வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



திருத்தந்தை : இளையோரே, நீங்கள் திருஅவையின் நம்பிக்கை

“அன்புள்ள இளையோரே, நீங்கள் திருஅவையின் நம்பிக்கை. உங்களது எதிர்காலம் பற்றி கனவு காண்கின்றீர்களா? அப்படியானால், உலக ஆயர்கள் மாமன்றத்தில் கலந்துகொள்ளுங்கள்”என்று திருத்தந்தை பிரான்சிஸ் அவர்கள், இச்சனிக்கிழமையன்று தனது டுவிட்டரில் கூறியுள்ளார். ஆகஸ்ட் 12, இச்சனிக்கிழமையன்று, ஐக்கிய நாடுகள் நிறுவனம், உலக இளையோர் நாளைக் கடைப்பிடித்ததையொட்டி, தனது டுவிட்டரில் இவ்வாறு வெளியிட்டுள்ளார், திருத்தந்தை பிரான்சிஸ். மேலும், "இளையோர், விசுவாசம், மற்றும் அழைப்பை தேர்ந்துதெளிதல்" என்ற தலைப்பில், இளையோரை மையப்படுத்தி, 2018ம் ஆண்டில் 15வது உலக ஆயர்கள் மாமன்றம் வத்திக்கானில் இடம்பெறவுள்ளது. இம்மாமன்றத்திற்குத் தயாரிப்பாக, 16 வயது முதல், 29 வயது வரையுள்ள இளையோர் அனைவருக்கும் கேள்விகள் அனுப்பப்பட்டுள்ளன. உலகளாவிய சமூகத்தை வளப்படுத்துவதற்கு உலகின் இளையோர் எடுக்கும் முயற்சிகளை அங்கீகரிக்கவும், உள்ளூர் சமூகங்களில் இளையோரின் ஈடுபாட்டை ஊக்குவிக்கவுமென, ஐக்கிய நாடுகள் நிறுவனம், ஆகஸ்ட் 12ம் தேதியை, உலக இளையோர் நாளாக அறிவித்து கடைப்பிடித்து வருகிறது. 1991ம் ஆண்டில், ஆஸ்ட்ரியாவின் வியன்னாவில், ஐ.நா. நடத்திய முதல் உலக இளையோர் கருத்தரங்கில் கலந்துகொண்ட, இளையோர் பிரதிநிதிகளின் பரிந்துரையின்பேரில், உலக இளையோர் நாளை உருவாக்கியது ஐ.நா. பொது அவை. (ஆதாரம் : வத்திக்கான் வானொலி) [2017-08-14 00:06:07]


காய்ந்து சாய்ந்த இலையின் பாடம்

ஞானம் தேடி ஓர் இளைஞர் துறவுமடம் ஒன்றில் சேர்ந்தார். அங்கு ஞானம் அடைவதற்கு முதல் படியாக, ''உன்னையே நீ உணர்வாயாக'' என்றனர். அது அவருக்குப் பிடிபடவில்லை. அவருக்கு எப்படி போதிப்பது என்று அங்கிருந்தவர்களுக்கும் தெரியவில்லை. ஒருநாள் இளைஞரை அழைத்த தலைமைக்குரு, ‘இன்று நீ தனியாக வெளியில் சென்று நடந்துவிட்டு வா’ என்றார். ஊருக்குள் நடந்து சென்ற இளைஞர், வழியில் ஒரு மூதாட்டியைப் பார்த்தார். ஒரு மரத்தடியில் அமர்ந்து இருந்த மூதாட்டியின் காலருகே திடீரென, அந்த மரத்திலிருந்து ஒரு காய்ந்த மட்டை விழுந்தது. பயந்து போன இளைஞர், அம்மூதாட்டியிடம் கேட்டார், ' இப்படி அச்சப்படாமல் அமர்ந்திருக்கிறீர்களே, எப்படி உங்களால் முடிகிறது?' என்று. இவரை அண்ணாந்துப் பார்த்த அந்த மூதாட்டி சொன்னார், 'இன்று இல்லாவிட்டாலும் நாளையாவது நானும் இந்த இலையைப்போல விழுந்துவிடுவேன் என்பதைப் புரிந்து கொண்டுள்ளேன். பின் எதற்குப் பெருமை,கர்வம், பயம் எல்லாம்? காய்ந்த இலையைக் காற்று உதைத்து எல்லாத் திசைகளிலும் மாறி மாறி அடித்துச் செல்வதைக் காண்கிறேன். நாளை அது சாம்பலாகிவிடும். நானும் அந்த இலையைப் போன்றே அலைவேன். நான் என்பது எனக்கு இனி இங்கில்லை. இதை இந்த காய்ந்த இலையிலிருந்து கற்றுக்கொண்டேன்' என்று. துறவுமடத்தில் பெறமுடியாத ஞானத்தை அந்தத் தாயிடமிருந்து கற்றுக்கொண்டார் அந்த இளைஞர். (ஆதாரம் : வத்திக்கான் வானொலி) [2017-08-12 22:21:46]


கொலம்பியத் திருத்தூதுப் பயண அதிகாரப்பூர்வமான பாடல்

வருகிற செப்டம்பர் மாதம் 6ம் தேதி முதல் 11ம் தேதி முடிய, திருத்தந்தை பிரான்சிஸ் அவர்கள், கொலம்பியா நாட்டில் மேற்கொள்ளும் திருத்தூதுப் பயணத்திற்காக இயற்றப்பட்டுள்ள அதிகாரப்பூர்வமான பாடல், ஆகஸ்ட் 8, இச்செவ்வாயன்று வெளியிடப்பட்டது. "திருத்தந்தைக்காக பாடுவோம்" என்ற பெயரில் கொலம்பியத் தலத்திருஅவை ஏற்பாடு செய்திருந்த ஒரு போட்டிக்கென அனுப்பப்பட்ட பல பாடல்களில், கார்லோஸ் கொர்வாக்கோ என்பவர் இயற்றிய, "நாம் முதலடியை எடுத்து வைப்போம்" என்ற பாடல் தெரிவு செய்யப்பட்டது என்று அறிவிக்கப்பட்டுள்ளது. "நீர் எங்களுக்கு ஒளியை, அமைதியை, உண்மையின் வார்த்தைகளை கொணர்வதால், எமது மக்கள், இறைவனின் உண்மையான விடுதலையைக் காண்பர்" என்ற மையக்கருத்துடன் அமைந்துள்ள இப்பாடல், திருத்தந்தை பிரான்சிஸ் அவர்கள் பங்கேற்கும் அனைத்து நிகழ்வுகளிலும் பாடப்படும் என்று அறிவிக்கப்பட்டுள்ளது. இந்தப் பாடலின் YouTube காணொளியை, கொலம்பியா நாட்டில் பணியாற்றும், திருநற்கருணையின் தூதர்கள் என்ற துறவு சபையின் அருள் சகோதரிகள் உருவாக்கியுள்ளனர் என்று Zenit கத்தோலிக்கச் செய்தி கூறியுள்ளது. (ஆதாரம் : Zenit / வத்திக்கான் வானொலி) [2017-08-12 22:15:14]


மறைக்கல்வி உரை : இறைமன்னிப்பு, நம்பிக்கையின் உந்துசக்தி

உரோமையில் இந்நாள்களில் கோடையின் தாக்கம் அதிகமாகவே இருக்கின்றது. இப்புதன் காலையில் அருளாளர் திருத்தந்தை ஆறாம் பவுல் அரங்கத்தில் ஆயிரக்கணக்கான பன்னாட்டுப் பயணிகள், திருத்தந்தை பிரான்சிஸ் அவர்களின் புதன் பொது மறைக்கல்வி உரையைக் கேட்பதற்கு கூடியிருந்தனர். பாவியான ஒரு பெண் நறுமணத் தைலம் பூசுதல் என்ற நற்செய்திப் பகுதி, லூக்கா நற்செய்திலிருந்து முதலில் வாசிக்கப்பட்டது (லூக்.7:44,47-50). “இயேசு அப்பெண்ணின் பக்கம் திரும்பி, சீமோனிடம், “இவரைப் பார்த்தீரா? நான் உம்முடைய வீட்டிற்குள் வந்தபோது நீர் என் காலடிகளைக் கழுவத் தண்ணீர் தரவில்லை; இவரோ தம் கண்ணீரால் என் காலடிகளை நனைத்து அவற்றைத் தமது கூந்தலால் துடைத்தார். ஆகவே நான் உமக்குச் சொல்கிறேன்; இவர் செய்த பல பாவங்கள் மன்னிக்கப்பட்டன. ஏனெனில் இவர் மிகுதியாக அன்பு கூர்ந்தார். குறைவாக மன்னிப்புப் பெறுவோர் குறைவாக அன்பு செலுத்துவோர் ஆவர்” என்றார். பின்பு அப்பெண்ணைப் பார்த்து, “உம் பாவங்கள் மன்னிக்கப்பட்டன”என்றார். “பாவங்களையும் மன்னிக்கும் இவர் யார்?” என்று அவரோடு பந்தியில் அமர்ந்திருந்தவர்கள் தங்களுக்குள் சொல்லிக்கொண்டார்கள். இயேசு அப்பெண்ணை நோக்கி, “உமது நம்பிக்கை உம்மை மீட்டது; அமைதியுடன் செல்க”என்றார்”. பரிசேயரான சீமோனின் வீட்டில், இயேசு உணவருந்தச் சென்றபோது அங்கிருந்தவர்கள், “பாவங்களையும் மன்னிக்கும் இவர் யார்?” என்று கேட்டதை இந்த நற்செய்திப் பகுதியில் வாசிக்கக் கேட்டோம் என, இத்தாலியத்தில் முதலில் உரையைத் தொடங்கினார் திருத்தந்தை பிரான்சிஸ். கிறிஸ்தவ நம்பிக்கை என்ற நம் மறைக்கல்வித் தொடரில், இறைவனின் இரக்கம், கிறிஸ்தவ நம்பிக்கைக்கு உந்து சக்தியாக உள்ளது என்பது பற்றி இன்று நோக்குவோம். இயேசு, பாவியான பெண்ணை மன்னித்தபோது, அவருடைய செயல் துர்மாதிரிகைக்குக் காரணமாக அமைந்திருந்தது. ஏனென்றால், இச்செயல், அக்காலத்திய ஆதிக்கவர்க்கத்தின் எண்ணத்தைப் புரட்டிப்போடுவதாக இருந்தது. இயேசு, பாவிகளைப் புறக்கணிப்பதற்குப் பதிலாக, தீண்டத்தகாதவர்களாக, சமூகத்தில் ஒதுக்கப்பட்டவர்களாக இருந்த அவர்களை அரவணைக்கிறார். இயேசுவில் ஊற்றெடுத்த கருணையே, அவர் உள்ளத்தின் ஆழத்தில் அதிர்வலைகளை ஏற்படுத்தி, இறைவனின் இரக்கமுள்ள இதயத்தை வெளிப்படுத்தியது. நம்பிக்கையிழந்த சூழல்களில் வாழ்வோருக்கும், வாழ்வில் பல தவறுகளை இழைத்தவர்களுக்கும்கூட, இயேசுவின் இந்த வியத்தகு மனப்பான்மை, நம்பிக்கைக்கு உறுதியான அடித்தளத்தை அமைத்துக் கொடுக்கின்றது மற்றும், இது கிறிஸ்தவத் தனித்துவத்தையும் குறித்து நிற்கின்றது. இறைவனின் மன்னிப்பை அனுபவித்துள்ள நாம், இறைவனின் இந்த இரக்கம், கிறிஸ்துவின் சிலுவை மரணம் என்ற மாபெரும் விலையால் வாங்கப்பட்டது என்பதை மறக்கும் ஆபத்தைத் தவிர்க்க வேண்டும். நம் ஆண்டவர், நோயுற்றோரைக் குணமாக்கினார் என்பதற்காக அல்ல, மாறாக, இறைவனால் மட்டுமே ஆற்றக்கூடியதாக இருந்த, பாவங்களை மன்னிக்கும் பண்பை வெளிப்படுத்தியதற்காக இறந்தார். இந்த இறை இரக்கம், நம்மையும், நம் நம்பிக்கையையும் மாற்றம் பெறச் செய்கின்றது. எவரையும் புறக்கணிக்காத நம் ஆண்டவர், உலகுக்கு அவரின் இரக்கத்தைப் பறைசாற்றும் பணியை நமக்கு அருளுகிறார். இவ்வாறு, “இறைமன்னிப்பு : நம்பிக்கையின் உந்துசக்தி” என்ற தலைப்பில், தன் புதன் மறைக்கல்வி உரையை நிறைவு செய்த திருத்தந்தை பிரான்சிஸ் அவர்கள், திருப்பயணிகள் அனைவரும், சொந்த இல்லங்களிலும், சமூகங்களிலும், இறை இரக்கம், மற்றும், கிறிஸ்தவ நம்பிக்கையின் அடையாளங்களாக வாழ்வதற்கு ஆண்டவர் இயேசுவிடம் தான் செபிப்பதாகக் கூறினார். பின்னர், இஞ்ஞாயிறன்று, நைஜீரியாவில் ஓர் ஆலயத்திற்குள் அப்பாவி மக்கள் கொல்லப்பட்டது மற்றும், இப்புதன் காலையில், மத்திய ஆப்ரிக்கக் குடியரசில் கிறிஸ்தவர்க்கெதிராக இடம்பெற்ற வன்முறைகள் குறித்து, தனது ஆழ்ந்த கவலையை தெரிவித்தார். அனைத்துவிதமான காழ்ப்புணர்வுகளும், வன்முறையும் நிறுத்தப்பட்டு, வெட்கத்துக்குரிய இந்தக் குற்றங்கள், குறிப்பாக, விசுவாசிகள் செபிக்கக் கூடியிருக்கும் வழிபாட்டுத்தலங்களில் நடத்தப்படும் குற்றங்கள், மீண்டும் இடம்பெறாமல் இருக்குமாறு அழைப்பு விடுத்து, திருப்பயணிகளோடு சேர்ந்து அருள்நிறைந்த மரியே வாழ்க என்ற செபத்தை செபித்தார். இறுதியில் எல்லாருக்கும் தன் அப்போஸ்தலிக்க ஆசீரையும் அளித்தார் திருத்தந்தை பிரான்சிஸ் . (ஆதாரம் : வத்திக்கான் வானொலி) [2017-08-11 00:19:07]


இயேசுவுக்கு நாம் உயர் மதிப்புள்ளவர்கள் - திருத்தந்தை

"இயேசு நம்மை தனிமையில் விடுவதில்லை, ஏனெனில், அவருக்கு நாம் உயர் மதிப்புள்ளவர்கள்" என்று சொற்கள், திருத்தந்தையின் டுவிட்டர் பக்கத்தில் ஆகஸ்ட் 10, இவ்வியாழன் இடம்பெற்ற செய்தியில் காணப்பட்டன. திருத்தந்தையின் டுவிட்டர் செய்திகள், ஒவ்வொரு நாளும், ஆங்கிலம், இஸ்பானியம், இத்தாலியம், ஜெர்மன், பிரெஞ்சு, போர்த்துகீசியம், போலந்து, இலத்தீன் மற்றும் அரேபியம் ஆகிய ஒன்பது மொழிகளில் வெளியாகிவருகின்றன. @pontifex என்ற முகவரியுடன் திருத்தந்தை வெளியிட்டுவரும் டுவிட்டர் செய்திகள், ஆகஸ்ட் 10ம் தேதி முடிய 1265 என்ற எண்ணிக்கையில் உள்ளன என்பதும், இச்செய்திகளை ஆங்கிலத்தில் பின்பற்றுவோரின் எண்ணிக்கை, 1 கோடியே 21 இலட்சம் என்பதும் குறிப்பிடத்தக்கன. டுவிட்டர் செய்திகளின் தாக்கங்கள் குறித்து புள்ளிவிவரங்களை வெளியிட்டு வரும் Twiplomacy நிறுவனத்தின் கணிப்புப்படி, திருத்தந்தை பிரான்சிஸ் அவர்களின் டுவிட்டர் செய்திகளை ஒன்பது மொழிகளில் பின்பற்றுவோரின் எண்ணிக்கை, 3 கோடியே 40 இலட்சத்திற்கு அதிகம் என்று சொல்லப்படுகிறது. இன்று உலகெங்கும், அரசியல் மற்றும் மத தளங்களில் பணியாற்றும் தலைவர்களில் 856 பேர், டுவிட்டர் செய்திகள் வழியே மக்களை தொடர்பு கொண்டுவருகின்றனர் என்றும், இச்செய்திகளை பின்பற்றுவோர் எண்ணிக்கையில், திருத்தந்தை பிரான்சிஸ் அவர்கள் முன்னணியில் உள்ளார் என்றும் வலைத்தள செய்திகள் கூறுகின்றன. (ஆதாரம் : வத்திக்கான் வானொலி) [2017-08-11 00:13:09]


ஒன்றிப்பிற்காக இயேசுவைப்போல் உழையுங்கள்

வரும் ஆண்டு ஜனவரியில் பெரு நாட்டிற்கு திருப்பயணம் மேற்கொள்ள உள்ளதை முன்னிட்டு, அம்மக்களுக்கு சிறப்பு ஒலி ஒளிச் செய்தியொன்றை அனுப்பியுள்ளார், திருத்தந்தை பிரான்சிஸ். லீமா நகர் பேராயர் கர்தினால் Juan Luis Cipriani Thorne அவர்கள் வழியாக திருத்தந்தை அனுப்பியுள்ள இச்செய்தியில், பெரு நாட்டு மக்கள் அனைவரும், ஒன்றிப்பிற்காக உழைக்கவேண்டும் என அழைப்பு விடுத்துள்ளார். எண்ணற்ற வளங்களைக் கொண்டுள்ள பெரு நாட்டில், திருத்தந்தைக்கு விருப்பமான புனிதர்கள் என்ற வளமும் நிறையவே உள்ளது என தன் செய்தியில் கூறியுள்ள திருத்தந்தை பிரான்சிஸ் அவர்கள், தென் அமெரிக்கத் திருஅவையைக் கட்டியெழுப்ப, பெரு நாட்டுப் புனிதர்கள் பெருமளவில் உதவியுள்ளனர் எனபதையும் சுட்டிக்காட்டியுள்ளார். பிரிவினைகளால் பாதிக்கப்பட்டிருந்த சமூகத்தை மீண்டும் கட்டியெழுப்ப, இயேசுவின் பாதையில் வழிநடந்த அவர்களை எடுத்துக்காட்டுகளாகக் கொண்டு, பெரு நாட்டு மக்கள் இன்றும் செயல்படவேண்டும் என கேட்டுக்கொண்டுள்ளார், திருத்தந்தை பிரான்சிஸ். நம்பிக்கையின்மையோடும், கசப்புணர்வுகளோடும் வருங்காலத்தை நோக்குபவர்கள், கிறிஸ்தவர்களாக இருக்க முடியாது என்ற திருத்தந்தை, நம்பிக்கை, மற்றும் ஒன்றிப்பிற்காக, பெரு நாட்டு மக்கள் ஒவ்வொருவரும் உழைக்கவேண்டும் என அந்நாட்டிற்கு அனுப்பியுள்ள செய்தியில் கேட்டுக் கொண்டுள்ளார். (ஆதாரம் : வத்திக்கான் வானொலி) [2017-08-08 23:20:10]


சொல்லால், வாழ்வால் நற்செய்தியை அறிவித்தவர் புனித தோமினிக்

“நற்செய்திப் பணியில், தன் சொல்லாலும், வாழ்வாலும் போதித்த புனித தோமினிக் அவர்களுக்காக, இன்று இறைவனுக்கு மகிமையளிப்போம்” என, திருத்தந்தை பிரான்சிஸ் அவர்கள், இச்செவ்வாயன்று கூறியுள்ளார். புனித தோமினிக் என்ற சாமிநாதர் அவர்களின் விழாவான ஆகஸ்ட் 08, இச்செவ்வாயன்று, திருத்தந்தை பிரான்சிஸ் அவர்கள் வெளியிட்ட டுவிட்டர் செய்தியில், இப்புனிதர் ஆற்றிய நற்செய்திப்பணிக்காக இறைவனை மகிமைப்படுத்துவோம் எனக் கூறியுள்ளார். புனித தோமினிக் அவர்கள், 1170ம் ஆண்டில் இஸ்பெயின் நாட்டின் கலரோகா என்ற இடத்தில் பிறந்து, 1221ம் ஆண்டில் காலமானார். இவரது காலத்தில், ஆல்பிஜென்ஸ் தப்பறைக் கொள்கை வளர்ந்து வந்தது. உலகில் நன்மைக்கு ஒரு காரணகர்த்தா உண்டு. பருப்பொருள் என்பதனைத்தும், தீயவனுக்குரியது என்பதே அக்கொள்கை. இந்தத் தவறான கொள்கையின் அடிப்படையில், அக்கொள்கையைப் பின்பற்றியவர்கள், கிறிஸ்து மனிதஉரு எடுத்ததையும், அருளடையாளங்களையும் மறுத்தனர். மனித இன உற்பத்தியும் கூடாதென அவர்கள் வாதாடினர். புனித தோமினிக் அவர்கள், தன் சொல்லாலும், வாழ்வாலும் இக்கொள்கையினர் மத்தியில் நற்செய்தி அறிவித்து, அவர்களை மனந்திருப்பினார். இந்த தன் பணிக்கு உதவியாக, 1215ம் ஆண்டில், போதகர்-துறவற (Order of Preachers O.P) என்ற சபையை நிறுவினார் புனித தோமினிக். (ஆதாரம் : வத்திக்கான் வானொலி) [2017-08-08 23:15:00]


புதியதாய் மலர மன்னிப்பும், நாளையை நோக்க நம்பிக்கையும் தேவை

மன்னிப்பின் மேன்மையையும் முக்கியத்துவத்தையும் வலியுறுத்தி இத்திங்களன்று தன் டுவிட்டர் செய்தியை வெளியிட்டுள்ளார் திருத்தந்தை பிரான்சிஸ். 'மன்னிப்பு, நம் இதயங்களை சுதந்திரமானவைகளாக மாற்றி, நாம் புதிதாக துவங்க உதவுகிறது. மன்னிப்பு, நம்பிக்கையை வழங்குகிறது. மன்னிப்பு இல்லாமல் திருஅவை கட்டியெழுப்பப்பட முடியாது' என உரைக்கிறது திருத்தந்தை பிரான்சிஸ் அவர்கள் திங்களன்று வெளியிட்ட டுவிட்டர் செய்தி. மேலும், நம்பிக்கை பற்றி தன் ஞாயிறு டுவிட்டர் பக்கத்தில் எழுதியுள்ள திருத்தந்தை பிரான்சிஸ் அவர்கள், 'தன்னை இருளுக்குள் வைத்து பூட்டிக்கொள்ளாமல், கடந்த காலங்களிலேயே வாழ்ந்து கொண்டிராமல், நாளை என்பதை காணவல்ல இதயத்தின் நற்பண்பே, நம்பிக்கை' என கூறியுள்ளார். மேலும், இஞ்ஞாயிறன்று, அருளாளர், திருத்தந்தை 6ம் பவுல் அவர்கள் இறந்ததன் 39ம் ஆண்டு நினைவு நாளையொட்டி, ஞாயிறு காலை தூய பேதுரு பேராலய அடிநில கல்லறைக்குச் சென்று, திருத்தந்தை 6ம் பவுலின் கல்லறையை தரிசித்தார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-08-07 19:31:43]


இயேசுவைச் சந்திக்க,சகோதரர்களுக்கு உதவ அழைக்கும் தோற்றமாற்றம்

"இஞ்ஞாயிறு நாம் சிறப்பித்த, இயேசுவின் தோற்றமாற்ற திருவிழா, இயேசுவை சந்திக்கவும், நம் சகோதரர்களுக்கு பணியாற்றவும் நமக்கு அழைப்புவிடுப்பதாக உள்ளது என தன் ஞாயிறு மூவேளை செப உரையில் எடுத்துரைத்தார், திருத்தந்தை பிரான்சிஸ். ஐரோப்பா தற்போது அனுபவித்துவரும் கோடைவிடுமுறை குறித்தும் தன் மூவேளை செப உரையில் குறிப்பிட்டத் திருத்தந்தை, நம்முடைய ஆன்மீகப் பாதையை ஆழப்படுத்தவும், உடலுக்கும், ஆன்மாவுக்கும், புது சக்தியை வழங்கவும் உதவும் இந்த விடுமுறை காலத்தில், நோயாலும், பணியின் காரணமாகவும், பொருளாதார காரணங்களுக்காகவும், தங்கள் விடுமுறைக் காலத்தை வெளியில் சென்று அனுபவிக்க முடியாமல் இருக்கும் மக்களைக் குறித்து சிந்திப்போம் எனவும் கூறினார். அழகையும், வனப்பையும், மகிழ்வையும் நோக்கி இட்டுச் செல்லும், நற்செய்தி வழங்கும் அமைதியையும் புத்துணர்வையும் நாம் மீண்டும் கண்டுகொள்வோமாக, என உரைத்த திருத்தந்தை பிரான்சிஸ் அவர்கள், தாபோர் மலைக்கு மூன்று சீடர்களும் ஏறிச் சென்றது, நாமும் இவ்வுலக இன்பங்களை விட்டு விலகி, இயேசுவைக் குறித்து தியானிக்க மேலெழும்பிச் செல்லவேண்டும் என்பதைக் குறித்து நிற்கிறது எனவும் கூறினார். இயேசுவின் தோற்றமாற்றத்தைக் கண்ட சீடர்கள், மலையிலிருந்து இறங்கி வரும்போது, தங்கள் கண்களிலும் இதயத்திலும் மாற்றம் பெற்றவர்களாக திரும்பி வந்ததைப்போல், அவர்களின் பாதையை நாமும் பின்பற்றவேண்டும் என மேலும் அழைப்பு விடுத்தார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-08-07 19:25:32]


திருத்தந்தை : மனிதர்கள், மதிப்போடு ஏற்கப்படவேண்டிய கொடைகள்

“மற்ற மனிதர்கள், குறிப்பாக, அவர்கள் வலிமையற்றவராகவும், நலிந்தோராகவும் இருக்கும்போது, மதிப்போடு ஏற்கப்படவேண்டிய கொடைகள், ஏனென்றால், கிறிஸ்து, அவர்களில் நம்மைச் சந்திக்க வருகிறார்” என்ற வார்த்தைகள், திருத்தந்தை பிரான்சிஸ் அவர்களின் டுவிட்டரில், இச்சனிக்கிழமையன்று வெளியாயின. மேலும், அமெரிக்க ஐக்கிய நாடு மற்றும் கானடாவிலுள்ள அமைதியின் அரசி சீரோ-மலங்கரா மறைமாவட்டத்திற்கு, ஆயர் Philipose Mar Stephanos Thottathil அவர்களை, இச்சனிக்கிழமையன்று நியமித்துள்ளார், திருத்தந்தை பிரான்சிஸ். ஆயர் Philipose Thottathil அவர்கள், இந்நாள்வரை, கேரளாவின் Tiruvalla மறைமாவட்டத்தின் துணை ஆயராகப் பணியாற்றியவர். இன்னும், இச்சனிக்கிழமையன்று, ஐரோப்பா மற்றும், ஓசியானியாவில் வாழும் சீரோ-மலங்கரா வழிபாட்டுமுறை விசுவாசிகளுக்குப் பொறுப்பாளராக, ஆயர் John Kochuthundil அவர்களை நியமித்துள்ளார், திருத்தந்தை பிரான்சிஸ். ஆயர் John Kochuthundil அவர்கள், சீரோ-மலங்கரா திருஅவையின் தலைமையகத்தில் ஆயராகப் பணியாற்றி வந்தவர். மேலும், எல் சால்வதோர் நாட்டின் அருளாளர் பேராயர் ஆஸ்கர் ரொமெரோ அவர்கள் பிறந்ததன் நூறாம் ஆண்டு நிறைவு விழாவில் தனது பிரதிநிதியாகக் கலந்துகொள்வதற்கு, சிலே நாட்டின் சந்தியாகோ கர்தினால், Andrello Ricardo Ezzati அவர்களை நியமித்துள்ளார், திருத்தந்தை பிரான்சிஸ். இந்நிகழ்வு, சான் சால்வதோரில், ஆகஸ்ட் 15ம் தேதி நடைபெறும். (ஆதாரம் : வத்திக்கான் வானொலி) [2017-08-05 21:29:04]


பக்க இலக்கங்களை அழுத்தி எல்லா செய்திகளையும் பார்வையிடவும்