் பெரும்பான்மையாக வாழும் ஜம்மு-காஷ்மீரில், பிரிவினைவாத புரட்சிக்குழுத் தலைவர் புர்கான் வானி அவர்கள், கடந்த ஜூலை 8ம் தேதி கொல்லப்பட்டார். இதையொட்டி இடம்பெற்ற வன்முறையில் குறைந்தது 75 பேர் இறந்துள்ளனர் மற்றும் பத்தாயிரம் பேர் காயமடைந்துள்ளனர். இவ்வன்முறையை முன்னிட்டு, விதிக்கப்பட்ட 51 நாள் ஊரடங்குச் சட்டம், ஆகஸ்ட் 30ம் தேதி நீக்கப்பட்டுள்ளது.

(ஆதாரம் : UCAN / வத்திக்கான் வானொலி) [2016-11-01 19:49:20]


வாடகைத் தாய்முறை புதிய மசோதா ஏற்றுக்கொள்ள முடியாதது

இந்தியாவில் வெளியாகியுள்ள வாடகைத் தாய்முறை பற்றிய புதிய மசோதா, மனிதக் கருவின் மாண்பை மதிக்கவில்லை என்று சொல்லி, இந்த மசோதாவை, கத்தோலிக்க திருஅவையால் ஏற்றுக்கொள்ள முடியாது என்று, இந்திய தலத்திருஅவை அதிகாரி ஒருவர் கூறினார்.

இந்திய மத்திய அமைச்சரவை ஒப்புதல் அளித்துள்ள, வாடகைத் தாய்முறை புதிய மசோதா பற்றி, ஆசியச் செய்தி நிறுவனத்திடம் பேசிய, இந்திய மேற்குப் பகுதி ஆயர் பேரவையின் குடும்ப ஆணையத்தின் தலைவரும், மும்பை துணை ஆயருமான ஆயர் சாவியோ ஃபெர்னான்டஸ் அவர்கள் இவ்வாறு தெரிவித்தார்.

தங்களால் குழந்தை பெற்றுக்கொள்ள முடியாது என்ற நிலையிலுள்ள தம்பதியரின் வேதனைகளையும், துன்பங்களையும் கத்தோலிக்க திருஅவை, மிக நன்றாகவே அறிந்துள்ளது என்றும், இதற்கு வாடகைத் தாய்முறை நல்ல தீர்வு அல்ல என்றும் கூறினார் ஆயர் சாவியோ ஃபெர்னான்டஸ். இந்தியாவில் ஆயிரக்கணக்கான கைவிடப்பட்ட சிறார் உள்ளனர், இவர்களைத் தத்து எடுப்பது, நல்ல தீர்வாக அமையும் என்றும் கூறிய ஆயர், இச்சிறார்க்கு மறுக்கப்பட்ட அன்பு, மாண்பு மற்றும் மதிப்பை இதன் வழியாகக் கொடுக்கலாம் என்றும் கூறினார்.

குழந்தைப்பேறு இல்லாத தம்பதிகள், திருமணமாகி ஐந்தாண்டுகள் ஆகியும் குழந்தைப் பேறு இல்லாதவர்கள் ஆகியோர் மட்டுமே வாடகைத்தாய் மூலம் குழந்தை பெறலாம். அதுவும், நெருங்கிய உறவினர் மூலமாகவே வாடகைத்தாய் முறையில் குழந்தை பெறலாம் என்பதற்கு, இப்புதிய மசோதா வழி அமைக்கிறது.
(ஆதாரம் : AsiaNews / வத்திக்கான் வானொலி) [2016-11-01 19:43:44]


புவனேஸ்வரில், அன்னை தெரேசா பெயரில் சாலை

அன்னை தெரேசா அவர்கள், வத்திக்கான் தூய பேதுரு வளாகத்தில் புனிதராக அறிவிக்கப்படும் செப்டம்பர் 4ம் தேதியன்று, இந்தியாவின் ஒடிசா மாநிலத் தலைநகர் கட்டக்-புவனேஸ்வரில், சாலை ஒன்றுக்கு, அன்னை தெரேசா சாலை எனப் பெயரிடப்படும் என்று அறிவிக்கப்பட்டுள்ளது.

கட்டக்-புவனேஸ்வர் பேராயர் ஜான் பார்வா அவர்களின் வேண்டுகோளின்பேரில், புவனேஸ்வர் மாநகராட்சி, இத்தீர்மானத்தை அறிவித்திருப்பதாக ஆசியச் செய்தி நிறுவனம் கூறியது. புவனேஸ்வர் மாநகராட்சியின் இத்தீர்மானம் குறித்துப் பேசிய பேராயர் பார்வா அவர்கள், எட்டு ஆண்டுகளுக்கு முன்னர், இந்துத் தீவிரவாதிகளால் கிறிஸ்தவர்க்கெதிரான படுகொலைகள் நடத்தப்பட்ட ஒடிசா மாநிலத்தில் இவ்வாறு பெயரிடப்படுவது மிகுந்த மகிழ்ச்சி தருவதாகத் தெரிவித்தார்.

சத்யாநகர் கட்டக்கிலிருந்து பூரி செல்லும் சாலைக்கு, அன்னை தெரேசா சாலை எனப் பெயரிடப்படவுள்ளது. செப்டம்பர் 4ம் தேதியன்று விழாத் திருப்பலிக்குப் பின்னர் இடம்பெறும் பொது நிகழ்வில், ஒடிசா முதலமைச்சர் நவீன் பட்நாயக் அவர்கள், கலந்துகொண்டு, இந்தச் சாலைக்குரிய, புதிய பெயர்ப் பலகையைத் திறந்து வைப்பார் என்றும், பேராயர் பார்வா அவர்கள் கூறினார். ஒடிசா மாநிலத்தில் அன்னை தெரேசா சபையினர் 11 இல்லங்களை நடத்துகின்றனர்.

(ஆதாரம் : AsiaNews / வத்திக்கான் வானொலி) [2016-10-22 14:25:36]


அன்னை தெரேசா முற்றிலுமாக ஓர் இந்தியப் புனிதர்

அன்னை தெரேசா அவர்களின் புனிதர்பட்ட நிகழ்வு, இந்தியாவுக்கு மிகவும் முக்கியமான நிகழ்வு என்றும், இந்நிகழ்வுக்கு இந்திய அரசு ஆதரவு வழங்குவது மகிழ்ச்சி தருகின்றது என்றும், இந்திய கத்தோலிக்க ஆயர்கள் கூறியுள்ளனர்.

வத்திக்கானில் நடைபெறும் இந்நிகழ்வு, உலகுக்கு, குறிப்பாக, இந்தியர்களுக்கு, ஒரு முக்கியமான நாள் என்றும், அல்பேனியாவிலிருந்து இந்தியா வந்து, இனம், மதம், மொழி ஆகியவற்றைக் கடந்து, ஒதுக்குப்புறங்களில் வாழும் இலட்சக்கணக்கான மக்களுக்கு நற்செய்தியின் விழுமியங்களை அன்னை விதைத்தார் என்றும், அன்னை தெரேசா முற்றிலுமாக ஓர் இந்தியப் புனிதர் என்றும் இந்திய ஆயர் பேரவைச் செயலர் ஆயர் தெயதோர் மஸ்கரெனாஸ் அவர்கள் கூறினார்.

அன்னை தெரேசா, நம் புனிதர் என, பெரும்பாலான இந்தியர்கள் நினைக்கின்றனர் என, இந்தியப் பிரதமர் நரேந்திர மோடி அவர்கள் கூறியுள்ளார் என்றும் உரைத்த ஆயர் மஸ்கரெனாஸ் அவர்கள், அன்னையின் ஏழ்மை மற்றும் தாழ்மையால், இந்தியர்கள் செல்வந்தர்களானோம் என்றும் தெரிவித்தார். மேலும், டெல்லி பேராயர் அனில் கூட்டோ அவர்கள் கூறுகையில், அன்னை தெரேசாவுக்குப் புனிதர் பட்டத்தை இறைவனே வழங்குகிறார், திருஅவை மற்றும் இறைமக்கள் சார்பாக, திருத்தந்தை இதை நடத்துகிறார் என்றார்.

(ஆதாரம் : Fides / வத்திக்கான் வானொலி) [2016-10-22 14:08:52]


இந்திய கிறிஸ்தவர்கள் ஒன்றிணைந்து குரல் எழுப்ப அழைப்பு

இந்தியாவில் கிறிஸ்தவர்கள் தொடர்ந்து தாக்கப்பட்டுவருவது குறித்த விழிப்புணர்வை மக்களில் ஏற்படுத்தும் நோக்கில், அக்டோபர் மாதம் முதல் தேதியன்று, நாடு முழுவதும் அமைதிப் போராட்டம் ஒன்றை நடத்த இந்திய கிறிஸ்தவ சபைகள் இணைந்து முடிவெடுத்துள்ளன.

சிறுபான்மை சமுதாயத்திடம் அச்சத்தை உருவாக்க சில சமூக விரோதக் குழுக்கள் மேற்கொண்டுவரும் நடவடிக்கைகளுக்கு எதிர்ப்பு தெரிவிக்கும் விதமாக, இந்த அமைதி போராட்டம் இடம்பெறும் எனவும் அறிவிக்கப்பட்டுள்ளது. கிறிஸ்தவர்கள் கொடுமைப்படுத்தப்படல், பாகுபாட்டுடன் நடத்தப்படல், என்பனவற்றை எதிர்த்து இந்தியாவின் அனைத்து கிறிஸ்தவ சமூகங்களும் அந்நாளில் ஒன்றிணைந்து தங்கள் குரலை எழுப்புவர் என தெரிவிக்கப்பட்டுள்ளது.

மக்களை மதமாற்ற முயல்கிறார்கள் என்ற பொய்யானக் குற்றச்சாட்டின் அடிப்படையில் கிறிஸ்தவர்கள் தாக்கப்படுவதாக உரைத்த அனைத்திந்திய கிறிஸ்தவ சிறுபான்மை முன்னணியின் தலைவர் பிலிப் கிறிஸ்டி அவர்கள், 2014ல் பாரதிய ஜனதா கட்சி ஆட்சிக்கு வந்ததிலிருந்து, கிறிஸ்தவர்கள் மீதான தாக்குதல்கள் அதிகரித்துள்ளதாகத் தெரிவித்தார்.

2014ம் ஆண்டில் மட்டும் இந்தியாவில், 5 கிறிஸ்தவர்கள் கொல்லப்பட்டுள்ளனர், ஏறத்தாழ 5000பேர் சித்ரவதைகளை அனுபவித்துன்னர். இது தவிர ஏறத்தாழ 2இலட்சத்து 73 ஆயிரம் சிறுபான்மை மதத்தவர், தாய் மதம் திரும்புதல் என்ற திட்டத்தின் கீழ் உத்தரபிரதேசத்தில் இந்துக்களாக மதமாற்றம் செய்யப்பட்டுள்ளனர்.

(ஆதாரம் : UCAN/வத்திக்கான் வானொலி) [2016-09-01 23:21:56]