வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



திருத்தந்தை: இதய நிலங்களில் இறைவார்த்தையை ஏற்போம்

இறைவனின் வார்த்தை எனும் விதைகளை ஏற்றுக்கொள்ள நம் இதயங்கள் தயாராக இருக்கின்றனவா என நம்மையே நாம் சோதிக்கும் அதேவேளை, விதைகளை ஏற்கும் நிலங்களாக நம் இதயங்களை சுத்தப்படுத்தி, தயாரிப்போம் என அழைப்பு விடுத்தார், திருத்தந்தை பிரான்சிஸ். 30,000திற்கும் மேற்பட்ட விசுவாசிகள் தூய பேதுரு பேராலய வளாகத்தில் குழுமியிருக்க, அவர்களுக்கு ஞாயிறு நண்பகல் மூவேளை செப உரை வழங்கிய திருத்தந்தை பிரான்சிஸ் அவர்கள், நிலத்திலிருந்து முட்புதர்களையும் பாறைகளையும் அகற்றுவதைப்போல், நம் உள்ளங்களில் நிறைந்திருக்கும் உலக செல்வங்கள் குறித்த ஆசைகளை நீக்கி தூய்மைப்படுத்த வேண்டும் என்று கூறினார். இஞ்ஞாயிறு திருப்பலி வாசகம் வழங்கிய‌ விதைப்பவர் உவமை பற்றி தன் ஞாயிறு மூவேளை செப உரையில் எடுத்துரைத்தத் திருத்தந்தை பிரான்சிஸ் அவர்கள், இயேசுவின் மொழியும், இறையியலும், மிகவும் எளிதானவையாக, மக்களின் இதயங்களை நேரடியாக சென்று தொடுவனவாக இருந்தன என்றார். கடவுள் நம்மீது எதையும் திணிப்பதில்லை, மாறாக, தன் பரிந்துரையையே முன்வைக்கிறார், மேலும், அவர் நம்மைக் கட்டாயப்படுத்தி தன் பக்கம் இழுப்பதில்லை, மாறாக, தன்னையே நமக்கு கையளிக்கிறார் என்று கூறியத் திருத்தந்தை பிரான்சிஸ் அவர்கள், இறைவார்த்தையை பரப்பும் அவரின் அணுகுமுறை, தராள மனப்பான்மையையும், பொறுமையையும், உள்ளடக்கியது என்றார். இயேசுவின் இந்த உவமை, விதைப்பவன் உவமை என அழைக்கப்பட்டாலும், இது விதைப்பவரைப் பற்றிப் பேசவில்லை, மாறாக நிலத்தைப் பற்றி, அதாவது, விதைகளைப் பெறும் நம்மைப் பற்றிப் பேசுகிறது என மேலும் கூறினார், திருத்தந்தை பிரான்சிஸ். இறைவனின் வார்த்தைகள் வேரூன்ற வேண்டுமானால், உலகச் சுகங்கள் குறித்த ஆசைகளிலிருந்து நாம் வெளிவரவேண்டும் என்ற அழைப்பையும் முன்வைத்த திருத்தந்தை பிரான்சிஸ் அவர்கள், இறைவார்த்தை எனும் விதைகளை ஏற்றுக்கொண்டு பலன்தர, நம் இதயங்களை சுத்தப்படுத்தி, திறந்து வைப்போம் என மேலும் உரைத்தார். (ஆதாரம்: வத்திக்கான் வானொலி) [2017-07-19 00:32:22]


திருத்தந்தையின் இந்தியத் திருத்தூதுப் பயணம் பற்றிய நம்பிக்கை

திருத்தந்தை பிரான்சிஸ் அவர்களின் இந்தியத் திருத்தூதுப் பயணம், இவ்வாண்டு முடிவதற்குள் அல்லது, அடுத்த ஆண்டின் தொடக்கத்தில் இடம்பெறும் என்ற நம்பிக்கையை வெளியிட்டுள்ளார், தலத்திருஅவை அதிகாரி ஒருவர். இந்திய ஆயர் பேரவையின் பொதுச்செயலர், ஆயர் தியோடர் மஸ்கரேனஸ் அவர்கள், இவ்வாறு நம்பிக்கை தெரிவித்தார் என, Deccan Herald தினத்தாள், செய்தி வெளியிட்டுள்ளது. 2017ம் ஆண்டில், இந்தியா மற்றும், பங்களாதேஷ் நாடுகளுக்குத் திருத்தூதுப் பயணம் மேற்கொள்வேன் என, திருத்தந்தை பிரான்சிஸ் அவர்களே, 2016ம் ஆண்டு அக்டோபரில், விமானப் பயணத்தில் செய்தியாளர்களிடம் அறிவித்ததைத் தொடர்ந்து, திருத்தந்தையின் இந்தியத் திருத்தூதுப் பயணம் பற்றிய செய்திகளை, ஊடகங்கள் வெளியிட்டு வருகின்றன. மேலும், இந்தியாவில் புதிய குடியரசுத் தலைவர் தேர்தல், பிரதமர் நரேந்திர மோடி அவர்களின் வெளிநாட்டுப் பயணங்கள் போன்றவற்றால், 2017ம் ஆண்டின் முதல் பாதிப் பகுதியில், திருத்தந்தையின் இந்தியத் திருத்தூதுப் பயணத்திற்குரிய தேதிகளைக் குறிப்பதில் சிரமங்கள் இருப்பதாகவும், ஊடகங்கள் செய்திகளை வெளியிட்டன. இந்நிலையில், இத்திருத்தூதுப் பயணம் பற்றிப் பேசியுள்ள ஆயர், மஸ்கரேனஸ் அவர்கள், திருத்தந்தை பிரான்சிஸ் அவர்களை வரவேற்பதில் மத்திய அரசு ஆர்வமாக இருக்கின்றவேளை, திருத்தந்தையின் மதிப்பு முழுமையாகக் காக்கப்படும் வகையில், திருத்தூதுப் பயணம் அமைக்கப்பட வேண்டும் என்பதிலும் கவனம் செலுத்தப்பட்டு வருகின்றது என்றும் தெரிவித்தார். திருத்தந்தையின் இந்தியத் திருத்தூதுப் பயணத்திற்கு, இவ்வாண்டில் சரியான நாள்கள் அமையாவிடில், 2018ம் ஆண்டின் ஆரம்பத்தில், இப்பயணம் இடம்பெறலாம் என்று தெரிவித்துள்ளார், ஆயர் மஸ்கரேனஸ். புனித திருத்தந்தை 2ம் ஜான் பால் அவர்கள், 1986ம் ஆண்டு பிப்ரவரியில், இந்தியாவில் மேற்கொண்ட பத்து நாள்கள் திருத்தூதுப் பயணத்தில், சென்னை உட்பட 14 நகரங்களில் பயண நிகழ்வுகளை நிறைவேற்றினார். 1999ம் ஆண்டு நவம்பரில், புது டெல்லிக்கு மட்டும் இத்திருத்தந்தை சென்றார் என்பது குறிப்பிடத்தக்கது. (ஆதாரம் : Deccan Herald / வத்திக்கான் வானொலி) [2017-07-17 02:09:33]


பாசமுள்ள பார்வையில்.. வறுமையிலும் வாழ்த்தும் தாய்

வெளிநாட்டில், சில நிறுவனங்களுக்கு அதிபராக, செல்வச் செழிப்பில் வாழ்ந்து வந்த கோடீஸ்வரர் ஒருவர், தான் பிறந்து வளர்ந்த கிராமத்தைப் பார்ப்பதற்காக வந்தார். தனது வீட்டில் சில நாள்கள் தங்கினார். வானம் பொய்த்துப் போனதால், கிராம மக்கள் வறுமையில் வாடுவதை நோக்கினார். அம்மக்களுக்கு உதவ நினைத்த அவர், ஒரு முக்கிய நாளில் அவர்களைத் தன் வீட்டிற்கு வரவழைக்கத் திட்டமிட்டார். அதேபோல், ஒருநாளைக் குறிப்பிட்டு, இன்று, எனது மகளின் பிறந்த நாள், நீங்கள் எல்லாரும் எனது வீட்டிற்கு வரவேண்டும் என்று அழைப்பு விடுத்தார். அந்நாளில் வருகை தந்த மக்களிடம், உங்களுக்குப் பரிசுகள் கொடுக்க விரும்புகின்றேன், விரும்பியதைக் கேளுங்கள் என்றார் அவர். பசியால் வாடிய அம்மக்கள் ஒவ்வொருவரும் கேட்ட பொருள்களை இன்முகத்துடன் அளித்தார் அவர். ஒருசிலர், வீட்டுமனை, குடியிருக்க வீடு போன்றவற்றைக்கூட கேட்டார்கள். மக்கள் வரிசையாக நின்று இப்படி பொருள்கள் வாங்குவதையும், அந்தச் செல்வந்தர் மலர்ந்த முகத்துடன் கொடுத்துக்கொண்டிருப்பதையும் கவனித்துக்கொண்டிருந்தார் தாய் ஒருவர். எதுவுமே கேட்காமல், ஓரத்தில் நின்றுகொண்டு, வேடிக்கைப் பார்த்துக்கொண்டிருந்த அந்தத் தாயைக் கவனித்தார் அந்தச் செல்வந்தர். கேட்டவர் அனைவருக்கும் பொருள்களைக் கொடுத்து முடித்த பின்னர், அந்தத் தாயை அணுகி, அம்மா, உங்களுக்கு என்ன வேண்டும் எனக் கேட்டார் அவர். அதற்கு அந்தத் தாய், நானும் ஓர் ஏழைதான் ஐயா. ஆனால், நீங்கள் ஒவ்வொருவரையும் இன்முகத்துடன் நோக்கி, ஓரிரு வார்த்தைகள் பேசி, அவர்கள் கேட்பதைக் கொடுத்த அழகையும், கருணையையும் கண்டு மகிழ்கின்றேன், எனவே உங்களிடம் எதையும் கேட்பதற்கு மனம் இசையவில்லை, உங்களை வாழ்த்தவே மனது துடிக்கின்றது என்றார். வறுமையிலும் வாழ்த்தத் துடித்த அந்தத் தாயின் உள்ளத்தைக் கண்டு நெகிழ்ந்து போனார் அவர். இத்தாயை, தனது சம்பந்தியாக ஏற்கவும் தீர்மானித்தார் செல்வந்தர். (ஆதாரம் : வத்திக்கான் வானொலி) [2017-07-15 23:11:38]


எல்லாப் படைப்புயிர்களும் நலமாக வாழ்வதற்கு ஏற்ற இடமாக..

இப்பூமி என்ற பொதுவான இல்லம், எல்லாப் படைப்புயிர்களும் நலமாக வாழ்வதற்கு ஏற்ற இடமாக அமைவதற்கு, ஒவ்வோர் அரசும் பொறுப்புள்ள விதத்தில் செயல்பட வேண்டுமென்று கேட்டுக்கொண்டுள்ளார், திருத்தந்தை பிரான்சிஸ். Laudato si’ மற்றும், மாநகரங்கள்” என்ற தலைப்பில், பிரேசில் நாட்டின் ரியோ தெ ஜெனெய்ரோவில், ஜூலை 13, இவ்வியாழனன்று தொடங்கியுள்ள பன்னாட்டு கருத்தரங்கிற்கு, திருத்தந்தை அனுப்பியுள்ள செய்தியில், குடிமக்கள் அனைவரும், சுற்றுச்சூழலைப் பாதுகாப்பதில் அரசுகள் ஊக்கமளிக்குமாறு கேட்டுக்கொண்டுள்ளார். படைப்பை மரியாதையோடும், பொறுப்புணர்வோடும் நடத்த வேண்டுமென்பது மனிதரின் அடிப்படை நோக்கமாக இருக்க வேண்டுமென்றும், ஒரு கொடையாக நாம் பெற்றுள்ள படைப்பு, வருங்காலத் தலைமுறைகள் வியந்து அனுபவிக்கும் விதத்தில் பேணிப் பாதுகாக்கப்பட வேண்டுமென்றும், அச்செய்தியில் குறிப்பிட்டுள்ளார், திருத்தந்தை. காற்றின் தூய்மைத் தன்மை குறைந்து வருவது மற்றும், கழிவுப்பொருள்கள் தகுந்த முறையில் பராமரிக்கப்படாமல் விடப்படுவது அதிகரித்து வருவது குறித்து, நாம் அக்கறையின்றி இருக்க முடியாது என்று கூறியுள்ள திருத்தந்தை, மாநகரங்களுக்கும், கிராமங்களுக்கும் இடையேயுள்ள தொடர்புகள் குறைந்து வருவதையும் சுட்டிக்காட்டியுள்ளார். சேரிகளை உருவாக்கும் ஏழ்மை, வன்முறை மற்றும், அநீதிகளையும் குறிப்பிட்டுள்ள திருத்தந்தை பிரான்சிஸ் அவர்கள், மனிதர் ஒருவர் ஒருவரைச் சார்ந்து, அன்புடன் வாழ அழைக்கப்பட்டுள்ளனர் என்றும், அரசியல், கல்வி மற்றும் சமயச் சூழல்களில் ஒன்றிணைந்து உழைப்பதன் வழியாக, இதமான மனித உறவுகளை உருவாக்கலாம் என்றும் கூறியுள்ளார். “இறைவா உமக்கே புகழ் (Laudato si’) மற்றும், மாநகரங்கள்” என்ற தலைப்பில் நடைபெறும் இக்கருத்தரங்கு, ஜூலை 15, இச்சனிக்கிழமையன்று நிறைவடையும். (ஆதாரம் : வத்திக்கான் வானொலி) [2017-07-14 21:46:00]


காலநிலை மாற்றம் குறித்த உலகளாவிய முயற்சிக்கு திருத்தந்தை

இப்பூமி என்ற நம் பொதுவான இல்லத்தைப் பாதுகாப்பதற்கு ஊக்கமளிக்கும், “இறைவா உமக்கே புகழ் (Laudato Si’)” என்ற திருமடல் செயல்படுத்தப்பட, எடுக்கப்படும் உலகளாவிய முயற்சிக்கு, தனது ஆதரவைத் தெரிவித்துள்ளார், திருத்தந்தை பிரான்சிஸ். திருத்தந்தை பிரான்சிஸ் அவர்கள், 2015ம் ஆண்டில் வெளியிட்ட, இறைவா உமக்கே புகழ் என்ற திருமடலின் பரிந்துரைகளை நடைமுறைப்படுத்த, குறைந்தது பத்து இலட்சம் கத்தோலிக்கரை நேரிடையாக ஈடுபடுத்துவதற்கு, உலகளாவிய கத்தோலிக்க காலநிலை (Global Catholic Climate) என்ற இயக்கம் முயற்சித்து வருகிறது. இந்த இயக்கத்தின் அதிகாரப்பூர்வ வலைத்தளத்தில் (livelaudatosi.org), இம்முயற்சிக்கு தனது ஆதரவை வெளியிட்டுள்ளார், திருத்தந்தை பிரான்சிஸ். கர்தினால்கள் டர்க்சன், தாக்லே, ரிபாட், கியூபிச், மார்க்ஸ் போன்றோர் உட்பட, பல திருஅவைத் தலைவர்களும், இம்முயற்சிக்குத் தங்களின் ஆதரவைத் தெரிவித்துள்ளனர் எனக் கூறப்பட்டுள்ளது. இந்த வலைத்தளத்தில் தங்களின் ஆதரவைத் தெரிவிக்கும் விதமாக, கையெழுத்திடுபவர்கள், நம் பொதுவான இல்லத்தைப் பாதுகாப்பதற்காகச் செபிக்கவும், அதற்காக நடவடிக்கை எடுக்கவும், மிக எளிய வாழ்வு வாழவும், மற்றவர்களைத் தூண்டவும் வலியுறுத்தப்படுகின்றனர். (ஆதாரம் : வத்திக்கான் வானொலி) [2017-07-14 21:40:04]


திருத்தந்தை: மறைக்கல்விப்பணி ஒருவர் பெறும் வேலை அல்ல

மறைக்கல்விப்பணி என்பது, ஒருவர், தன் வாழ்வில் பெறும் வேலை அல்ல, மாறாக, அது அவரது வாழ்வாகவே மாறவேண்டும் என்று, திருத்தந்தை பிரான்சிஸ் அவர்கள், அர்ஜென்டீனா நாட்டில் நடைபெறும் ஒரு பன்னாட்டு கருத்தரங்கிற்கு அனுப்பியுள்ள செய்தியில் கூறியுள்ளார். ஜூலை 11, இச்செவ்வாய் முதல், 14 இவ்வெள்ளி முடிய, அர்ஜென்டீனாவின் புவெனஸ் அயிரஸ் நகரில், மறைக்கல்விப்பணியை மையப்படுத்தி நடைபெறும் பன்னாட்டு கருத்தரங்கிற்கு திருத்தந்தை அனுப்பியுள்ள செய்தியில் இவ்வாறு கூறியுள்ளார். நோயுற்றோரை சந்தித்தல், பசித்தோருக்கு உணவளித்தல், குழந்தைகளுக்கு கல்விபுகட்டுதல் என்ற அனைத்து பணிகளையும், அசிசி நகர் புனித பிரான்சிஸ், தான் வழங்கும் மறையுரையாகவும், மறைக்கல்விப் பணியாகவும் உணர்ந்தார் என்பதை, திருத்தந்தை பிரான்சிஸ் அவர்கள் தன் செய்தியின் துவக்கத்தில் குறிப்பிட்டுள்ளார். மறைக்கல்விப்பணியாளர் ஒவ்வொருவரும், கிறிஸ்துவிலிருந்து புறப்பட்டு, கிறிஸ்துவோடு இணைந்து செல்லும் பயணி என்பதை உணரவேண்டும் என்றும், தங்கள் தனிப்பட்ட கருத்துக்களை சொல்லித்தரும் பணி இதுவல்ல என்றும் திருத்தந்தை தன் செய்தியில் வலியுறுத்திக் கூறியுள்ளார். 'கிறிஸ்துவின் வழியே அடைந்த மீட்பை அறிவித்தல்' என்று பொருள்படும் 'Kerygma' என்ற கொடையைப் பெற்றுள்ள மறைக்கல்விப் பணியாளர்கள், இப்பணியை ஆற்றுவதற்கு, தங்கள் படைப்பாற்றலைப் பயன்படுத்த வேண்டும் என்று, இச்செய்தியில் திருத்தந்தை பிரான்சிஸ் அவர்கள் அழைப்பு விடுத்துள்ளார். புவெனஸ் அயிரஸ் நகரில் உள்ள பாப்பிறை கத்தோலிக்க பல்கலைக்கழகமும், அர்ஜென்டீனா ஆயர் பேரவையின் மேய்ப்புப்பணி மற்றும் மறைக்கல்விப்பணி குழுவும் இணைந்து நடத்தும் இந்த பன்னாட்டுக் கருத்தரங்கிற்கு, "நம்பிக்கை கொள்வோர் பேறு பெற்றோர்" என்பது மையக்கருத்தாக அமைந்துள்ளது. விசுவாசக் கோட்பாடு பேராயத்தின் புதியத் தலைவராக திருத்தந்தை பிரான்சிஸ் அவர்களால் அண்மையில் நியமிக்கப்பட்ட பேராயர் லூயிஸ் பிரான்சிஸ்க்கோ இலதாரியா அவர்கள், இக்கருத்தரங்கில் கலந்துகொள்ளச் சென்றுள்ளார். (ஆதாரம் : வத்திக்கான் வானொலி) [2017-07-13 19:35:44]


உருவாக்கும் பயிற்சியாளர்களுக்கு கர்தினால் ஸ்டெல்லா

ருள்பணியாளர்களை உருவாக்கும் பணியில் ஈடுபட்டிருப்போர், அவர்களுக்கு, தந்தையாக, தாயாக, உடன்பிறந்தோராக இருந்து, அவ்விளையோரை வழி நடத்த அழைக்கப்பட்டுள்ளனர் என்று, வத்திக்கான் உயர் அதிகாரி ஒருவர் கூறினார். அருள்பணியாளர் பயிற்சியை மையப்படுத்தி அண்மையில் உரோம் நகரில் நடைபெற்ற கருத்தரங்கின் துவக்கத் திருப்பலியில், அருள்பணியாளர் பேராயத்தின் தலைவரான கர்தினால் பென்யமினோ ஸ்டெல்லா அவர்கள் மறையுரையாற்றுகையில், இவ்வாறு கூறினார். இறைவனோடும், கிறிஸ்துவோடும் கொள்ளும் உறவு, மற்ற அனைத்து உறவுகளுக்கும் மேலாக, முதன்மை இடம் பெறவேண்டும் என்பதை, அருள்பணியாளராக விரும்பும் இளையோர் முழுமையாக உணர்வதே, அவர்களுக்கு அளிக்கப்படும் பயிற்சியின் தலையாய நோக்கம் என்று, கர்தினால் ஸ்டெல்லா அவர்கள் தன் மறையுரையில் வலியுறுத்திக் கூறினார். உலக நிறுவனங்கள் தரும் பயிற்சிகளில், அதிகாரம், பணிகள் என்பனவற்றில் தங்கள் கவனத்தைச் செலுத்த பயிற்றுவிக்கப்படுவதுபோல், அருள்பணியாளர் பயிற்சியிலும் நிகழக்கூடாது என்பதை கர்தினால் ஸ்டெல்லா அவர்கள், தன் மறையுரையில் எடுத்துரைத்தார். அனைவரையும் வரவேற்று அரவணைக்கும் இதயம் கொண்டிருந்த இயேசுவைப்போல அருள்பணியாளரும், தன் இதயத்தை உருவாக்க வேண்டும் என்று, திருத்தந்தை பிரான்சிஸ் அவர்கள் கூறிய வார்த்தைகளை, கர்தினால் ஸ்டெல்லா அவர்கள் தன் மறையுரையில் குறிப்பிட்டார். (ஆதாரம் : வத்திக்கான் வானொலி) [2017-07-13 19:30:23]


நோயாளர் பராமரிப்பு சமூகத்தின் விலைமதிப்பிட முடியாத சொத்து

புற்றுநோய் தடுப்பு முயற்சிகள் குறித்த மனப்பான்மையை, ஒரு வாழ்வுமுறையாக மாற்ற முயன்றுவரும், இத்தாலிய அமைப்பு ஒன்றை, இத்திங்கள் காலை திருப்பீடத்தில் சந்தித்து, தன் நன்றியையும், வாழ்த்தையும் தெரிவித்தார், திருத்தந்தை பிரான்சிஸ். புற்றுநோய்க் கட்டிகளுக்கு எதிரான இத்தாலிய கழகம் என்ற அமைப்பின் அங்கத்தினர்களைத் திருப்பீடத்தில் சந்தித்த திருத்தந்தை, வியாபார நோக்கம் இல்லாமல், மக்களிடையே விழிப்புணர்வையும், பயிற்சிகளையும் வழங்கும் இந்த தன்னார்வலர்களின் பணி, மக்களின் வாழ்வில், ஒவ்வொரு நாளும் நல்மாற்றங்களை உருவாக்கி வருகிறது என்று கூறினார். தாழ்ச்சியுடனும், அமைதியிலும் ஆற்றப்படும் இப்பணி, துன்புறுவோருக்கு, தன்னலமற்ற சேவையின் எடுத்துக்காட்டாக உள்ளது எனவும் பாராட்டினார், திருத்தந்தை பிரான்சிஸ். உடல்நலம் என்பது, ஒவ்வொருவரின் அடிப்படைக் கூறாக இருக்கும் சூழலில், நோயாளர்கள் மீது அக்கறை காட்டி, அவர்களுக்குப் பணியாற்றுவது, சமூகத்தின் விலைமதிப்பிட முடியாத சொத்தாக கணிக்கப்படுகிறது என்ற பாராட்டையும், இந்த இத்தாலிய கழகத்திடம் தெரிவித்தார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-07-13 19:25:18]


பாசமுள்ள பார்வையில்...: அருகாமை தரும் ஆனந்தம்

அன்று, ஸ்ரீராமின் அம்மாவுக்கு 75வது பிறந்த நாள். அலுவலகத்திற்கு சீக்கிரமாகவே கிளம்பிவிட்டார் ஸ்ரீராம். ஏனெனில், போகிற வழியில், பூக்கடையில் நிறுத்தி, 250 மைல்களுக்கு அப்பால், முதியோர் இல்லத்தில் இருக்கும் அம்மாவுக்கு மலர்க்கொத்து அனுப்ப வேண்டும். கடைக்குள் சென்று முகவரியைக் கொடுத்து, பணமும் கொடுத்து, மலர்க்கொத்தை அனுப்பச் சொல்லிவிட்டு, வெளியே வந்த ஸ்ரீராமுக்கு, சாலையின் ஓரத்தில் அழுதுகொண்டிருந்த ஒரு சிறுமி தெரிந்தாள். அருகில் சென்று விசாரித்தபோது அவள் சொன்னாள், ' என் அம்மாவுக்கு ஒரு பூ வாங்கவேண்டும், ஒரு பூவின் விலை 2 ரூபாய் சொல்கிறார்கள். ஆனால், என்னிடம் ஒரு ரூபாய்தான் இருக்கிறது' என்று. அச்சிறுமியை கடையினுள் அழைத்துச்சென்ற ஸ்ரீராம், ஒரு பூவை வாங்கிக் கொடுத்ததுடன், அவளை வீட்டில் கொண்டு விடுவதாகக் கூறினார். அவளும் காரில் ஏறிக்கொண்டு, ஊருக்கு ஒதுக்குப்புறமாக ஒரு பகுதியைச் சொல்லி, அங்கு காரை விடச் சொன்னாள். ஆம். அது ஒரு மயானம். அங்கு சென்று, புதிதாக தோன்றியிருந்த ஒரு கல்லறையில் அந்த பூவை வைத்தாள், அச்சிறுமி. கல்லறை மண் இன்னும் காய்ந்திருக்கவில்லை. நிச்சயமாக இந்த பெண்ணின் அம்மா இறந்து இரண்டு அல்லது மூன்று நாடகள்தான் ஆகியிருக்க வேண்டும். அந்த சிறுமியின் தாய்ப் பாசத்தைக் கண்டதும் ஸ்ரீராமின் கண்கள் கலங்கின. நேராக அந்த பூக்கடைக்குச் சென்று, தான் அனுப்பச் சொன்ன மலர்க்கொத்தை அனுப்பவேண்டாம் என கூறிவிட்டு, மலர்க்கொத்து ஒன்றை கையில் வாங்கிக்கொண்டு, 250 மைல் தூரத்தில் உள்ள தன் தாயைப் பார்க்க காரை ஓட்டினார் ஸ்ரீராம். (ஆதாரம் : வத்திக்கான் வானொலி) [2017-07-11 21:20:50]


அகற்றுவதற்கல்ல, சிலுவைகளை சுமக்கவே இயேசு உதவுகிறார்

கிறிஸ்து நம் தோள்களிலிருந்து சிலுவையை தானே எடுத்துக்கொண்டு, வாழ்வின் சுமைகளிலிருந்து நமக்கு விடுதலை தருபவராக அல்ல, மாறாக, நம் சுமைகளை நம்முடன் இணைந்து சுமப்பவராகச் செயல்படுகிறார் என்றார் திருத்தந்தை பிரான்சிஸ். வத்திக்கான் புனித பேதுரு வளாகத்தில் கூடியிருந்த பல்லாயிரக்கணக்கான மக்களுக்கு இஞ்ஞாயிறு நண்பகல் மூவேளை செப உரை வழங்கியத் திருத்தந்தை, நம் வாழ்வின் சுமைகளைக் கண்டு நாம் கவலைப்படாமல், அவரில் நம் அமைதியைக் காணவேண்டும் என்று அழைப்புவிடுத்த்தோடு, மக்களையும், சூழல்களையும், இயேசுவின் மீது நாம் கொள்ளும் நம்பிக்கையில் ஒப்படைக்கவேண்டும் எனவும் கேட்டுக்கொண்டார். 'பெரும்சுமை சுமந்து சோர்ந்திருப்பவர்களே, எல்லாரும் என்னிடம் வாருங்கள். நான் உங்களுக்கு இளைப்பாறுதல் தருவேன்' என்ற இயேசுவின் வார்த்தைகளை, இஞ்ஞாயிறு திருப்பலி வாசகத்திலிருந்து எடுத்து, உரை வழங்கிய திருத்தந்தை பிரான்சிஸ் அவர்கள், இது ஒரு குறிப்பிட்ட மக்களுக்கு மட்டும் வழங்கப்பட்ட அழைப்பு அல்ல, மாறாக, வாழ்வில் சோர்வுற்றிருக்கும் அனைவருக்கும் வழங்கப்பட்டுள்ளது என்றார். வாழ்வில் ஏற்படும் தோல்விகளாலும், ஏமாற்றங்களாலும் நாம் நம்மையே மூடிக்கொண்டோமானால், நாம் அனைத்தையும் கறுப்பாகவே கண்டு, சோகத்திற்கே நம்மை உள்ளாக்குவோம், ஆனால், அவற்றைவிட்டு வெளியே வரவேண்டும் என தன் கைகளை விரித்து அழைக்கிறார் இயேசு, என உரைத்த திருத்தந்தை, நம்மிலிருந்து நாம் வெளிவருவது மட்டும் போதாது, வெளிவந்தபின் நாம் எதை நோக்கிச் செல்கிறோம் என்பதும் முக்கியம், என்றார். இயேசுவை நோக்கி நாமும் நம் கரங்களை விரித்து, நம் மூடியிருக்கும் பக்கங்களை அவருக்குத் திறந்து, அவர் அதில் மாற்றங்களைக் கொணர அனுமதிப்போம் எனவும் அழைப்புவிடுத்தார், திருத்தந்தை பிரான்சிஸ். நம்முடைய பிரச்னைகளுக்கு மாயாஜால வழியில் தீர்வு தருவதற்காக அவர் காத்திருக்கவில்லை, மாறாக, நாம் அந்த பிரச்னைகளை எதிர்கொள்வதில் மேலும் உறுதியடையவேண்டும் என அவர் விரும்புகிறார், என மேலும் கூறிய திருத்தந்தை பிரான்சிஸ் அவர்கள், இயேசு நம் வாழ்வில் நுழையும்போதுதான், அமைதியும் நுழைகிறது என மேலும் உரைத்தார். (ஆதாரம் : வத்திக்கான் வானொலி) [2017-07-11 21:13:14]


பக்க இலக்கங்களை அழுத்தி எல்லா செய்திகளையும் பார்வையிடவும்