வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



திருத்தந்தை: துன்புறுவோரிடம், இயேசு பிரசன்னமாகியிருக்கிறார்

ட்டாயத்தின் பேரில் காணாமற்போக வைக்கப்படும் மக்களை நினைவுகூரும் உலக நாள், ஆகஸ்ட் 30, இப்புதனன்று கடைபிடிக்கப்படுவதையொட்டி, திருத்தந்தை பிரான்சிஸ் அவர்கள், துன்புறும் மக்களை மையப்படுத்தி, தன் டுவிட்டர் செய்தியை வெளியிட்டுள்ளார். "அவரைப் போல இன்று துன்புறும் பல சகோதர, சகோதரிகளிடம், இயேசு பிரசன்னமாகியிருக்கிறார்" என்ற வார்த்தைகள், திருத்தந்தையின் டுவிட்டர் செய்தியில் இப்புதனன்று பதிவு செய்யப்பட்டுள்ளன. மக்களிடையே அச்சத்தை உருவாக்கும் நோக்கத்துடன், எவ்வித தடயமும் இன்றி தனி மனிதர்களைக் காணாமற்போகச் செய்யும் கொடுமைகளை, அரசு உட்பட, பல அமைப்புக்கள் மேற்கொள்வதை கண்டித்து, ஐ.நா. அவை 2010ம் ஆண்டு தீர்மானம் ஒன்றை நிறைவேற்றியது. இத்தீர்மானத்தின் விளைவாக, 2011ம் ஆண்டு முதல், ஆகஸ்ட் 30ம் தேதி, கட்டாயத்தின் பேரில் காணாமற்போக வைக்கப்படும் மக்களை நினைவுகூரும் உலக நாள் கடைபிடிக்கப்பட்டு வருகிறது. (ஆதாரம் : வத்திக்கான் வானொலி) [2017-08-31 01:09:19]


மியான்மாருக்கு அமைதியைக் கொணரும் தூதராக வரும் திருத்தந்தை

2016ம் ஆண்டு மியான்மார் நாட்டில் கிறிஸ்தவம் காலூன்றியதன் 500ம் ஆண்டு கொண்டாடப்பட்டபோது உண்டான மகிழ்வைவிட, தற்போது, திருத்தந்தை மியான்மார் வருகிறார் என்ற செய்தி, மக்களிடையே பெரும் மகிழ்வை உருவாக்கியுள்ளது என்று மியான்மார் தலத்திருஅவை அதிகாரி ஒருவர் கூறினார். யாங்கூன், திருப்பீடத் தூதரகத்தில் செயலராகப் பணியாற்றும் அருள்பணி தாரியோ பவிசா (Dario Pavisa) அவர்கள், நவம்பர் 27ம் தேதி முதல் 30ம் தேதி வரை, திருத்தந்தை பிரான்சிஸ் அவர்கள் மியான்மார் நாட்டில் மேற்கொள்ளவிருக்கும் திருத்தூதுப் பயணம் குறித்து, செய்தியாளர்களிடம் பேசியவேளையில் இவ்வாறு கூறினார். மியான்மார் நாட்டில் அமைதியைக் கொணரும் ஒரு தூதராக வரும் திருத்தந்தை பிரான்சிஸ் அவர்கள், இந்நாட்டு கிறிஸ்தவர்கள் அனைவரும் உலகெங்கிலும் ஒப்புரவை உருவாக்கும் தூதர்களாக மாறவேண்டும் என்ற செய்தியைத் தர வருகிறார் என்று அருள்பணி பவிசா அவர்கள் எடுத்துரைத்தார். (ஆதாரம் : வத்திக்கான் வானொலி) [2017-08-31 01:04:49]


அன்னை தெரேசாவுக்கு அர்ப்பணிக்கப்பட உள்ள புதிய கோவில்

அன்னை தெரேசாவின் திருவிழா அன்று அன்னையின் பெயரால் கோசொவோ (Kosovo) நாட்டின் பிரிஸ்டினா எனுமிடத்தில் திறக்கப்படவிருக்கும் கோவில் திருநிலைப்பாட்டு நிகழ்வுக்கு, தன் பிரதிநிதியாக கர்தினால் ஒருவரை நியமித்து, செய்தி ஒன்றையும் அனுப்பியுள்ளார், திருத்தந்தை பிரான்சிஸ். தற்போது இருக்கும் கோசொவோ நாட்டிற்கு அருகிலேயே பிறந்த அன்னை தெரேசாவுக்கு, கோசொவோவில் வாழும் அல்பேனிய மக்கள் வெளியிட்ட விருப்பத்தின்பேரில் கட்டப்பட்டுள்ள இக்கோவில், கோசொவோ தலைநகர் பிரிஸ்டினாவில் செப்டம்பர் 5ம் தேதி திருநிலைப்படுத்தப்பட உள்ளது. அல்பேனிய கர்தினால் எர்னெஸ்டோ சிமோனி அவர்களை, தன் பிரதிநிதியாக நியமித்து, இத்திருநிலைப்பாட்டு நிகழ்வுக்குச் செய்தி ஒன்றையும் அனுப்பியுள்ள திருத்தந்தை பிரான்சிஸ் அவர்கள், இத்தகைய கொண்டாட்டங்கள், மக்களின் விசுவாச வாழ்வை மேலும் பலப்படுத்த உதவுவதாக இருக்கட்டும் என நம்பிக்கையையும் தெரிவித்துள்ளார். அன்னை மரியா மற்றும் அன்னை தெரேசாவின் பரிந்துரைகள், பிரிஸ்டினா பகுதி மக்களுக்கு என்றென்றும் இருக்கும் என மேலும் தன் செய்தியில் கூறியுள்ளார் திருத்தந்தை. செர்பியாவிலிருந்து 2008ம் ஆண்டு, சுதந்திர நாடாக பிரிவதாக அறிவித்து, சில நாடுகளாலேயே அங்கீகரிக்கப்பட்டுள்ள கோசொவோ நாட்டின் தலைநகரில் பெரும்பான்மையாக வாழும் அல்பேனிய மக்களிடையே, அன்னை தெரேசாவிற்கு அர்ப்பணிக்கப்பட்ட இக்கோவில், அவ்வன்னை இறந்த நாளும், திருநாளும் இணைந்துவரும் செப்டம்பர் 5ம் தேதி திருநிலைப்படுத்தப்பட்டு, திறக்கப்பட உள்ளது. (ஆதாரம் : வத்திக்கான் வானொலி) [2017-08-30 00:01:56]


பாசமுள்ள பார்வையில் – துன்பங்களில் பங்கேற்கும் அன்னை மரியா

பல நூற்றாண்டுகளாக, கத்தோலிக்கத் திருஅவையில், இரு இதயங்கள், மக்களின் வணக்கத்தைப் பெற்று வந்துள்ளன - இயேசுவின் திரு இதயம், மரியாவின் மாசற்ற இதயம். முள்ளால் சூழப்பட்டு, கொழுந்துவிட்டெரியும் இதயமாக, இயேசுவின் திரு இதயமும், வாளால் ஊடுருவப்பட்டு, மலர்களால் சூழப்பட்டு, பற்றியெரியும் இதயமாக, மரியாவின் மாசற்ற இதயமும், மக்களின் வணக்கத்தைப் பெற்றுள்ளன. அன்னை மரியாவும், யோசேப்பும், இயேசுவை, கோவிலில் காணிக்கையாக ஒப்புக்கொடுக்கச் சென்ற வேளையில், அங்கு வந்த முதியவர் சிமியோன், அன்னை மரியாவைப் பார்த்து, "உமது உள்ளத்தையும் ஒரு வாள் ஊடுருவிப் பாயும்" (லூக்கா 2: 35) என்று கூறியதையும், மரியன்னை, தன் வாழ்வில் அனுபவித்த ஏழு துயர்நிறை தருணங்களை நினைவுறுத்தவும், வாள் ஊடுருவிய இதயமாக, மரியன்னையின் இதயம் சித்திரிக்கப்பட்டுள்ளது. சிமியோன் சொன்ன கடினமான கூற்று, குழந்தை இயேசுவைத் தூக்கிக்கொண்டு எகிப்துக்கு தப்பித்துச்சென்றது, சிறுவன் இயேசு, எருசலேம் திருவிழாவில் காணாமற்போனது, சிலுவை சுமந்து சென்ற இயேசுவைச் சந்தித்தது, சிலுவையில் அறையப்பட்டு துடித்த இயேசுவைக் கண்டது, இறந்த இயேசுவை மடியில் கிடத்தி அழுதது, இயேசுவை அடக்கம் செய்தது என்று, ஏழு கொடுமைகளை மரியா தன் இதயத்தில் தாங்கி நின்றார் என்பதை, அவர் இதயத்தில் பாய்ந்து நிற்கும் ஏழு வாள்கள் காட்டுகின்றன. புலம்பெயர்வோர், குழந்தைகளைத் தொலைத்துவிட்டு துன்புறுவோர், காவல்துறையாலும், வன்முறை கும்பல்களாலும், தன் மகனோ, மகளோ, துன்புறுத்தப்படுவதைக் காண்போர், இளம் வயதில் இறந்துபோகும் மகனையோ, மகளையோ அடக்கம் செய்வோர் என்று... பெற்றோர், துயருறும் தருணங்களில், மரியன்னை, அவர்களது துன்பங்களில் பங்கேற்கிறார். மரியாவின் மாசற்ற இதயத் திருவிழா, பல ஆண்டுகளாக, ஆகஸ்ட் 22ம் தேதி, கொண்டாடப்பட்டது. தற்போது, இத்திருவிழா, இயேசுவின் திரு இதயத் திருவிழாவைத் தொடர்ந்துவரும் சனிக்கிழமையில் சிறப்பிக்கப்படுகிறது. ஆகஸ்ட் 15ம் தேதி விண்ணேற்படைந்த மரியன்னை, அரசியாக முடிசூட்டப்பட்டத் திருவிழா, ஆகஸ்ட் 22ம் தேதி சிறப்பிக்கப்படுகிறது. (ஆதாரம் : வத்திக்கான் வானொலி) [2017-08-28 02:09:14]


மதங்களைத் தாண்டி மனிதர்களாக வாழ்ந்து அன்புகூர்வோம்

கடந்த வாரம் வெள்ளியன்று ஃபின்லாந்தின் Turku எனுமிடத்தில் இடம்பெற்ற தாக்குதலைத் தொடர்ந்து, அவ்விடத்தில் இறந்தோருக்கு மரியாதை செலுத்தி, செபிக்க, இவ்வாரம் அங்கு வந்த மக்களுக்கு, ஆன்மீகச் சேவையாற்றி வருகிறது தலத்திருஅவை. மக்கள் அமைதியான முறையில் இவ்விடத்திற்கு வந்து செபித்துவிட்டுச் சென்றாலும், அவர்களின் மனங்களில் இன்னும் துயரம் தங்கியிருப்பதைக் காணமுடிகிறது என உரைக்கும் செய்தி நிறுவனங்கள், மொரொக்கோ நாட்டைச் சேர்ந்த 18 வயது இளைஞரால் இரு அப்பாவி ஃபின்லாந்து பெண்கள் ஏன் கொல்லப்பட்டார்கள், மற்றும், எட்டு பேர் காயப்படுத்தப்பட்டார்கள் என்பதற்கு இன்னும் விடைகிடைக்காமல் கத்தோலிக்கர்கள் திணறுவதாக Turku பங்குதளத்தின் அருள்பணி Jean Claude Kabeza அவர்கள் தெரிவித்துள்ளதையும் சுட்டிக்காட்டுகின்றன. ஃபின்லாந்தில் வாழும் 55 இலட்சம் மக்கள் தொகையில், மூன்றில் ஒரு பகுதியாக, வெளிநாட்டு குடியேற்றதாரர்கள் வாழும் நிலையில், மதங்களைத் தாண்டி, ஒருவருக்கொருவர் அன்பு கூர்ந்து உதவிச் செய்பவர்களாக மக்கள் வாழவேண்டும் என, அந்நாட்டு கிறிஸ்தவத் தலைவர்கள் அனைத்து மக்களிடமும் விண்ணப்பித்துள்ளனர். (ஆதாரம் : வத்திக்கான் வானொலி) [2017-08-28 02:02:24]


முடிசூட்டிய அரசி நம்முடன் இணைந்து நடந்து வருகிறார்

போலந்தின் செஸ்டகோவா மரியன்னை திருவிழாவை முன்னிட்டு, அத்திருத்தலத்தில் கூடியிருக்கும் திருப்பயணிகள் அனைவருக்கும் தன் வாழ்த்துக்களை வெளியிட்டு, செய்தி ஒன்றை அனுப்பியுள்ளார், திருத்தந்தை பிரான்சிஸ். இவ்வாண்டு, செஸ்டகோவா மரியன்னை திருவிழாவுடன் இணைந்து, செஸ்டகோவாவின் யஸ்ன கோரா மரியன்னை திரு உருவத்திற்கு, திருத்தந்தையின் அங்கீகாரத்துடன் மணிமகுடம் சூட்டப்பட்டதன் 300ம் ஆண்டும் சிறப்பிக்கப்படுவதை தன் செய்தியில் சுட்டிக்காட்டியுள்ள திருத்தந்தை பிரான்சிஸ் அவர்கள், போலந்தின் இதயமாக செஸ்டகோவா இருப்பது என்பது, போலந்து நாடு ஒரு தாய்மைக்குரிய இதயத்தைக் கொண்டுள்ளது என்பதை சுட்டிக்காட்டுவதாக உள்ளது என தெரிவித்துள்ளார். போலந்து நாடு திருமுழுக்குப் பெற்றதன் 1050ம் ஆண்டுக் கொண்டாட்டங்களில் கலந்துகொள்ள, தான் அங்கு வந்ததை இன்றும் பசுமையுடன் நினைவுகூர்வதாக தன் செய்தியில் குறிப்பிட்டுள்ள திருத்தந்தை, முடிசூட்டப்பட்ட அரசியாகிய யஸ்ன கோரா அன்னைமரியா, தூரத்தில் வாழும் ஓர் அரசி அல்ல, மாறாக, மக்களோடு உடன் நடந்து வழி நடத்தும் ஒரு தாய் என மேலும் அதில் கூறியுள்ளார். யஸ்ன கோரா அன்னை முடிசூட்டப்பட்டதன் 300ம் ஆண்டை சிறப்பிக்கும் இவ்வேளையில், நாம் அனைவரும் அன்னையின் பாதுகாப்பை உணர்ந்து, நாம் எவரும் அனாதைகள் அல்ல என்பதை காட்டவேண்டும் எனவும், போலந்து மக்களுக்கான திருத்தந்தையின் செய்தியில் மேலும் கூறப்பட்டுள்ளது (ஆதாரம் : வத்திக்கான் வானொலி) [2017-08-27 01:55:39]


திருஅவையின் ஆண்களாக, பெண்களாக இருப்பது, தொடர்பின்...

தொடர்பு கொள்ளுதல், சந்திக்கும் கலாச்சாரத்தை வளர்த்தல் என்ற கருத்துக்களை எழுத்து வடிவிலும், உரைகளிலும் வலியுறுத்தி வரும் திருத்தந்தை பிரான்சிஸ் அவர்கள், இவ்வெள்ளியன்று வெளியிட்டுள்ள டுவிட்டர் செய்தியிலும் இக்கருத்தை மீண்டும் கூறியுள்ளார். "திருஅவையின் ஆண்களாக, பெண்களாக இருப்பது என்றால், தொடர்பின் ஆண்களாக, பெண்களாக இருப்பது என்று பொருள்" என்ற சொற்கள் திருத்தந்தையின் டுவிட்டர் செய்தியாக இவ்வெள்ளியன்று வெளியாயின. திருத்தந்தையின் டுவிட்டர் செய்திகள் வெளியாகும் வலைத்தளத்திற்கு தெரிவு செய்யப்பட்டுள்ள @pontifex என்ற பெயர், இலத்தீன் மொழியில், 'திருத்தந்தை' என்பதைக் குறிப்பதோடு, இச்சொல்லுக்கு, 'பாலம்' என்பதும் பொருளாக விளங்குவதால், இந்த வலைத்தளம், திருத்தந்தைக்கும், மக்களுக்கும் இடையே தொடர்புகளை வளர்க்கும் ஒரு பாலமாக விளங்குகிறது என்பது குறிப்பிடத்தக்கது. (ஆதாரம் : வத்திக்கான் வானொலி) [2017-08-26 00:43:00]


"வாழும் ஒரு திருஅவைக்கு, வாழும் ஒரு வழிபாடு" - திருத்தந்தை

மாற்றங்கள் தேவை என்ற உணர்வைப் பெற்றதும், அந்த மாற்றங்களை நோக்கி முயற்சிகளை மேற்கொள்வது முக்கியம் என்று, திருத்தந்தை பிரான்சிஸ் அவர்கள், தன்னைச் சந்திக்க வந்திருந்த மாநாட்டு உறுப்பினர்களிடம் கூறினார். ஆகஸ்ட் 21 இத்திங்கள் முதல், ஆகஸ்ட் 24, இவ்வியாழன் முடிய உரோம் நகரில் நடைபெற்ற 68வது தேசிய திருவழிபாட்டு வாரம் என்ற கூட்டத்தில் கலந்துகொண்ட 800க்கும் அதிகமான உறுப்பினர்களை, இவ்வியாழன் மதியம் வத்திக்கான் அருளாளர் ஆறாம் பவுல் அரங்கத்தில் சந்தித்தத் திருத்தந்தை, கத்தோலிக்கத் திருஅவையின் திருவழிபாடுகளில் நிகழ்ந்துள்ள மாற்றங்கள் குறித்து பேசினார். புனித திருத்தந்தை பத்தாம் பயஸ் அவர்களின் தூண்டுதலால், திருவழிபாட்டு இசையில் துவங்கிய மாற்றங்கள், திருத்தந்தை 12ம் பயஸ் அவர்கள் பரிந்துரைத்த மாற்றங்கள், ஆகியவை, இரண்டாம் வத்திக்கான் சங்கத்தின் வேளையில் இன்னும் தெளிவாக வெளிப்பட்டன என்பதை திருத்தந்தை பிரான்சிஸ் அவர்கள் தன் உரையில் சுட்டிக்காட்டினார். கத்தோலிக்கத் திருஅவையின் திருவழிபாடுகளில் துவக்கப்பட்ட மாற்றங்கள், இன்னும் தொடரவேண்டும் என்ற கருத்தை வெளியிட்ட திருத்தந்தை, 68வது திருவழிபாட்டு வாரத்திற்குத் தெரிவு செய்யப்பட்ட, "வாழும் ஒரு திருஅவைக்கு, வாழும் ஒரு வழிபாடு" என்ற மையக்கருத்தைக் குறித்த தன் எண்ணங்களைப் பகிர்ந்துகொண்டார். உயிர்த்த கிறிஸ்து வாழ்கிறார் என்பதாலேயே, திருஅவையும், திருவழிபாடும் வாழ்வு பெறுகிறது என்ற கருத்தை முதலில் பகிர்ந்துகொண்ட திருத்தந்தை, இந்த வழிபாடுகள் குருக்களை மையப்படுத்தாமல், இறை மக்களை மையப்படுத்தும்போது, இன்னும் அதிகமான உயிர்த்துடிப்பு பெறுகின்றன என்று எடுத்துரைத்தார். கத்தோலிக்கத் திருவழிபாடு, ஒரு கருத்தை மையப்படுத்தி நிகழ்வதல்ல, மாறாக, மக்களின் வாழ்வை மையப்படுத்தி நிகழ்கிறது என்பதைச் சுட்டிக்காட்டியத் திருத்தந்தை பிரான்சிஸ் அவர்கள், வழிபாடு, நமது வாழ்வையும் மாற்றும் சக்தி பெற்றதாக அமையவேண்டும் என்று வலியுறுத்திக் கூறினார். இத்தாலிய வழிபாட்டு நடவடிக்கை மையமும், தெய்வீகப் போதகரின் சீடர்களான அருள்சகோதரிகள் சபையும் இணைந்து, 68வது வழிபாட்டு வாரம் என்ற கூட்டத்தை உரோம் நகரில் ஏற்பாடு செய்திருந்தன. (ஆதாரம் : வத்திக்கான் வானொலி) [2017-08-24 19:33:49]


புதன் மறைக்கல்வி உரை : வாழ்வு எப்போதும் அர்த்தமுள்ளது

“அப்பொழுது அரியணையில் வீற்றிருந்தவர், “இதோ! நான் அனைத்தையும் புதியது ஆக்குகிறேன்”என்று கூறினார். மேலும், “‘இவ்வாக்குகள் நம்பத்தக்கவை, உண்மையுள்ளவை’என எழுது” என்றார். பின்னர் அவர் என்னிடம் கூறியது: “எல்லாம் நிறைவேறிவிட்டது; அகரமும் னகரமும் நானே; தொடக்கமும் முடிவும் நானே. தாகமாய் இருப்போருக்கு வாழ்வு அளிக்கும் நீரூற்றிலிருந்து நான் இலவசமாய்க் குடிக்கக் கொடுப்பேன். வெற்றி பெறுவோர் இவற்றை உரிமைப்பேறாகப் பெறுவர். நான் அவர்களுக்குக் கடவுளாய் இருப்பேன்; அவர்கள் எனக்கு மக்களாய் இருப்பார்கள் (தி.வெ. 21,5-7)”. இப்புதன் காலையில், அருளாளர் திருத்தந்தை ஆறாம் பவுல் அரங்கத்தில் நடைபெற்ற, புதன் பொது மறைக்கல்வி உரையின் தொடக்கத்தில், திருவெளிப்பாடு நூல் பிரிவு 21ல், புதிய விண்ணகமும் புதிய மண்ணகமும் என்ற தலைப்பின் கீழுள்ள பகுதியிலிருந்து இந்த இறைச் சொற்கள் வாசிக்கப்பட்டன. பின், அரங்கத்தில் அமர்ந்திருந்த ஆயிரக்கணக்கான பன்னாட்டுப் பயணிகளிடம், அன்புச் சகோதர சகோதரிகளே, காலை வணக்கம் எனச் சொல்லிய திருத்தந்தை பிரான்சிஸ் அவர்கள், “இதோ! நான் அனைத்தையும் புதியது ஆக்குகிறேன்”(தி.வெ.21,5) என்ற இறைவார்த்தையை நாம் இப்போது வாசிக்க கேட்டோம். கிறிஸ்தவ நம்பிக்கை, இறைவன்மீதுள்ள விசுவாசத்தை அடிப்படையாகக் கொண்டது என, முதலில் இத்தாலியத்தில் தனது மறைக்கல்வியுரையை ஆரம்பித்தார். புதன் மறைக்கல்வியுரைகளில், கிறிஸ்தவ நம்பிக்கை என்ற நற்பண்பு பற்றிய ஆய்வைத் தொடரும் நாம், நம் கிறிஸ்தவ திருப்பயணத்தின் இறுதி முடிவு, விண்ணக எருசலேம் என்பதை, திருவிவிலியத்தின் நிறைவுப் பக்கங்களில் காண்கின்றோம். இத்திருப்பயணத்தில், வியப்புக்களின் கடவுளைச் சந்திக்கின்றோம். நீண்ட மற்றும், கடினமான ஒரு பயணத்திற்குப் பின், வீடு திரும்பும் தன் பிள்ளைகளை வரவேற்கும் தந்தை போன்று, எல்லையில்லா கனிவுடன் நம்மை நடத்துபவர் இக்கடவுள். வெகுகாலமாக துன்பங்கள் நிறைந்த வாழ்வை பலர் அனுபவித்திருந்தாலும்கூட, தம் பிள்ளைகளுக்காக கரையில்லாக் கருணையால் கண்ணீர் சிந்தும் மற்றும், மிகவும் மாறுபட்ட எதிர்காலத்தோடு ஆறுதலளிப்பதற்காக காத்திருக்கின்ற ஓர் இறைத்தந்தை நமக்கு இருக்கின்றார். இவ்வேளையில், வன்முறை மற்றும், போர்களால் மனத்தளவிலும், உடலளவிலும் துன்புற்ற அச்சம் மிகுந்த முகங்களை நினைத்துப் பார்ப்போம். மரணமோ, காழ்ப்புணர்வோ எதுவும் தனது இறுதி முடிவைக் கொண்டிருப்பதில்லை என, கிறிஸ்தவர்களாகிய நாம் நம்புகின்றோம். ஏனென்றால், எல்லாத் தீமைகளும் என்றென்றும் அழிக்கப்படுகின்ற, இறையாட்சி என்ற, மிகப் பரந்த, நீண்ட எல்லையை, மிகுந்த நம்பிக்கையோடு பார்க்கின்றோம். இந்தப் புதிய வருங்காலத்தின் ஒளியாகிய, மற்றும், இப்போதும்கூட நம் வாழ்வில் உடன்வருகின்ற இயேசுவே அந்த இறையாட்சி. தொடக்க நூலில் இறைவனின் படைப்பு ஆறாம் நாளோடு நிறுத்தப்படவில்லை. ஏனென்றால், கடவுள், தொடர்ந்து நம்மைப் பராமரித்து வருகிறார், “இதோ! நான் அனைத்தையும் புதியது ஆக்குகிறேன்”(தி.வெ.21,5) என்ற தம் ஆசீரை அறிவிப்பதற்கு எப்போதும் அவர் தயாராக இருக்கின்றார். இவ்வாறு, கிறிஸ்தவ நம்பிக்கை பற்றிய தன் புதன் மறைக்கல்வி உரையை நிறைவு செய்த திருத்தந்தை பிரான்சிஸ் அவர்கள், இதில் கலந்துகொண்ட இந்தியா, வியட்நாம் உட்பட பல நாடுகளின் திருப்பயணிகளை வாழ்த்தினார். இயேசு கிறிஸ்து உங்கள் எல்லாரையும் விசுவாசத்தில் உறுதிப்படுத்துவாராக. உலகில் அவரின் அன்புக்குச் சாட்சிகளாக உங்களை ஆக்குவாராக என்றார். பின், இத்தாலியின் இஸ்கியா தீவில் இத்திங்களன்று இடம்பெற்ற நிலநடுக்கத்தில் இறந்தவர்கள், காயமுற்றவர்கள் மற்றும் அவர்களின் குடும்பங்களுக்கு, தனது செபங்களையும் ஒருமைப்பாட்டுணர்வையும் தெரிவித்தார். பின் எல்லாருக்கும் தன் அப்போஸ்தலிக்க ஆசீரை அளித்தார் திருத்தந்தை பிரான்சிஸ். (ஆதாரம் : வத்திக்கான் வானொலி) [2017-08-24 19:27:31]


பாசமுள்ள பார்வையில்:அம்மா என்ற சொல்லுக்கு சாதி மதம் கிடையாது

சென்னையில் முதியோர் காப்பகம் ஒன்றில், கல்யாணி என்ற எழுபது வயது நிரம்பிய ஓர் அம்மாவைச் சேர்த்துவிட்டு மேலாளர் அறைக்குச் சென்றார் ராஜா முகமது இக்பால். கல்யாணி அம்மாவின் குடும்ப விபரங்களை ராஜா சொல்லச் சொல்ல எழுதிய மேலாளர், வியப்புடன், அப்ப நீங்க யாரு... உறவினரா, நண்பரா? என்று கேட்டார். சொல்றேன் சார், இரண்டுமே இல்லை. ஏறக்குறைய பதினைந்து நாள்களுக்குமுன், சென்னையில், நானும் என் மனைவியும், என் அம்மாவுடன் கடைத் தெருவுக்குச் சென்றோம். கார் கதவைத் திறந்து, என் அம்மா இரண்டடிதான் வைத்திருப்பார்கள். அப்போது அவர்களை நோக்கி ஒரு பைக் சீறிட்டு வந்தது. நான் பதறிப் போய் உறைந்து நின்றேன். அப்போது அந்த வழியாக வந்த இளைஞன் ஒருவன், மின்னல் வேகத்தில் பாய்ந்து, என் அம்மாவைப் பின்னால் தள்ளிவிட்டான். பைக் வந்த வேகத்தில் போய்விட்டது. என் அம்மா நன்றாக இருப்பது தெரிந்ததும்தான், அந்த இளைஞனைப் பற்றிய நினைவே எனக்கு வந்தது. அவனைப் போய் பாருடான்னு என் அம்மா பதறினாங்க. அந்த இளைஞன், சாலையில் மயங்கிக் கிடந்தான். அங்கு கிடந்த கூரான கல் ஒன்று, இளைஞனின் பின்புற மண்டையில் குத்தினதில், இரத்தம் ஏராளமாக வெளியேறியிருந்தது. அவனை உடனடியாக மருத்துவமனையில் சேர்த்தோம். இரண்டு மணி நேரம் கழித்து கண் விழித்தான். மெதுவாக, திக்கித் திக்கி அவனைப் பற்றி சொன்னான். பெயர் சுந்தரேசன். அப்பா பஞ்சாபகேச அய்யர். அம்மா கல்யாணி. இரண்டு பேரும் காரைக்கால் அருகிலே நிரவியிலே இருக்கிறார்கள். குடும்பத்தில் ரொம்ப கஷ்டம். எனக்கும், இங்கே சுமாரான வேலைதான். அந்த வேலையும் போய், இப்போது வேறு வேலை தேடிக்கொண்டு இருக்கிறேன் என்றான். அவனை நன்றாகக் கவனிக்கும்படி மருத்துவரிடம் சொல்லி, மருத்துவ செலவுக்குப் பணத்தைக் கட்டிவிட்டு வீட்டுக்கு வந்தேன். ஆனால் அவன் அன்று இரவே இறந்துவிட்டான். உடனே என் அம்மா புலம்பிக்கொண்டே, அவங்க ஊருக்குப் போய், அவங்க அப்பா, அம்மாவை கையோட கூட்டிவந்து, பிள்ளைக்குச் செய்யவேண்டிய சடங்குகளை செய்ய ஏற்பாடு பண்ணுன்னு' என்னை விரட்டினார்கள். நானும் உடனடியாக வாகனத்தில் சென்று காலையில் அவன் ஊர் போய்ச் சேர்ந்தேன். ஆனால் அங்கே சுந்தரேசனின் அப்பாவும் இறந்திருந்தார். சுந்தரேசனின் வருகைக்காக ஊரார் காத்திருந்தனர். அங்கே இருந்த வறுமை சூழ்நிலை, என் மனதை மிகவும் பாதித்தது. அதனால் மகன் இறந்ததை, அவன் அம்மாவிடம் சொல்லாமல், அவன் அப்பாவுக்குச் செய்ய வேண்டிய காரியங்களுக்கு நானே பணம் கொடுத்து செய்யச் சொன்னேன். அவன் வேலை விடயமாக, வடநாடு போயிருக்கிறான் எனப் பொய் சொல்லி, அவன் அம்மாவையும் கையோட கூட்டிவந்து, இங்கு சேர்த்துள்ளேன், இந்த என் அம்மாவை நன்றாகப் பார்த்துக் கொள்ளுங்கள். நான் முஸ்லிம். சுந்தரேசன் பிராமின், உலகத்தில் அம்மா என்ற சொல்லுக்கு சாதி, மதம், இனம் கிடையாது. அதற்கு ஒரே அர்த்தம் அன்புதான் சார் என்று கூறி முடித்தான் ராஜா இக்பால். (ஆதாரம் : வத்திக்கான் வானொலி) [2017-08-14 00:14:59]


பக்க இலக்கங்களை அழுத்தி எல்லா செய்திகளையும் பார்வையிடவும்