வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



மாதத்தின் முதல் நாள் அமைதிக்காக கிறிஸ்தவ ஒன்றிப்பு செபம்

ஒவ்வொரு மாதத்தின் முதல் நாளன்று, அனைத்துக் கிறிஸ்தவ சபைகளும், அமைதி மற்றும், நல்லிணக்கத்திற்காக சிறப்பு செபம் செய்யலாம் எனப் பரிந்துரைத்துள்ளார், இந்திய தலத்திருஅவை அதிகாரி ஒருவர்.

அஸ்ஸாம் மாநிலத்தின், குவாஹாட்டியின் முன்னாள் பேராயராகிய, தாமஸ் மெனாம்பரம்பில் அவர்கள், தங்கள் சமூகங்களுக்குள் அமைதி மற்றும், நல்லிணக்கம் ஏற்படுவதற்காக, ஒவ்வொரு மாதத்தின் முதல் நாளன்று, அனைத்துக் கிறிஸ்தவ சபைகளும், சிறப்பு செபம் செய்யலாம் எனச் சொல்லி, அதற்குரிய செபம் ஒன்றையும் எழுதியுள்ளார். பேராயர் மெனாம்பரம்பில் அவர்களின் இந்தப் பரிந்துரையை, வடகிழக்கு இந்திய கிறிஸ்தவ ஒன்றிப்பு அமைப்பு வரவேற்றுள்ளதென, ஆசியச் செய்தி கூறுகிறது.

இந்தியாவில், அமைதியற்றநிலை அதிகம் காணப்படும் பகுதிகளில் ஒன்றாகிய, வட கிழக்குப் பகுதியில், பதட்டநிலைகளைக் குறைத்து, அப்பகுதி மக்கள், சமாதானத்துடனும், நல்லிணக்கத்துடனும் வாழ்வற்கு உதவும் ஒரு முயற்சியாக, இந்தப் பரிந்துரையை அனைத்துக் கிறிஸ்தவ சபைகளுக்கும் சமர்ப்பித்துள்ளார், ஓய்வுபெற்றுள்ள பேராயர் மெனாம்பரம்பில். இந்தச் செப முயற்சி, ஆகஸ்ட் மாதத்திலிருந்து, ஒவ்வொரு மாதமும், முதல் நாளன்று கடைப்பிடிக்கப்படும். இதனைத் தனியாகவும், நண்பர்கள் குழுவாகவும் செய்யலாம் எனவும், துறவறக் குழுமங்கள், பள்ளிகள், ஆலயங்கள், நிறுவனங்கள் என, எல்லா இடங்களிலும் இச்செபம் செய்வதற்கு அழைப்பு விடுக்கப்பட்டுள்ளது எனவும், ஆசியச் செய்தி கூறுகிறது.

(ஆதாரம் : AsiaNews /வத்திக்கான் வானொலி) [2017-08-06 10:54:17]


போபால் அருள் சகோதரி மீது பொய்யான குற்றச்சாட்டு

தகுந்த காரணம் ஏதுமின்றி, மத்தியப் பிரதேசத்தில், அருள் சகோதரி ஒருவர் காவல் துறையினரால் கைது செய்யப்பட்டதற்கு, போபால் உயர் மறைமாவட்ட கத்தோலிக்கர்கள் தங்கள் வன்மையான கண்டனத்தை வெளியிட்டுள்ளனர்.

கார்மேல் சபையைச் சேர்ந்த அருள் சகோதரி, பீனா ஜோசப் அவர்கள், பழங்குடியைச் சேர்ந்த நான்கு பெண்களுடன் இரயிலில் பயணம் செய்த வேளையில், தடுத்து நிறுத்தப்பட்டு, 12 மணிநேரம் காவலில் வைக்கப்பட்டார் என்று ஆசிய செய்தி கூறுகிறது. அருள் சகோதரி பீனா ஜோசப் அவர்கள், மதம் மாற்றும் முயற்சியில் ஈடுபட்டார் என்ற, பொய்யான குற்றச்சாட்டு சுமத்தப்பட்டு, காவலில் வைக்கப்பட்டதற்கு, போபால் உயர் மறைமாவட்டம் தன் கண்டனத்தை வெளியிட்டுள்ளது.

இந்து அடிப்படைவாதக் குழுவான விஷ்வ இந்து பரிஷத்தின் தூண்டுதலால் இத்தகைய நடவடிக்கையை அரசு அதிகாரிகள் மேற்கொண்டனர் என்றும், இத்தகையத் துன்பங்கள் அண்மைய மாதங்களில் அடிக்கடி நிகழ்ந்துவந்தாலும், பழங்குடியினரிடையே தங்கள் பணி தொடரும் என்றும் கார்மேல் சபை துணைத் தலைவி, அருள் சகோதரி திருப்தி அவர்கள் ஆசிய செய்தியிடம் கூறினார்.

(ஆதாரம் : AsiaNews / வத்திக்கான் வானொலி) [2017-08-06 10:41:51]


இயேசுவை அவமதிக்கும் குஜராத் பாடப் புத்தகம்

குஜராத் மாநில கல்வித்துறை வெளியிட்டுள்ள மேல்நிலைப்பள்ளிக்கான பாடப் புத்தகம் ஒன்றில் இயேசு, சாத்தான் என்ற அடைமொழியுடன் குறிப்பிடப்பட்டிருப்பது குறித்து, இந்திய கிறிஸ்தவர்கள் தங்கள் எதிர்ப்பை வெளியிட்டுள்ளனர்.

'இந்திய கலாச்சாரத்தில் ஒரு குருவுக்கும் அவரின் சீடர்களுக்கும் இடையே நிலவும் உறவு' என்ற தலைப்பில் வெளியிடப்பட்டுள்ள, அரசு மேல்நிலைப்பள்ளி பாடப்புத்தகத்தின் 16ம் பிரிவில், 'சாத்தானாகிய இயேசுவின் வாழ்வில் நடந்த ஒரு நிகழ்வு நினைவுக்கு வருகிறது' என்ற கூற்று இடம்பெற்றுள்ளது. இத்தவறை சுட்டிக்காட்டிய வழக்குரைஞர் சுப்பிரமணியம் அய்யர் அவர்கள், சமூகக் குழுக்களிடையே தவறான மத உணர்வுகளைத் தூண்டி, சட்டம், ஒழுங்கு, சீர்குலைய காரணமாகும் இத்தகைய நடவடிக்கைகளுக்கு எதிராக, இந்திய தண்டனைச் சட்டப்பிரிவு 295 ஐ பயன்படுத்தலாம் என்றதுடன், இந்தப் புத்தகங்கள் அரசால் திரும்பப் பெறவேண்டும் என விண்ணப்பித்தார்.

அரசின் இத்தவறு குறித்து கருத்துக்களை வெளியிட்ட மனித உரிமை நடவடிக்கையாளர், இயேசு சபை அருள்பணியாளர் செட்ரிக் பிரகாஷ் அவர்கள், இந்தியக் குழந்தைகளின் வருங்காலத்தையும், குண நலன்களையும், வடிவமைப்பதில், முக்கியப் பங்காற்றவேண்டிய கல்வித்துறையினர், இத்தகைய நடவடிக்கைகளில் ஈடுபடுவது, கவலை தருவதாக உள்ளது என்றார். சிறும்பான்மையினர், தலித் சமூகத்தினர், பழங்குடியினர் என, மக்களை தரம் பிரித்து ஒழிப்பதில், பலர், எவ்வித தயக்கமும் காட்டுவதில்லை எனவும் கூறினார், அருள்பணி பிரகாஷ்.

(ஆதாரம் : Fides/வத்திக்கான் வானொலி) [2017-08-06 10:35:54]


பாத்திமா அன்னைக்கென, ஆசியாவில் அமைக்கப்பட்ட முதல் திருத்தலம்

பாத்திமா அன்னையின் நூற்றாண்டு விழாவையொட்டி, தமிழ் நாட்டின் பாளையங்கோட்டை மறைமாவட்டம், நாலாங்கட்டளை பங்கிற்குட்பட்ட தாழையூத்து மறைபரப்புத் தளத்தில், பாத்திமா அன்னையின் பெயரால் புதிதாக எழுப்பப்பட்டுள்ள ஓர் ஆலயத்தை, பாளை ஆயர், ஜூடு பால்ராஜ் அவர்கள், மே 13 அன்று அர்ச்சித்து, திறந்து வைத்தார்.

63 அடி உயர கோவில் முகப்பைக் கொண்டுள்ள இவ்வாலயத்தின் அடிக்கல், 2015ம் ஆண்டு, சனவரி 26ம் தேதி நாட்டப்பட்டது என்றும், இவ்வாலயத்தில் வைக்கப்பட்டுள்ள அன்னையின் திரு உருவம், பாத்திமா நகரிலிருந்து வரவழைக்கப்பட்டது என்றும், நாலாங்கட்டளை பங்கு வெளியிட்டுள்ள அறிக்கை கூறுகிறது. மேலும், பாத்திமா அன்னைக்கென, ஆசியாவில் முதன் முதலாக அமைக்கப்பட்ட திருத்தலம் ஒன்றில், மே 13, மும்பை பேராயர், கர்தினால் ஆசுவால்ட் கிரேசியஸ் அவர்கள் திருப்பலி நிறைவேற்றியதாக ஆசிய செய்தி கூறியுள்ளது.

இந்தியாவின் மகாராஷ்ட்ரா மாநிலத்தின் கர்ஜத் (Karjat) என்ற ஊரில், பாத்திமா அன்னையின் பெயரால், 1935ம் ஆண்டு உருவாக்கப்பட்ட இத்திருத்தலத்தில், இந்த நூற்றாண்டு நினைவாக புதிதாக நிறுவப்பட்டுள்ள ஒரு பீடத்தை, கர்தினால் கிரேசியஸ் அவர்கள் அர்ச்சித்து, திருப்பலி நிறைவேற்றினார். 1917ம் ஆண்டு பாத்திமாவில் அன்னை மரியா தோன்றிய நிகழ்வையடுத்து, இந்தியாவுக்கு 1920ம் ஆண்டு சென்ற போர்த்துகீசிய வர்த்தகர்கள், அன்னையின் உருவச் சிலையை அங்கு கொண்டு சென்றனர் என்றும், அச்சிலையை மையப்படுத்தி அமைந்த திருத்தலம் 1935ம் ஆண்டு முதல் மக்களை ஈர்த்து வந்துள்ளது என்றும் ஆசிய செய்தி மேலும் கூறுகிறது.

(ஆதாரம் : AsiaNews / வத்திக்கான் வானொலி) [2017-06-27 23:41:22]


கந்தமால் பகுதியில் புனித அன்னை தெரேசா சகோதரிகள் இல்லம்

வன்முறைகளைச் சந்தித்த கந்தமால் பகுதியில் அருள் சகோதரிகள் ஒரு குழுமத்தைத் துவங்கவேண்டும் என்ற நெடுங்கால ஆவல் நிறைவேற்றப்பட்டுள்ளது என்று, கட்டக் புவனேஸ்வர் பேராயர், ஜான் பார்வா அவர்கள், பீதேஸ் செய்தியிடம் கூறினார்.

இந்தியாவின் ஒடிசா மாநிலத்தில், 2008ம் ஆண்டு, இந்து அடிப்படைவாத குழுவால் கொடிய வன்முறைகளைச் சந்தித்த கந்தமால் பகுதியில், சலிமக்குச்சா (Salimaguchha) என்ற ஊரில், புனித அன்னை தெரேசாவால் உருவாக்கப்பட்ட பிறரன்பு மறைப்பணியாளர் சகோதரிகள் சபையினர் ஓர் இல்லத்தைத் துவக்கியுள்ளனர் என்று, பீதேஸ் செய்தி கூறியுள்ளது. வறியோருக்கு உதவிகள் வழங்கும் நோக்கத்துடன் நிறுவப்பட்டுள்ள இந்த இல்லம், மே மாதம் 13, பாத்திமா அன்னையின் திருவிழாவன்று திறக்கப்பட்டது.

(ஆதாரம் : Fides / வத்திக்கான் வானொலி) [2017-06-27 23:34:42]


மும்பை மாநகராட்சியின் அத்துமீறிய செயல் - கர்தினால் கிரேசியஸ்

மும்பையின் Bandra பகுதியில் மும்பை மாநகராட்சி சிலுவை ஒன்றை இடித்துத் தள்ளியது, சட்டத்திற்குப் புறம்பான அத்துமீறிய ஒரு செயல் என்றும், மத உணர்வுகளைத் தூண்டிவிடும் முயற்சி என்றும், மும்பை பேராயர், கர்தினால் ஆஸ்வால்டு கிரேசியஸ் அவர்கள், ஆசிய செய்தியிடம் கூறினார்.

1890களில், ஏற்பட்ட கொள்ளைநோய் தாக்குதலின்போது நிறுவப்பட்ட இந்தச் சிலுவை, தனியார் ஒருவருக்குச் சொந்தமான இடத்தில் உள்ளது என்றும், கடந்த நூறு ஆண்டுகளுக்கும் மேலாக, இச்சிலுவை, எவ்வகையிலும் பொது மக்களுக்கு இடையூறாக இருந்ததில்லை என்றும், கர்தினால் கிரேசியஸ் அவர்கள் தன் பேட்டியில் குறிப்பிட்டார். தனிப்பட்டவர்க்குச் சொந்தமான ஒரு இடத்தில் அத்து மீறி நுழைந்து, அவருக்குரிய சொத்தை நாசம் செய்த மாநகராட்சியின் செயல், கண்டனத்திற்குரியது என்று, மும்பை உயர் மறைமாவட்ட பிரதிநிதி, அருள்பணி Antony Charangat அவர்கள் செய்தியாளர்களிடம் கூறினார்.

ஏப்ரல் 29 அன்று எவ்வித முன்னறிவிப்பும் இல்லாமல் மேற்கொள்ளப்பட்ட இந்த இடிபாடு முயற்சி, அண்மைய மாதங்களில் மும்பையில் கிறிஸ்தவ வழிபாட்டுத் தலங்களுக்கும், கிறிஸ்தவ உருவச்சிலைகளுக்கும் செய்யப்பட்டுள்ள நிந்தனைகளின் ஒரு தொடர்ச்சியாக உள்ளது என்று ஆசிய செய்தி கூறுகிறது. இடிக்கப்பட்ட சிலுவை இருந்த இடத்தில் மற்றொரு சிலுவையை நிறுவி, மக்கள் அதைச் சுற்றி வணக்கம் செலுத்தி வருகின்றனர் என்று ஆசிய செய்தி கூறியுள்ளது.

(ஆதாரம் : AsiaNews / வத்திக்கான் வானொலி) [2017-06-27 23:26:06]


"மும்பை மாநகராட்சியே, என் சிலுவையைக் கட்டிக்கொடு"

ஏப்ரல் 29ம் தேதி, மும்பையின் Bandra பகுதியில் தனியாருக்குச் சொந்தமான இடத்தில் வைக்கப்பட்டிருந்த ஒரு சிலுவையை, மும்பை மாநகராட்சி இடித்ததை எதிர்த்து, மும்பை கத்தோலிக்க சமுதாயம், அமைதியான ஒரு போராட்டத்தை, மே 3 ஆம் தேதியன்று மேற்கொண்டது.

"மும்பை மாநகராட்சியே, என் சிலுவையைக் கட்டிக்கொடு" என்ற விருதுவாக்குடன் மேற்கொள்ளப்பட்ட இந்தப் போராட்டத்தில் கலந்துகொண்டோர் அனைவரும், கறுப்புத் துணியை தங்கள் கரங்களில் கட்டியிருந்தனர் என்று ஆசிய செய்தி கூறுகிறது. பொது இடங்களில், பொது மக்களுக்கு இடையூறாக உள்ள மத அடையாளங்களை அகற்றும்படி உச்ச நீதி மன்றம் அளித்த உத்தரவின்பேரில், தாங்கள் இந்த முயற்சியை மேற்கொண்டதாக மும்பை மாநகராட்சி கூறியுள்ளது தவறான தகவல் என்றும், இடிக்கப்பட்ட சிலுவை, தனியாருக்குச் சொந்தமான இடத்தில் யாருக்கும் இடையூறின்றி கடந்த 122 ஆண்டுகள் இருந்துள்ளது என்றும், மும்பை உயர் மறைமாவட்டம் அறிக்கையோன்றை வெளியிட்டுள்ளது.

(ஆதாரம் : AsiaNews / வத்திக்கான் வானொலி) [2017-06-27 23:21:38]


மனித வர்த்தகத்திற்கெதிராய், இந்தியா பங்களாதேஷ் திருஅவைகள்

ஆயிரக்கணக்கான பெண்களும், சிறாரும், பங்களாதேஷ் நாட்டிலிருந்து இந்தியாவிற்கு வர்த்தகம் செய்யப்படுவதாக அறிக்கைகள் வெளிவந்துள்ளவேளை, இவ்விரு நாடுகளின் கத்தோலிக்கத் திருஅவைப் பணியாளர்கள் இணைந்து மனித வர்த்தகத்திற்கெதிராய் உழைப்பதற்குத் தீர்மானித்துள்ளனர்.

பங்களாதேஷ் காரித்தாஸ் நிறுவனமும், டெல்லி உயர்மறைமாவட்டத்தின், செத்னாலயா (Chetnalaya) சமூகநல நிறுவனமும் இணைந்து, கடந்த ஏப்ரல் இறுதியில், மூன்று நாள் கூட்டம் நடத்தி, இவ்வாறு தீர்மானித்தன. இவ்விரு நிறுவனங்களும் ஒன்றிணைந்து ஆற்றிய பணியின் பயனாக, 2015ம் ஆண்டில், 89 சிறுமிகள் காப்பாற்றப்பட்டுள்ளனர். 2004ம் ஆண்டிலிருந்து 2016ம் ஆண்டுக்கு இடைப்பட்ட காலத்தில், 8,761 சிறுமிகள் பங்களாதேஷ் நாட்டிலிருந்து இந்தியாவுக்கு வர்த்தகம் செய்யப்பட்டுள்ளனர் என, அந்நாட்டு காவல்துறை கூறியுள்ளது.

(ஆதாரம் : UCAN / வத்திக்கான் வானொலி( [2017-06-27 23:17:30]


சுரண்டலுக்குப் பலியாகும் தொழிலாளர் மறக்கப்படக் கூடாது

குடியேற்றதாரத் தொழிலாளர் மற்றும், மனித வர்த்தகத்திற்குப் பலியாகும் மக்கள் மறக்கப்படக் கூடாது, ஏனென்றால், இவ்விரு தரப்பு மக்களும், அமைப்புமுறை சாராத, மற்றும், சீருடை அணியாதத் தொழிலாளர்களுடன் தொடர்புடையவர்கள் என்று, இந்திய ஆயர்களின் மே தினச் செய்தி கூறுகின்றது.

இந்திய ஆயர் பேரவையின், தொழிலாளர் பணிக்குழுத் தலைவர் ஆயர் ஆசுவால்டு லூயிஸ் (Oswald Lewis) அவர்கள், தொழிலாளரான புனித யோசேப்புக்கு அர்ப்பணிக்கப்பட்ட மே தினத்திற்கென வெளியிட்ட செய்தியில், குடியேற்றதாரத் தொழிலாளர்களை மறக்கக் கூடாது எனக் கேட்டுக்கொண்டுள்ளார். தங்களையும், தங்களின் குடும்பங்களையும் காப்பாற்றுவதற்காக, தங்களின் வீடுகளைவிட்டு, புதிய இடங்களுக்குச் செல்லும் தொழிலாளர்கள், ஆரம்பத்திலிருந்தே பிரச்சனைகளை எதிர்கொள்கின்றனர் என்றும் கூறியுள்ளார், ஆயர் லூயிஸ்.

புதிய பணியிடங்களில் எதிர்கொள்ளும் கடினமான சூழல்களிலிருந்து தப்பித்துச் செல்வதற்கு இத்தொழிலாளர்கள் முயற்சிக்கும் போது, அடிக்கடி காணாமல்போகின்றனர், மனித வர்த்தகத்திற்கு உள்ளாகின்றனர், இறுதியில் அவர்கள் தனிமையை அனுபவிக்கின்றனர் எனவும், ஆயர் லூயிஸ் அவர்கள் குறிப்பிட்டுள்ளார். திருத்தந்தை 12ம் பத்திநாதர் அவர்கள், 1955ம் ஆண்டில், தொழிலாளர் புனித யோசேப்பு விழாவை ஏற்படுத்தினார்.

2011ம் ஆண்டின் கணக்கெடுப்பின்படி, இந்தியாவின் ஏறக்குறைய 120 கோடி மக்களில், 32 கோடியே 60 இலட்சம் பேர் குடியேற்றதாரத் தொழிலாளர்கள். மேலும், துருக்கி நாட்டில், சிரியா நாட்டு புலம்பெயர்ந்த சிறார் உட்பட, ஏறக்குறைய இருபது இலட்சம் சிறார், கட்டாய வேலையில் அமர்த்தப்பட்டுள்ளனர் என, உலக தொழில் நிறுவனம் கணக்கிட்டுள்ளது.

(ஆதாரம் : AsiaNews / வத்திக்கான் வானொலி) [2017-06-27 23:13:12]


உத்தர பிரதேச ஆயர்கள், முதலமைச்சர் சந்திப்பு

இந்தியாவின் உத்தர பிரதேச மாநிலத்தின் ஏழு ஆயர்களும், முதலமைச்சர் யோகி ஆதித்யநாத் அவர்களைச் சந்தித்து வாழ்த்து தெரிவித்ததோடு, சிறுபான்மை கிறிஸ்தவர்கள் பாதுகாக்கப்பட வேண்டும் என்ற வேண்டுகோளையும் சமர்ப்பித்துள்ளனர்.

உத்தர பிரதேச மாநிலத்தின் புதிய முதலமைச்சர் யோகி ஆதித்யநாத் அவர்களுக்கு, தங்களின் செபங்களை உறுதி செய்ததோடு, சிறுபான்மை கிறிஸ்தவர்களும், அவர்களின் வழிபாட்டுத் தலங்களும், நிறுவனங்களும் பாதுகாக்கப்பட வேண்டும் என்றும் ஆயர்கள் கேட்டுக்கொண்டுள்ளனர். இச்சந்திப்பு குறித்து ஆசியச் செய்தியிடம் பேசிய, லக்னௌவ் ஆயர் Gerald John Mathias அவர்கள், யோகி ஆதித்யநாத் அவர்கள், மதமாற்றத்திற்கு எதிரானவர், ஆயினும், ஆண்டவர் இயேசு பற்றி தொடர்ந்து பேசுங்கள் எனக் கூறினார் என்றார்.

ஏனைய மதங்களை மதித்து, அனைவரோடும் நல்லிணக்கத்தில் வாழுமாறும், யோகி ஆதித்யநாத் அவர்கள் கூறினார் எனவும், லக்னௌவ் ஆயர் தெரிவித்தார். இந்தியாவின் மிகப்பெரிய மாநிலமான உத்தர பிரதேசத்தில், கடந்த ஏப்ரல் மாதம் 7ம் தேதியன்றும் ஒரு கிறிஸ்தவ சபை ஆலயம் தாக்கப்பட்டுள்ளது.

(ஆதாரம் : AsiaNews / வத்திக்கான் வானொலி) [2017-06-27 23:07:54]