வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



அருள்பணி டாம் விடுதலை செய்யப்பட்டுள்ளதற்கு திருப்பீடம் நன்றி

கடந்த 18 மாதங்களாக இஸ்லாம் தீவிரவாதிகளால் கடத்திவைக்கப்பட்டிருந்த, இந்திய அருள்பணியாளர் டாம் உழுன்னலில் (Tom Uzhunnalil) அவர்கள், விடுதலை செய்யப்பட்டுள்ளதற்கு, தனது நன்றியை தெரிவித்துள்ளது திருப்பீடம். 2016ம் ஆண்டு மார்ச் 4ம் தேதி ஏமன் நாட்டின் ஏடனில், புனித அன்னை தெரேசாவின் பிறரன்பு மறைப்பணியாளர் சபையின் முதியோர் இல்லத்திலிருந்து கடத்தப்பட்ட சலேசிய சபை அருள்பணி டாம் அவர்கள், செப்டம்பர் 12, இச்செவ்வாயன்று ஓமன் நாட்டில் விடுதலை செய்யப்பட்டார். அருள்பணி டாம் அவர்கள் விடுதலை செய்யப்பட்டுள்ளது குறித்து அறிக்கை வெளியிட்ட திருப்பீட செய்தித் தொடர்பகம், அருள்பணி டாம் அவர்களின் விடுதலைக்காக உழைத்தவர்கள், குறிப்பாக, ஓமன் நாட்டு அரசுத்தலைவர் மற்றும் அந்நாட்டின் அதிகாரிகளுக்கு, திருப்பீடம் தனது நன்றியை தெரிவிப்பதாகவும், அருள்பணியாளர் டாம், இந்தியா செல்வதற்குமுன், உரோம் நகரிலுள்ள சலேசிய சபை இல்லத்தில் சில நாள்கள் தங்கியிருப்பார் எனவும் அறிவித்தது. இவ்விடுதலை குறித்து செய்தி வெளியிட்டுள்ள ஓமன் நாட்டு Ona செய்தி நிறுவனம், வத்திக்கானின் வேண்டுகோள் மற்றும், ஓமன் நாட்டு சுல்தான் Qabus அவர்களின் வழிகாட்டுதல்களின்படி, மஸ்கட்டிலுள்ள அதிகாரிகள், ஏமன் நாட்டினர் சிலரின் ஒத்துழைப்புடன், அருள்பணி டாம் அவர்கள் இருக்கும் இடத்தைக் கண்டுபிடித்து, அவர் பாதுகாப்பாக விடுதலை செய்யப்படுவதற்கு உதவினர் என்று அறிவித்துள்ளது. ஏமனில் போரில் ஈடுபட்டுள்ள எல்லாத் தரப்பினருடனும் சம உறவுகளைக் கொண்டிருக்கும் ஓமன் நாடு, ஏமன் உள்நாட்டுப்போரில் அண்மை ஆண்டுகளில், கடத்தப்பட்ட அல்லது காணாமல்போன பலரின் பாதுகாப்பான விடுதலைக்கு உதவியுள்ளது என, ஊடகச் செய்திகள் கூறுகின்றன. செப்டம்பர் 13, இப்புதனன்று, சலேசிய சபையின் அனைத்து இல்லங்களிலும் நன்றித் திருப்பலி நிறைவேற்றப்பட்டது. 58 வயது நிரம்பிய, கேரளாவைச் சேர்ந்த, சலேசிய அருள்பணியாளர் டாம் உழுன்னலில் அவர்கள், ஏமனில் மறைப்பணியாற்றி வந்தார். இவர் மறைப்பணியாற்றிய பங்கு ஆலயம், குண்டுவீச்சால் சேதமடைந்ததையொட்டி, ஏடனில், அன்னை தெரேசாவின் பிறரன்பு மறைப்பணியாளர் சபையின் முதியோர் இல்லத்தில் தங்கி மறைப்பணியாற்றி வந்தார். இஸ்லாம் தீவிரவாதிகள், 2016ம் ஆண்டு மார்ச் 4ம் தேதி, அந்த முதியோர் இல்லத்தைத் தாக்கியதில் அன்னை தெரேசா சபையின் நான்கு அருள்சகோதரிகள் மற்றும் 12 பேர் கொல்லப்பட்டனர். அச்சமயம் இவரும் கடத்தப்பட்டார். (ஆதாரம் : வத்திக்கான் வானொலி) [2017-09-13 21:43:18]


திருத்தந்தை பிரான்சிஸ் விமானப் பயணத்தில் நேர்காணல்

குடும்பங்களிலிருந்து இளையோரைப் பிரிப்பது தவறானது, இவ்வாறு பிரிப்பது, குடும்பங்களுக்கும், இளையோருக்கும் என்ற, இரு தரப்பினருக்குமே நன்மை பயக்காது என்று, திருத்தந்தை பிரான்சிஸ் அவர்கள், இத்திங்களன்று கூறினார். கொலம்பியாவில் தனது இருபதாவது வெளிநாட்டுத் திருத்தூதுப் பயணத்தை நிறைவுசெய்து, கார்த்தஹேனா நகரிலிருந்து உரோம் நகருக்குத் திரும்பி வந்த விமானப் பயணத்தில், செய்தியாளர்களின் கேள்விகளுக்குப் பதில் சொன்ன திருத்தந்தை, இவ்வாறு கூறினார். வெளிப்புற காலநிலை காரணமாக விமானம் குலுங்கிக்கொண்டு சென்றதால், இந்நேர்காணலின் நேரம் குறைக்கப்பட்டாலும், ஊழல், காலநிலை மாற்றம், மக்களின் குடிபெயர்வு, அமெரிக்க ஐக்கிய நாட்டின் குடிபெயர்வு கொள்கை, வெனெசுவேலா நாட்டில் தொடர்ந்து நிலவும் நெருக்கடி உட்பட, இன்றைய உலக விவகாரங்கள் குறித்து கேட்கப்பட்ட பல்வேறு கேள்விகளுக்கு திருத்தந்தை பதிலளித்தார். கொலம்பியத் திருத்தூதுப் பயணம் குறித்து, கொலம்பியச் செய்தியாளர்கள் முதலில் திருத்தந்தையிடம் கேள்வி கேட்டனர். பல ஆண்டுகள் உள்நாட்டுப் போரால் கொலம்பியாவில் நிலவும் பிரிவினைகள் மற்றும் காழ்ப்புணர்வுகள் களையப்படுவதற்கு அந்நாட்டினர் எடுக்கவேண்டிய தெளிவான நடவடிக்கைகள் என்ன என்ற கேள்விக்குப் பதிலளித்த திருத்தந்தை, “கொலம்பியர்கள், இரண்டாவது அடியை எடுத்து வைக்கட்டும்”என்று கூறினார். “முதல் அடியை எடுத்து வைப்போம்”என்ற இத்திருத்தூதுப் பயண இலக்கை குறிப்பிட்டு இவ்வாறு கூறினார் திருத்தந்தை பிரான்சிஸ். உள்நாட்டுச் சண்டை இடம்பெற்ற ஆண்டுகளில் ஆற்றப்பட்ட பாவங்கள் ஆன்மாக்களை நோயுற்றவைகளாக மாற்றியுள்ளன, இருந்தபோதிலும், மக்கள் அமைதியை நோக்கி அடியெடுத்து வைக்க வேண்டும் என்று கூறினார். வன்முறையைவிட ஊழல் ஒரு நாட்டை மிகவும் சீரழிக்கும், ஊழலும் ஒருவகையான பாவம், ஊழல் செய்பவர் மன்னிப்புக் கேட்பதற்கே சோர்வடைந்து விடுகிறார், எப்படி மன்னிப்புக் கேட்பதென்பதையே மறந்து விடுகிறார், இதனால் ஊழல் செய்பவருக்கு உதவுவது கடினம், ஆனால் கடவுளால் இயலும், நானும் செபிக்கின்றேன் என்று சொன்னார் திருத்தந்தை பிரான்சிஸ். அமெரிக்க ஐக்கிய நாட்டு அரசுத்தலைவர் டொனால்டு டிரம்ப் அவர்கள், குடிபெயர்வு மக்கள் குறித்து அண்மையில் எடுத்துள்ள தீர்மானம் குறித்தும் கேட்கப்பட்ட கேள்விக்குப் பதிலளித்த திருத்தந்தை, இது குறித்து கருத்து தெரிவிப்பதற்கு, போதுமான அளவு அத்தீர்மானத்தை தான் வாசிக்கவில்லை என்றும், எனினும், குடும்பங்களிலிருந்து இளையோரைப் பிரிப்பது குடும்பங்களுக்கும், இளையோருக்கும் நன்மை பயக்காது என்றும் கூறினார். காலநிலை மாற்றம் தொடர்பாக பிற நாடுகளுடன் ஒத்துழைக்காத மக்கள், இம்மாற்றம் பற்றித் தெளிவாகவும், துல்லியமாகவும் பேசும் அறிவியலாளர்களிடம் செல்ல வேண்டும் என்றும், திருத்தந்தை பிரான்சிஸ் அவர்கள், இத்திங்களன்று கூறினார். (ஆதாரம் : வத்திக்கான் வானொலி) [2017-09-13 21:34:38]


தலைவர்கள் பொது நலனில் அக்கறைகொண்டு செயல்பட அழைப்பு

பிரிவினைகள் மற்றும் கருத்தியல் சார்புடைய ஆதாயங்களைப் பின்னுக்குத் தள்ளி, முழு மனித சமுதாயத்தின் பொதுவான நலனைத் தேடுமாறு, உலகத் தலைவர்களைக் கேட்டுக்கொண்டுள்ளார், திருத்தந்தை பிரான்சிஸ். ஐக்கிய நாடுகள் நிறுவனத்தின் 72வது பொது அவை (UNGA 72) இச்செவ்வாயன்று தொடங்கும்வேளை, உலகத் தலைவர்கள் பொது நலனில் அக்கறைகொண்டு செயல்படுமாறு, இச்செவ்வாயன்று தன் டுவிட்டர் செய்தியில் விண்ணப்பித்துள்ளார், திருத்தந்தை பிரான்சிஸ். நியு யார்க் நகரிலுள்ள ஐ.நா. தலைமையகத்தில் செப்டம்பர் 12, இச்செவ்வாயன்று ஆரம்பிக்கும் 72வது ஐ.நா. பொது அவை, செப்டம்பர் 25ம் தேதி நிறைவடையும். UNGA 72 என அழைக்கப்படும் இப்பொது அவையின் பொது விவாதங்கள், செப்டம்பர் 19ம் தேதி, செவ்வாயன்று, “மக்களை மையப்படுத்தல் : நீடித்த நிலையான பூமிக்கோளத்தில் எல்லாருக்கும் அமைதி மற்றும், தரமான வாழ்வை அமைப்பதற்கு முயற்சித்தல்” என்ற தலைப்பில் ஆரம்பிக்கும். ஐக்கிய நாடுகள் நிறுவனத்தின் பொது அவையின் முதல் அமர்வு, 1946ம் ஆண்டு சனவரி பத்தாம் தேதி, இலண்டன் மெத்தடிஸ்ட் மையத்தின் அறையில் நடைபெற்றது. இதில் 51 நாடுகளின் பிரதிநிதிகள் கலந்துகொண்டனர். தற்போது இப்பொது அவையில் 193 நாடுகள் பங்கேற்கின்றன. (ஆதாரம் : வத்திக்கான் வானொலி) [2017-09-12 19:51:01]


கார்த்தஹேனா இறுதி திருப்பலியில் திருத்தந்தையின் மறையுரை

அன்பு சகோதர சகோதரிகளே! இருநூறு ஆண்டுகளுக்கு முன்னர், மனித சுதந்திரத்தைப் பாதுகாக்க முக்கிய பங்கு வகித்து, வீரத்துவ நகராக விளங்கிய இங்கு, கொலம்பிய திருத்தூதுப் பயணத்தின் நிறைவுத் திருப்பலியை நிறைவேற்றுகிறேன். கடந்த முப்பத்திரண்டு ஆண்டுகளாக கார்த்தஹேனா தே இன்டியாஸ் என்ற இந்நகரம், மனித உரிமைகளின் தலைநகராகவும் விளங்குகிறது. ஒடுக்கப்பட்டோர், குறிப்பாக, அடிமைகளின் உரிமைகளுக்குப் போராடுவதற்கென இயேசுசபை அருள்பணியாளர்களாலும் பொதுநிலையினராலும் இங்கு 17ம் நூற்றாண்டில் அமைக்கப்பட்ட குழுவுக்கு நன்றி கூறுகிறேன். கொலம்பிய மனித உரிமைகள் நிலை குறித்து ஆய்வு செய்யப்படும் இந்த புனித பீட்டர் கிளேவர் திருத்தலத்தில், மன்னிப்பு, திருத்தம், சமூகம், மற்றும் செபம் குறித்து, இறைவனின் வார்த்தைகள் நம்மிடம் பேசுகின்றன. காணாமல் போன ஓர் ஆட்டைத் தேடிச்செல்ல, தன் 99 ஆடுகளையும் விட்டு விட்டுச் சென்ற நல்லாயனைக் குறித்து இயேசு சொல்கிறார். நம் அக்கறை, மன்னிப்பு, அருகாமை என்ற எல்லைகளைத் தாண்டி, தொலைந்து போனவர்கள், கைவிடப்பட்டவர்கள் என்று எவரும் இல்லை. தங்களுக்கு பெரும் தீங்கிழைத்தவர்களை மன்னித்து ஏற்றுக்கொண்ட மனிதர்களை இந்த திருத்தூதுப் பயணத்தின் கடந்த நாட்களில் நாம் சந்தித்தோம். அவர்களின் சாட்சியங்களுக்கு செவிமடுத்தோம். பழிவாங்கும் உணர்வுகளையும் தாண்டி, பகுத்தறிவைப் பயன்படுத்தும் வழிகளால் அமைதியை உருவாக்கமுடியும் என்பதையும் கற்றுக் கொண்டோம். அரசியலுக்கும் சட்டத்திற்கும் இடையே நிலவும் இணக்க வாழ்வும், மக்களின் ஈடுபாடும் இங்கு தேவைப்படுகின்றன. அமைதி என்பது, அமைப்புமுறைகளால் பெறப்படுவது அல்ல, ஆனால் அதை ஒருவரொருவருக்கிடையே இடம்பெறும் கருத்துப் பரிமாற்றங்களால் பெறமுடியும். கொலம்பிய நாடு எடுத்துவைக்க முயலும் புதிய பாதைக்கு நாமனைவரும் பங்களிக்கமுடியும். குணப்படுத்தும் சந்திப்புக்களுக்கு இணையாக, வேறு எதையும் இட்டு நிரப்பமுடியாது. சந்திப்பது, விளக்கமளிப்பது, மன்னிப்பது என்ற சவால்களிலிருந்து, வேறு எதுவும் நம்மைத் தள்ளி வைக்க முடியாது. வரலாற்றுக் காயங்களை அகற்ற, நீதி வழங்கப்படுதலும், பாதிக்கப்பட்டோர் உண்மையை அறிவதற்குரிய வாய்ப்பு வழங்கப்படலும், தவறுகள் திருத்தப்படலும், அதே தவறுகள் மீண்டும் இடம்பெறாதிருப்பதற்குத் தேவையான அர்ப்பணமும் தேவை. அடிமட்ட கலாச்சார மாற்றம் இடம்பெறவேண்டும். வன்முறை மற்றும் மரணக் கலாச்சாரத்தை, வாழ்வு மற்றும் சந்திப்பின் கலாச்சாரமாக மாற்றுவது, கிறிஸ்தவப் பதில்மொழியாக இருக்கவேண்டும். நாம் இந்த அமைதிக்கு என்ன பங்காற்றியுள்ளோம்? புனித பீட்டர் கிளேவர், அடிமை மக்களின் மனங்களில் நம்பிக்கையை விதைக்கவும், அவர்களின் மாண்பைக் காக்கவும் உதவியுள்ளார். மனித வாழ்வின் புனிதத்துவத்திற்கு மதிப்பு, உலகளாவிய உடன்பிறந்த உணர்வு ஆகியவற்றை, சரியானமுறையில் புரிந்துகொண்டு, அவற்றின் அடித்தளத்தில் கட்டப்பட்ட மனிதகுலத்தின் பொதுவான வீடு இருக்கவேண்டும். இந்த நாட்டின் போதைப்பொருள் பயன்பாடு, சுற்றுச்சூழல் அழிவு, மாசுக்கேடு, தொழிலாளர் சுரண்டப்படல், சட்டவிரோதப் பணப்பரிமாற்றங்கள், மக்களை ஏழ்மையில் தள்ளுதல், பாலியல் தொழில், மனிதர்கள் சந்தைப் பொருட்கள்போல் கடத்தப்படுதல், சிறார்களுக்கு எதிரான உரிமை மீறல்கள், அடிமைத்தனம், சுரண்டப்படும் குடியேற்றதாரர், என அனைத்தையும் நினைத்துப் பார்க்கிறேன். பிறரன்பை உள்ளடக்கிய நீதியின் கொள்கைகளுடன் சமூக அடித்தளம் இடப்படவேண்டும் என்பதை உணர்வோம். நாம் ஒன்றிணைந்து செபிக்கவேண்டும் என இயேசு விரும்புகிறார். நம் செபங்கள் ஒரே குரலாக எழட்டும். தவறிழைத்தவர்களின் அழிவுக்காக அல்ல, மாறாக, அவர்கள் மீட்கப்படுவதற்கும், பழி வாங்கலுக்காக அல்ல, மாறாக, நீதிக்கும், அழிப்பதற்கு அல்ல, மாறாக, உண்மையின் வழி குணப்படுத்தப்படுவதற்கும் செபிப்போம். 'நம் முதலடியை எடுத்து வைப்போம்' என்ற இத்திருத்தூதுப்பயண விருது வாக்கு நிறைவேற்றப்பட செபிப்போம். முதலடி எடுத்து வைப்பது என்பது, நம்மை விட்டு வெளியே வந்து, பிறரை, இயேசுவோடு இணைந்து சந்திப்பதாகும். நீடித்த அமைதி வேண்டுமெனில், கொலம்பியா இப்பாதையில் செல்லவேண்டும். சுருக்கமாக சொல்லவேண்டுமெனில், இன்று தேவைப்படுவது, அமைதியை கட்டியெழுப்பும் பணி. நம்மால் இயலாததை இறைவன் நமக்கு ஆற்றமுடியும். உலகம் முடியும் வரை உங்களோடு இருப்பேன் என உரைத்த இயேசு, நம் அனைத்து முயற்சிகளுக்கும் பலனளிப்பார். (ஆதாரம் : வத்திக்கான் வானொலி) [2017-09-11 21:14:56]


கொலம்பியாவின் மெடெலினில் திருத்தந்தையின் திருப்பலி

திருத்தந்தை பிரான்சிஸ் அவர்கள், தனது இருபதாவது வெளிநாட்டுத் திருத்தூதுப் பயணமாக, தென் அமெரிக்க நாடான கொலம்பியாவில், செப்டம்பர் 07, இவ்வியாழன் முதல் பயண நிகழ்ச்சிகளை நிறைவேற்றிக் கொண்டிருக்கிறார். இப்பயணத்தில் திருத்தந்தை சென்ற இரண்டாவது நகரமான வில்லாவிசென்சியோவில், இவ்வெள்ளிக்கிழமை பயண நிகழ்வுகளை ஆரம்பித்தவேளை, கொலம்பியாவின் முன்னாள் முக்கிய புரட்சிக்குழுவான FARC அமைப்பின் தலைவர் Rodrigo Londono அவர்கள், தனது புரட்சிக்குழு இழைத்த அனைத்துத் துன்பங்களுக்கும் திருத்தந்தையிடம் மன்னிப்புக் கேட்டு திறந்த கடிதம் ஒன்றை வெளியிட்டிருந்தார். வில்லாவிசென்சியோ நகரம், கொலம்பியாவில், ஐம்பது ஆண்டுகளுக்கும் மேலாக நடந்த உள்நாட்டுப் போரின் முக்கிய இடமாக அமைந்திருந்தது என்பது குறிப்பிடத்தக்கது. இப்போரில் 2 இலட்சத்து 20 ஆயிரத்துக்கு மேற்பட்டோர் கொல்லப்பட்டனர். எழுபது இலட்சத்துக்கு மேற்பட்டவர்கள் புலம்பெயர்ந்தனர். இவ்வெண்ணிக்கை, உலகிலே அதிகமான புலம்பெயர்வாக இருந்தது எனச் சொல்லப்படுகிறது. வில்லாவிசென்சியோ நகரில், திருத்தந்தை தேசிய ஒப்புரவு நிகழ்வுகளை நிறைவேற்றி, கொலம்பிய மக்கள் பகைமை உணர்வுகளைக் கைவிட்டு, மனம்வருந்தி திரும்பிவரும் மக்களை மன்னித்து ஒப்புரவுக்குத் தங்களைக் கையளிக்குமாறு கேட்டுக்கொண்டார். இவ்வெள்ளி இரவு பொகோட்டா திருப்பீடத் தூதரகத்தில் உறங்கச் செல்வதற்குமுன், அத்தூதரகத்திற்குமுன் கூடியிருந்த முன்னாள் புரட்சிக்குழு உறுப்பினர்கள், வன்முறைக்குப் பலியானவர்கள் மற்றும், படைவீரர்களை வாழ்த்தி, ஆசீர்வதித்தார். திருத்தந்தை பிரான்சிஸ் அவர்கள், செப்டம்பர் 09, இச்சனிக்கிழமை பயணத் திட்டங்களை நிறைவேற்றிய மெடெலின் (Medellín) நகரமும் கொலம்பியா எதிர்கொள்ளும் முக்கிய பிரச்சனையான போதைப்பொருள் வர்த்தகத்தோடு தொடர்புடைய இடம். மெடெலின், மக்கள் தொகையிலும், பொருளாதாரத்திலும், அந்நாட்டின் இரண்டாவது பெரிய நகரமாகும். 1616ம் ஆண்டில் ஒரு சிறிய பழங்குடியின கிராமமாக உருவாக்கப்பட்ட இந்நகரில்தான், உலகில் மிகவும் பிரபலமாக இருந்த போதைப்பொருள் வர்த்தகர் Pablo Emilio Escobar Gaviria தனது தொவிலை நடத்தினார். கொக்கெய்ன் போதைப்பொருள் மன்னர் என அழைக்கப்பட்ட இவர், அமெரிக்க ஐக்கிய நாட்டிற்குள் நுழைந்த போதைப்பொருள்களில் 80 விழுக்காட்டை அனுப்பி, பெரும் பணக்காரராக இருந்தார். இவர் தனது 44வது வயதில் 1993ம் ஆண்டு டிசம்பரில் சுட்டுக்கொல்லப்பட்டார். இந்த மெடெலின் நகரின் Enrique Olaya Herrera விமானநிலையத்தை, உள்ளூர் நேரம் காலை 9.30 மணிக்குச் சென்றடைந்தார் திருத்தந்தை. அவ்விமானநிலையத்தில் திருத்தந்தை நிறைவேற்றவிருந்த திருப்பலிக்காக, கொட்டும் மழையிலும், மழைக்குரிய மற்றும் அமைதியின் அடையாளமாக வெண்மை நிறத்திலும் ஆடைகளை அணிந்துகொண்டு ஏறத்தாழ பத்து இலட்சம் விசுவாசிகள் காத்திருந்தனர். இவர்கள் மத்தியில் திறந்த காரில் வலம் வந்து திருப்பலி மேடைக்குச் சென்று திருப்பலியைத் தொடங்கிய திருத்தந்தை, இங்கு தாமதமாக வந்ததற்கு மன்னிப்புக் கேட்டார். Rionegro நகரிலிருந்து கெலிகாப்டரில் இங்கு வரவிருந்தவேளை, மழையின் காரணமாக, காரில் வரவேண்டியிருந்ததே இதற்கு காரணம் என்று சொல்லி திருப்பலியைத் தொடங்கினார். இலத்தீனிலும், இஸ்பானியத்திலும் நிறைவேற்றப்பட்ட இத்திருப்பலியில் திருத்தந்தை ஆற்றிய மறையுரையில், கொலம்பிய மக்கள் ஒருவர் ஒருவருக்கு உதவிசெய்வதில் தங்களை அர்ப்பணிக்க வேண்டும், வன்முறையற்ற அகிம்சா, ஒப்புரவு மற்றும் அமைதியின் செயல்களை தழுவிக்கொள்ளுமாறு கேட்டுக்கொண்டார். ஆப்ரிக்க கறுப்பு இன அடிமைகளின் திருத்தூதராகப் போற்றப்படும், இயேசு சபை அருள்பணியாளர் புனித பீட்டர் கிளேவர் அவர்களின் நினைவாக இத்திருப்பலியை நிறைவேற்றினார் திருத்தந்தை பிரான்சிஸ்.இப்புனிதரின் விழா செப்டம்பர் 9. கத்தோலிக்கர் அதிகமாக வாழ்கின்ற மெடெலின் நகரில் நிறைவேற்றிய இத்திருப்பலிக்குப்பின், அந்நகர் குருத்துவ கல்லூரியில் மதிய உணவு உண்டார் திருத்தந்தை. பின், உள்ளூர் நேரம் மாலை 3 மணிக்கு, மெடெலின் நகரின் புனித யோசேப்பு சிறார் இல்லம் (Hogar San José) சென்றார் திருத்தந்தை. (ஆதாரம் : வத்திக்கான் வானொலி) [2017-09-10 22:04:57]


அருள்பணியாளர், துறவியருக்கு திருத்தந்தையின் உரை

அன்பு சகோதர ஆயர்களே, அருள்பணியாளரே, துறவியரே, குருமாணவர்களே, குடும்பத்தினரே, உண்மையான திராட்சை செடி என்று இயேசு கூறிய நற்செய்திப் பகுதியை வாசிக்கக் கேட்டோம். இச்சொற்களை, இயேசு, தன் இறுதி இரவுணவின்போது சீடர்களிடம் கூறினார். மேலறையில் நிகழ்ந்த அந்த முதல் திருப்பலியில், இயேசு, மனம் திறந்து தன் சீடர்களிடம் பேசினார்; புதிய உடன்படிக்கையை அவர்களுக்கு வழங்கினார். அதே மேலறையில், மரியாவும், ஏனைய பெண்களும் சீடர்களோடு கூடி, செபித்து வந்தனர் (திருத்தூதர் பணிகள் 1: 13-14). அன்று அவர்கள் கூடிவந்ததுபோல், நாம் இங்கு கூடிவந்துள்ளோம். அருள்சகோதரி லெய்டி, மரியா இசபேல், அருள்பணி யுவான் ஃபெலிப்பே ஆகியோர் பகிந்துகொண்டதைக் கேட்டோம். இளையோரில் பலர், வாழும் இயேசுவை, தங்கள் குழுமங்களில் கண்டுகொண்டுள்ளனர். இவ்வுலகின் தீமைகளுக்கு எதிராக, இளையோர் பொறுமையிழந்து கூடிவருகின்றனர். இந்த அநீதிகளுக்கு எதிராக அவர்கள் குரல் கொடுப்பதை, இயேசுவின் பெயரால் செய்யும்போது, அவர்கள் 'தெரு போதகர்களாக' மாறி, மக்கள் வாழும் இடங்களுக்கு, இயேசுவை ஏந்திச் செல்கின்றனர். இயேசு கூறும் திராட்சைக்கொடி, 'உடன்படிக்கையின் மக்களே'. இயேசுவுடன் ஒன்றித்திருக்கும்வரை, திராட்சைக்கொடி பலன்தரும்; கோபம், ஏமாற்றம் ஆகியவற்றால், செடியைவிட்டு விலகிச்செல்லும் கொடி, காய்ந்துபோகும். திராட்சைச்செடி வளரும் பூமியான கொலம்பியா நாடு, எவ்வாறு உள்ளது? ஒளியும், இருளும் கலந்த ஒரு குழப்பமானச் சூழல் இந்நாட்டில் நிலவி வருகிறது. இந்தக் குழப்பங்களின் நடுவே, இறைவனின் அழைத்தல் தொடர்ந்து ஒலிக்கிறது. விவிலியத்தில், ஆதிகாலம் முதலே, குழப்பங்கள் நிலவிவந்தன. காயின் ஆபேலைக் கொன்றதுமுதல், இவ்வுலகில் இரத்தம் சிந்தப்பட்டு வருகிறது. இருப்பினும், இவற்றிற்கிடையே, இறைவனின் அழைத்தலும் மக்களை தொடர்ந்து வந்தடைந்துள்ளது. திராட்சைச்செடியுடன் இணைந்த ஒவ்வொரு கொடியும், பலன் தருவதற்கு அழைக்கப்பட்டுள்ளது. கொடி வாழ்வதற்கு, இயேசு என்ற செடியிலிருந்து சாறைப் பெறவேண்டும். இயேசுவோடு இணையாமல், தங்கள் பதவி, முன்னேற்றம் என்ற ஏணியில் ஏற விழைவோர், பணம், புகழ் என்ற சோதனைகளுக்கு உட்படுகின்றனர். நான் அடிக்கடி சொல்லிவருவது இதுதான்: பணம் உள்ள 'பர்ஸ்' வழியே, சாத்தான் நுழைகிறது. 'நீங்கள் கடவுளுக்கும், செல்வத்துக்கும் பணிவிடை செய்யமுடியாது' (மத்தேயு 6: 21,24) மக்கள் நம்மீது கொண்டிருக்கும் மதிப்பையும், செல்வாக்கையும் பயன்படுத்திக்கொண்டு, பணிவிடை பெறுவதற்கோ, செல்வங்கள் சேர்ப்பதற்கோ முயற்சிகள் செய்யக்கூடாது. கனி தராத கொடிகளை தறித்துவிடும் இறைவன், மிகுந்த கனி தருவதற்கென, கொடிகளை கழித்தும் விடுகிறார். முற்றிலும் வெட்டப்பட்டு உலர்ந்துபோகாமல் இருக்க, இயேசு கூறும் வழி, அவரோடு இணைந்திருத்தல். இயேசுவோடு இணைந்திருப்பதற்கு, மூன்று வழிகளைக் கூற விழைகிறேன். 1. கிறிஸ்துவின் மனிதத்தன்மையை தொடுவதன் வழியாக, குறிப்பாக, துயருறுவோருக்கு உதவிகள் செய்யும் நல்ல சமாரியராக வாழ்வதன் வழியாக, இயேசுவோடு இணைந்திருக்கிறோம். 2. அவரது இறைத்தன்மையை தியானம் செய்வதன் வழியாக, அதாவது, விவிலியத்தை வாசிப்பது, ஒவ்வொருநாளும் செபிப்பது இவற்றின் வழியே இயேசுவோடு இணைந்திருக்கிறோம். 3. கிறிஸ்துவுடன் இணைந்திருப்பதால், வாழ்வில் மகிழ்வடைகிறோம். உண்மையான மகிழ்வுடன் இருந்தால், சோகமான சீடர்களாக, கசப்பு நிறைந்த திருத்தூதர்களாக வாழ மாட்டோம். மகிழ்வைப் பறைசாற்றி, நம்பிக்கையின் தூதர்களாக வாழ்வோம். பெரு வெள்ளத்திற்குப்பின், நோவா, புதிய துவக்கத்தின் அடையாளமாக, திராட்சைத் தோட்டம் ஒன்றை உருவாக்கினார். வாக்களிக்கப்பட்ட நாட்டைப் பார்வையிட, மோசே அனுப்பிய தூதர்கள், அந்நாட்டின் செழிப்பை உணர்த்த, திராட்சைக் கனிகளைக் கொணர்ந்தனர். கொலம்பியா நாடும், கனிகள் தரும் திராட்சைச்செடியாக இருக்கவேண்டும் என்று இறைவன் விரும்புகிறார். வெறுப்பு, பகைமை என்ற வெள்ளம் தீர்ந்தபின், அமைதி, நீதி என்ற கனிகள் இந்நாட்டில் விளையவேண்டும் என்று இறைவன் விரும்புகிறார். இறைவன் உங்கள் அனைவரையும் ஆசீர்வதிப்பாராக! கொலம்பியா நாட்டில், அர்ப்பணிக்கப்பட்ட வாழ்வை ஆசீர்வதிப்பாராக! எனக்காக செபிக்க மறவாதீர்கள்! (ஆதாரம் : வத்திக்கான் வானொலி) [2017-09-10 21:48:24]


கர்தினால் தெ பவ்லிஸ் மரணம், திருத்தந்தை இரங்கல்

திருப்பீட பொருளாதாரத்துறையின் முன்னாள் தலைவர், சிறந்த பேராசிரியர் மற்றும் திருஅவை சட்டத்தில் நிபுணருமான கர்தினால் வெலாசியோ தெ பவ்லிஸ் அவர்கள் மரணமடைந்ததை முன்னிட்டு, தனது இரங்கல் தந்திச் செய்தியை அனுப்பியுள்ளார், திருத்தந்தை பிரான்சிஸ். கர்தினால் வெலாசியோ தெ பவ்லிஸ் அவர்களின் சகோதரர் ஆஞ்சலோ தெ பவ்லிஸ் அவர்களுக்கு திருத்தந்தை பிரான்சிஸ் அவர்களும், திருப்பீட செயலர் கர்தினால் பியெத்ரோ பரோலின் அவர்களும், இரங்கல் தந்திகளை அனுப்பி, கர்தினால் அவர்களின் குடும்பத்தினருக்கு தங்களின் ஆழ்ந்த அனுதாபங்களையும், செபங்களையும் தெரிவித்துள்ளனர். மேலும், திருஅவைக்கு, குறிப்பாக அருள்பணியாளர்களை உருவாக்குவதில் கர்தினால் ஆற்றிய பணிகளைப் பாராட்டியுள்ளார் திருத்தந்தை. 81 வயது நிரம்பிய கர்தினால் வெலாசியோ தெ பவ்லிஸ் அவர்கள், சில மாதங்களாக நோயினால் துன்புற்று, செப்டம்பர் 09, இச்சனிக்கிழமையன்று உரோம் நகரில் இறைபதம் அடைந்தார். இவரின் அடக்கச் சடங்கு திருப்பலி, செப்டம்பர் 11 இத்திங்கள் காலை 9 மணிக்கு நடைபெறுகின்றது. கர்தினால் அவர்களின் இறப்போடு திருஅவையில் மொத்த கர்தினால்களின் எண்ணிக்கை 220 ஆகவும், திருத்தந்தையைத் தேர்ந்தெடுக்கும் தகுதியுடையவர்களின் எண்ணிக்கை 120 ஆகவும் மாறியுள்ளன. புனித சார்லஸ் பொரோமியோ மறைப்பணி (ஸ்கலபிரினி) சபையைச் சார்ந்த கர்தினால் வெலாசியோ தெ பவ்லிஸ் அவர்கள், 1935ம் ஆண்டு செப்டம்பர் 19ம் தேதி இத்தாலியில் சொனினோ என்ற ஊரில் பிறந்தவர். இவர் இன்னும் 10 நாள்களுக்குள் அவரின் 82வது பிறந்த நாளைச் சிறப்பிக்க இருந்தார். இவர், உரோம் பல்கலைக்கழகங்களில் ஏறத்தாழ நாற்பது ஆண்டுகள் அறநெறியியல் மற்றும் திருஅவை சட்டப் பாடங்களைக் கற்பித்துள்ள பேராசிரியர் மற்றும் நிபுணர். அறிவியல், ஆன்மீகம், திருஅவை சட்டம் ஆகியவற்றில் 200க்கும் மேற்பட்ட நூல்கள் மற்றும் கட்டுரைகளை இவர் எழுதியுள்ளார். திருஅவையின் உச்ச நீதிமன்றத்தின் செயலராகவும் பணியாற்றிய கர்தினால் வெலாசியோ தெ பவ்லிஸ் அவர்கள், 2010ம் ஆண்டில் முன்னாள் திருத்தந்தை 16ம் பெனடிக் அவர்களால் கர்தினாலாக உயர்த்தப்பட்டார். (ஆதாரம் : வத்திக்கான் வானொலி) [2017-09-10 21:44:55]


சமுள்ள பார்வையில் – வானதூதராக வழியனுப்பி வைத்த அன்னை

1979ம் ஆண்டு, அன்னை தெரேசா அவர்களுக்கு நொபெல் அமைதி விருது வழங்கப்பட்ட வேளையில், அவர் வழங்கிய ஏற்புரையில், தன் வாழ்வு அனுபவங்கள் சிலவற்றைப் பகிர்ந்துகொண்டார். அவற்றில் ஒன்று, இதோ: "வீதியில் கிடந்த ஒருவரை எங்கள் இல்லத்திற்குக் கொணர்ந்தபோது, அவர் சொன்னதை நான் ஒருநாளும் மறக்கப்போவதில்லை. அவரது உடல் முழுவதும், காயங்களால் நிறைந்து, புழுக்கள் மண்டிக்கிடந்தது. முகம் மட்டுமே புழுக்களின் தாக்குதலிலிருந்து தப்பித்திருந்தது. அந்நிலையில் இருந்த அவர், எங்கள் இல்லத்திற்கு வந்து சேர்ந்ததும், 'நான் இதுவரை வீதியில் ஒரு மிருகத்தைவிட கேவலமாகக் கிடந்தேன். இப்போது, ஒரு வானதூதரைப்போல் இறக்கப்போகிறேன்' என்று சொன்னார். சில நாள்கள் சென்று, அவர் இறைவன் இல்லத்தில் வாழச் சென்றார். ஆம், மரணம் என்பது, இறைவனின் இல்லம் செல்வதுதானே!" மனிதர்கள் என்றுகூட மதிக்க இயலாதவாறு உருக்குலைந்திருந்தோரை, வானதூதர்களாக மாற்றி, வழியனுப்பி வைத்த அன்னை தெரேசா, 20 ஆண்டுகளுக்கு முன், 1997ம் ஆண்டு, செப்டம்பர் 5ம் தேதி இறைவனின் இல்லம் சென்றார். கொல்கத்தா வீதிகளிலிருந்து கொண்டுவரப்பட்டு, அன்னையின் இல்லத்தில் சில நாள்கள் தங்கியபின், வானதூதர்களாக இறைவனின் இல்லம் சென்றிருந்த பலர், அன்னையை வரவேற்க அங்கு காத்திருந்தனர் என்று உறுதியாகக் கூறலாம். அன்னை தெரேசா அவர்கள் இறையடி சேர்ந்த செப்டம்பர் 5ம் தேதியை, அகில உலக பிறரன்பு நாள் என ஐ.நா.அவை அறிவித்துள்ளது. 2013ம் ஆண்டு முதல் இந்த உலக நாள் சிறப்பிக்கப்படுகிறது. (ஆதாரம் : வத்திக்கான் வானொலி) [2017-09-09 20:49:01]


வில்லாவிசென்சியோவில் ஒப்புரவு நிகழ்வுகள்

கொலம்பிய நாட்டின் வில்லாவிசென்சியோ நகரில், இவ்வெள்ளி மாலை 3.30 மணிக்கு, Las Malocas பூங்காவில் தேசிய ஒப்புரவுக்கான செபக் கூட்டத்தைத் தலைமை தாங்கி நடத்தினார் திருத்தந்தை பிரான்சிஸ். 2002ம் ஆண்டு மே 2ம் தேதி Bojayá ஆலயம் தாக்கப்பட்டதில், உருவிழந்த, எரிந்த சிதைந்துபோன, கால்கள் இல்லாத கறுப்புநிற இயேசுவின் திருச்சிலுவை, இச்செபக்கூட்டம் நடைபெற்ற மேடையில் வைக்கப்பட்டிருந்தது. அந்த ஆண்டுகளில் நடந்த வன்முறை மற்றும் தீமைகளை நினைவுபடுத்துவதாக இச்சிலுவை உள்ளது. அந்த ஆலயம் தாக்கப்பட்டதில் நூற்றுக்கும் மேற்பட்டோர் உயிரிழந்தனர். கொலம்பிய உள்நாட்டுப்போரின் வன்முறையில் பாதிக்கப்பட்டவர்கள், இராணுவத்தினர், காவல்துறையினர், முன்னாள் புரட்சிக்குழுவினர் ஆகியோரின் பிரதிநிதிகள் முதல் வரிசையில் அமர்ந்திருந்தனர். வில்லாவிச்சென்சியோ பேராயர் Oscar Urbina Ortega அவர்கள் முதலில் வரவேற்றுப் பேசினார். பின் அமைதி பற்றிய பாடல் பாடப்பட்டது. கொலம்பியாவில் ஐம்பது ஆண்டுகளுக்கு மேலாக நடந்த சண்டையில் பலவிதமாகப் பாதிக்கப்பட்ட நான்கு பேர் சாட்சியம் சொன்னார்கள். ஒவ்வொருவரும் சாட்சியம் சொல்லியபின், அத்திருச்சிலுவையின் முன் மெழுகுதிரிகளை ஏற்றிவைத்தனர். திருத்தந்தையின்முன் சாட்சியம் சொன்னவர்களில் ஒருவரான Pastora Mira என்பவர், போரில் தனது மகளையும் மகனையும் இழந்தவர். தற்போது, தனது மகனைக் கொலைசெய்தவர்களில் ஒருவரைப் பராமரித்து வருகிறார். அடுத்து சாட்சியம் சொன்ன Luz Dary என்பவர், நிலக்கண்ணி வெடியால் கடுமையாய்க் காயப்பட்டு துன்புற்றவர். எனினும் தற்போது குணமடைந்து, மக்களில் அச்சத்தையும், மனக்காயத்தையும் போக்குவதற்கு உழைத்து வருகிறார். மற்ற இருவரும் முன்னாள் வன்முறை புரட்சிக்குழுக்களைச் சார்ந்தவர்கள். வன்முறையின் கொடுமைகளை ஏற்ற இவர்கள், அவை தங்கள் வாழ்வை எவ்வாறு மாற்றியுள்ளன எனப் பகிர்ந்து கொண்டனர். தேசிய ஒப்புரவு செப நிகழ்வில் திருத்தந்தை ஆற்றிய உரையில், பலரின் சார்பாக, சாட்சியம் சொன்ன இவர்களுக்கு நன்றி தெரிவித்தார். இவர்கள் அனுபவித்த துன்பங்களையும் வேதனைகளையும், எல்லாவற்றிற்கும் மேலாக, இவர்களிடம் தற்போது காணப்படும் அன்பு மற்றும் மன்னிப்பைக் கேட்டபோது, நான் மிகவும் மனம் உருகினேன். வெறுப்பும், பழிவாங்கும் உணர்வும், வேதனையும் நம் வாழ்வை மிஞ்சவிடாமல் மன்னிப்பை இவர்கள் விதைத்திருக்கின்றார்கள் என்ற திருத்தந்தை, அமைதிக்கும் ஒப்புரவுக்கும் அழைப்பு விடுத்தார். இந்தப் பூங்காவில் ஒப்புரவு செப நிகழ்வை நிறைவுசெய்து, அங்கிருந்து 14 கிலோ மீட்டர் தூரத்திலுள்ள los Fundadores பூங்கா சென்றார் திருத்தந்தை. இங்கு தேசிய ஒப்புரவின் நினைவுச்சின்னமாக அமைக்கப்பட்டுள்ள திருச்சிலுவையின்முன் சிறிதுநேரம் அமைதியாக செபித்தார் திருத்தந்தை. இந்நிகழ்வில் கொலம்பிய அரசுத்தலைவர் ஹூவான் மானுவேல் சாந்தோஸ் கால்தெரோன், சிறார், பழங்குடியின மக்கள் குழு என ஏறத்தாழ நானூறு ஆகியோர் கலந்துகொண்டனர். சிறார் திருத்தந்தையுடன் அச்சிலுவையின் முன் சென்றபோது, பாடகர் குழு, மரபுப் பாடல் ஒன்றை பாடியது. இந்த நினைவுச்சின்னத்தில், அந்த நாட்டில் அண்மை ஆண்டுகளில் வன்முறைக்குப் பலியானவர்களின் பெயர்கள் எழுதப்பட்டுள்ளன. சுற்றுலாப் பயணிகள் விரும்பிச் செல்லும் இடமாகவும் இது உள்ளது. இராணுவம் அமைதிக்குரிய மணியை ஒலித்த பின், சிறிதுநேரம் அமைதியில் அனைவரும் செபித்தனர். பின், புதுப்பிக்கப்பட்ட வாழ்வின் அடையாளமாக திருத்தந்தை ஒரு மரத்தை நட்டார். வெண்ணிற ஆடையணிந்த இரு சிறாரும் அங்கு நின்று திருத்தந்தைக்கு உதவினர். ஒப்புரவு நிகழ்வுகள் என்பதால், இவற்றில் பங்குகொண்டவர்களில் ஏறத்தாழ அனைவருமே வெண்ணிறத்தில் ஆடை அணிந்திருந்தனர். இந்நிகழ்வை நிறைவுசெய்து பொகோட்டாவுக்குப் புறப்பட்டார் திருத்தந்தை பிரான்சிஸ். அந்நகர் திருப்பீடத் தூதரகத்தில் இரவு உணவருந்தி உறங்கச் சென்றார். ஒவ்வொரு நாள் இரவும், இத்தூதரகத்தின்முன் ஒரு குழுவினர் கூடுகின்றனர். “முதல் அடியை எடுத்து வைப்போம்”என்ற இப்பயணத்தின் கருப்பொருளை மையப்படுத்தி இக்குழு கூடுகிறது. இவர்களுக்கு நல்வார்த்தைகள் சொல்லி அன்றைய நாளை நிறைவு செய்கிறார் திருத்தந்தை பிரான்சிஸ். கொலம்பியாவில், ஏன் உலகெங்கும் மக்கள் மனங்களில் அமைதியும் ஒப்புரவும் மன்னிப்பும் நிலவுதாக. திருத்தந்தை, கொலம்பியத் திருத்தூதுப் பயணத்தை நிறைவுசெய்து, செப்டம்பர் 11, வருகிற திங்களன்று வத்திக்கான் வந்தடைவார். (ஆதாரம் : வத்திக்கான் வானொலி) [2017-09-09 20:40:50]


வத்திக்கான் தொழிற்கூடத்தில் திருத்தந்தை திருப்பலி

இயேசு நேர்மையாளர்களை அல்ல, பாவிகளையே அழைக்க வந்தார் என்றும், நாம் எல்லாரும் பாவிகளாய் இருப்பதால், இயேசுவை நம்மிடம் ஈர்ப்பதற்கு வாய்ப்பாக உள்ளது என்றும், திருத்தந்தை பிரான்சிஸ் அவர்கள், இவ்வெள்ளி காலையில் மறையுரை வழங்கினார். வத்திக்கானிலுள்ள தொழிற்கூடத்தில், தற்காலிகமாக அமைக்கப்பட்ட பீடத்தில், ஏறத்தாழ நூறு தொழிலாளர்களுக்கு, இவ்வெள்ளி காலை 7.30 மணிக்கு திருப்பலி நிறைவேற்றிய திருத்தந்தை பிரான்சிஸ் அவர்கள், மத்தேயுவின் அழைப்பு பற்றிக் கூறும், இந்நாளைய நற்செய்தியை மையப்படுத்தி மறையுரை வழங்கினார். உரோமையர்களுக்கு வரிவசூலித்துக்கொடுத்த மத்தேயு, பாவி என ஒதுக்கி வைக்கப்பட்டார், ஆனால் இயேசு அவரை அழைத்தார் என்றுரைத்த திருத்தந்தை, புனித ஜெரோம் அவர்களின் வாழ்வு பற்றியும் பகிர்ந்துகொண்டார். இப்புனிதர் எல்லாவற்றையும் ஆண்டவருக்கு அர்ப்பணித்தபின், இன்னும் என்ன வேண்டுமெனக் கேட்டபோது, உன் பாவங்களைக் கொடு என, ஆண்டவர் அவரிடம் கேட்டார் எனவும் திருத்தந்தை கூறினார். மாதத்தின் முதல் வெள்ளிக்கிழமையாகிய இன்று, இயேசுவின் திருஇதயத்தை நினைக்கின்றோம், இரக்கமுள்ள இந்த இதயம், நம் பலவீனங்களையும், பாவங்களையும், நம்மிடமிருந்து கேட்கிறார், அவை அனைத்தையும் மன்னிக்கிறார், இயேசு எல்லாவற்றையும் எப்போதும் மன்னிக்கிறார் என்றும், மறையுரையில் கூறினார், திருத்தந்தை பிரான்சிஸ். இத்திருப்பலியின் இறுதியில், தொழிலாளர்கள் மரச் சிலுவை ஒன்றை, திருத்தந்தைக்குப் பரிசாக வழங்கினர். பின் அந்தத் தொழிற்கூடத்தில், அனைவரோடும் சேர்ந்து காலையுணவையும் அருந்தினார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-09-09 20:34:05]


பக்க இலக்கங்களை அழுத்தி எல்லா செய்திகளையும் பார்வையிடவும்