வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



இளையோரை இனிமேலும் கொலை செய்ய வேண்டாம்

வெனிசுவேலா நாட்டில், தற்போது நிலவும் ஒரு சூழலைப் போன்ற வருங்காலத்தில், நம்பிக்கை வைக்காததே, அந்நாட்டு இளையோர் செய்யும் பெரும் பாவம் என்று சொல்லி, இளையோரைக் கொலை செய்ய வேண்டாமென, கடவுள் பெயரால் விண்ணப்பிப்பதாக, அந்நாட்டு ஆயர்கள் கவலையுடன் கூறியுள்ளனர். அடிப்படை தேவைகளில் கடும் பற்றாக்குறையை எதிர்நோக்கிவரும் வெனிசுவேலா மக்கள், அரசுக்கெதிரான போராட்டங்களையும் நடத்திவரும் இந்நாள்களில், மீண்டும் ஓர் இளைஞர் கொடூரமாய்க் கொலைசெய்யப்பட்டுள்ளதை முன்னிட்டு, தன் டுவிட்டரில், இவ்வாறு விண்ணப்பித்துள்ளார், அந்நாட்டின் த்ருஹில்லோ ஆயர்,Oswaldo Azuaje Pérez. ஜூன் 22, இவ்வியாழனன்று, அரசை எதிர்க்கும் பேரணியில் கலந்துகொண்ட, 22 வயது நிரம்பிய David Vallenilla என்ற இளைஞர், இராணுவத்தால் கொலை செய்யப்பட்டுள்ளார். மேலும், ஐ.நா.வுக்கான திருப்பீடப் பிரதிநிதி பேராயர் பெர்னார்தித்தோ அவுசா அவர்களும், வெனிசுவேலா நாட்டிற்கு உணவுப் பொருள்களும், மருந்துகளும் செல்வதற்கு அனுமதிக்கப்பட வேண்டும், மற்றும், பொதுத் தேர்தலுக்கான தேதி அறிவிக்கப்பட வேண்டும் என்று, அமெரிக்க நாடுகள் அமைப்பு, இவ்வாரத்தில் மெக்சிகோவில் நடத்திய கூட்டத்தில் கேட்டுக்கொண்டார். தென் அமெரிக்க நாடான வெனிசுவேலாவில் இடம்பெற்றுவரும் போராட்டங்களில், கடந்த ஏப்ரலிலிருந்து குறைந்தது 75 பேர் இறந்துள்ளனர். (ஆதாரம் : Fides /வத்திக்கான் வானொலி) [2017-06-25 01:14:17]


‘தென் சூடானுக்குத் திருத்தந்தை’ புதிய பிறரன்பு நடவடிக்கை

“தென் சூடானுக்குத் திருத்தந்தை” என்ற புதிய பிறரன்பு நடவடிக்கை குறித்து, திருப்பீட ஒருங்கிணைந்த மனித முன்னேற்ற அவைத் தலைவர், கர்தினால் பீட்டர் டர்க்சன் அவர்கள் தலைமையிலான குழு, இப்புதனன்று செய்தியாளர் கூட்டத்தில் அறிவித்தது. தென் சூடானில், இரண்டு மருத்துவமனைகள், ஒரு பள்ளி மற்றும், வேளாண் கருவிகளுக்கென, ஐந்து இலட்சம் டாலருக்கும் அதிகமான நிதியுதவியை, திருத்தந்தை வழங்குகிறார் என, கர்தினால் டர்க்சன் அவர்கள் தெரிவித்தார். தென் சூடானில் மறைப்பணியாற்றும் கொம்போனி சபையின் அருள்சகோதரிகள், தென்சூடானுடன் ஒருமைப்பாடு என்ற மனிதாபிமான அமைப்பு, வத்திக்கான் காரித்தாஸ் நிறுவனம் ஆகியவை வழியாக இவ்வுதவி செயல்படுத்தப்படவுள்ளது. தென் சூடானில், பசி மற்றும், உள்நாட்டுச் சண்டையால் துன்புறும் மக்களின் நெருக்கடிநிலையை உலகுக்கு எடுத்துரைத்து, அம்மக்களுடன் ஒருமைப்பாட்டுணர்வைத் தெரிவிப்பதற்காக, அக்டோபரில் அந்நாட்டிற்குத் திருத்தூதுப்பயணம் மேற்கொள்ள திருத்தந்தை நினைத்திருந்தார், ஆனால், அந்நாட்டின் சூழ்நிலை அதற்கு இடம்தரவில்லை என்பது குறிப்பிடத்தக்கது. திருத்தந்தை பிரான்சிஸ் அவர்கள், எல்லைகளைக் கடந்த, உலகளாவிய மேய்ப்பர் என்ற வகையில், துன்புறும் இம்மக்களின் தேவைகளை நிறைவேற்ற பன்னாட்டு சமுதாயத்தைத் தூண்ட வேண்டிய நிலை ஏற்பட்டுள்ளதை உணர்ந்து, அந்நாட்டில் இடம்பெறும் ஆயுத மோதல்களுக்கு, அமைதியான தீர்வு காணப்படுமாறும் அழைப்பு விடுத்து வருகிறார் எனக் கூறினார், கர்தினால் டர்க்சன். துன்புறும் தென் சூடான் மக்களுக்கு உதவும் வகையில், தொடங்கப்பட்டுள்ள இப்புதிய நடவடிக்கை, திருத்தந்தை அம்மக்கள்மீது கொண்டிருக்கும் அன்பு, மற்றும், ஒருமைப்பாட்டை வெளிப்படுத்துவதாய் உள்ளது என்றும், கர்தினால் டர்க்சன் அவர்கள் தெரிவித்தார். தென் சூடானில், 2013ம் ஆண்டு வன்முறை தொடங்கியதிலிருந்து, அந்நாட்டில் பாதிக்கும் மேற்பட்ட மக்கள், அதாவது ஏறக்குறைய 73 இலட்சம் மக்கள், கடும் மனிதாபிமான நெருக்கடிகளை எதிர்கொள்கின்றனர், ஒவ்வொரு நாளும் பசியினால் துன்புறுகின்றனர் எனக் கூறினார் கர்தினால் டர்க்சன். மேலும், இலட்சக்கணக்கான மக்கள், காலரா தொற்றுநோயின் அச்சுறுத்தலுக்கு உள்ளாகியுள்ளனர், தென் சூடானில் இடம்பெறும் சண்டையினால், 15 இலட்சம் மக்கள் தங்கள் வீடுகளைவிட்டு வெளியேறியுள்ளனர், இந்த வன்முறை மற்றும், உரிமை மீறல்களுக்கு, பெண்களும், சிறாரும் ஒவ்வொரு நாளும் பலியாகின்றனர் எனவும், கர்தினால் டர்க்சன் அவர்கள் கூறினார். (ஆதாரம் : வத்திக்கான் வானொலி) [2017-06-23 01:16:09]


பாசமுள்ள பார்வையில் - பட்டினியிலும் பகிர்ந்த அன்னை

புனித அன்னை தெரேசா, கொல்கத்தாவில் வாழ்ந்த காலத்தில், ஒரு நாள், ஒரு பையில் அரிசி எடுத்துக்கொண்டு, ஓர் ஏழைப் பெண்ணின் இல்லத்திற்குச் சென்றார். அப்பெண்ணும் அவரது குழந்தைகளும் பல நாட்களாக பட்டினியால் துன்புற்றனர் என்பதை, அன்னை அவர்கள் அறிந்திருந்ததால், அவரைத் தேடிச் சென்றார். அன்னை அவர்கள் கொண்டுவந்த அரிசியை நன்றியோடு பெற்றுக்கொண்ட அப்பெண், அடுத்து செய்தது, அன்னை தெரேசா அவர்களை வியப்பில் ஆழ்த்தியது. தான் பெற்ற அரிசியை, அப்பெண், இரு பங்காகப் பிரித்தார். ஒரு பங்கை தன் வீட்டில் வைத்துவிட்டு, மற்றொரு பங்கை, தன் வீட்டுக்கு அருகில் வாழ்ந்த பெண்ணிடம் கொடுத்துவிட்டுத் திரும்பினார். அன்னை அவரிடம் காரணம் கேட்டபோது, அப்பெண், "அன்னையே, நீங்கள் தந்த அரிசியில் பாதிப் பங்கைக் கொண்டு எங்களால் சமாளிக்கமுடியும். ஆனால், அடுத்த வீட்டிலோ அதிகக் குழந்தைகள் உள்ளனர். அவர்களும், பல நாட்கள் பட்டினியால் துன்புறுகின்றனர் என்பது எனக்குத் தெரியும்" என்று பதில் சொன்னார். (ஆதாரம் : வத்திக்கான் வானொலி) [2017-06-20 18:07:57]


கர்தினால் ஐவன் டயஸ் மரணம், திருத்தந்தை இரங்கல்

கர்தினால் ஐவன் டயஸ் (Ivan Dias) அவர்கள், மரணமடைந்ததையொட்டி, தனது ஆழ்ந்த இரங்கலையும், செபங்களையும் தெரிவிக்கும் தந்திச் செய்தியை அனுப்பியுள்ளார், திருத்தந்தை பிரான்சிஸ். திருப்பீட நற்செய்தி அறிவிப்புப்பணி பேராயத்தின் முன்னாள் தலைவரும், மும்பை உயர்மறைமாவட்டத்தின் முன்னாள் பேராயருமாகிய, கர்தினால் ஐவன் டயஸ் அவர்கள், ஜூன்,19, இவ்வெள்ளி இரவு எட்டு மணிக்கு, தனது 81வது வயதில் உரோம் நகரில் இயற்கை எய்தினார். கர்தினால் ஐவன் டயஸ் அவர்களின் சகோதரர் பிரான்சிஸ் டயஸ் அவர்களுக்கு, திருத்தந்தை அனுப்பியுள்ள தந்திச் செய்தியில், கர்தினால் டயஸ் அவர்கள், நீண்ட காலம் திருப்பீடத்திற்கு ஆற்றியுள்ள பிரமாணிக்கமுள்ள சேவைக்கு, குறிப்பாக, அல்பேனியாவில் துன்புறும் திருஅவையை, ஆன்மீக மற்றும், ஏனைய வழிகளில் மீண்டும் கட்டியெழுப்புவதற்கும், நற்செய்தி அறிவிப்புப்பணி பேராயத்தின் தலைவராக, அவர் தன் பணியில் வெளிப்படுத்திய மறைப்பணி ஆர்வத்திற்கும் நன்றி தெரிவிப்பதாகக் குறிப்பிட்டுள்ளார். மும்பை உயர்மறைமாவட்டத்தின் பேராயராக, பரந்த தொலைநோக்குப் பார்வையுடன் இவர் ஆற்றிய பணிகளையும் பாராட்டி, அவ்வுயர்மறைமாவட்ட விசுவாசிகளுடன், தான் செபத்தில் ஒன்றித்திருப்பதாகவும், ஞானமும், பணிவுமிக்க இந்த மேய்ப்பரின் ஆன்மா இறைவனில் இளைப்பாற, தான் செபிப்பதாகவும், தந்திச் செய்தியில் குறிப்பிட்டுள்ளார், திருத்தந்தை பிரான்சிஸ். இந்தியாவின் மும்பை நகரில், 1936ம் ஆண்டு ஏப்ரல் 14ம் தேதியன்று பிறந்த கர்தினால் ஐவன் டயஸ் அவர்கள், 1958ம் ஆண்டில், மும்பை உயர்மறைமாவட்டத்திற்கென, அருள்பணியாளராகத் திருப்பொழிவு செய்யப்பட்டார். இவர், உரோம் இலாத்தரன் பாப்பிறை பல்கலைக்கழகத்தில், திருஅவை சட்டத்தில் முனைவர் பட்டத்தையும் பெற்றிருப்பவர். திருப்பீடத்தின் தூதரகப் பணியில், 1964ம் ஆண்டில் இணைந்த இவர், திருப்பீடச் செயலகத்திலும், நார்டிக் நாடுகள், இந்தோனேசியா, மடகாஸ்கர், லா ரியூனியோன், கொமொரோஸ், மொரீசியஸ் ஆகிய நாடுகளின் தூதரகங்களிலும் பணியாற்றினார். பின் கொரியாவிலும்(1987-91), அல்பேனியாவிலும் (1991-97) திருப்பீட தூதராகப் பணியாற்றினார் கர்தினால் டயஸ். 1996ம் ஆண்டு நவம்பர் 8ம் தேதி, மும்பை உயர்மறைமாவட்டத்தின் பேராயராக(1996-2006) நியமிக்கப்பட்ட இவர், 2001ம் ஆண்டு பிப்ரவரி 21ம் தேதி, புனித திருத்தந்தை 2ம் ஜான் பால் அவர்களால், கர்தினாலாக உயர்த்தப்பட்டார். இவர், நற்செய்தி அறிவிப்புப்பணி பேராயத்தின் தலைவராகவும், உரோம் உர்பானியானம் பாப்பிறைப் பல்கலைக்கழகத்தின் பெரும் முதல்வராகவும் (மே 20,2006- மே 10,2011) பணியாற்றியுள்ளார். கர்தினால் ஐவன் டயஸ் அவர்களின் மறைவுக்குப்பின், திருஅவையில் மொத்த கர்தினால்களின் எண்ணிக்கை 220 ஆகவும், இவர்களில் திருத்தந்தையைத் தேர்ந்தெடுக்கும் தகுதியுடைய, எண்பது வயதுக்குட்பட்ட கர்தினால்களின் எண்ணிக்கை 116 ஆகவும் உள்ளன. நார்டிக் நாடுகள் (Nordic countries) என்பன, நார்வே, சுவீடன், டென்மார்க் ஆகிய மூன்று ஸ்காண்டினேவிய நாடுளையும், அத்துடன், பின்லாந்து, ஐஸ்லாந்து, ஆகிய நாடுகளையும் உள்ளடக்கியதாகும். இவற்றுடன் டென்மார்க் நாட்டைச் சார்ந்த கிரீன்லாந்து, பரோயே தீவுகள், பின்லாந்து நாட்டை சார்ந்த Åland, மற்றும் நார்வே நாட்டைச் சேர்ந்த Jan Mayen தீவும், Svalbard தீவுகளும் இந்த நார்டிக் நாடுகளின் அமைப்புக்குள் வருகின்றன. (ஆதாரம் : வத்திக்கான் வானொலி) [2017-06-20 17:58:13]


ஏழு இறை ஊழியர்களின் வீரத்துவமான வாழ்வு ஏற்பு

மறைசாட்சிகள், ஆயர்கள், துறவு சபை நிறுவனர், பொதுநிலையினர் போன்றோரை, புனிதர் மற்றும், அருளாளர் நிலைகளுக்கு உயர்த்துவதற்கென, ஏழு பேரின் வீரத்துவ புண்ணிய வாழ்வு குறித்த விபரங்களை அங்கீகரித்தார், திருத்தந்தை பிரான்சிஸ். திருப்பீட புனிதர் நிலை பேராயத் தலைவர் கர்தினால் ஆஞ்சலோ அமாத்தோ அவர்கள், இவ்வெள்ளி மாலையில், திருத்தந்தையைச் சந்தித்து, இந்த விபரங்களைச் சமர்ப்பித்தார். பொதுநிலை விசுவாசியான இறை ஊழியர் Teresio Olivelli அவர்கள், 1945ம் ஆண்டு சனவரி 17ம் தேதி, கிறிஸ்தவ விசுவாசத்திற்காக கொலை செய்யப்பட்டார். இத்தாலியின் பெல்லாஜ்ஜோ என்ற ஊரில், 1916ம் ஆண்டு சனவரி 7ம் தேதி, பக்தியுள்ள கிறிஸ்தவக் குடும்பத்தில் பிறந்த இவர், இரண்டாம் உலகப்போரின்போது சிறைவைக்கப்பட்டு, திருமறைக்காக உயிர் துறந்தார். Porto ஆயரான இறை ஊழியர் Antonio Giuseppe De Sousa Barroso (நவ.5,1854-ஆக.31,1918); Aguas Calientes ஆயரும், இயேசுவின் திருஇதய கத்தோலிக்க ஆசிரியர்கள் அருள்சகோதரிகள் சபையை ஆரம்பித்தவருமான இறை ஊழியர் Giuseppe di Gesù López y González (அக்.16,1872 – நவ.11,1950); San Marco Argentano-Bisignano ஆயரும், பிரான்சிஸ்கன் சபையைச் சேர்ந்தவருமான இறை ஊழியர் Agostino Ernesto Castrillo (பிப்.18,1904 – 16,அக்.1955); கப்புச்சின் துறவு சபயைச் சேர்ந்த இறை ஊழியர் Giacomo da Balduina (ஆக.2,1900 – ஜூலை,21, 1948); கார்மேல் சபையின் துறவியும், தூரின் கார்மேல் துறவு இல்லத்தை ஆரம்பித்தவருமான இறை ஊழியர் Maria degli Angeli (நவ.16,1871 – அக்.7,1949); பிரான்சிஸ்கன் அமலமரி சபையைச் சேர்ந்த அருள்சகோதரி இறை ஊழியர் Umiltà Patlán Sánchez (மார்ச்,17,1895 – ஜூன்,17,1970) ஆகியோரின் வீரத்துவமான வாழ்வு குறித்த விபரங்களை அங்கீகரித்தார் திருத்தந்தை பிரான்சிஸ். (ஆதாரம் : வத்திக்கான் வானொலி) [2017-06-18 18:50:51]


பாசமுள்ள பார்வையில் - பனிப்புயலில் பலியான அன்னை

பல ஆண்டுகளுக்குமுன், இங்கிலாந்தின் தெற்கு வேல்ஸ் பகுதியில் இடம்பெற்ற ஓர் உண்மை நிகழ்வு இது. அப்பகுதியில் உள்ள ஒரு மலைப்பாதையில், ஒருநாள், ஓர் இளம் தாய் தன் கைக்குழந்தையைச் சுமந்தபடி நடந்துகொண்டிருந்தார். திடீரென அப்பகுதியில் உருவான பனிப்புயல், பயணம் செய்த பலருக்கு ஆபத்தாக முடிந்தது. பனிப்புயல் சற்று குறைந்ததும், அப்பாதைவழியே, தேடுதல் பணிகள் துவங்கின. அப்போது, பனியால் மூடப்பட்டு, அவ்விளம் தாய் இறந்திருந்ததை, தேடும் குழுவினர் கண்டுபிடித்தனர். அவரது உடலின் மீது ஒரு மெல்லிய ஆடை மட்டுமே இருந்தது. வேறு எந்த கம்பளி உடையும் இல்லை. இதைக்கண்டு, தேடும் குழுவினர் அதிர்ச்சியுற்ற வேளையில், அருகிலிருந்த பாறைக்குப் பக்கத்தில் குழந்தையின் அழுகுரல் கேட்டது. தேடும் குழுவினர் விரைந்து சென்று அங்கு பார்த்தபோது, ஒரு சிறு குழந்தையின் உடல், ஒரு பெரிய கம்பளி உடையால் நன்கு மூடப்பட்டிருந்ததைக் கண்டனர். தான் உடுத்தியிருந்த கம்பளி உடையால் குழந்தையைப் பாதுகாத்துவிட்டு, அந்த இளம்தாய் இறந்துவிட்டார் என்பதை, அக்குழுவினர் புரிந்துகொண்டனர். முதல் உலகப் போரின்போது, பிரித்தானியப் பிரதமராகப் பணியாற்றி, புகழடைந்த, டேவிட் லாய்ட் ஜார்ஜ் அவர்களே, பனிப்புயலிலிருந்து தன் அன்னையால் காப்பாற்றப்பட்ட அக்குழந்தை. (ஆதாரம் : வத்திக்கான் வானொலி) [2017-06-18 18:43:37]


அபுதாபியில் மசூதி ஒன்று அன்னை மரியாவுக்கு அர்ப்பணம்

ஐக்கிய அரபு குடியரசில் (EAU), ஒரு மசூதிக்கு, அன்னை மரியாவின் பெயரைச் சூட்ட, அந்நாடு தீர்மானித்திருப்பது, கிறிஸ்தவர்களுடன், முஸ்லிம்கள் கொண்டிருக்கும் நல்லுறவின் அடையாளமாக உள்ளது என, அராபியாவின் தென் பகுதி திருப்பீடப் பிரதிநிதி, ஆயர் Paul Hinder அவர்கள் கூறினார். அபுதாபியின் வாரிசு இளவரசரும், பாதுகாப்பு அமைச்சருமான Sheikh Mohammad Bin Zayed Al Nahyan அவர்கள், Al Mushrif மாவட்டத்தில் Sheikh Mohammad Bin Zayed என்ற பெயரிலுள்ள மசூதிக்கு, அன்னை மரியாவின் பெயரைச் சூட்டுவதாக, ஜூன் 14, இப்புதனன்று அறிவித்தார். மற்ற மதங்களுடன் நல்லுறவை ஏற்படுத்துவதன் அடையாளமாக, இவ்வாறு தான் தீர்மானித்ததாக, Al Nahyan அவர்கள் கூறினார். Sheikh Mohammad Bin Zayed மசூதி, "Mariam, Umm Eisa", அதாவது, மரியா, இயேசுவின் தாய் என்ற பெயரில் அழைக்கப்படும். இந்த மசூதி, புனித யோசேப்பு பேராலயத்திலிருந்து நடந்து செல்லும் தூரத்தில் உள்ளது. Al Nahyan அவர்களின் இத்தீர்மானம் குறித்து ஆசியச் செய்தியிடம் பேசிய, ஆயர் Paul Hinder அவர்கள், இத்தீர்மானம், இஸ்லாம்-கிறிஸ்தவ உரையாடலில் இந்நாடு கொண்டிருக்கும் ஆர்வத்தையும், திறந்த மனத்தையும் காட்டுகின்றது, மேலும், இது மத சகிப்புத்தன்மையின் அடையாளமாகவும் உள்ளது என்று கூறினார். (ஆதாரம் : AsiaNews / வத்திக்கான் வானொலி) [2017-06-17 01:41:01]


பாசமுள்ள பார்வையில்..எந்நிலையிலும் ஏற்கக் காத்திருக்கும்..

பக்தியும் பாசமும் நிறைந்த பெற்றோருக்குப் பிறந்தவர் அந்த இளம்பெண். தந்தையின் இறப்புக்குப் பின் அந்தக் கைம்பெண் தாய், தனது ஒரே மகளை மிகவும் பாசத்தோடு வளர்த்து வந்தார். ஆனால் அந்த இளம் பெண், கல்லூரியில் படிக்கும்போது, தகாத நண்பர்கள் பழக்கத்தினால் தீய வழியில் சென்றாள். வேறு வகையில் வாழ்வில் இன்பம் தேடினாள். அதனால் வாழ்வுப் பாதையில் வழுக்கி விழுந்தாள். தாய் எவ்வளவோ சொல்லியும், ஓர் ஆண் நண்பரோடு வீட்டை விட்டு வெளியேறினாள். காலம் உருண்டோடியது. பணம் இருக்கும்வரைதான் அவள் நம்பிச் சென்றவன் உடன் இருந்தான். இப்போது தனி மரமானாள் அந்தப் பெண். உதவி செய்ய யாருமில்லை. தானாகவே தன் வாழ்வை முடித்துக்கொள்வதைத் தவிர, வேறு வழி அவளுக்குத் தெரியவில்லை. இவ்வாறு மனம் கலங்கி, அழுதுகொண்டிருந்த வேளையில், அவளின் மனதில் ஓர் ஆசை பிறந்தது. கடைசியாக, தான் பிறந்து வளர்ந்த வீட்டுக்கு ஒருமுறை செல்ல முடிவெடுத்தாள். பகலில் சென்றால் ஊர் மக்கள் பாரத்துவிடுவார்கள் என்று வெட்கி, இரவில் செல்ல முடிவெடுத்தாள். நள்ளிரவில் தன் வீட்டுக்குச் சென்றாள் அவள். ஆச்சரியம். அந்நேரத்திலும் தன் வீட்டுக் கதவு திறந்தே கிடந்தது. மெதுவாக உள்ளே சென்று, அம்மா என்றாள் பயந்துகொண்டே. நள்ளிரவிலும் தூங்காமல் விழித்திருந்த தாயின் காலடிகளில், விம்மி அழுதபடியே விழுந்தாள். அம்மா, உங்கள் மன்னிப்புக்குக்கூட நான் தகுதியற்றவள் எனச் சொல்லி அழுதாள். எழுந்து மகளை அணைத்துக்கொண்ட அந்தத் தாய், மகளே, உன்னைப் பிரிந்த நாள் முதல், உனக்காக, இரவும் பகலும் செபித்து வருகிறேன். உன்னைப் பாதுகாப்பாக வீடு வந்து சேர்க்கும்படியாக, இறைவனிடம் எந்நேரமும் மன்றாடுகிறேன். நீ வீட்டைவிட்டுச் சென்ற அந்த நாள்முதல் இந்த வீட்டுக் கதவு பூட்டப்படவே இல்லை. நீ எந்நேரத்திலும் இங்கு வரலாம். இதில் சந்தேகமே வேண்டாம் என்றார் அந்தப் பாசக்காரத் தாய். பிரிந்து சென்ற பிள்ளைகளுக்காக வீட்டுக் கதவை மட்டுமல்ல, மனக்கதவையும் எப்போதும் திறந்தே வைத்திருப்பவர் தாய். (ஆதாரம் : வத்திக்கான் வானொலி) [2017-06-16 01:19:44]


மறைக்கல்வியுரை : அன்பை இலவசமாகக் கொடுப்பதிலேயே மகிழ்ச்சி

உரோம் நகரில் வெயில் காலம் ஓரளவு முழுமையாக ஆரம்பித்துவிட்டது என்றே சொல்ல வேண்டும். ஏனெனில், இந்தியாவைப் போன்ற கொடும் வெயிலை உணரமுடியவில்லையெனினும், ஐரோப்பிய நாடுகளுக்கு அதிகம் என்றேச் சொல்லக்கூடிய அளவில், வெப்பம் தாக்கிக் கொண்டிருக்க, பெருமளவான மக்கள் திருத்தந்தையின் உரைக்குச் செவிமடுக்க தூய பேதுரு பேராலய வளாகத்தில் குழுமியிருந்தனர். வெயிலின் தாக்கம் அதிகமிருந்ததால், நோயுற்றோருள் பலர் அருளாளர் திருத்தந்தை 6ம் பவுல் அரங்கில் குழுமியிருக்க, அவர்களை முதலில் சென்று சந்தித்தார் திருத்தந்தை பிரான்சிஸ். 'இன்று நாம் இரு இடங்களில் நம் மறைக்கல்வி உரை சந்திப்புக்களை நடத்துகிறோம். வெளியே வெப்பம் அதிகமாக இருப்பதால், நீங்கள் இங்கு அரங்கில் அமர வைக்கப்பட்டுள்ளீர்கள். இருப்பினும், பெரிய தொலைக்காட்சி திரை வழியாக, நீங்களும் வளாகத்தில் அமர்ந்திருப்போரும் இணைந்துள்ளீர்கள். திருஅவையும் இவ்வாறே, தூய ஆவியாரின் துணையோடு இணைக்கப்பட்டுள்ளது. அனைத்தையும் ஒன்றிப்பில் கொணரும் தூய ஆவியாரை நோக்கிச் செபிப்போம்', என உரைத்த திருத்தந்தை பிரான்சிஸ் அவரகள், அவர்களோடு இணைந்து 'இயேசு கற்பித்த செபம்' மற்றும் 'அருள்நிறை மரியே' செபங்களை செபித்தபின், அரங்கில் குழுமியிருந்த அனைத்து நோயாளிகளுக்கும் தன் அப்போஸ்தலிக்க ஆசீரையும் அளித்தார். தனக்காகத் தொடர்ந்து செபிக்குமாறு அவர்களிடம் விண்ணப்பம் ஒன்றை விடுத்தபின், புதன் மறைக்கல்வி உரையை வழங்க தூய பேதுரு பேராலய வளாகம் நோக்கிச் சென்றார் திருத்தந்தை. இன்று வெயிலின் தாக்கம் அதிகமாக இருப்பதால், நோயாளர் பலர் அருளாளர் திருத்தந்தை 6ம் பவுல் அரங்கில் அமர்ந்து, பெரிய தொலைக்காட்சி திரை வழியாக நம்மோடு இணைந்துள்ளனர் என்ற திருத்தந்தை பிரான்சிஸ் அவர்கள், அவர்களுக்கு நம் வாழ்த்துக்களைத் தெரிவிப்போம் என கேட்டுக்கொண்டார். இந்த மறைக்கல்வி உரையின் துவக்கத்தில், லூக்கா நற்செய்தி பிரிவு 15, வசனங்கள் 20 முதல் 24 வரை வாசிக்கப்பட்டன. காணாமற்போன மகனாக வீட்டை விட்டுச் சென்ற இளைய மகன், திருந்தி திரும்பி வந்தபோது, தந்தைக்கும் இளைய மகனுக்கும் இடையே இடம்பெற்ற உரையாடல் வாசிக்கப்பட்டபின், கிறிஸ்தவ எதிர்நோக்கு என்ற மறைக்கல்வித் தொடரின் இப்புதன் பகுதியாக, 'அன்புகூரப்பட்ட குழந்தைகள், எதிர்நோக்கின் உறுதிப்பாடுகள்' என்ற தலைப்பில் தன் கருத்துக்களை, திருப்பயணிகளோடு பகிர்ந்து கொண்டார் திருத்தந்தை பிரான்சிஸ். அன்பு சகோதர சகோதரிகளே! கிறிஸ்தவ எதிர்நோக்குக் குறித்த நம், கடவுள் மீதான முன்நிபந்தனையற்ற அன்பிலும், இறைமகனின் வருகையில் நமக்கு வெளிப்படுத்தப்பட்டுள்ளவைகள், மற்றும், தூய ஆவியாரின் கொடைகளிலும், கிறிஸ்தவ எதிர்நோக்கின் ஆதாரத்தை, நம் அண்மைக்கால மறைக்கல்வி தொடர் வழியாகக் கண்டுள்ளோம், என தன் உரையைத் துவக்கினார் திருத்தந்தை பிரான்சிஸ். அன்பின்றி நம்மில் எவராலும் வாழ முடியாது. அன்பைத் தெரிந்துகொண்டு, அதனை இலவசமாகக் கொடுப்பதிலும், பெறுவதிலும் கிட்டும் அனுபவத்திலிருந்தே மகிழ்ச்சி பிறக்கிறது. நமக்காக நம்மை எவரும் அன்புகூரவில்லை, என்ற உணர்வே இவ்வுலகில், பலவேளைகளில் மகிழ்ச்சியின்மைக்குக் காரணமாக அமைகின்றது. எல்லையற்ற அன்பால் கடவுள் நம்மை அன்புகூர்கிறார் என்றால், அது நம் சிறப்புத் தகுதிகளால் அல்ல, மாறாக அவரின் நன்மைத்தனத்தினாலேயே என்பதை, நம் விசுவாசம் நமக்குக் கற்றுத் தருகிறது. நாம் அவரைவிட்டு விலகிச் சென்றாலும், காணாமற்போன மகன் உவமையில் வரும் இரக்கம் நிறைந்த தந்தையைப்போல், அவர் நம்மைத் தேடிக் கொண்டிருக்கிறார். விலகிச் சென்ற நமக்கு, அவர் மன்னிப்பை வழங்கி, நம்மை அரவணைத்து ஏற்றுக் கொள்கிறார். தூய பவுலின் வார்த்தைகளில் பார்த்தோமானால், 'நாம் பாவிகளாக இருந்தபோதே, கிறிஸ்து நமக்காகத் தம் உயிரைக் கொடுத்தார்'(உரோ. 5:8). நாம், நம் இறைத்தந்தையின் அன்புநிறை புதல்வர்களாகவும் புதல்வியராகவும் மாறும்பொருட்டு, இயேசுத் தம் உயிரைக் கையளித்தார். இயேசுவின் உயிர்ப்பு, மற்றும் தூய ஆவியாரின் அருள்கொடை வழியாக, நாம், இறைவனுக்கேயுரிய அன்பு வாழ்வில் பங்குதாரராக மாறுகிறோம். கடவுளுடைய அரவணைப்பில் நாம் அனைவரும், புதிய வாழ்வையும் விடுதலையையும் கண்டுகொள்வோமாக. ஏனெனில், அவருடைய அன்பே, நம் நம்பிக்கையின் ஆதாரம். இவ்வாறு, தன் புதன் மறைக்கல்வி உரையை, இறையன்பை மையமாக வைத்து வழங்கிய திருத்தந்தை பிரான்சிஸ் அவர்கள், அனைவருக்கும் தன் அப்போஸ்தலிக்க ஆசீரையும் அளித்தார். (ஆதாரம் : வத்திக்கான் வானொலி) [2017-06-16 01:08:16]


நம் துன்பங்களை சுமப்பதுடன், ஆறுதலையும் தருகிறார் இயேசு

தன் பாடுகளின் வழியாக, நம் துன்ப துயரங்களை ஏற்றுக்கொண்ட இயேசு, துன்பத்தின் அர்த்தத்தை அறிந்தவராக, நம்மைப் புரிந்துகொண்டு, ஆறுதல்படுத்தி பலப்படுத்துவார்' என இச்செவ்வாய்க்கிழமை டுவிட்டர் பக்கத்தில் எழுதியுள்ளார் திருத்தந்தை பிரான்சிஸ். மேலும், இச்செவ்வாய்க்கிழமையன்று, C-9 என்ற பெயரில் தனக்கு ஆலோசனை வழங்கும் கர்தினால்கள் அவைக் கூட்டத்தில் திருத்தந்தை கலந்துகொண்டதால், வேறு எவரையும் இந்நாளில் அவர் சந்திக்கவில்லை. கர்தினால்களின் இந்த உயர்மட்ட அவையிலுள்ள 9 அங்கத்தினர்களும், இந்நாளில் திருத்தந்தை நிறைவேற்றிய காலைத் திருப்பலியிலும் கலந்துகொண்டனர். C-9 என்ற இந்த உயர் மட்ட குழுவில், ஆசியாவிலிருந்து, மும்பை பேராயர் கர்தினால் ஆஸ்வால்டு கிரேசியஸ் அவர்களும் அங்கத்தினராக உள்ளார். (ஆதாரம் : வத்திக்கான் வானொலி) [2017-06-15 02:14:22]


பக்க இலக்கங்களை அழுத்தி எல்லா செய்திகளையும் பார்வையிடவும்