வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



திருத்தந்தை: நாம் அனைவரும் இவ்வுலகில் விருந்தினரே

நாம் அனைவரும் இவ்வுலகில் விருந்தினரே; நமது இவ்வுலகப் பயணம் நிறைவடைந்ததும், விண்ணகத்தில், உரிமைக் குடிமக்களாக வாழச்செல்வோம் என்ற சொற்கள், திருத்தந்தை பிரான்சிஸ் அவர்கள் வழங்கிய ஒரு வாழ்த்துச் செய்தியில் இடம்பெற்றுள்ளன. இத்தாலியின் வட பகுதியில், ஆல்ப்ஸ் மலையடிவாரத்தில் அமைந்துள்ள 'போஸே' துறவு மடத்தில், செப்டம்பர் 6 இப்புதன் முதல், 9, இச்சனிக்கிழமை முடிய நடைபெறும் 25வது அகில உலக கிறிஸ்தவ ஒன்றிப்பு கருத்தரங்கிற்கு திருத்தந்தை அனுப்பியுள்ள செய்தியில் இவ்வாறு கூறியுள்ளார். கிறிஸ்தவ ஒன்றிப்பு ஆர்த்தடாக்ஸ் சபையினருடன் இணைந்து நடத்தப்படும் இந்த பன்னாட்டுக் கருத்தரங்கிற்கு, "விருந்தோம்பல் என்ற கொடை" என்பது, மையக்கருத்தாகத் தெரிவு செய்யப்பட்டுள்ளதற்கு, திருத்தந்தை தன் பாராட்டுக்களைத் தெரிவித்தார். போஸே துறவு மடத்தின் தலைவர், சகோதரர் என்ஸோ பியாங்கி (Enzo Bianchi) அவர்களுக்கு திருத்தந்தை அனுப்பியுள்ள இச்செய்தியின் ஆரம்பத்தில், கிறிஸ்தவ ஒன்றிப்பு ஆர்த்தடாக்ஸ் சபையின் முதுபெரும்தந்தை, முதலாம் பர்த்தலோமேயு அவர்களுக்கு தன் சிறப்பான வணக்கங்களைத் தெரிவித்துள்ளார். இவ்வுலகில் விருந்தினர்களாக வாழும் நாம் அனைவரும், விண்ணகத்தை நோக்கி நம் பார்வையைப் பதித்து மேற்கொள்ளும் இவ்வுலகப் பயணத்தில், நம்முடன் பயணிக்கும் ஏழை, எளியோரையும், துன்புறுவோரையும் கருத்தில்கொள்ள வேண்டும் என்று திருத்தந்தை பிரான்சிஸ் அவர்கள் தன் செய்தியில் வலியுறுத்தியுள்ளார். (ஆதாரம் : வத்திக்கான் வானொலி) [2017-09-07 15:51:14]


திருத்தந்தையின் கொலம்பியத் திருத்தூதுப் பயணம், ஒரு முன்தூது

மனிதராய்ப் பிறந்த எல்லாருமே துயரின்றி அமைதியாக வாழவே விரும்புகின்றனர். ஆனால் அது பலரது வாழ்வில் எளிதில் எட்டமுடியாததாகவே உள்ளது. இந்நிலை தனிமனித வாழ்வில் மட்டுமல்ல, நாடுகளின் வாழ்விலும் காணப்படுகின்றது. மோதல்களை மனிதர்கள் உருவாக்காமல் விட்டாலே, அமைதி தானாக நிகழ்ந்துவிடும். ஆயினும் மோதல்களின் கொடுமையில் நாடே துன்பத்தில் தவிக்க, இறுதியில், போரிடும் குழுக்கள், அமைதி உடன்பாட்டிற்கு வருகின்றன. புயலுக்குப் பின் அமைதி என்பதுபோல், நாட்டு மக்கள் சிறிது சிறிதாக அமைதியான வாழ்வுக்குத் திரும்பி, நாட்டை மீண்டும் கட்டியெழுப்பும் பணிகளில் ஈடுபடுகின்றனர். இதுதான் இன்று கொலம்பிய நாட்டில் இடம்பெற்று வருகின்றது. தென் மெரிக்காவின் வடமேற்குப் பகுதியில் அமைந்துள்ள கொலம்பியாவில், 52 ஆண்டுகளாக இடம்பெற்ற உள்நாட்டுச் சண்டை, 2016ம் ஆண்டில் நிறைவுக்கு வந்தது. இத்தனை ஆண்டுகால ஆயுத மோதல்களில், ஏறத்தாழ இரண்டு இலட்சத்து அறுபதாயிரம் பேர் கொல்லப்பட்டனர். இலட்சக்கணக்கான மக்கள் புலம்பெயர்ந்தனர். எண்ணற்ற ஆள்கடத்தல்களும் இடம்பெற்றன. தொடர் அமைதி பேச்சுவார்த்தைகளுக்குப் பின், இந்நாட்டில் அமைதி ஒப்பந்தம் ஏற்படுத்தப்பட்டதில், திருத்தந்தைக்கும், திருப்பீடத்திற்கும் முக்கிய பங்கு உள்ளது. அமைதியை நோக்கி முதல்படியை எடுத்து வையுங்கள் என்ற அழைப்புடன், இந்நாட்டிற்கு, தனது ஐந்து நாள் திருத்தூதுப் பயணத்தை தொடங்கியுள்ளார், திருத்தந்தை பிரான்சிஸ். திருத்தந்தை பிரான்சிஸ் அவர்கள், செப்டம்பர் 06, இப்புதன் காலை 10.30 மணிக்கு, வத்திக்கானில் தான் தங்கியிருக்கும் சாந்தா மார்த்தா இல்லத்திலிருந்து புறப்பட்டார். கொலம்பியாவுக்குப் புறப்படுவதற்குமுன், சாந்தா மார்த்தா இல்லத்தில், ஐந்து பேர் கொண்ட இரு குடும்பத்தினரைச் சந்தித்தார் திருத்தந்தை. இக்குடும்பத்தினர், உரோம் நகரின், Ponte Mammolo பகுதியில், இந்தக் கோடையில் ஏற்பட்ட தீ விபத்தில், தங்கள் வீடுகளை இழந்தவர்கள். இவர்களுக்கு, திருத்தந்தையின் சார்பில், உதவிகள் ஆற்றப்பட்டுள்ளன. மேலும், வெளி நாடுகளுக்குத் திருத்தூதுப் பயணம் மேற்கொள்ளும் முன்னரும், அதற்குப் பின்னரும், உரோம் மேரி மேஜர் பசிலிக்கா சென்று, Salus Populi Romani அதாவது உரோமைக்கு சுகம் அளிக்கும் அன்னை மரியிடம் செபிப்பதை வழக்கமாக வைத்திருக்கும் திருத்தந்தை, இச்செவ்வாய் மாலையும், அப்பசிலிக்கா சென்று அன்னை மரியிடம் செபித்தார். இப்புதன் முற்பகல் 11.13 மணிக்கு, உரோம் ஃபியூமிச்சினோ பன்னாட்டு விமான நிலையத்திலிருந்து, ஆல் இத்தாலியா A330 விமானத்தில், கொலம்பிய நாட்டுத் தலைநகர் பொகோட்டா (Bogota')வுக்குப் புறப்பட்டார் திருத்தந்தை பிரான்சிஸ். 12 மணி, 25 நிமிடங்கள் கொண்ட இந்த விமானப் பயணத்தில், தான் கடந்துசெல்லும் இத்தாலி, பிரான்ஸ், இஸ்பெயின், போர்த்துக்கல்லின் Azzorre தீவு, அமெரிக்க ஐக்கிய நாட்டின் ஓசியானியா பகுதி, புவர்த்தோ ரிக்கோ, ஹாலந்து நாட்டின் Antilles, வெனெசுவேலா ஆகிய நாடுகளின் தலைவர்களுக்கு தனது வாழ்த்தையும் செபங்களையும் தெரிவிக்கும் தந்திச் செய்திகளையும் அனுப்பினார். 9,825 கிலோ மீட்டர் தூர இந்த விமானப் பயணத்தில் தன்னோடு பயணம் செய்யும், பன்னாட்டுச் செய்தியாளர்களுக்கு வாழ்த்தும், நன்றியும் ஊக்கமும் தெரிவித்தார் திருத்தந்தை பிரான்சிஸ். கொலம்பிய நாட்டிற்கும், இந்தியாவுக்கும் உள்ள நேர இடைவெளி 10 மணி 30 நிமிடங்களாகும். அதாவது, திருத்தந்தை பிரான்சிஸ் அவர்கள் கொலம்பிய நாட்டைச் சென்று சேரும்போது, உள்ளூர் நேரம், இப்புதன் மாலை 4.30 மணியாக இருக்கும். ஆனால் இந்தியா, இலங்கைக்கு, செப்டம்பர் 07, இவ்வியாழன் அதிகாலை 3 மணியாக இருக்கும். கொலம்பியக் குடியரசு என்ற அதிகாரப்பூர்வ பெயரைக் கொண்டுள்ள கொலம்பியா, அமெரிக்கா என்ற புதிய கண்டத்தைக் கண்டுபிடித்த, இத்தாலியரான கிரிஸ்டோபர் கொலம்பஸ் (Cristoforo Colombo) அவர்களின் பெயரால் அழைக்கப்படுகிறது. தென் அமெரிக்க நாடான கொலம்பியா, மத்திய அமெரிக்காவிலும் நிலப்பகுதிகளைக் கொண்டுள்ளது. இந்நாட்டிற்கு வடமேற்கில் பானமா, கிழக்கில் வெனெசுவேலா, பிரேசில், தெற்கில் ஈக்குவடோர், மற்றும் பெரு நாடுகள், எல்லைகளாக அமைந்துள்ளன. மேலும், பசிபிக் பெருங்கடல் பகுதியில், 1,300 கிலோ மீட்டர் தூர கடற்கரையையும், அட்லாண்டிக் பெருங்கடல் பகுதியில், 1,600 கிலோ மீட்டர் தூர கரீபியன் கடற்கரையையும் இந்நாடு கொண்டிருக்கின்றது. இந்நாடு, ஒற்றையாட்சி, அரசியலமைப்பைச் சார்ந்த குடியரசாகும். தற்போதைய கொலம்பிய நாடு உள்ள பகுதியில், தொடக்கக் காலத்தில் முயிஸ்க்கா (Muisca), குயிம்பயா (Quimbaya), தயிரோனா (Tairona) போன்ற பழங்குடி மக்கள் வாழ்ந்துள்ளனர். உலகில், பல்வேறு இன மற்றும், மொழிகளை அதிகமாகக் கொண்டுள்ள நாடுகளில், கொலம்பியாவும் ஒன்று. இந்நாட்டின் பெரும்பாலான நகர்ப்புறங்கள், ஆன்டெஸ் மலைப்பகுதிகளில் உள்ளன. இஸ்பானியர்கள், 1499ம் ஆண்டில் கொலம்பிய நாட்டுப் பகுதியில் முதலில் காலடி பதித்தனர். பின், 16ம் நூற்றாண்டின் முதல் பாதிப் பகுதியில் காலனி ஆதிக்கத்தைத் தொடங்கி, கிரனாடா என்ற புதிய அரசை உருவாக்கி, பொகோட்டாவை அதன் தலைநகரமாக அமைத்தனர். பின் 1819ம் ஆண்டில், கொலம்பியா இஸ்பானியர்களிடமிருந்து விடுதலை அடைந்தது. எனினும், 1830ம் ஆண்டில், பெரிய கிரானாடா என்ற கூட்டாட்சி கலைக்கப்பட்டது. தற்போதுள்ள கொலம்பிய நாடும், பானமா நாடுமே, புதிய கிரானாடா குடியரசாக உருவானது. இந்தப் புதிய நாடு, 1858ம் ஆண்டில் கிரெனடியக் கூட்டரசு எனவும், 1863ம் ஆண்டில் கொலம்பிய ஐக்கிய நாடுகள் எனவும் செயல்பட்டது. இறுதியில் 1886ம் ஆண்டில், இப்புதிய நாடு கொலம்பியக் குடியரசானது. 1903ம் ஆண்டில், கொலம்பியாவிலிருந்து பானமா பிரிந்து சென்றது. கொலம்பியா குடியரசாக செயல்பட்டாலும், 1960களில் கடும் ஆயுதமோதல்களை இந்நாடு எதிர்கொண்டது. கொலம்பிய அரசுக்கும், உப இராணுவ குழுக்களுக்கும், குற்றக்கும்பல்களுக்கும், FARC எனப்படும் வலதுசாரி கெரில்லா புரட்சிக்குழுவுக்கும், ELN என்ற தேசிய விடுதலை புரட்சி அமைப்புக்கும் இடையே ஆயுத மோதல்கள் நடந்தன. இம்மோதல்கள் தீவிரமடைவதற்கு, பன்னாட்டு நிறுவனங்களும், அமெரிக்க ஐக்கிய நாடும் முக்கிய காரணிகள் எனச் சொல்லப்படுகின்றது. இம்மோதல்கள் 1990ம் ஆண்டுகளில் தீவிரமடைந்து, பின் 2005ம் ஆண்டில் சற்று குறைந்தது பின் மீண்டும் சண்டை. எனினும், தொடர் அமைதிப் பேச்சுவார்த்தைகளுக்குப் பின், 2016ம் ஆண்டு ஜூன் 23ம் தேதி, கொலம்பிய அரசுக்கும், FARC புரட்சிக் குழுவுக்கும் இடையே, கியூபா நாட்டின் ஹவானாவில் அமைதி ஒப்பந்தம் கையெழுத்தானது. அதே ஆண்டில் கொலம்பிய அரசுத்தலைவர் Juan Manuel Santos அவர்களுக்கு நொபெல் அமைதி விருதும் அறிவிக்கப்பட்டது. கொலம்பியாவின் நிலப்பகுதிகள், அமேசான் மழைக்காடு, வெப்பமண்டல புல்வெளி, கரீபிய மற்றும் பசிபிக் அமைதிப் பெருங்கடல் கடற்கரைகளை உள்ளடக்கியுள்ளன. சுற்றுச்சூழலியல்படி பார்த்தால், இந்நாடு உலகின் 17 பெரும் பல்வகை உயிரின வகைகள் கொண்ட நாடுகளில் ஒன்றாக விளங்குகின்றது. இந்தப் பல்வகை உயிரினங்கள், ஒரு சதுர கிலோமீட்டர் வீதம் மிகவும் அடர்த்தியாக உள்ளன. பொருளாதாரத்தில், இலத்தீன் அமெரிக்காவில், நான்காவது பெரிய நாடாகவும், சிவெட்ஸ் (CIVETS) எனக் குறிப்பிடப்படும் ஆறு முன்னணி வளரும் பொருளாதாரங்களில் ஒன்றாகவும் விளங்குகின்றது. இஸ்பானியம், chibcha, idiomi போன்ற மொழிகள் பேசப்படுகின்றன. இந்நாட்டில், 47 விழுக்காட்டினர் Mestizo இனத்தவர், 23 விழுக்காட்டினர் Mulatti இனத்தவர், 1 விழுக்காட்டினர் அமெரிக்க இந்தியர், 20 விழுக்காட்டினர் வெள்ளையினத்தவர், 6 விழுக்காட்டினர் கறுப்பினத்தவர் வாழ்கின்றனர். சமயத்தைப் பொருத்தவரை, 93.9 விழுக்காட்டினர் கத்தோலிக்கர். இன்னும், பிரிந்த கிறிஸ்தவ சபையினர், முஸ்லிம்கள், புத்த மதத்தினர் மற்றும், தாவோயிச மதத்தினரும் வாழ்கின்றனர். 1510ம் ஆண்டில், பானமா மற்றும் கொலம்பியாவுக்கு இடையிலுள்ள எல்லையில், தாரியென் எனும் பகுதியில், இஸ்பானியர்களுக்கும், கொலம்பிய மக்களுக்கும் இடையே முதன்முதலில் தொடர்பு ஏற்பட்டது. அங்குதான் முதல் மறைமாவட்டம் உருவாக்கப்பட்டது. அந்நாட்டில் காலனி ஆதிக்கம் வளர வளர, ஆதிக்க நாடுகளிலிருந்து கத்தோலிக்க மறைப்பணியாளர்களும் அங்குச் சென்றனர். முதலில், 1550ம் ஆண்டில் தொமினிக்கன் மற்றும் பிரான்சிஸ்கன் துறவு சபைகள், பொகோட்டாவில் மறைப்பணிகளைத் தொடங்கின. பின், 1575ம் ஆண்டில் அகுஸ்தீனார் சபையும், 17ம் நூற்றாண்டில் இயேசு சபையும் அந்நாட்டில் மறைப்பணிகளைத் தொடங்கின. இவ்வாறு மறைப்பணியாளர்களால் படிப்படியாக வளர்ந்துவந்த கத்தோலிக்கம், தற்போது அந்நாட்டின் பெரும்பான்மையாக உள்ளது. கத்தோலிக்கர் நாட்டின் அமைதிக்கும், பொதுநலனுக்கும் அதிகமாக உழைத்து வருகின்றனர். மற்ற நாடுகளைப் போன்றே கொலம்பியத் திருஅவையும், கருக்கலைப்பு, திருமண மற்றும் குடும்ப வாழ்வில் சிக்கல், ஓரினச் சேரக்கை போன்ற பல சவால்களை மேய்ப்புப்பணியில் சந்தித்து வருகின்றது. கொலம்பியாவின் பொகோட்டாவுக்கு, அருளாளர் திருத்தந்தை 6ம் பவுல் அவர்கள், 1968ம் ஆண்டு ஆகஸ்ட் 22 முதல் 25 வரை திருத்தூதுப் பயணம் மேற்கொண்டார். பின் புனித திருத்தந்தை 2ம் ஜான் பால் அவர்கள், 1986ம் ஆண்டு ஜூன் 1 முதல் 8 வரை, அந்நாட்டிற்குத் திருத்தூதுப் பயணம் மேற்கொண்டார். தற்போது திருத்தந்தை பிரான்சிஸ் அவர்கள், செப்டம்பர் 6, இப்புதனன்று, கொலம்பியாவுக்கு திருத்தூதுப் பயணத்தைத் தொடங்கியுள்ளார். இப்பயணம், திருத்தந்தை பிரான்சிஸ் அவர்களின் இருபதாவது வெளிநாட்டுத் திருத்தூதுப் பயணமாக அமைந்துள்ளது. கடந்த ஆண்டில் ஹவானாவில் கொலம்பிய அமைதி ஒப்பந்தம் கையெழுத்தானதைத் தொடர்ந்து, தற்போது அந்நாட்டில் எடுக்கப்பட்டுவரும் அமைதி மற்றும் ஒப்புரவு முயற்சிகளை ஊக்குவிக்கச் சென்றுள்ளார் திருத்தந்தை பிரான்சிஸ். முதல் அடி எடுத்து வைப்போம் என்ற தலைப்புடன் நடைபெறும் இத்திருத்தூதுப்பயணத்தில் 12க்கும் மேற்பட்ட உரைகள் ஆற்றுவார் மற்றும், எல்லா தரப்பு மக்களையும் சந்திக்கவுள்ளார் திருத்தந்தை. கொலம்பியாவில் தொடர்ந்து அமைதி நிலவுவதாக. (ஆதாரம் : வத்திக்கான் வானொலி) [2017-09-07 00:05:28]


அன்பு, வாழ்வுக் கலாச்சாரத்தை வெளிப்படுத்தும் திருத்தலம்

அன்னை தெரேசா இறையடி சேர்ந்ததன் 20ம் ஆண்டு, மற்றும், புனிதராக அறிவிக்கப்பட்டதன் முதலாம் ஆண்டு ஆகியவற்றை நினைவுகூரும் விதமாக, இச்செவ்வாய்க்கிழமையன்று, கோசொவோ நாட்டில் உள்ள பிரிஸ்டினா நகரில், புனித அன்னை தெரேசா திருத்தலம் திருநிலைப்படுத்தப்பட்டு திறந்துவைக்கப்பட்டுள்ளது. அன்னை தெரேசாவின் பிறந்த நாளான ஆகஸ்ட் 26ம் தேதி அல்பேனிய மக்களால் துவக்கப்பட்ட இரு வாரக் கொண்டாட்டங்களின் ஒரு பகுதியாக இடம்பெற்ற இந்த கோவில் திருநிலைப்பாட்டுக் கொண்டாட்டத்தில், ,திருத்தந்தையின் பிரதிநிதியாக கர்தினால் எர்னஸ்ட் சிமோனி அவர்கள் கலந்துகொண்டார். கோசொவோ பகுதியின் முதல் மறைசாட்சிகளான இரண்டாம் நூற்றாண்டு இரட்டை சகோதரர்கள், ஃபுளோரஸ் மற்றும் லௌரஸ் ஆகியோரின் மறைசாட்சிய இடத்தருகே முன்னாள் அரசுத்தலைவர் Ibrahim Rugova அவர்களால் வழங்கப்பட்ட நிலத்தில், 2005ம் ஆண்டு ஆகஸ்ட் 26ம்தேதியே, அப்போதைய ஆயர் Mark Sopi அவர்களால் அடிக்கல் நாட்டப்பட்டுள்ளபோதிலும், 2006ம் ஆண்டு ஜனவரி மாதம், அரசுத்தலைவரும் ஆயரும் அடுத்தடுத்து மரணமடைய, கட்டுமானப்பணிகள் காலதாமதத்தை எதிர்கொண்டன. அன்னை தெரேசாவின் பெயரால் இச்செவ்வாய்க்கிழமையன்று திறக்கப்பட்டுள்ள இத்திருத்தலத்தின் கட்டுமானப்பணிகள் இடம்பெற்றுக் கொண்டிருந்தபோதே, 2010ம் ஆண்டு, அன்னை தெரேசாவின் நூறாமாண்டு பிறப்புக் கொண்டாட்டம், இக்கோவிலினுள் இடம்பெற்றது குறிப்பிடத்தக்கது. இத்திருத்தலம் பற்றிக் குறிப்பிட்ட பிரிஸ்டினா மறைமாவட்ட முதன்மைக்குரு Lourdes Gjergji அவர்கள், அன்னை தெரேசாவின் எடுத்துக்காட்டின் துணையுடன், அன்பு மற்றும் வாழ்வுக் கலாச்சாரத்தை கற்று நடைமுறைப்படுத்தும் ஆவலை வெளிப்படுத்துவதாக இந்த திருத்தலம் உள்ளது என்றார். (ஆதாரம் : வத்திக்கான் வானொலி) [2017-09-06 11:08:42]


துன்பங்களை கொடையாகவும், சோர்வை மகிழ்வாகவும் காண உதவுதல்

இயேசுவின் நற்செய்தியை மகிழ்வுடனும், விசுவாசத்துடனும், திறந்த மனதுடனும், கீழ்ப்படிதலுடனும் அறிவிக்கும் வழிகளில் இறைவன் உதவுகிறார் என Neocatechumenal Way என்ற அமைப்புக்கு அனுப்பியுள்ள கடிதத்தில் குறிப்பிட்டுள்ளார், திருத்தந்தை பிரான்சிஸ். 1964ம் ஆண்டு இஸ்பெயின் நாட்டின் மத்ரிதித்தில் Kiko Argüello, மற்றும், Carmen Hernández ஆகியோரால், கிறிஸ்தவ உருவாக்கலுக்கு உதவும் பயிற்சிமுறைகளுக்கென நிறுவப்பட்ட Neocatechumenal Way என்ற அமைப்பிற்கு நன்றி தெரிவித்து திருத்தந்தை அனுப்பியுள்ள கடிதம், தனக்கு அனுப்பப்பட்ட Carmen Hernández அவர்களின் வாழ்வு குறிப்பேடு குறித்தும் எடுத்துரைக்கிறது. கடந்த ஆண்டு இறையடி சேர்ந்த Carmen Hernández அவர்களின் தினசரி குறிப்புகள் என்ற நூல், ஜூலையில் வெளியிடப்பட்டு, தனக்கும் ஒரு பிரதி அனுப்பப்பட்டது குறித்து, தன் நன்றியை வெளியிட்டு Kiko Argüello அவர்களுக்கு கடிதம் எழுதியுள்ள திருத்தந்தை பிரான்சிஸ் அவர்கள், 1979ம் ஆண்டிற்கும் 81ம் ஆண்டிற்கும் இடைப்பட்ட காலத்தின் நாள்குறிப்புக்களைக்கொண்டு எழுதப்பட்ட இந்த நூல், துன்பங்களை கொடையாகவும், சோர்வை மகிழ்வாகவும் காணும் வழிகளைக் கற்றுத்தருகிறது என அதில் கூறியுள்ளார். (ஆதாரம் : வத்திக்கான் வானொலி) [2017-09-05 01:37:38]


செப்டம்பர் 1, படைப்பின் பாதுகாப்பு உலக செப நாள்

செப்டம்பர் 1, இவ்வெள்ளியன்று, கத்தோலிக்கத் திருஅவையும், கிறிஸ்தவ ஒன்றிப்பு ஆர்த்தடாக்ஸ் சபையும் மூன்றாவது முறையாக இணைந்து, படைப்பின் பாதுகாப்பிற்கென உருவாக்கப்பட்டுள்ள உலக செப நாளைக் கடைபிடிக்கும் வேளையில், இவ்விரு சபைகளின் தலைவர்களும், முதல் முறையாக, இணைந்த செய்தியொன்றை வெளியிட்டுள்ளனர் என்று, திருப்பீடச் செய்தித்தொடர்பகம் கூறியது. படைப்பைப் பாதுகாப்பதற்கென அனைத்து நல்மனம் கொண்டோரும் இணைந்து செபிக்க வேண்டும் என்றும், எளிமையான, பொறுப்பான வாழ்வு முறையைக் கடைபிடிப்பதால், படைப்பைக் காக்கும் வழிகளை எளிதாக்கமுடியும் என்றும் இச்செய்தியில் வலியுறுத்தப்பட்டுள்ளது. உலகெங்கும் உள்ள கத்தோலிக்க ஆர்த்தடாக்ஸ் கோவில்களிலும், துறவு இல்லங்களிலும், இன்னும் ஏனைய நிறுவனங்களிலும், இந்த செப நாளை சிறப்பான முறையில் கடைபிடிக்குமாறு, இவ்விரு சபைகளின் தலைவர்களும் விண்ணப்பித்துள்ளனர். செப்டம்பர் 1, இவ்வெள்ளி காலை, உரோம் நகரில் உள்ளூர் நேரம் 8 மணிக்கும், அதற்கு இணையாக, துருக்கி நாட்டின் இஸ்தான்புல் நகரில் உள்ளூர் நேரம் காலை 9 மணிக்கும் இச்செய்தி, ஏழு மொழிகளில் வெளியிடப்பட்டதென திருப்பீடச் செய்தித்தொடர்பகம் கூறியது. மேலும், "படைப்பின் அழகை ஆழ்ந்து தியானிப்பதால், எங்களுக்குள், நன்றி உணர்வையும், பொறுப்பையும் தூண்டுமாறு, ஆண்டவரே, எங்களுக்கு கற்றுத்தாரும்" என்ற சொற்களை, திருத்தந்தை பிரான்சிஸ் அவர்கள், செப்டம்பர் 1, தன் டுவிட்டர் செய்தியாக வெளியிட்டார். (ஆதாரம் : வத்திக்கான் வானொலி) [2017-09-04 01:15:50]


பாசமுள்ள பார்வையில்: "அன்னை, வேண்டும்; ஆசிரியர், வேண்டாம்"

புனிதத் திருத்தந்தை 23ம் ஜான் அவர்கள், வெளியிட்ட திருமடல்களில், “Mater et Magistra” என்ற மடல், புகழ்பெற்ற ஒரு மடல். சமுதாயப் பிரச்சனைகள் பெருகிவந்த இவ்வுலகில், திருஅவை ஆற்றக்கூடிய, ஆற்றவேண்டிய பணிகளை விளக்குவது “Mater et Magistra”, அதாவது, "அன்னையும் ஆசிரியரும்" என்ற அந்த திருமடல். அம்மடல் வெளியான ஒரு சில வாரங்களில், ஒரு கத்தோலிக்க எழுத்தாளர், பத்திரிகையில் விமர்சனம் ஒன்றை வெளியிட்டார். அந்த விமர்சனத்தின் தலைப்பு: "அன்னை... வேண்டும்; ஆசிரியர்... வேண்டாம்" (“Mater sí, Magistra no!”) என்று அமைந்திருந்தது. அளவுகடந்த அன்பைப் பொழியும் அன்னையாக திருஅவையை உருவகித்துப் பார்க்கையில் மனம் குளிர்கிறது. ஆனால், கண்டிப்புடன் பாடங்கள் புகட்டும் ஆசிரியராக திருஅவையை எண்ணிப்பார்க்கையில் கசக்கிறது. காயப்பட்ட வேளைகளில், அன்னையின் அணைப்பை உணர்வதற்கு, நாம், கோவிலையும், திருஅவையின் பணியாளர்களையும் நாடிச் சென்றுள்ளோம். ஆனால், காயப்பட்டதற்குக் காரணம் நாம்தான் என்று சுட்டிக்காட்டும் ஆசிரியராக, திருஅவை மாறியபோது, அந்தக் கண்டிப்பை நம்மால் ஏற்றுக்கொள்ள முடியவில்லை. 'அன்னை' என்ற இலக்கணத்தில், 'ஆசிரியர்' என்ற அம்சமும் இணைந்துள்ளது. எந்த ஓர் அன்னையும் தன் குழந்தைக்கு அளவுகடந்த அன்பை மட்டுமே எந்நேரமும் பொழிந்தால், அக்குழந்தையின் முழுமையான வளர்ச்சிக்கு அந்த அன்பே ஒரு தடையாக அமையும். தவறும்போது, தடுமாறும்போது அக்குழந்தைக்குத் தகுந்த வழியைக் காட்டுவதும் அன்னையின் பொறுப்பு. அவ்வேளைகளில், கரிசனை கலந்த கண்டிப்புடன் செயலாற்றும் ஓர் ஆசிரியராக அன்னை மாறவேண்டும். (ஆதாரம் : வத்திக்கான் வானொலி) [2017-09-02 20:31:50]


இறையடி சேர்ந்த கர்தினால் Murphy-O’Connor

இங்கிலாந்தின் வெஸ்ட்மின்ஸ்டர் முன்னாள் பேராயர், கர்தினால் Cormac Murphy-O’Connor அவர்களின் மறைவையொட்டி, தன் ஆழ்ந்த அனுதாபத்தை வெளியிடும் இரங்கல் செய்தியை, வெஸ்ட்மின்ஸ்டர் உயர் மறைமாவட்டத்திற்கு அனுப்பியுள்ளார் திருத்தந்தை பிரான்சிஸ். வெஸ்ட்மின்ஸ்டர் பேராயர் கர்தினால் Vincent Nichols அவர்களுக்கு அனுப்பப்பட்டுள்ள இச்செய்தி, அப்பெருமறைமாவாட்ட விசுவாசிகளுக்கு, திருத்தந்தையின் ஆழ்ந்த அனுதாபங்களைத் தெரிவிப்பதாகவும், விசுவாசிகளுக்கு கர்தினால் Murphy-O’Connor அவர்கள் ஆற்றிய சேவைகளை நினைவுகூர்வதாகவும் அமைந்துள்ளது. நற்செய்தியை அறிவிப்பதிலும், ஏழைகள் மீதுள்ள அக்கறையிலும், கிறிஸ்தவ ஒன்றிப்பு மற்றும் பல்சமய உரையாடலிலும், கர்தினால் Murphy-O’Connor அவர்கள் காட்டிய ஈடுபாட்டை தன் இரங்கல் செய்தியில் சுட்டிக்காட்டி, பாராட்டுக்களை வெளியிட்டுள்ளார், திருத்தந்தை பிரான்சிஸ். இவ்வாண்டு ஆகஸ்ட் 24ம் தேதி தன் 85வது வயதை நிறைவு செய்த கர்தினால் Murphy-O’Connor அவர்கள், இவ்வெள்ளியன்று இறைபதம் சேர்ந்ததைத் தொடர்ந்து, திருஅவையில் கர்தினால்களின் எண்ணிக்கை 222 ஆக குறைந்துள்ளது. இதில் 121 பேர், 80 வயதிற்குட்பட்டவர்களாய், திருத்தந்தையைத் தேர்ந்தெடுக்கும் தகுதி பெற்றுள்ளனர். (ஆதாரம் : வத்திக்கான் வானொலி) [2017-09-02 20:26:31]


திருத்தந்தையின் முன்னிலையில் திருமண விருப்பம்

வெனெசுவேலா நாட்டைச் சேர்ந்த அரசியல்வாதி ஒருவர், தான் திருமணம் செய்துகொள்ள விழைந்த பெண்ணுடன் திருத்தந்தை பிரான்சிஸ் அவர்களைச் சந்தித்த வேளையில், திருத்தந்தையின் முன்னிலையில் தன் விருப்பத்தை அப்பெண்ணிடம் தெரிவித்தார். ஆகஸ்ட் 27, கடந்த ஞாயிறன்று, அகில உலக கத்தோலிக்கப் பாராளுமன்ற ஒருங்கிணைப்பு அவையின் உறுப்பினர்களை திருத்தந்தை பிரான்சிஸ் அவர்கள் வத்திக்கானில் சந்தித்துப் பேசினார். வியன்னா கர்தினால் Christoph Schönborn அவர்களின் முயற்சியால் ஒருங்கிணைக்கப்பட்ட இந்த அவையின் உறுப்பினர்களில் ஒருவரான, Dario Ramirez என்ற அரசியல்வாதி, கர்தினால் அவர்களின் உத்தரவைப் பெற்றபின், திருத்தந்தையின் முன்னிலையில், தன் திருமண ஆவலை, தன் உடன்வந்த பெண்ணிடம் தெரிவித்தார். சூழ இருந்தோரை, குறிப்பாக, திருத்தந்தையின் மெய்காப்பாளர்களை பதட்டமடையச் செய்த இந்த நிகழ்வு, திருஅவை வரலாற்றுக்கு ஒரு புதிய முயற்சி என்று கர்தினால் Schönborn அவர்கள் கூறினார். இந்த நிகழ்வால் ஆச்சரியம் அடைந்த திருத்தந்தை, Dario Ramirez அவர்களையும், அவர் மணக்க விரும்பிய Maryangel Espinal அவர்களையும் ஆசீர்வதித்தார் என்று Zenit கத்தோலிக்கச் செய்தி கூறியுள்ளது. உலகின் கத்தோலிக்க சட்டமன்ற உறுப்பினர்களைக் கொண்டு 2010ம் ஆண்டு வியன்னா கர்தினால் Christoph Schönborn, மற்றும், பிரித்தானியப் பாராளுமன்ற உறுப்பினர் Lord David Alton ஆகியோரால் உருவாக்கப்பட்ட அகில உலக கத்தோலிக்கப் பாராளுமன்ற ஒருங்கிணைப்பு அவை, அரசியல் அரங்கில், கிறிஸ்தவ மதிப்பீடுகளை ஊக்குவித்தல் என்ற நோக்கத்துடன், ஒவ்வோர் ஆண்டும், ஆகஸ்ட் இறுதி வாரத்தில், உரோம் நகரில், நான்கு நாட்கள் கூடி விவாதிக்கின்றது. அந்த கூட்டத்தின் ஒரு பகுதியாக, திருத்தந்தையை சந்திக்கும் நிகழ்வும் ஏற்பாடு செய்யப்படுகின்றது. (ஆதாரம் : Zenit / வத்திக்கான் வானொலி) [2017-09-01 00:28:50]


ஐரோப்பிய, அமெரிக்க யூத மத குருக்களுடன் திருத்தந்தை

ஐரோப்பா, மற்றும் அமெரிக்காவிலிருந்து உரோம் நகருக்கு வருகை தந்துள்ள யூத மத குருக்கள் பலரை, திருத்தந்தை பிரான்சிஸ் அவர்கள் இவ்வியாழன் காலை திருப்பீடத்தில் சந்தித்து வாழ்த்தினார். யூதர்களுக்கும், கத்தோலிக்கருக்கும் இடையே, பயன் நிறைந்த உரையாடல்கள் நிகழ்ந்துவரும் இக்காலக்கட்டத்தில், 'எருசலேமுக்கும் உரோமுக்கும் இடையே’ என்ற தலைப்பில் அறிக்கையொன்று வெளியாகியிருப்பது, தனக்கு மிகுந்த மகிழ்வைத் தருவதாக திருத்தந்தை கூறினார். 'Nostra Aetate' என்ற பெயரில் இரண்டாம் வத்திக்கான் பொதுச்சங்கம் வெளியிட்ட மடலில், கிறிஸ்தவ-யூத உறவு வலியுறுத்தப்பட்டுள்ளது என்பதை, திருத்தந்தை தன் உரையில் சுட்டிக்காட்டினார். கத்தோலிக்கரும், யூதரும் கொண்டிருக்கும் அடிப்படை மத நம்பிக்கையும், நன்னெறி விழுமியங்களும் உரையாடல் முயற்சிகளை ஊக்குவிக்கும் என்பதையும், திருத்தந்தை தன் உரையில் வலியுறுத்தினார். மேலும், "இதயம் நோக்கி உங்கள் கவனத்தைச் செலுத்தினால், நீங்கள் ஆண்டவருக்கும் அடுத்தவருக்கும் அருகிலிருப்பதை உணர்வீர்கள்" என்ற சொற்கள், ஆகஸ்ட் 1, இவ்வியாழனன்று திருத்தந்தையின் டுவிட்டர் செய்தியில் இடம்பெற்றன. @pontifex என்ற முகவரியுடன், திருத்தந்தை பிரான்சிஸ் அவர்கள் ஏறத்தாழ ஒவ்வொரு நாளும் வெளியிட்டுவரும் டுவிட்டர் செய்திகள், ஆகஸ்ட் 31ம் தேதி முடிய, 1.283 என்ற எண்ணிக்கையில் உள்ளன என்பதும், அவரது செய்திகளை ஆங்கிலத்தில் ஆர்வமாகப் பின்தொடர்வோரின் எண்ணிக்கை, 1, 27,65028 என்பதும் குறிப்பிடத்தக்கன. (ஆதாரம் : வத்திக்கான் வானொலி) [2017-09-01 00:17:44]


உயிர் பிழைத்த கால்பந்தாட்ட வீரர்களுடன் திருத்தந்தை

ஆகஸ்ட் 30, இப்புதனன்று நடைபெற்ற பொது மறைக்கல்வி உரைக்குப் பின்னர், திருத்தந்தை பிரான்சிஸ் அவர்கள் பிரேசில் நாட்டிலிருந்து வந்திருந்த கால்பந்தாட்ட வீரர்கள் இருவரைச் சந்தித்தது, உணர்வுப்பூர்வமான நிகழ்வாக இருந்ததென்று Zenit கத்தோலிக்கச் செய்தி கூறியுள்ளது. பிரேசில் நாட்டைச் சேர்ந்த Chapecoense Club என்ற விளையாட்டுக் குழுவின் இளம் வீரர்கள், கொலம்பியா நாட்டில் நடைபெற்ற கால்பந்தாட்ட போட்டியில் கலந்துகொள்ள, கடந்த ஆண்டு நவம்பர் மாதம் 28ம் தேதி, பிரேசில் நாட்டிலிருந்து பயணித்த விமானம் விழுந்து நொறுங்கியதில், அந்தக் குழுவைச் சேர்ந்த 71 பேர் உயிர் துறந்தனர். அந்த விபத்தில் உயிர் பிழைத்த, Jackson Follmann மற்றும் Alan Ruschel என்ற இரு வீரர்கள், ஆகஸ்ட் 30, நடைபெற்ற புதன் பொது மறைப்போதகத்திற்குப் பின், திருத்தந்தையைச் சந்தித்தனர். இந்த விபத்தில் தன் கால்கள் இரண்டையும் இழந்த, 24 வயது இளையவர் Jackson Follmann அவர்களையும், Alan Ruschel அவர்களையும் திருத்தந்தை சிறப்பான முறையில் ஆசீர்வதித்தார். எங்களுக்கு மறுவாழ்வு தந்த இறைவனுக்கும், நாங்கள் இழந்துள்ள எங்கள் நண்பர்களுக்கும் பெருமைசேர்க்கும் வகையில் நாங்கள் வாழ விழைகிறோம் என்று இவ்விரு வீரர்களும், வத்திக்கான் நாளிதழ் L’Osservatore Romanoவுக்கு அளித்த பேட்டியில் கூறினர். Chapecoense Club அணியும், உரோமா அணியும், செப்டம்பர் 1, இவ்வெள்ளியன்று, உரோம் ஒலிம்பிக் திடலில் நட்பு கருதி நடைபெறும் கால்பந்தாட்ட விளையாட்டில் பங்கேற்கின்றனர் என்று அறிவிக்கப்பட்டுள்ளது. (ஆதாரம் : Zenit / வத்திக்கான் வானொலி) [2017-09-01 00:11:07]


பக்க இலக்கங்களை அழுத்தி எல்லா செய்திகளையும் பார்வையிடவும்