வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



எகிப்தின் புதிய மறைசாட்சிகளுக்காக செபிப்போம்

கடந்த வாரத்தில் எகிப்தில் தங்கள் விசுவாசத்திற்காக கொல்லப்பட்ட கிறிஸ்தவர்கள் குறித்து தன் ஆழ்ந்த அனுதாபங்களை இஞ்ஞாயிறு அல்லேலூயா வாழ்த்தொலி உரையின்போது வெளியிட்டார் திருத்தந்தை பிரான்சிஸ். சனிக்கிழமையன்று இத்தாலியின் ஜெனோவா நகரில் இடம்பெற்ற மேய்ப்புப்பணி சார்ந்த பயணத்தின்போதும், எகிப்து படுகொலைகள் குறித்து தன் ஆழ்ந்த கவலையை வெளியிட்டிருந்த திருத்தந்தை பிரான்சிஸ் அவர்கள், காப்டிக் ஆர்த்தடாக்ஸ் சபையின் திருத்தந்தை தவாத்ரோஸ் அவர்களுக்கும், எகிப்து நாடு முழுவதற்கும் தன் அனுதாபங்களையும் தெரிவித்துள்ளார். எகிப்து கிறிஸ்தவர்கள் பேருந்தில், நாட்டிற்குள் திருப்பயணத்தை மேற்கொண்டபோது, வழியில் நிறுத்திய இஸ்லாமிய தீவிரவாதிகள், கிறிஸ்தவர்கள் தங்கள் விசுவாசத்தை மறுதலிக்கவேண்டும் என கட்டாயப்படுத்தியபோது மறுத்ததால், குழந்தைகள் உட்பட 35 பேரை சுட்டுக் கொன்றுள்ளது பற்றி ஆழ்ந்த கவலையை வெளியிட்ட திருத்தந்தை பிரான்சிஸ் அவர்கள், இந்த புதிய மறைசாட்சிகளை தன் இல்லத்திற்குள் வரவேற்கும் இறைவன், பயங்கரவாதிகளின் மனம் மாறவும் உதவுவாராக எனவும் தெரிவித்தார். மேலும், மான்செஸ்டர் நகரில் இடம்பெற்ற வெடிகுண்டு தாக்குதலில் உயிரிழந்தவர்கள் மற்றும் படுகாயமடைந்தவர்கள் குறித்து கவலையையும் அனுதாபங்களையும், இஞ்ஞாயிறு அல்லேலூயா வாழ்த்தோலி உரையின்போது குறிப்பிட்ட திருத்தந்தை பிரான்சிஸ் அவர்கள், அவர்களுக்கான செபத்திற்கும் உறுதி கூறினார். மேலும், இஞ்ஞாயிறு சிறப்பிக்கப்பட்ட 'உலக சமூகத்தொடர்பு நாள்' குறித்தும் தன் உரையின் இறுதியில் குறிப்பிட்ட திருத்தந்தை, 'அஞ்சாதே, நான் உன்னோடு இருக்கிறேன்' என்ற இந்நாளுக்கான தலைப்பையும் எடுத்துரைத்து, சமூகத்தை கட்டியெழுப்பும் நோக்குடன், எவ்வித முற்சார்பு எண்ணங்களும் இன்றி, நம்பிக்கையையும் பற்றுறுதியையும் விதைத்து, தகவல் துறை செயல்படவேண்டும் என்ற விண்ணப்பத்தையும் முன்வைத்தார். (ஆதாரம் : வத்திக்கான் வானொலி) [2017-06-02 20:37:27]


பாசமுள்ள பார்வையில்: துன்புறும் அன்னையரைச் சந்திக்கும் மரியா

கன்னி மரியா எலிசபெத்தைச் சந்தித்தத் திருநாள். "மரியா புறப்பட்டு யூதேயா மலைநாட்டிலுள்ள ஓர் ஊருக்கு விரைந்து சென்றார்" (லூக்கா 1: 39) என்று இத்திருநாளின் நற்செய்தி ஆரம்பமாகிறது. தேவையில் இருந்த தன் உறவினர் எலிசபெத்தை, அன்று தேடிச்சென்ற மரியா, இன்றும், தேவையில் இருப்போரைத் தேடி வருகிறார். தன் கருவிலும், கரங்களிலும் குழந்தை இயேசுவைத் தாங்கியவண்ணம், மரியன்னை மேற்கொண்ட பயணங்கள் கடினமானவை. கருவில் இயேசு உருவான அத்தருணமே, உறவினரான எலிசபெத்தைச் சந்திக்க, யூதேயா மலைப்பகுதியில் பயணமானார். தன் பேறுகாலம் நெருங்கிய வேளையில், பெத்லகேம் என்ற ஊருக்கு கடினமானதொரு பயணம் மேற்கொண்டார். இயேசுவின் உயிரைக் காப்பாற்ற, பச்சிளம் குழந்தையைச் சுமந்தவண்ணம், இரவோடிரவாக எகிப்துக்குத் தப்பித்துச் சென்றார். எருசலேமில் விழா கொண்டாடச் சென்றவர், அங்கு சிறுவன் இயேசு தொலைந்துபோனதை அறிந்து, மீண்டும், பதைபதைப்புடன் அவரைத் தேடி, எருசலேமுக்குச் சென்றார். இறுதியாக, தன் மகன் சிலுவை சுமந்து சென்றபோது, அவருடன் அச்சிலுவைப்பாதை பயணத்திலும் பங்கேற்றார். அன்னை மரியா மேற்கொண்ட இந்த துயரமான பயணங்களை, இன்றும், ஆயிரமாயிரம் அன்னையர் மேற்கொள்கின்றனர். நெருக்கடியானச் சூழல்களிலும், கருவில் வளரும் குழந்தையைக் கலைத்துவிடாமல் வாழும் அன்னையரை நினைவில் கொள்ள... பிறந்தநாளன்றே, பச்சிளம் குழந்தைகளைத் தூக்கிக்கொண்டு, புலம்பெயர்ந்து செல்லும் அன்னையரை நினைவில் கொள்ள... திருவிழாக் கூட்டங்களில் குழந்தைகளைத் தொலைத்துவிட்டு, பரிதவிக்கும் அன்னையரை நினைவில் கொள்ள... அநியாயமாகக் கொல்லப்படும் மகன்களை தங்கள் மடியிலேந்தி, மனம்நொறுங்கும் அன்னையரை நினைவில் கொள்ள... மே 31ம் தேதி, தகுந்ததொரு தருணம். (ஆதாரம் : வத்திக்கான் வானொலி) [2017-05-31 19:44:55]


மரியன்னை குறித்து திருத்தந்தையின் டுவிட்டர் செய்தி

"இறைவனின் இரக்கத்திற்கு வாழும் சாட்சிகளாக மாறும்வண்ணம், அன்னை மரியாவின் உறுதியான, உதவி செய்யும் நம்பிக்கையிலிருந்து நாம் கற்றுக்கொள்வோம்" என்ற சொற்கள், மே 31, இப்புதனன்று, திருத்தந்தையின் டுவிட்டர் செய்தியில் இடம்பெற்றன. மரியன்னையின் வணக்க மாதமான மே மாதத்தின் இறுதி நாளையும், மே 31ம் தேதி, கன்னி மரியா எலிசபெத்தை சந்தித்தத் திருநாளையும் இணைத்து, திருத்தந்தை பிரான்சிஸ் அவர்கள் இந்த டுவிட்டர் செய்தியை வெளியிட்டுள்ளார். @pontifex என்ற முகவரியில், திருத்தந்தை ஒவ்வொரு நாளும் வெளியிடும் டுவிட்டர் செய்திகள், இத்தாலியம், இஸ்பானியம், ஆங்கிலம், பிரெஞ்சு, போர்த்துகீசியம், ஜெர்மனி, இலத்தீன், போலந்து, அரேபியம் ஆகிய ஒன்பது மொழிகளில் உலகினரைச் சென்றடைகின்றன. மே 31, இப்புதன் முடிய, திருத்தந்தை வெளியிட்டுள்ள டுவிட்டர் செய்திகள், 1,213 என்பதும், அவரது செய்திகளை ஆர்வமாய்த் தொடர்வோர் 1 கோடியே 7 இலட்சத்து, 87,238 பேர் என்பதும் குறிப்பிடத்தக்கன. (ஆதாரம் : வத்திக்கான் வானொலி) [2017-05-31 19:36:16]


மறைக்கல்வியுரை : எதிர்நோக்குடன் வாழ தூய ஆவியாரின் உதவி

இப்புதன் காலை திருத்தந்தையின் மறைக்கல்வி உரையின் துவக்கத்தில், தூய பவுல் உரோமையருக்கு எழுதிய திருமுகத்திலிருந்து, ‘எதிர்நோக்கைத் தரும் கடவுள், நம்பிக்கையால் உண்டாகும் பெருமகிழ்ச்சியாலும், அமைதியாலும் உங்களை நிரப்புவாராக! அவ்வாறு தூய ஆவியாரின் வல்லமையால் நீங்கள் இன்னும் மிகுதியான எதிர்நோக்குடன் வாழ அருள்புரிவாராக. என் சகோதர சகோதரிகளே, நீங்கள் நன்னயம் நிறைந்தவர்களாயும், எல்லா அறிவும் நிரம்பப் பெற்றவர்களாயும், ஒருவர் மற்றவரை அறிவுறுத்தக் கூடியவர்களாயும் இருக்கிறீர்கள் என நான் உறுதியாக நம்புகிறேன்’, என்ற பகுதி வாசிக்கப்பட்டது. தூய பேதுரு பேராலய வளாகத்தில் கூடியிருந்த பல ஆயிரக்கணக்கான மக்களுக்கு, 'தூய ஆவியானவர் மிகுதியான எதிர்நோக்குடன் வாழ நமக்கு அருள்புரிகிறார்' என்ற தலைப்பில் உரை வழங்கினார் திருத்தந்தை பிரான்சிஸ். அன்பு சகோதர சகோதரிகளே! தூய ஆவியார் திருவிழாவின்போது நம்மீது பொழியப்பட உள்ள தூய ஆவியாரின் வரங்களுக்காக நம்மையே தயாரித்துவரும் இந்நாட்களில், கிறிஸ்தவ எதிர்நோக்கு குறித்த நம் மறைக்கல்வி உரையை இன்று, தூய ஆவியாரையும் அவரின் மீட்புப் பணிகளையும் நோக்கித் திருப்புவோம். ‘எதிர்நோக்கைத் தரும் கடவுள், நம்பிக்கையால் உண்டாகும் பெருமகிழ்ச்சியாலும், அமைதியாலும் உங்களை நிரப்புவாராக’, என உரோமையருக்கு எழுதிய திருமுகத்தில் குறிப்பிடுகிறார் தூய பவுல். தூய ஆவியாரின் கொடையாக இருக்கும் 'எதிர் நோக்கு', ஒரு நங்கூரமாகவும், அதேவேளை, பாய்மரக் கப்பலாகவும் செயல்படுகிறது. நம் வாழ்வில் புயல் வீசும் நேரங்களில் நமக்கு பாதுகாப்பு வழங்குவற்கு நங்கூரமாகவும், முடிவற்ற வாழ்வெனும் பாதுகாப்பான துறைமுகத்தை நோக்கி நம்மை அழைத்துச் செல்லும் பாய்மரக் கப்பலாகவும், தூய ஆவியானவர் தரும் கிறிஸ்தவ எதிர்நோக்கு எனும் கொடை உள்ளது. இறைவனின் வாக்குறுதிகளுக்கும், நாம் கடவுளின் பிள்ளைகள் என்பதற்கும், நம் உள்ளத்தோடு சேர்ந்து தூய ஆவியார் சான்று பகர்கிறார். கர்தினால் நியூமென் அவர்களின் வார்த்தைகளில் சொல்ல வேண்டுமானால், நம்பிக்கையால் நிரப்பப்பட்டவர்களாக, நாமும், தூய ஆவியாரின் சாயலில், ஆறுதல் வழங்குபவர்களாகவும், பரிந்து பேசுபவர்களாகவும், உதவியாளர்களாகவும், அமைதியை கொணர்பவர்களாகவும் மாறமுடியும். அனைத்துப் படைப்புக்கும் எதிர்நோக்கைக் கொணரும் தூய ஆவியானவர், நாம் வாழும் இவ்வுலகிற்கான மதிப்பையும் அன்பையும் நமக்குள் தூண்டுகிறார். செபத்தில் கூடியிருந்த அன்னை மரியாவையும் அப்போஸ்தலர்களையும் போல், இந்த தூய ஆவியார் பெருவிழா, நம்மை அடையாளம் காணுவதுடன், அவர் வழங்கும் கொடை வழியாக நாம் விசுவாசத்தில் நிரப்பப்படுவோமாக. இவ்வாறு தன் புதன் மறைக்கல்வி உரையை வழங்கிய திருத்தந்தை பிரான்சிஸ் அவர்கள், கத்தோலிக்க அருங்கொடை மறுமலர்ச்சி இயக்கத்தின் 50வது ஆண்டைக் கொண்டாட, இந்தியா, இந்தோனேசியா மலேசியா, சிங்கப்பூர் உட்பட, பல்வேறு நாடுகளிலிருந்து உரோம் நகருக்கு வருகை தந்துள்ள மக்களை வாழ்த்தி, அனைவருக்கும் தன் அப்போஸ்தலிக்க ஆசீரையும் அளித்தார். (ஆதாரம் : வத்திக்கான் வானொலி) [2017-05-31 19:30:16]


தென் கொரிய புதிய அரசுத்தலைவர் திருத்தந்தைக்கு வாழ்த்து

தென் கொரியாவின் புதிய அரசுத்தலைவர் மூன் ஜே-இன் (Moon Jae-in) அவர்கள், திருத்தந்தை பிரான்சிஸ் அவர்களுக்கு, தன் வாழ்த்துக்கள் அடங்கிய செய்தியை, ஒரு சிறப்புத் தூதர் வழியாக வழங்கியுள்ளார். வத்திக்கான் தூய பேதுரு வளாகத்தில், மே 24, இப்புதனன்று நடைபெற்ற பொதுமறைக்கல்வியுரையில், திருப்பீடத்துக்கான தென் கொரியத் தூதர் Seong Youm, தென் கொரிய ஆயர் பேரவைத் தலைவர் பேராயர் Hyginius Kim Hee-jong ஆகிய இருவரும் கலந்துகொண்டு, அரசுத்தலைவர் மூன் ஜே-இன் அவர்களின் வாழ்த்துச் செய்தியை திருத்தந்தையிடம் அளித்தனர். அமைதி, நீதி, ஒப்புரவு ஆகியவற்றுக்கு, திருத்தந்தை ஆற்றிவரும் நற்பணிகளுக்கு, அரசுத்தலைவர் மூன் ஜே-இன் அவர்கள் தன் சிறப்புப் பாராட்டுக்களை, அச்செய்தியில் தெரிவித்துள்ளார். 1947ம் ஆண்டு, ஜப்பானிய ஆதிக்கத்திலிருந்து கொரியா விடுதலை பெற்றதும், திருத்தந்தை 12ம் பத்திநாதர் அவர்கள், அந்நாட்டிற்கு, திருப்பீடத்தின் தூதராக, அருள்பணி Patrick James Byrne அவர்களை அனுப்பியதன் வழியே, கொரியாவை ஒரு தனி நாடாக, திருப்பீடம் ஏற்றுக்கொண்டது. 1948ம் ஆண்டு திருப்பீடம் மேற்கொண்ட முயற்சிகளால், பல கத்தோலிக்க நாடுகள், கொரியாவை, தனி நாடாக ஏற்றுக்கொள்ள முன்வந்தன என்பது குறிப்பிடத்தக்கது. இதற்கிடையே, தென் கொரியாவில், குடியேற்றதாரர் பாதுகாக்கப்படவும், இனப்பாகுபாடு தடை செய்யப்படவும், புதிய அரசு நடவடிக்கை எடுக்க வேண்டும் என, அந்நாட்டின் பல்சமய குழு ஒன்று, விண்ணப்பித்துள்ளது. (ஆதாரம் : வத்திக்கான் வானொலி) [2017-05-29 02:28:24]


பாசமுள்ள பார்வையில்: "கிறிஸ்தவர்களின் உதவியாகும் மரியா"

மே 24ம் தேதி, சகாய அன்னையின் திருநாளைக் கொண்டாடுகிறோம். சகாய மாதா, சகாயத்தாய் என்று சுருக்கமாக வழங்கப்படும் இந்த அடைமொழியின் விரிவான விளக்கம், "கிறிஸ்தவர்களின் உதவியாகும் மரியா" (Mary, Help of Christians) என்பதே. முதல் நூற்றாண்டிலிருந்தே, கிறிஸ்தவ சமுதாயத்தில், அன்னை மரியாவுக்கு, இரு அடைமொழிகள் வழங்கப்பட்டு வந்தன. 'மரியா, இறைவனின் தாய்' என்பதும், 'மரியா, உதவி செய்பவர்' என்பதும் அவ்விரு அடைமொழிகள். 4ம் நூற்றாண்டில் வாழ்ந்த, புனித ஜான் கிறிசோஸ்தம் அவர்கள், தன் மறையுரைகளில், மரியன்னையை, உதவி செய்பவராக அறிமுகப்படுத்தி, அதை ஒரு பக்தி முயற்சியாக வளர்த்தார். 16ம் நூற்றாண்டில், ஐரோப்பிய கிறிஸ்தவ சமுதாயத்தை, இஸ்லாமியப் படையெடுப்பிலிருந்து காப்பாற்ற, சகாயத்தாயின் உதவிகேட்டு, மக்கள் செபிக்கவேண்டுமெனக் கேட்டுக்கொண்டார், திருத்தந்தை 5ம் பத்திநாதர். அவ்வேளையில் கிடைத்த வெற்றியும், பாதுகாப்பும், மரியன்னையின் பரிந்துரையால் கிடைத்தன என்பதை, மக்கள் நன்கு உணர்ந்திருந்தனர். 19ம் நூற்றாண்டில், திருத்தந்தை 7ம் பத்திநாதர் அவர்கள், மன்னன் நெப்போலியானால் கைது செய்யப்பட்டு, பின்னர், விடுவிக்கப்பட்டார். தன் விடுதலைக்கும், திருஅவையின் பாதுகாப்பிற்கும் உதவி செய்தவர் அன்னை மரியா என்று கூறிய திருத்தந்தை 7ம் பத்திநாதர், தான் விடுதலையடைந்த மே 24ம் தேதியை, சகாயத்தாயின் திருநாளாக உருவாக்கினார். இத்தாலியின் தூரின் நகரில் உள்ள பசிலிக்காவில், 'கிறிஸ்தவர்களின் உதவியான மரியா' மகுடம் சூட்டப்பட்டு, பீடமேற்றப்பட்டுள்ளார். புனித தொன் போஸ்கோவால் பிரபலமாக்கப்பட்ட சகாயத்தாயின் பக்தி முயற்சி, சலேசிய சபைத் துறவிகளால் இன்று வளர்க்கப்பட்டு வருகிறது. இதே மே 24ம் தேதி, இயேசுசபையினர், ‘வழித்துணையாகும் நமது அன்னை’ என்று போருள்படும், ‘Madonna Della Strada’ திருநாளைக் கொண்டாடுகின்றனர். கிறிஸ்தவ சமுதாயம், அன்னை மரியாவை, 'இறைவனின் தாய்' என்றும், 'உதவி செய்பவர்' என்றும் ‘வழித்துணையாகும் நமது அன்னை’ என்றும் கொண்டாடுவதில், ஆச்சரியம் எதுவுமில்லையே! (ஆதாரம் : வத்திக்கான் வானொலி) [2017-05-25 17:03:45]


குற்றங்களைத் தடுப்பதற்கு, சட்டங்கள் மட்டும் போதாது

குற்றங்களைத் தடுப்பதற்கு, வெறும் சட்டங்களைக் கொண்டு மட்டும் முயற்சிகள் மேற்கொள்ளப்படுவது போதாது என்பதையும், சமுதாயத்தின் அனைத்து தரப்பினரையும் முன்னேற்றுவதில் கவனம் செலுத்தப்பட வேண்டும் என்பதையும் திருப்பீடம் முழுமையாக நம்புகிறது என்று, திருப்பீட உயர் அதிகாரி ஒருவர் கூறினார். வியென்னா நகரில் நிகழும் ஐ.நா.அவை கூட்டங்களில், திருப்பீடத்தின் சார்பில் பங்கேற்கும், அருள்பணி Janusz Urbancyzk அவர்கள், மே 22ம் தேதி முதல், 28ம் தேதி முடிய அங்கு நிகழும் பன்னாட்டு கூட்டம் ஒன்றில் இவ்வாறு உரையாற்றினார். "குற்றங்களைத் தடுப்பதற்கு முழுமையான, ஒருங்கிணைந்த திட்டங்கள்" என்ற தலைப்பில் நிகழும் இக்கருத்தரங்கை திருப்பீடம் மனதார வரவேற்கிறது என்பதையும், அருள்பணி Urbancyzk அவர்கள், தன் உரையில் எடுத்துரைத்தார். குற்றங்களைத் தடுக்கும் முயற்சிகள், மனித சமுதாயத்தின் அடிப்படையான குடும்பங்களில் துவங்கவேண்டும் என்பதை, தன் உரையில் சுட்டிக்காட்டிய அருள்பணி Urbancyzk அவர்கள், குடும்பங்கள், பல்வேறு நெருக்கடிகளால் சூழப்படும் வேளையில், அங்கு, அமைதி குலைந்து, அதுவே பல்வேறு குற்றங்களுக்கு காரணமாக அமைகிறது என்று கூறினார். குடும்பத்திற்கு அடுத்ததாக பள்ளிகள், மத நிறுவனங்கள் ஆகியவை, இளையோரை நல்வழி நடத்துவதிலிருந்து தவறும்போது, குற்றங்கள் பெருக வாய்ப்புக்கள் உருவாகின்றன என்று, அருள்பணி Urbancyzk அவர்கள், கவலை வெளியிட்டார். (ஆதாரம் : வத்திக்கான் வானொலி) [2017-05-25 16:56:14]


புதன் மறைக்கல்வியுரை : கடவுள் எப்போதும் நம்முடன் நடக்கிறார்

இப்புதனன்று திருப்பீடத்தில், அமெரிக்க ஐக்கிய நாட்டு அரசுத் தலைவரையும், அவருடன் வந்தவர்களையும், காலை எட்டு மணி, முப்பது நிமிடங்களுக்குச் சந்தித்தபின், பல நாடுகளின் திருப்பயணிகளை சந்திக்க, வத்திக்கான் தூய பேதுரு வளாகத்திற்கு வந்தார் திருத்தந்தை பிரான்சிஸ். கிறிஸ்தவ நம்பிக்கை குறித்த தன் தொடர் மறைக்கல்வி உரையில், எம்மாவு வழிப்பயணத்தில் இயேசுவுடன் இடம்பெற்ற நிகழ்வு குறித்து, இந்த உயிர்ப்புக் காலத்தில் உரையாற்றினார் திருத்தந்தை பிரான்சிஸ். முதலில் லூக்கா நற்செய்தியின் 24ம் பிரிவிலிருந்து எம்மாவு பயண நிகழ்வு வாசிக்கப்பட்டது. “அவர்கள் தாங்கள் போக வேண்டிய ஊரை நெருங்கி வந்தார்கள். அவரோ அதற்கு அப்பால் போகிறவர் போலக் காட்டிக் கொண்டார். அவர்கள் அவரிடம், “எங்களோடு தங்கும்; ஏனெனில் மாலை நேரம் ஆயிற்று; பொழுதும் போயிற்று” என்று கூறிக் கட்டாயப்படுத்தி அவரை இணங்கவைத்தார்கள். அவர் அங்குத் தங்குமாறு அவர்களோடு சென்றார். அவர்களோடு அவர் பந்தியில் அமர்ந்திருந்தபோது அப்பத்தை எடுத்து, கடவுளைப் போற்றி, பிட்டு அவர்களுக்குக் கொடுத்தார். அப்போது அவர்கள் கண்கள் திறந்தன. அவர்களும் அவரை அடையாளம் கண்டுகொண்டார்கள். உடனே அவர் அவர்களிடமிருந்து மறைந்துபோனார். அப்போது, அவர்கள் ஒருவரையொருவர் நோக்கி, “வழியிலே அவர் நம்மோடு பேசி, மறைநூலை விளக்கும்போது நம் உள்ளம் பற்றி எரியவில்லையா?” என்று பேசிக் கொண்டார்கள் (லூக்.24,28-32 )”. இப்பகுதி வாசித்தளிக்கப்பட்டபின், தன் கருத்துக்களைப் பகிர்ந்துகொண்டார் திருத்தந்தை. அன்பு சகோதர சகோதரிகளே! கிறிஸ்தவ எதிர்நோக்கு குறித்த நம் தொடர் மறைக்கல்வி உரையில் இன்று, எம்மாவு பயணத்தின்போது இரு சீடர்களை உயிர்த்த இயேசு சந்தித்த நிகழ்வு குறித்து நோக்குவோம். சீடர்களால் அடையாளம் கண்டுகொள்ளாதபடிக்கு, அவர்களுடன் நடந்து சென்ற இயேசு, சிலுவையில் இடம்பெற்ற பெருந்துயரால் எவ்விதம் தங்கள் நம்பிக்கைகள் சிதறிப் போயின என்பது குறித்து அவர்கள் பேசிக்கொள்வதைக் கேட்டுக்கொண்டே அவர்களுடன் நடந்து சென்றார். இயேசுவும் மெதுவாக, அவர்களுடன் பேச்சுக்கொடுத்து, மெசியாவின் துன்பங்கள் மற்றும் மரணம் குறித்து மறைநூல்களில் கூறியிருப்பவைகள் எவ்வாறு நிறைவேறியுள்ளன என்பதை விளக்கி, ஒரு புதிய மற்றும் உயரிய எதிர்நோக்கிற்கு அவர்களின் இதயங்களைத் திறந்தார். பின்னர், இயேசு அப்பத்தை பிட்டபோதுதான், தங்களுடன் இருப்பவர் ஆண்டவர் இயேசு என்பதை சீடர்கள் புரிந்துகொண்டனர். இதன் பின்னர் இயேசு அங்கிருந்து மறைந்து விடுகிறார், அச்சீடர்களும் இந்த நற்செய்தியுடன் எருசலேமுக்குத் திரும்பிச் சென்றனர். இந்த எம்மாவு பயண நிகழ்வில் நாம், இயேசுவின் 'எதிர்நோக்கு பயிற்சிமுறையை' காண்கிறோம். அதாவது, பொறுமையாக உடன்சென்று, இறைவனின் வாக்குறுதிகள் மீதான நம்பிக்கையை படிப்படியாகத் திறப்பதை அடிப்படையாகக் கொண்டது இந்த பயிற்சிமுறை. இந்த நிகழ்வு, திருப்பலியின் முக்கியத்துவத்தை படம்பிடித்துக் காட்டுகிறது. திருப்பலியில் அப்பத்தை பகிர்வதுபோல், நம் வாழ்வையும் பிட்டு, பகிர்ந்து மற்றவர்களுக்கு வழங்குகிறார் இயேசு. நம் வாழ்வுப் பயணத்தின் ஒவ்வோர் அடியிலும், நம்மைத் தொடர்ந்துவரும் இறைவனின் மாறாத அன்பை அடிப்படையாகக்கொண்ட எதிர்நோக்கு மற்றும் வாழ்வின் வார்த்தைகளை மற்றவர்களுக்கு வழங்கும் நோக்கில், அவர்களை எதிர்கொண்டு சென்று, அவர்களின் இன்பங்களுக்கும் துன்பங்களுக்கும் செவிமடுக்க வேண்டும் என இயேசுவின் சீடர்களைப்போல் நாமும் அனுப்பப்பட்டுள்ளோம். இவ்வாறு தன் மறைக்கல்வி உரையை வழங்கிய திருத்தந்தை பிரான்சிஸ் அவர்கள், இந்தியா, வியட்நாம், பிலிப்பீன்ஸ், இந்தோனேசியா, சிம்பாபுவே உட்பட பல்வேறு நாடுகளிலிருந்து வந்திருந்த அனைத்துத் திருப்பயணிகளுக்கும், உயிர்த்த கிறிஸ்துவின் மகிழ்வில், அருளை வேண்டுவதாக உரைத்து, தன் அப்போஸ்தலிக்க ஆசீரையும் அளித்தார். (ஆதாரம் : வத்திக்கான் வானொலி) [2017-05-25 16:50:27]


பாசமுள்ள பார்வையில்.. அன்புக்காக ஏங்கும் அன்னையர்

மீன்களை, பறவைகளை, விலங்குகளை.. இப்படி எல்லாவற்றையும் படைத்த கடவுளுக்கு, தம் படைப்பில் திருப்தி ஏற்படவில்லை. அதனால் மனிதனைப் படைத்தார் கடவுள். அதிலும் மனநிறைவு இல்லாமல், தமது சக்தி முழுவதையும் பயன்படுத்தி, குறையே இல்லாத, ஓர் உன்னதமான படைப்பை உருவாக்கினார். அப்படைப்புதான் பெண். அதாவது தாய். தம் படைப்பு வேலை முடிந்தபின் விண்ணகம் சென்ற கடவுள், தம் படைப்புக்களைப் பார்வையிடுவதற்காக, சிறிது காலம் கழித்து பூமிக்கு வந்தார். அப்போது, தமது உன்னதப் படைப்பாகிய பெண்ணைப் பார்த்தார். அம்மா, உனக்கு ஏதாவது குறை இருக்கிறதா? எனக் கேட்டார் கடவுள். அதற்கு அந்த அம்மா, சுவாமி, என் பிள்ளைகளுக்குச் சேவை செய்ய இரண்டு கைகள் போதவில்லை, அதனால் இன்னும் இரண்டு கைகளைக் கொடுத்தால் நன்றாக இருக்கும் என்றார். உடனே கடவுள் இதோ அதற்கான வரம் கொடுக்கிறேன் என்றார். அந்த அம்மாவுக்கு மேலும் இரண்டு கைகள் கிடைத்தன. நான்கு கைகளால் அந்த அம்மா பிள்ளைகளுக்குச் சேவை செய்ய ஆரம்பித்தார். அதைப் பார்த்து கடவுள் திருப்தியோடு திரும்பிச் சென்றார். சிறிது காலம் சென்று, மீண்டும் அந்த அம்மாவிடம் வந்து நலம் விசாரித்தார் கடவுள். அந்நேரத்தில் அந்த அம்மா, சுவாமி, ஓடி ஓடி வேலை செய்ய இரண்டு கால்கள் போதவில்லை என்றார். சரியம்மா, மேலும் இரண்டு கால்களைப் பெற்றுக்கொள் என கடவுள் வரமளித்துச் சென்றார். மீண்டும் சிறிது காலம் கழித்து, தன் தூதர் ஒருவருடன் பூமிக்கு வந்த கடவுள், அந்த அம்மாவைப் பார்த்தார். அப்போது அந்த அம்மா, ஒரு சுவரில் சாய்ந்து அழுதுகொண்டிருந்தார். அதைப் பார்த்த அந்தத் தூதர், கடவுளே, கைகளையும், கால்களையும் கொடுத்த நீங்கள், கண்ணீரை எதற்குக் கொடுத்தீர்கள் எனக் கேட்டார். அதற்கு கடவுள், கண்ணீரை நான் கொடுக்கவில்லை, அதைக் கொடுத்தது அந்த அம்மாவின் பிள்ளைகள் என்றார். இது ஒரு நாட்டின் நாடோடிக் கதை. ஆம். பிள்ளைகளின் அன்பின்மையால் கண்ணீரில் காலம் தள்ளும் நிலையில் இன்று பல தாய்மார். (ஆதாரம் : வத்திக்கான் வானொலி) [2017-05-23 13:43:06]


பாசமுள்ள பார்வையில் - தேடிவந்து பரிசளிக்கும் தாயான இறைவன்

ர் ஊரில், வாழ்ந்துவந்த ஒரு முக்கிய புள்ளி, எப்போதும் ஏதோ ஓர் அவசரத்தில் இருப்பதுபோல் எல்லாருக்கும் தெரியும். தொழுகைக் கூடத்திற்குச் சென்றாலும், அங்கும் நிலைகொள்ளாமல் தவிப்பார். தொழுகையின் இறுதிவரை தங்காமல், விரைந்து வெளியேறுவார். இவரைப் பார்த்துக்கொண்டிருந்த யூத குரு, ஒரு நாள் இவரிடம், "நான் உங்களைப் பார்க்கும்போதெல்லாம், நீங்கள், ஏதோ ஓர் அவசரத்தில் இருப்பதுபோலவே தோன்றுகிறீர்களே. ஏன் இந்த அவசரம்?" என்று கேட்டார். அந்த முக்கிய புள்ளி, குருவிடம், "நான் வாழ்வில் பலவற்றைச் சாதிக்க விரும்புகிறேன். வெற்றி, செல்வம், புகழ், இவற்றைத் தேடி, எப்போதும் நான் ஓடிக்கொண்டே இருப்பதால், இந்த அவசரம்" என்று கூறினார். "சரியான பதில் இது" என்று கூறிய குரு, மேலும் தொடர்ந்தார்: "வெற்றி, செல்வம், புகழ் எல்லாம் உங்களுக்கு முன் செல்வதாக நினைக்கிறீர்கள். கைநழுவிப் போய்விடுமோ என்ற பயத்துடன், நீங்கள் எப்போதும் இவற்றைத் துரத்திக் கொண்டிருக்கிறீர்கள்... சரி... கொஞ்சம் மாற்றி சிந்தித்துப் பாருங்களேன். நீங்கள் துரத்திச்செல்லும் பரிசுகள், உங்களுக்கு முன் செல்லாமல், உங்கள் பின்னே உங்களைத் தேடிக்கொண்டு வரலாம் இல்லையா? கடவுள், இந்தப் பரிசுகளையெல்லாம் ஏந்திவருவதாகவும் எண்ணிப் பார்க்கலாமே! அப்படி அவர், உங்கள் வீடு தேடி வரும்போது, நீங்கள் இப்பரிசுகளைத் துரத்திக்கொண்டு போயிருந்தால், கடவுள் வரும் நேரத்தில், நீங்கள் வீட்டில் இருக்க மாட்டீர்கள். கடவுள் உங்களைச் சந்திக்காமல், உங்களுக்கு இந்தப் பரிசுகளைத் தரமுடியாமல், திரும்ப வேண்டியிருக்குமே!" என்று, அந்த யூத குரு கூறினார். செல்வத்தையும் புகழையும் தேடி நாம் ஓடிக் கொண்டிருக்கும்போது, தாயான இறைவன், இவற்றையெல்லாம் நமக்குத் தருவதற்கு, நம்மைத் தேடி வரக்கூடும் என்பது, அழகான எண்ணம், மாற்றி சிந்திக்க வைக்கும் ஓர் எண்ணம். (ஆதாரம் : வத்திக்கான் வானொலி) [2017-05-22 12:22:23]


பக்க இலக்கங்களை அழுத்தி எல்லா செய்திகளையும் பார்வையிடவும்