வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



துயருறுவோரின் துன்பம் துடைப்பதே அமைதியை ஊக்குவிக்கும் செயல்

ஏழைகள், புலம்பெயர்ந்தோர், மற்றும், அடிமைத்தொழிலுக்கு உள்ளாக்கப்பட்டோரின் துன்பங்களை துடைப்பதே அமைதியை ஊக்குவிப்பதற்குரிய வழி என இச்செவ்வாயன்று, தன் டுவிட்டர் பக்கத்தில் எழுதியுள்ளார், திருத்தந்தை பிரான்சிஸ். 'அமைதியை ஊக்குவிக்கும் நோக்கத்தில், ஏழைகள், புலம்பெயர்ந்தோர், மற்றும், நவீன அடிமைத்தனத்திற்கு உள்ளாக்கப்பட்டோருக்கு உதவும் நிலையான தீர்வுகளை கண்டுகொள்ள, ஒன்றிணைந்து செயல்படுவோம்' என்கிறது, திருத்தந்தையின் டுவிட்டர் செய்தி. மேலும், இச்செவ்வாயன்று திருப்பீட செய்தித் தொடர்பகம் வெளியிட்டுள்ள ஓர் அறிக்கையில், 1983ம் ஆண்டு எம்மானுவேலா ஒர்லாந்தி என்ற சிறுமி, இத்தாலியில் காணாமல் போனதற்கும், திருப்பீடத்திற்கும் தொடர்பு உள்ளது என இரு பத்திரிகைகளில் வந்துள்ள செய்தி பொய்யானது, மற்றும், திருப்பீடத்தின் நற்பெயருக்கு களங்கம் விளைவிப்பதாக உள்ளது என தெரிவிக்கிறது. (ஆதாரம் : வத்திக்கான் வானொலி) [2017-09-19 19:42:24]


பாசமுள்ள பார்வையில் - கணவரைக் காப்பாற்றத் துணிந்த தாய்

2013ம் ஆண்டு டிசம்பர் மாதத்தில் மகாராஷ்டிர மாநிலத்தின் பாராமதி நகரில் நடந்த, மாரத்தான் ஓட்டப் பந்தயத்தில், 60 வயதைத் தாண்டிய, மூத்த குடிமக்களுக்கான பிரிவில், மூன்று கி.மீ. தூரம் ஓடி, முதல் பரிசை தட்டிச் சென்றார், 66 வயது நிரம்பிய லதா பாக்வான் கரே (Lata Bhagwan Kare). அவர் வயதை ஒட்டிய பலரும், பந்தயத்தில் ஓடுவதற்குரிய உடைகளை அணிந்திருந்த நிலையில், லதா அவர்கள், காலில் செருப்புகூட அணியாமல், தலையில் முக்காடுடன், மராத்தியப் பாரம்பரிய ஒன்பது முழ பாரம்பரியச் சேலையை உடுத்தியபடி, பந்தயத் தூரத்தை முதலில் கடந்து பரிசுத் தொகையைப் பெற்றார். இவர் தன் வாழ்நாளில் வேகமாகக்கூட நடந்ததில்லையாம். அப்படியிருந்தும் வெறும் காலோடு இந்த ஏழைத்தாய் மாரத்தானில் ஓடுவதற்குத் துணிந்ததே, நோயுற்றிருந்த தன் கணவரைக் காப்பாற்ற வேண்டும் என்ற ஒரே நோக்கம்தான். லதா அவர்கள் சொன்னார் : “என் கணவரைக் காப்பாற்ற, இதற்குமேல், எந்த தியாகத்தையும் செய்யத் தயாராக இருக்கிறேன்” என்று. புல்டானா மாவட்டத்தில் பிம்ப்லி என்ற சிறிய கிராமத்தைச் சேர்ந்தவர் லதா. இவரும் இவரது கணவரும் கடினமாக உழைத்து, தங்களின் மூன்று மகள்களுக்கும் திருமணம் செய்து வைத்தனர். மகள்களின் திருமணங்களுக்குப் பின், இத்தம்பதியர், வயல்களில் தினமும் கூலிவேலை செய்து பிழைப்பு நடத்தி வந்தனர். ஒருநாள் லதாவின் கணவர் கடுமையாய் நோயால் பாதிக்கப்பட்டார். கையில் பணமில்லை. தனது கிராமத்திற்கு அருகிலிருந்த அரசு மருத்துவமனைக்கு கணவரை அழைத்துச் சென்றார் லதா. அங்கு அவரைப் பரிசோதித்த மருத்துவர்கள், மேலும் சில மருத்துவப் பரிசோதனைகள் செய்வதற்காக, பாராமதிக்குப் போகச் சொன்னார்கள். தன் கரங்களிலே தன் கணவர் இறப்பதைப் பார்க்க விரும்பாத லதா, கண்ணீருடன் தனக்குத் தெரிந்தவர்களிடம் கெஞ்சி சிறிது பணம் சேர்த்தார். பாராமதியில், மருத்துவர்கள் மேலும் சில பரிசோதனைகள் செய்யச் சொன்னார்கள். அதற்கு ஐந்தாயிரம் ரூபாய் கட்டணம் தேவைப்பட்டது. விவசாயக் கூலி வேலை மூலம், தினம், நூறு ரூபாய் சம்பாதிக்கும் இவரிடம், பணம் இல்லை. பணத்திற்கு எங்குச் செல்வது? யாரிடம் கையேந்துவது? கனத்த இதயத்துடன் மருத்துவமனையைவிட்டு வெளியே வந்த லதா தம்பதியருக்கு, பசி வயிற்றைக் கிள்ளி எடுக்க, சாப்பிடுவதற்கு ஆளுக்கொரு சம்சா பலகாரம் வாங்கினர். அது சுற்றப்பட்டிருந்த துண்டு தினத்தாளில் மாரத்தான் பற்றி தடித்த எழுத்துக்களில் வெளியாகியிருந்ததை வாசித்தார் லதா. தனது கணவரின் உயிரைக் காப்பாற்றுவதற்கு அதில் கலந்துகொள்ள முடிவெடுத்தார். இவரின் பரிதாப நிலையைப் பாரத்து, மாரத்தானில் ஓடுவதற்கு நிர்வாகிகள் முதலில் அனுமதிக்கவில்லை. லதா கண்ணீருடன் கெஞ்சி அனுமதி பெற்றார். கணவரின் மீதுள்ள அன்பால் வெறுங்காலோடு ஓடி பரிசுப் பணத்தையும் பெற்றார் லதா. (ஆதாரம் : வத்திக்கான் வானொலி) [2017-09-18 21:14:03]


மன்னிப்பில் கிட்டிய மகிழ்வை, மன்னிப்பதில் பகிர்வோம்

எப்போதும் மன்னிக்க வேண்டும், ஏனெனில், கடவுளின் சாயலால் படைக்கப்பட்ட மனிதர்கள், அவர்கள் ஆற்றும் தீமைகளைவிட உயர்ந்தவர்கள் என்று இஞ்ஞாயிறு மூவேளை செப உரையில் எடுத்துரைத்தார் திருத்தந்தை பிரான்சிஸ். மன்னிப்பு குறித்து, தூய பேதுரு இயேசுவிடம் கேட்டது பற்றியும், அதற்கு இயேசு ஓர் உவமையுடன் பதில் கூறியதைப் பற்றியும் எடுத்துரைக்கும் இஞ்ஞாயிறு நற்செய்தி வாசகத்தை மையப்படுத்தி, புனித பேதுரு வளாகத்தில் கூடியிருந்த மக்களுக்கு நண்பகல் மூவேளை செப உரை வழங்கிய திருத்தந்தை, இரக்கமுள்ள அரசர், தன் பணியாளரின் பெரும் கடனை மன்னித்திருக்க, அவ்வூழியரோ தன்னிடம் ஒருவர் பட்டடிருந்த சிறு கடனை மன்னிக்க மறுத்தது, அவரை சிறையிலடைக்க காரணமாயிருந்தது என்றார். நாம் மனம் வருந்தும்போதெல்லாம் நம் பாவங்களை மன்னித்துவிடும் இறைவன் முன்னால், நாம் நம் சகோதரர்களை மன்னிக்க மறுப்பது தவறு என்ற திருத்தந்தை பிரான்சிஸ் அவர்கள், பாவங்கள் மன்னிக்கப்பட்டதால், அமைதியையும், மகிழ்ச்சியையும், உள்மன சுதந்திரத்தையும் பெறும் ஒருவர், மற்றவர்களை மன்னிப்பதன் வழியாக, அவற்றை அவர்களுக்கு வழங்கவேண்டும் என கேட்டுக்கொண்டார். 'எங்களுக்கு எதிராக தீமைச் செய்தவர்களை நாங்கள் மன்னிப்பதுபோல் எங்கள் பாவங்களையும் மன்னித்தருளும்' என்ற செபத்தின் வரிகளையும் சுட்டிக்காட்டிய திருத்தந்தை பிரான்சிஸ் அவர்கள், மற்றவர்களை நாம் மன்னிக்க மறுப்பது, நம்மை அன்புகூரவும், மன்னிக்கவும் தயாராக இருக்கும் இறைவனை ஏற்க மறுப்பதாகும் எனவும் எடுத்துரைத்தார். (ஆதாரம் : வத்திக்கான் வானொலி) [2017-09-18 21:05:07]


வத்திக்கான் வானொலி முன்னாள் இயக்குனரின் 100வது பிறந்தநாள்

வத்திக்கான் வானொலியின் முன்னாள் தலைமை இயக்குனர் அந்தோனியோ ஸ்டெபனிஸ்ஸி (Antonio Stefanizzi) அவர்கள், செப்டம்பர் 18, இத்திங்களன்று தன் 100வது பிறந்தநாளை சிறப்பித்ததையொட்டி, அவருக்கு தன் வாழ்த்துச் செய்தியை அனுப்பியுள்ளார் திருத்தந்தை பிரான்சிஸ். வத்திக்கானில், குறிப்பாக, அதன் சமூகத்தொடர்புத் துறையில் பல ஆண்டுகள் பணியாற்றி ஓய்வுபெற்ற இயேசு சபை அருள்பணியாளர் ஸ்டெபனிஸ்ஸி அவர்களுக்கு தன் ஆசீரையும், வாழ்த்தையும் தெரிவிக்கும் திருத்தந்தையின் செய்தி, திருப்பீடச் செயலர், கர்தினால் பியெத்ரோ பரோலின் அவர்களால் அனுப்பப்பட்டுள்ளது. இதற்கிடையே, வத்திக்கான் வானொலி பணியாளர்கள், மற்றும், திருப்பீட சமூகத்தொடர்பு செயலகத்தின் சார்பாக, இச்செயலகத்தின் செயலர், அருள்பணி லூச்சியோ ஏட்ரியன் ரூயிஸ் (Lucio Adrian Ruiz) அவர்கள், இத்திங்கள் நண்பகலில், அருள்பணி ஸ்டெபனிஸ்ஸி அவர்களைச் சந்தித்து, வாழ்த்துக்களைத் தெரிவித்தார். 1917ம் ஆண்டு, இத்தாலியின் லெச்சே (Lecce) நகரில் பிறந்த அருள்பணி ஸ்டெபனிஸ்ஸி அவர்கள், 1953ம் ஆண்டு முதல், 1967ம் ஆண்டு வரை, 15 ஆண்டுகள், வத்திக்கான் வானொலியின் தலைமை இயக்குநராகப் பணியாற்றினார். திருத்தந்தையர் 12ம் பயஸ், 23ம் ஜான் மற்றும் 6ம் பால் ஆகியோரின் தலைமைப்பணி காலத்தில் பணியாற்றிய அருள்பணி ஸ்டெபனிஸ்ஸி அவர்கள், உரோம் நகரில் உள்ள புனித கனிசியுஸ் இயேசு சபை இல்லத்தில் தன் 100வது பிறந்தநாளைக் கொண்டாடினார். (ஆதாரம் : வத்திக்கான் வானொலி) [2017-09-18 20:55:30]


17.09.2017AP2803251_Articolo

மனித உரிமைகள் உலகளாவிய தன்மை கொண்டவை மற்றும், இவை எல்லா மனிதருக்கும், எவ்வித வேறுபாடும் இன்றி வழங்கப்பட வேண்டுமென்று, திருப்பீட அதிகாரி ஒருவர் வலியுறுத்தியுள்ளார். ஐரோப்பாவில் பாதுகாப்பு மற்றும் ஒத்துழைப்புக்காக உழைக்கும் OSCE என்ற நிறுவனம், போலந்து நாட்டின் வார்சா நகரில், மனிதக்கூறுகள் என்ற தலைப்பில் நடத்திவரும் கூட்டத்தில் உரையாற்றிய, பேரருள்திரு Janusz Urbańczyk அவர்கள், நேரம், காலம், இடம் ஆகிய எவ்விதப் பாகுபாடுமின்றி, அனைத்து மக்களுக்கும் உலகளாவிய மனித உரிமைகள் அறிக்கை அமல்படுத்தப்பட வேண்டும் என்று வலியுறுத்தினார். மனித உரிமைகள், உலகளாவிய தன்மை கொண்டவை என்றும், இவ்வுரிமைகள் எல்லாருக்கும் இன்றியமையாதவை என்றும், இவை அனைவருக்கும் வழங்கப்படவேண்டும் என்றும், கத்தோலிக்கத் திருஅவையின் சமூகக் கோட்பாட்டு ஏட்டில் கூறப்பட்டுள்ளது என, பேரருள்திரு Urbańczyk அவர்கள், தன் உரையில் குறிப்பிட்டார். வார்சா நகரில் செப்டம்பர் 11ம் தேதி தொடங்கிய இக்கூட்டம், செப்டம்பர் 22ம் தேதி நிறைவடையும். OSCE நிறுவனத்தில், திருப்பீடப் பிரதிநிதியாகப் பணியாற்றிவரும் பேரருள்திரு Urbańczyk அவர்கள், இக்கூட்டத்தின் தொடக்க நிகழ்வில், இவ்வுரையை ஆற்றினார். (ஆதாரம் : வத்திக்கான் வானொலி) [2017-09-18 00:57:07]


குடும்ப திருப்பயண நிகழ்வுக்கு திருத்தந்தையின் வாழ்த்து

'மனித குடும்பத்திற்கு, குடும்பங்கள்' என்ற தலைப்பில் இத்தாலியின் பொம்பேய் நகரில் இடம்பெற்ற தேசிய திருப்பயண நிகழ்வுக்கு தன் வாழ்த்தைத் தெரிவித்துள்ளார், திருத்தந்தை பிரான்சிஸ். திருத்தந்தையின் வாழ்த்தையும் ஆன்மீக நெருக்கத்தையும் வெளியிட்டு, அவரது பெயரால் திருப்பீடச்செயலர் கர்தினால் பியெத்ரோ பரோலின் அவர்கள், பொம்பேய் பேராயர் தொம்மாசோ கப்பூத்தோ அவர்களுக்கு அனுப்பியுள்ள தந்திச்செய்தி, 2018ம் ஆண்டு அயர்லாந்தின் டப்ளின் நகரில் இடம்பெறவுள்ள அகில உலக குடும்ப மாநாட்டிற்கு தயாரிப்பாக பொம்பேய் பயணம் இருப்பதாக என்ற திருத்தந்தையின் ஆவலையும் வெளிப்படுத்தியுள்ளது. வேலைவாய்ப்புகள் இன்மையால் துன்புறும் குடும்பங்கள், விசுவாசத்திற்காக துயர்களை அனுபவிக்கும் குடும்பங்கள், துன்ப துயர்களை அனுபவிக்கும் குடும்பங்கள் என அனைவருக்கும் செபிக்குமாறும் இச்செய்தியில் திருத்தந்தையின் வேண்டுகோள் விடப்பட்டுள்ளது. 'மனித குடும்பத்திற்கு, குடும்பங்கள்' என்ற தலைப்பில், இத்தாலியின் பொம்பேய் நகரில் இச்சனிக்கிழமையன்று இடம்பெற்ற திருப்பயணம் மற்றும் கருத்தரங்கில் 10,000த்திற்கும் மேற்பட்டோர் கலந்துகொண்டனர். (ஆதாரம் : வத்திக்கான் வானொலி) [2017-09-18 00:47:54]


இயேசுவின் திரு இருதய நற்செய்தி சபையினருடன் திருத்தந்தை

இயேசுவின் திரு இதய பக்தி முயற்சிகளை பரப்பும் நோக்கத்துடன் உருவாக்கப்பட்ட இயேசுவின் திரு இருதய நற்செய்தி சபை, இயேசுவின் கருணைநிறை அன்பின் சாட்சிகளுக்குரிய நடவடிக்கைகளை மேற்கொண்டு வருவது குறித்து தன் மகிழ்ச்சியையும் பாராட்டையும் வழங்கினார் திருத்தந்தை பிரான்சிஸ். இயேசுவின் திரு இருதய நற்செய்தி சபையின் பொது அவைக் கூட்டத்தில் கலந்துகொண்ட 85 பிரதிநதிகளை இச்சனிக்கிழமை காலை, திருப்பீடத்தில் சந்தித்து உரை வழங்கிய திருத்தந்தை பிரான்சிஸ் அவர்கள், இந்தப் பொது அவை தயாரிப்பிற்கென தேர்ந்தெடுக்கப்பட்ட தலைப்பான ' நல்ல இரசத்தை இதுவரை வைத்திருத்தல்' என்பது குறித்தும் கருத்துக்களைப் பகிர்ந்து கொண்டார். கடந்த 150 ஆண்டுகளாக இத்துறவு சபை ஆற்றிவரும் அப்போஸ்தலிக்கப் பணிகளையும், உயர்ந்த திட்டங்களையும் குறித்து சிந்தித்து வரும் இந்நாட்களில், உலகிற்கும் திரு அவைக்கும் தொடர்ந்து ஆற்றவேண்டிய பணிகளை நினைவில்கொண்டு, தங்கள் விவாதங்களை மேற்கொள்ளுமாறு திருத்தந்தை கேட்டுக்கொண்டார். கடந்தவற்றிற்குரிய மதிப்புடன் புதிய சவால்களை ஏற்றுக்கொண்டவர்களாக, நம்பிக்கை மற்றும் மகிழ்ச்சியின் ஆதாரமான நற்செய்தியின் புதிய திராட்சை இரசத்தை மக்களுக்குக் வழங்கும் புதிய வழிகளில் இத்துறவு சபையினர் ஈடுபட அழைப்பு விடுத்தார் திருத்தந்தை பிரான்சிஸ். முதன்மையானதாகவும், ஒரே அன்பாகவும் இருக்கும் இயேசுவில் தங்கள் பார்வையை பதித்தவர்களாக, உதவித் தேவைப்படும் மக்களுக்கு பணியாற்றுமாறு கூறிய திருத்தந்தை பிரான்சிஸ் அவர்கள், துன்புறும் மக்களுக்கு மாண்பையும் நம்பிக்கையையும் வழங்கவும் இயேசுவிலிருந்து கற்றுக்கொள்ள வேண்டும் என கூறினார். இன்றைய உலகில் கைவிடப்பட்ட மக்களுக்கு இறைவனின் அன்பை எடுத்துரைக்க திருஅவை உங்களை உலகிற்கு அனுப்பியுள்ளது எனவும் கூறிய திருத்தந்தை, இத்துறவுசபைக்கு தென் அமெரிக்கா, ஒசியனியா மற்றும் ஆசியாவில் கிடைத்துவரும் தேவ அழைத்தல்களின் எண்ணிக்கை புது நம்பிக்கைகளை தருவதாக உள்ளது எனவும் எடுத்துரைத்தார். கிறிஸ்தவ இளையோர் நன்முறையில் தயாரிக்கப்படுதல் பற்றியும் எடுத்துரைத்தத் திருத்தந்தை, மனித குல மதிப்பீடுகளிலும், வாழ்வு மற்றும் வரலாறு கண்ணோட்டத்திலும் அவர்கள் பயிற்சி அளிக்கப்பட வேண்டிய அவசியம் குறித்தும் வலியுறுத்தினார். இத்துறவு சபை உறுப்பினர்களின் பொது வாழ்வு, உண்மையான சகோதரத்துவத்தால் அடையாளப்படுத்தப்பட்டதாய், பன்மைத்தன்மையையும், ஒவ்வொருவரின் தனிப்பட்டக் கொடைகளின் மதிப்பையும் வரவேற்பதாக இருக்கட்டும் எனவும் கேட்டுக்கொண்டார் திருத்தந்தை பிரான்சிஸ். (ஆதாரம் : வத்திக்கான் வானொலி) [2017-09-16 20:39:54]


திருத்தந்தை பிரான்சிஸ் : நமக்கு ஓர் அன்னை இருக்கிறார்

“ஆண்டவர் நம்மை அநாதைகளாக விட்டுவிடவில்லை. நமக்கு ஓர் அன்னை இருக்கிறார். இயேசுவுக்கு இருந்த அதே அன்னை அவர். மரியா, நம்மை எப்போதும் கவனித்துக் கொள்கிறார் மற்றும் நம்மைப் பாதுகாக்கிறார்” என்ற வார்த்தைகள், திருத்தந்தை பிரான்சிஸ் அவர்களின் டுவிட்டரில் இவ்வெள்ளியன்று வெளியாயின. புனித வியாகுல அன்னை விழாவான செப்டம்பர் 15 இவ்வெள்ளியன்று, திருத்தந்தை தனது டுவிட்டரில், அன்னை மரியா, நம்மீது கொண்டிருக்கும் அன்பையும், அக்கறையையும் குறிப்பிட்டுள்ளார். மேலும், உலக கல்வியறிவு நாளையொட்டி, யுனெஸ்கோ தலைமையகத்தில் நடைபெற்ற கூட்டத்தில் கலந்துகொண்டவர்களுக்கு, திருத்தந்தையின் பெயரில், திருப்பீடச் செயலர் கர்தினால் பியெத்ரோ பரோலின் அவர்கள் செய்தி ஒன்றை அனுப்பினார். “டிஜிட்டல் உலகில் கல்வியறிவு” என்ற தலைப்பில், இவ்வுலக நாள் சிறப்பிக்கப்பட்டதைக் குறிப்பிட்டு, தொழில்நுட்பத்தில் ஏற்பட்டுள்ள முன்னேற்றங்களால் இவ்வுலகம் அதிகம் பயனடைந்துள்ளது என்று அச்செய்தி கூறுகின்றது. டிஜிட்டல் உலகின் வளர்ச்சி, படிப்படியான முன்னேற்றத்திற்கு புதிய வாய்ப்புக்களை வழங்கின்றபோதிலும், டிஜிட்டல் உலகு வழங்கும் வாய்ப்புக்களை மிகக் குறைந்த அளவே பெறும் மக்கள், சமுதாயத்தின் விளிம்புக்குத் தள்ளப்படும் ஆபத்தை எதிர்கொள்கின்றனர் எனவும், அச்செய்தி எச்சரிக்கின்றது. செப்டம்பர் 8, உலக கல்வியறிவு நாள். இந்நாளன்று நடைபெற்ற நிகழ்வில் பேசிய, யுனெஸ்கோ இயக்குனர் இரினா பொக்கோவா அவர்கள், உலகில் 75 கோடி வயது வந்தவர்கள் எழுத வாசிக்கத் தெரியாதவர்கள் என்றும், ஏறத்தாழ 26 கோடியே 40 இலட்சம் சிறாரும், இளையோரும் பள்ளிக்குச் செல்லவில்லை என்றும் அறிவித்தார். (ஆதாரம் : வத்திக்கான் வானொலி) [2017-09-16 00:31:41]


பாசமுள்ளப் பார்வையில்…............, : தலை சாய்க்க இடம் தா!

அவன் சிறுவனாக இருந்தபோது ஒரு நாள், அவன் தாய் அவனிடம் கேட்டார், ‘மகனே, உன் உடம்பில் முக்கியமான உறுப்பு என்று எதைக் கருதுகிறாய்?’ என்று. அவன் சொன்னான், ‘அம்மா, அது என் காதுதான். ஏனென்றால், அதன் வழியாகத்தானே நீங்கள் பேசுவதை நான் கேட்க முடிகிறது’ என்று. ‘அதைவிட முக்கியமானது ஒன்று உள்ளது’, என்று கூறிவிட்டு விடை சொல்லாமலேயே மௌனம் காத்தார் அத்தாய். ஓர் இரண்டு ஆண்டுகளுக்குப்பின் மீண்டும் அதே கேள்வி அவனிடம் கேட்கப்பட்டது. ‘கண்தான் முக்கியம்’, என்றான் அவன். தவறு என்று கூறிய தாய், ‘விடை தேடிக்கொண்டேயிரு’ எனக் கூறி அமைதியானார். அவனுக்கு 11 வயதிருக்கும்போது அதே கேள்வி மீண்டும் கேட்கப்பட்டது. 'நாக்கு’ எனக் கூறி, ‘இது இல்லையென்றால் உங்களுடன் பேச முடியாதே’ என்றான் மகன். ‘அதைவிடவும் உயர்ந்தது ஒன்றுண்டு’, எனக் கூறிய தாய் மௌனமானார். 15 வயதில் அதே கேள்வி கேட்கப்பட்டபோது, ‘வாழ்வதற்கு உதவும் மூச்சுக்காற்றை இழுக்கும் மூக்கா, இரத்தத்தை அனுப்பும் இதயமா, அல்லது மூளையா’ என இவனே தாயைப் பார்த்து கேள்வியைக் கேட்டு உண்மையை அறிய விரும்பினான். 'இவைகளும் முக்கியம்தான், ஆனால், இவைகளைவிட முக்கியமான ஒன்று உள்ளது’ என்று கூறினார் தாய். அவனின் 20ம் வயதில் அவன் தாத்தா காலமானார். அவரின் உடலருகே கண்ணீரோடு நின்ற தாய், அவனை நோக்கி வந்தார். அவன் அருகே வந்து மெதுவாக, ‘மகனே, இப்போதாவது தெரிகிறதா உடலின் முக்கிய உறுப்பு எதுவென்று’, எனக் கேட்டார். மகனுக்கோ அந்த துக்கத்திலும் ஆச்சரியமாக இருந்தது. இந்த துக்க நேரத்தில் இப்படி ஒரு கேள்வியா, என்று. தாயே பதிலைக் கூறினார். 'மகனே, ஒவ்வொருவருக்கும், தங்கள் துக்கத்தைப் பகிர்ந்து கொள்ளவும், சாய்ந்து அழவும் ஒரு தோள் வேண்டும். ஒரு தாயின், தந்தையின், சகோதரனின், சகோதரியின், தோழனின் உறவினர்களின் துயர்களை ஏற்றுக்கொண்டு, தலைசாய்த்து அழ உன் தோள்களில் இடம்கொடுக்க முடியும். உனக்கும் பல நேரங்களில் அழ ஒரு தோள் தேவைப்படும். தோள் கொடுப்பான் தோழன் என நீ கேள்விப்பட்டதில்லையா?. எல்லா உறுப்புக்களுமே சுயநலத்திற்காகப் பயன்பட, தோள்தான் பிறர் தலை சாய்க்க உதவுவதாக உள்ளது. ஆகவே, அதுதான் என்னைப் பொறுத்தவரையில் உயர்ந்த உறுப்பு’, என்ற தாய், அவன் தோள்களில் சாய்ந்து அழுதார். ஆம். மரணத்துயர்களை எவராலும் குணப்படுத்த முடியாதுதான், அதேவேளை, அன்பின் நினைவுகளை எவராலும் திருடவும் முடியாது. (ஆதாரம் : வத்திக்கான் வானொலி) [2017-09-14 23:55:03]


விடுதலை செய்யப்பட்ட அருள்பணி டாம் திருத்தந்தையை சந்தித்தார்

“திருச்சிலுவையில் நம் நம்பிக்கை புதுப்பிறப்பெடுக்கின்றது. சிலுவையில் பிறந்த நம்பிக்கை, உலகம் தருகின்ற நம்பிக்கையிலிருந்து மாறுபட்டது. ஏனென்றால், இந்நம்பிக்கை, இயேசுவின் மீதுள்ள அன்பினால் பிறப்பது” என்ற வார்த்தைகள், திருத்தந்தை பிரான்சிஸ் அவர்களின் டுவிட்டரில் இவ்வியாழனன்று வெளியாயின. செப்டம்பர் 14, இவ்வியாழனன்று திருச்சிலுவையின் மகிமை விழா சிறப்பிக்கப்பட்டதையொட்டி, திருத்தந்தையும் தனது டுவிட்டரில், இயேசுவின் திருச்சிலுவை குறித்த சிந்தனையைப் பகிர்ந்துகொண்டுள்ளார். மேலும், கடந்த 18 மாதங்களாக இஸ்லாம் தீவிரவாதிகளால் கடத்திவைக்கப்பட்டிருந்த, இந்திய அருள்பணி டாம் உழுன்னலில் (Tom Uzhunnalil) அவர்கள், தான் விடுதலை செய்யப்பட்ட மறுநாளே, வத்திக்கானில் திருத்தந்தை பிரான்சிஸ் அவர்களைச் சந்தித்து ஆசீர் பெற்றார். இப்புதன் பொதுமறைக்கல்வியுரையை நிறைவுசெய்து, வத்திக்கானில் தான் தங்கியிருக்கின்ற சாந்தா மார்த்தா இல்லம் சென்ற திருத்தந்தை பிரான்சிஸ் அவர்கள், அவ்வில்லத்தில் அருள்பணி டாம் உழுன்னலில் அவர்களைச் சந்தித்தார். இச்சந்திப்பில் திருத்தந்தையின் காலடிகளை முத்தமிட்ட அருள்பணி டாம் அவர்கள், தான் பிணையல் கைதியாக இருந்த காலம் முழுவதும், தான் எதிர்கொண்ட துன்பங்களை, திருத்தந்தை மற்றும் திருஅவையின் நலனுக்காக அர்ப்பணித்ததாக, திருத்தந்தையிடம் தெரிவித்தார். திருத்தந்தையும், அருள்பணி டாம் அவர்களின் நெற்றியில் சிலுவை வரைந்து ஆசீரளித்தார். அருள்பணி டாம் அவர்கள் விடுதலையடைந்துள்ளதையொட்டி, இந்தியத் திருஅவையும், நன்றித் திருப்பலிகளை நிறைவேற்றின. 2016ம் ஆண்டு மார்ச் 4ம் தேதி ஏமன் நாட்டின் ஏடனில், புனித அன்னை தெரேசாவின் பிறரன்பு மறைப்பணியாளர் சபையின் முதியோர் இல்லத்திலிருந்து கடத்தப்பட்ட சலேசிய சபை அருள்பணி டாம் அவர்கள், செப்டம்பர் 12, இச்செவ்வாயன்று விடுதலை செய்யப்பட்டார். இவர் ஓமன் நாட்டின் மஸ்கட்டிலிருந்து உரோம் திரும்பினார். இவ்விடுதலை குறித்து செய்தி வெளியிட்டுள்ள ஓமன் நாட்டு Ona செய்தி நிறுவனம், வத்திக்கானின் வேண்டுகோள் மற்றும், ஓமன் நாட்டு சுல்தான் Qabus அவர்களின் வழிகாட்டுதல்களின்படி, மஸ்கட்டிலுள்ள அதிகாரிகள், ஏமன் நாட்டினர் சிலரின் ஒத்துழைப்புடன், அருள்பணி டாம் அவர்கள் இருக்கும் இடத்தைக் கண்டுபிடித்து, அவர் பாதுகாப்பாக விடுதலை செய்யப்படுவதற்கு உதவினர் என்று அறிவித்துள்ளது. 57 வயது நிரம்பிய, கேரளாவைச் சேர்ந்த, சலேசிய அருள்பணியாளர் டாம் உழுன்னலில் அவர்கள், ஏமனில் மறைப்பணியாற்றி வந்தார். இவர் மறைப்பணியாற்றிய பங்கு ஆலயம், குண்டுவீச்சால் சேதமடைந்ததையொட்டி, ஏடனில், அன்னை தெரேசாவின் பிறரன்பு மறைப்பணியாளர் சபையின் முதியோர் இல்லத்தில் தங்கி மறைப்பணியாற்றி வந்தார். இஸ்லாம் தீவிரவாதிகள், 2016ம் ஆண்டு மார்ச் 4ம் தேதி, அந்த முதியோர் இல்லத்தைத் தாக்கியதில் அன்னை தெரேசா சபையின் நான்கு அருள்சகோதரிகள் மற்றும் 12 பேர் கொல்லப்பட்டனர். அச்சமயம் இவரும் கடத்தப்பட்டார். (ஆதாரம் : வத்திக்கான் வானொலி) [2017-09-14 23:46:13]


பக்க இலக்கங்களை அழுத்தி எல்லா செய்திகளையும் பார்வையிடவும்