வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



எல்லாவித பயங்கரவாதங்களிலிருந்து கடவுள் உலகை காப்பாராக

கிப்து நாட்டையும், மத்திய கிழக்குப் பகுதியையும், இந்த உலகம் முழுவதையும், எல்லாவிதமான பயங்கரவாதத்திலிருந்தும், தீமைகளிலிருந்தும் இறைவன் பாதுகாப்பாராக என்று, இப்புதனன்று செபித்தார் திருத்தந்தை பிரான்சிஸ். திருத்தந்தையின் இப்புதன் பொது மறைக்கல்வியுரையை, அரபு மொழியில் ஒருவர் வாசித்தபின், அரபு மொழி பேசுகின்றவர்களுக்கு, சிறப்பாக, திருக்குடும்பப் படத்துடன் இந்நிகழ்வில் கலந்துகொண்ட எகிப்து நாட்டுப் பிரதிநிதிகளுக்கு, தன் வாழ்த்தைத் தெரிவித்த திருத்தந்தை, இவ்வாறு செபித்தார். எகிப்துக்குத் திருத்தூதுப்பயணம் மேற்கொண்டதைக் குறிப்பிட்டுப் பேசிய திருத்தந்தை, இயேசு, மரி, யோசேப்பு ஆகியோரைக்கொண்ட திருக்குடும்பம் மற்றும் ஏராளமான இறைவாக்கினர்கள் வாழ்ந்துள்ள எகிப்து நாடு, நூற்றாண்டுகளாக மறைசாட்சிகளின் விலைமதிப்பில்லாத குருதியாலும், நீதிமான்களாலும் ஆசீர்வதிக்கப்பட்டுள்ள பூமி என்று கூறினார். இன்னும், அசிசி நகர் புனித பிரான்சிஸ் அவர்களைப் பின்பற்றி, படைப்புமீது அக்கறை காட்டுமாறு, எல்லாருக்கும், குறிப்பாக, இளையோருக்கு, இப்புதன் பொது மறைக்கல்வியுரையில் கேட்டுக்கொண்டார், திருத்தந்தை பிரான்சிஸ். அசிசி நகர் புனித பிரான்சிஸ் அவர்களின் விழாவாகிய, அக்டோபர் 04, இப்புதனன்று தன் டுவிட்டர் பக்கத்திலும், அசிசி நகர் புனித பிரான்சிஸ் போன்று, எளிமையிலும், மகிழ்விலும் வாழ்வதற்கு, கிறிஸ்துவின் அன்பால் நாம் உருமாற்றப்படுவோமாக என்று, செய்தி வெளியிட்டுள்ளார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-10-04 21:00:47]


பாசமுள்ள பார்வையில்.. அன்னையின் வளர்ப்பினிலே

இந்திய தேசத்தந்தை என்று புகழப்படும் மகாத்மா காந்தி அவர்கள், எளிமையைக் கற்றது, அவரின் அம்மா புத்திலிபாய் அவர்களின் வளர்ப்பினில். காந்திஜி அவர்கள், அமைதியை, சாந்தியை, சமாதானத்தை விரும்பியதற்கெல்லாம் காரணம், அவரின் அம்மாதான். புத்திலிபாய் அவர்கள், மிகுந்த கடவுள் பக்தி உடையவர். தன் குழந்தைகளும் கடவுள் மீது மிகுந்த பக்தி கொண்டிருக்க வேண்டும் என்பதில் மிகவும் கவனமாக இருந்தார். மிகவும் எளிமையான வாழ்க்கையையே விரும்பிய புத்திலிபாய் அவர்கள், நகைகளுக்கோ, ஆடை அலங்காரத்துக்கோ ஆசைப்பட்டதே இல்லை. காந்திஜி அவர்கள், சட்டம் படிக்க இங்கிலாந்து செல்லத் தயாராகிக் கொண்டிருந்தவேளையில், அவரின் அம்மா அவரிடம், “வெளிநாட்டுக்குச் செல்பவர்கள் ஒழுக்கம் தவறி நடப்பதாகக் கேள்விப்படுகிறேன். அதனால் உன்னை வெளிநாட்டுக்கு அனுப்பத் தயக்கமாக இருக்கிறது” என்றார். உடனே காந்திஜி அவர்கள், மது அருந்த மாட்டேன், மாமிசம் உண்ண மாட்டேன், பெண்களைத் தீண்ட மாட்டேன் ஆகிய மூன்று சத்தியங்களை, அம்மா புத்திலிபாய். அவர்களுக்குச் செய்துகொடுத்தார். ‘தாய் சொல்லைத் தட்டாதே’ என்ற பழமொழிக்கு ஏற்ப, அந்த மூன்று சத்தியங்களையும் கடைசிவரைத் தவறாமல் கடைப்பிடித்தார் காந்திஜி. ஒருமுறை காந்திஜி தங்கியிருந்த விடுதி ஒன்றுக்கு, நண்பர் ஒருவர் கூடை நிறைய மாம்பழங்களை அனுப்பியிருந்தார். அதில் சில பழங்களை எடுத்து சாறு புழிந்து கொடுத்தார் ஒரு சீடர். ஒரு மாம்பழத்தின் விலை என்ன? இவ்வளவு சாறு தயாரிக்க எத்தனை ரூபாய் செலவாகியிருக்கும்? இவ்வளவு விலையுயர்ந்த பழச்சாறு எனக்குத் தேவையா? பல மக்கள் பட்டினி கிடக்கும்போது நான் மட்டும் இப்படி மாம்பழச் சாறு குடிப்பது நியாயமா? என்று, கேள்வி மேல் கேள்வி கேட்டார் காந்திஜி. அப்போது ஓர் ஏழைப் பெண் குழந்தையுடன் வருவதைப் பார்த்து, தனக்குக் கொண்டுவரப்பட்ட மாம்பழச் சாற்றினை இரண்டு கோப்பைகளில் ஊற்றி, ஒரு கோப்பையை அந்தப் பெண்ணிடம் கொடுத்துவிட்டு “கடவுளே என் மன வேதனையைக் குறைக்க ஓர் ஏழைப் பெண்ணை அனுப்பியதற்கு நன்றி” என்றார். மகாத்மா காந்தி அவர்கள், 1869ம் ஆண்டு அக்டோபர் இரண்டாம் தேதி, குஜராத் மாநிலத்தின் போர்பந்தரில் பிறந்தார். அறவழியை உலகிற்குக் கற்பித்த இவரின் பிறந்த நாள், உலக அகிம்சை தினமாக, ஐ.நா.வால் கடைப்பிடிக்கப்படுகின்றது. (ஆதாரம் : வத்திக்கான் வானொலி) [2017-10-03 21:50:14]


தாய்வான் அரசுத்தலைவர் திருத்தந்தைக்கு அழைப்பு

தாய்வான் அரசுத்தலைவர் Tsai Ing-wen அவர்கள், திருத்தந்தை பிரான்சிஸ் அவர்களை, தன் நாட்டிற்கு திருத்தூதுப்பயணம் மேற்கொள்ளுமாறு, கடந்த ஈராண்டுகளில் நான்காவது முறையாக அழைப்பு விடுத்துள்ளார் என்று, UCA செய்தி கூறுகின்றது. திருப்பீட ஒருங்கிணைந்த மனித முன்னேற்ற அவைத் தலைவர் கர்தினால் பீட்டர் டர்க்சன் அவர்களை, தனது அலுவலகத்தில் சந்தித்தவேளை, மனிதாபிமான உதவிகள் மற்றும் பிற விவகாரங்கள் தொடர்பாக கலந்துரையாடியபின், திருத்தந்தை தாய்வானுக்கு வருகைதருமாறு அழைப்பு விடுத்தார், அரசுத்தலைவர் Tsai Ing-wen. அக்டோபர் ஒன்று இஞ்ஞாயிறு முதல், ஏழாம் தேதி வரை, தாய்வானின் Kaohsiung நகரில் நடைபெற்றுவரும், கடல் தொழிலாளருக்கு மறைப்பணி ஆற்றுவது குறித்த 24வது உலக மாநாட்டில் கலந்துகொள்ளும் கர்தினால் டர்க்சன் அவர்கள், தாய்வான் அரசுத்தலைவரையும் சந்தித்து உரையாடினார். மீன்பிடித் தொழிலில் உரிமை மீறல்கள் பற்றி கவனம் செலுத்துகின்ற இம்மாநாட்டில், ஐம்பது நாடுகளிலிருந்து 250க்கும் மேற்பட்ட வல்லுனர்கள் கலந்துகொள்கின்றனர். (ஆதாரம் : UCAN /வத்திக்கான் வானொலி) [2017-10-03 21:42:59]


கொடுப்பது, கொடுப்பவரையும், பெறுபவரையும் மகிழ்விக்கின்றது

நம் ஒவ்வொருவருக்கும் கடவுள் வழங்கியுள்ள மாபெரும் நன்கொடை வாழ்வு, இந்த வாழ்வு, படைப்பு என்னும் மற்றொரு நன்கொடையின் ஓர் அங்கம் என்றும், படைக்கப்பட்ட அனைத்தும் பல்வேறு வடிவங்களில் அழிந்துவிடாமல், தகுந்த விதமாய் அவற்றைப் பாதுகாப்பது நமது கடமை என்றும், திருத்தந்தை பிரான்சிஸ் அவர்கள் கூறினார். அக்டோபர் 04, வருகிற புதனன்று சிறப்பிக்கப்படும் “நன்கொடை 2017” நாளையொட்டி, இத்தாலிய நன்கொடை நிறுவனம் (IID) நடத்திவரும் கூட்டத்தில் கலந்துகொள்ளும் 150 பிரதிநிதிகளை, இத்திங்களன்று வத்திக்கானின் கிளமெந்தினா அறையில் சந்தித்து உரை வழங்கிய திருத்தந்தை பிரான்சிஸ் அவர்கள், இவ்வாறு கூறினார். கடவுளின் நன்மைத்தனத்திலிருந்து இலவசமாகப் பெற்ற இப்பூமிக் கோளம், கடும் சுற்றுச்சூழல் பிரச்சனையை எதிர்நோக்கி வருவதை நாம் அனுபவித்து வருகிறோம், ஆயினும், இந்த இலவசக் கொடையை, முழுமையாகப் பாதுகாத்து, வருங்காலத் தலைமுறைகளுக்கு வழங்கவேண்டியது நம் கடமை என்றும் எடுத்துரைத்தார் திருத்தந்தை பிரான்சிஸ். அன்பின் கலாச்சாரத்தைக் கட்டியெழுப்புமாறும் கூறியத் திருத்தந்தை, நாம் இலவசமாகப் பெற்றுள்ள கொடைகள் குறித்து, இளையோருக்கு விழிப்புணர்வூட்டுவதற்கு, இந்த நன்கொடை நாள் சிறந்த வாய்ப்பாக அமைந்துள்ளது என்றும், தனக்காகச் செபிக்குமாறும், இத்தாலிய நன்கொடை நிறுவனம் நடத்திவரும் கூட்டத்தில் கலந்துகொள்பவர்களிடம் கூறினார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-10-03 01:14:22]


பாசமுள்ள பார்வையில்: இயேசு அடியானில் தெரிந்த இறைச்சாயல்

புகழ்பெற்ற பேச்சாளர், பாரதி பாஸ்கர் அவர்கள், ஒருமுறை, மேடையில் பகிர்ந்துகொண்ட உண்மை நிகழ்வு இது: குமரி முனையில் வாழ்ந்துவந்த ஓர் இளையவரின் பெயர், இயேசு அடியான். அவ்விளைஞர் நீச்சலில் அதிகத் திறமை பெற்றவர். எனவே, பாறைகள் நிறைந்த கடல் பகுதிகளில் நீந்தி, பலரது உயிர்களைக் காப்பாற்றியுள்ளார். சில வேளைகளில், பாறைகளுக்கிடையே சிக்கி இறந்தோரின் உடலை மீட்டுக் கொணர்ந்துள்ளார். ஒருமுறை, ஆக்ராவிலிருந்து, செல்வம் மிகுந்த ஒரு குடும்பத்தினர், குமரி முனை வந்தபோது, அவர்களின் இளைய மகன் பாறைகளுக்கிடையே சிக்கினார். இயேசு அடியான் அவர்கள், அந்த இளையவரை உயிரோடு மீட்டுக் கொணர்ந்தார். தன் மகனின் உயிரைக் காத்த இயேசு அடியான் அவர்களுக்கு என்ன வேண்டுமானாலும் தருவதாக தந்தை கூறியபோது, அவர் மறுமொழியாக, "எனக்கு எதுவும் தேவையில்லை. உயிர்களைக் காப்பது என் கடமை" என்று பணிவாக மறுத்துவிட்டார். சில மாதங்கள் சென்று, அத்தந்தை மீண்டும் குமரிமுனைக்குச் சென்று, இயேசு அடியான் அவர்களை தன்னுடன் ஆக்ராவுக்கு அழைத்துச் சென்றார். அங்கு, அச்செல்வந்தரின் வீட்டு பூசையறையில், இயேசு அடியானின் படம், ஏனைய தெய்வங்களின் படங்களுடன் வைக்கப்பட்டிருப்பதைக் காட்டினார். பின்னர் அத்தந்தை, இயேசு அடியானிடம், "நீங்கள் என் மகனை உயிருடன் மீட்டதற்காக மட்டும் இங்கு உங்கள் படத்தை நான் வைக்கவில்லை. ஆனால், எதையும் எதிர்பார்க்காமல், உயிர்களைக் காத்துவரும் உங்களிடம், கடவுளையேப் பார்ப்பதுபோல் நாங்கள் உணர்கிறோம். அதனால்தான், உங்கள் படம் எங்கள் பூஜையறையில் உள்ளது" என்று கூறினார். பலன்கள் ஏதும் எதிர்பார்க்காமல், உயிர்களைக் காக்கும் உன்னத மனிதர்கள் வழியே, இறைவன் இவ்வுலகில் தொடர்ந்து வாழ்கிறார். (ஆதாரம் : வத்திக்கான் வானொலி) [2017-10-01 23:38:20]


கிறிஸ்தவர், யூதர், முஸ்லிம்கள், அமைதிக்காக செபிக்க வேண்டும்

“இந்த நம் காலத்தில், கிறிஸ்தவர்களும், யூதர்களும், முஸ்லிம்களும், அமைதிக்காக மிக அதிகமாகச் செபிக்க வேண்டிய அவசியம் ஏற்பட்டுள்ளது” என, இச்சனிக்கிழமையன்று, தன் டுவிட்டர் செய்தியில் கூறியுள்ளார், திருத்தந்தை பிரான்சிஸ். மேலும், அக்டோபர் 01, இஞ்ஞாயிறன்று, வட இத்தாலியிலுள்ள Cesena, பொலோஞ்ஞா ஆகிய இரு நகரங்களுக்கு, மேய்ப்புப்பணி பயணம் மேற்கொள்கிறார், திருத்தந்தை பிரான்சிஸ். திருத்தந்தை ஆறாம் பத்திநாதர் (பயஸ்) அவர்கள் பிறந்ததன் 300ம் ஆண்டு நிறைவையொட்டி, Cesenaவுக்கு இஞ்ஞாயிறு காலையில் மேய்ப்புப்பணி பயணம் மேற்கொள்ளும் திருத்தந்தை பிரான்சிஸ் அவர்கள், பொலோஞ்ஞா உயர்மறைமாவட்டத்தில் இடம்பெறும், திருநற்கருணை மாநாட்டிலும் கலந்துகொள்வார். Cesena-Sarsina ஆயர் Regattieri Douglas, பொலோஞ்ஞா பேராயர் Matteo Maria Zuppi ஆகிய இருவரின் அழைப்பின்பேரில், அந்நகரங்களுக்குச் செல்லும் திருத்தந்தை பிரான்சிஸ் அவர்கள், இஞ்ஞாயிறு மாலை 5 மணிக்கு பொலோஞ்ஞாவில் திருப்பலி நிறைவேற்றிய பின், வத்திக்கானுக்குப் புறப்படுவார் என, திருப்பீடச் செய்தித் தொடர்பகம் அறிவித்துள்ளது. பொலோஞ்ஞாவில் ஏழைகளுடன் மதிய உணவருந்துவார், திருத்தந்தை பிரான்சிஸ். திருத்தந்தை ஆறாம் பத்திநாதர் அவர்கள், Cesena நகரில், 1717ம் ஆண்டு டிசம்பர் 25ம் தேதி பிறந்தார். இவர், 1775ம் ஆண்டு பிப்ரவரி 15ம் தேதி முதல், 1799ம் ஆண்டு அவரின் மரணம்வரை, அதாவது அவ்வாண்டு ஆகஸ்ட் 29ம் தேதி வரை திருஅவையின் தலைவராகப் பணியாற்றினார். தனது 81வது வயதில் மரணமடைந்த திருத்தந்தை ஆறாம் பத்திநாதர் அவர்கள், திருஅவையை நீண்டகாலம் தலைமையேற்று வழிநடத்திய நான்காவது திருத்தந்தை ஆவார். (ஆதாரம் : வத்திக்கான் வானொலி) [2017-10-01 22:59:40]


கிறிஸ்தவர், யூதர், முஸ்லிம்கள், அமைதிக்காக செபிக்க வேண்டும்

“இந்த நம் காலத்தில், கிறிஸ்தவர்களும், யூதர்களும், முஸ்லிம்களும், அமைதிக்காக மிக அதிகமாகச் செபிக்க வேண்டிய அவசியம் ஏற்பட்டுள்ளது” என, இச்சனிக்கிழமையன்று, தன் டுவிட்டர் செய்தியில் கூறியுள்ளார், திருத்தந்தை பிரான்சிஸ். மேலும், அக்டோபர் 01, இஞ்ஞாயிறன்று, வட இத்தாலியிலுள்ள Cesena, பொலோஞ்ஞா ஆகிய இரு நகரங்களுக்கு, மேய்ப்புப்பணி பயணம் மேற்கொள்கிறார், திருத்தந்தை பிரான்சிஸ். திருத்தந்தை ஆறாம் பத்திநாதர் (பயஸ்) அவர்கள் பிறந்ததன் 300ம் ஆண்டு நிறைவையொட்டி, Cesenaவுக்கு இஞ்ஞாயிறு காலையில் மேய்ப்புப்பணி பயணம் மேற்கொள்ளும் திருத்தந்தை பிரான்சிஸ் அவர்கள், பொலோஞ்ஞா உயர்மறைமாவட்டத்தில் இடம்பெறும், திருநற்கருணை மாநாட்டிலும் கலந்துகொள்வார். Cesena-Sarsina ஆயர் Regattieri Douglas, பொலோஞ்ஞா பேராயர் Matteo Maria Zuppi ஆகிய இருவரின் அழைப்பின்பேரில், அந்நகரங்களுக்குச் செல்லும் திருத்தந்தை பிரான்சிஸ் அவர்கள், இஞ்ஞாயிறு மாலை 5 மணிக்கு பொலோஞ்ஞாவில் திருப்பலி நிறைவேற்றிய பின், வத்திக்கானுக்குப் புறப்படுவார் என, திருப்பீடச் செய்தித் தொடர்பகம் அறிவித்துள்ளது. பொலோஞ்ஞாவில் ஏழைகளுடன் மதிய உணவருந்துவார், திருத்தந்தை பிரான்சிஸ். திருத்தந்தை ஆறாம் பத்திநாதர் அவர்கள், Cesena நகரில், 1717ம் ஆண்டு டிசம்பர் 25ம் தேதி பிறந்தார். இவர், 1775ம் ஆண்டு பிப்ரவரி 15ம் தேதி முதல், 1799ம் ஆண்டு அவரின் மரணம்வரை, அதாவது அவ்வாண்டு ஆகஸ்ட் 29ம் தேதி வரை திருஅவையின் தலைவராகப் பணியாற்றினார். தனது 81வது வயதில் மரணமடைந்த திருத்தந்தை ஆறாம் பத்திநாதர் அவர்கள், திருஅவையை நீண்டகாலம் தலைமையேற்று வழிநடத்திய நான்காவது திருத்தந்தை ஆவார். (ஆதாரம் : வத்திக்கான் வானொலி) [2017-09-30 21:33:15]


இளையோர் தங்கள் அழைப்பை உணர, விசுவாச ஒளி உதவட்டும்

பெலாருஷ்யாவின் மின்ஸ்க் நாகரில் இடம்பெற்றுவரும் ஐரோப்பிய ஆயர்கள் பேரவையின் ஆண்டு நிறையமர்வுக் கூட்டத்திற்கு தன் வாழ்த்துக்களையும் ஊக்கத்தையும் தெரிவித்து செய்தி ஒன்றை அனுப்பியுள்ளார் திருத்தந்தை பிரான்சிஸ். திருத்தந்தையின் பெயரால் திருப்பீடச் செயலர் கர்தினால் பியெத்ரோ பரோலின் அவர்கள், ஐரோப்பிய ஆயர் பேரவைத் தலைவர் கர்தினால் ஆஞ்சலோ பஞ்ஞாஸ்கோ அவர்களுக்கு அனுப்பியுள்ள இச்செய்தி, பல்வேறு ஐரோப்பிய நாடுகளிடையே மேய்ப்புப்பணி சார்ந்த ஒத்துழைப்பையும், ஒருமைப்பாட்டையும், சகோதரத்துவத்தையும் இக்கூட்டம் ஊக்குவிக்கும் என்ற நம்பிக்கையை வெளியிட்டுள்ளது. ஐரோப்பிய ஆயர்களிடையே நிலவும் ஒன்றிப்பை, மேலும் பலமுள்ளதாக மாற்ற உதவும் இக்கூட்டத்திற்கு, திருத்தந்தை தன் ஆசீரை வழங்குவதாகவும் இச்செய்தியில் குறிப்பிட்டுள்ளார் கர்தினால் பரோலின். இளையோரின் நிலை குறித்து விவாதிக்க உள்ள இந்த ஆயர்கள் கூட்டம், திருஅவையிலும் சமூகத்திலும் தங்கள் அழைப்பை இளையோர் விசுவாச ஒளியில் கண்டுகொள்ள உதவும் என்ற திருத்தந்தையின் நம்பிக்கையும் இந்த செய்தியில் வெளியிடப்பட்டுள்ளது. ஐரோப்பிய ஆயர் பேரவையின் ஆண்டு நிறையமர்வுக் கூட்டம் இப்புதன் முதல் ஞாயிறு வரை பேலாருஷ்யா நாட்டின் மின்ஸ்க் நகரில் இடம்பெற்று வருகிறது. 45 ஐரோப்பிய நாடுகளின் ஆயர் பேரவைகளின் தலைவர்கள் பங்குபெறும் இக்கூட்டத்தின்போது, பெலாருஷ்யா நாட்டில் முதன் முதலாக அம்மொழியில் விவிலியம் அச்சிடப்பட்டதன் 500ம் ஆண்டும் சிறப்பிக்கப்படுகிறது. இன்றைய இளையோரின் ஏக்கங்கள், எதிர்பார்ப்புகள், தேவைகள், அச்சங்கள், உறவுகள், சவால்கள் என பல கோணங்களில் இளையோர் குறித்து விவாதிக்க உள்ள இக்கூட்டம், 2018ம் ஆண்டின் இளையோர் குறித்த உலக ஆயர் மன்றக் கூட்டத்திற்கு தயாரிப்பாக இருக்கும் என அறிவிக்கப்பட்டுள்ளது. இரண்டாவதாக, இக்கூட்டத்தில், ஐரோப்பாவை பொது இல்லமாக கட்டியெழுப்புவதில் திருஅவையின் பங்கு குறித்தும், ஐரோப்பாவில் மீண்டும் நற்செய்தியை இணைந்து அறிவிப்பது குறித்தும் விவாதிக்க உள்ளனர் ஆயர்கள். பெலாருஷ்யா அரசுத்தலைவர் Aleksandr Lukashenko அவர்களை சந்தித்து உரையாடியுள்ள ஆயர்கள், இக்கூட்டத்தின் இறுதி நாளான, வரும் ஞாயிறன்று, மின்ஸ்க் நகரின் பங்குதளங்களில் திருப்பலி நிறைவேற்றி கத்தோலிக்கர்களுடன் உரையாடுவர். (ஆதாரம் : வத்திக்கான் வானொலி) [2017-09-29 20:02:52]


பாசமுள்ள பார்வையில்.. நேர்மைக்கு கிடைத்த வெகுமதி

அந்த ஊரில் சில ஆண்டுகளாகத் தொடர்ந்து மழையே பெய்யவில்லை. ஊரில் கடும் பஞ்சம். மக்கள் பசியால் வாடினர். ஆதலால் பக்கத்து ஊரில் வாழ்ந்த நல்ல உள்ளம் படைத்த பணக்கார கைம்பெண் ஒருவரிடம் ஊர் மக்கள் சென்று, அம்மா, பெரியவர்களாகிய நாங்கள் எப்படியோ பசியைப் பொறுத்துக்கொள்கிறோம். ஆனால் பசியால் வாடும் எங்கள் சிறுபிள்ளைகளுக்கு நீங்கள்தான் கருணை காட்ட வேண்டும் என்று கெஞ்சினர். இளகிய உள்ளம் படைத்த அந்த அம்மா, ஊர் பெரியவர்களிடம், உங்கள் ஊரில் சிறார் யாரும் பசியால் வாட வேண்டாம், தினமும் ஆளுக்கொரு ரொட்டி கிடைக்குமாறு நான் ஏற்பாடு செய்கிறேன், நாளை என் வீட்டிற்கு வந்து ரொட்டியை எடுத்துச் செல்லச் சொல்லுங்கள் என்று சொன்னார். பின் தனது மாளிகை திரும்பிய அந்த அம்மா, தனது ஊழியர் ஒருவரை அழைத்து, அந்த ஊரிலுள்ள சிறார் ஒவ்வொருவருக்கும் ஆளுக்கொரு ரொட்டி கிடைக்க வேண்டும், அதிகரிக்கவும் கூடாது, குறையவும் கூடாது, ஒரு கூடையில் சரியான எண்ணிக்கையில் ரொட்டிகளை வைத்துக்கொண்டு வீட்டிற்கு வெளியே நாளையிலிருந்து அமர்ந்திரு என்று சொன்னார். மறுநாள் அங்கு வந்த சிறார், கூடையிலிருந்து பெரிய ரொட்டியை எடுப்பதில் போட்டிப் போட்டனர் ஆனால் ஒரு சிறுமி மட்டும் ஒதுங்கி நின்று, எல்லாரும் எடுத்தபின் கடைசியில் கூடையில் இருக்கும் சிறிய ரொட்டியை எடுத்துக்கொண்டு மகிழ்ச்சியுடன் சென்றாள். இப்படியே தொடர்ந்து நான்கு நாள்கள் நடந்தன. இதை அந்த பணக்கார அம்மா கவனித்துக் கொண்டிருந்தார். ஐந்தாவது நாளில் கடைசியில் சிறிய ரொட்டியை எடுத்துச் சென்ற சிறுமி, வீட்டிற்குச் சென்று தாயிடம் கொடுத்தாள். சிறுமியின் தாய் அதைப் பிரித்தார். அதிலிருந்து தங்கக்காசு கீழே விழுந்தது. அதை எடுத்துக்கொண்டு உடனே பணக்கார அம்மாவிடம் வந்து கொடுத்தாள் சிறுமி. அப்போது அந்த அம்மா, மகளே, உன் பொறுமைக்கும், நற்பண்பிற்கும் நான் கொடுத்த பரிசு இது. இதை எடுத்துக்கொண்டு வீட்டிற்குச் செல் என்றார். சிறுமியும் துள்ளிக் குதித்துக்கொண்டு வீட்டிற்குச் சென்று தன் தாயிடம் காட்டினார். (ஆதாரம் : வத்திக்கான் வானொலி) [2017-09-29 00:45:30]


திருத்தந்தையின் அக்டோபர் மாத திருவழிபாட்டு நிகழ்வுகள்

திருத்தந்தை பிரான்சிஸ் அவர்கள், வருகிற அக்டோபர் மாதத்தில் நிறைவேற்றும் திருவழிபாட்டு நிகழ்வுகள் பற்றிய விவரங்களை வெளியிட்டுள்ளார், திருத்தந்தையின் திருவழிபாடுகளுக்குப் பொறுப்பான, பேரருள்திரு குய்தோ மரினி. அக்டோபர் ஒன்றாம் தேதியான ஞாயிறன்று, இத்தாலியின் Cesena மற்றும் பொலோஞ்ஞா நகரங்களுக்கு, மேய்ப்புப்பணி பயணம் மேற்கொள்வார் திருத்தந்தை பிரான்சிஸ். திருவழிபாட்டு ஆண்டின் 28ம் ஞாயிறாகிய அக்டோபர் 15ம் தேதியன்று, வத்திக்கான் தூய பேதுரு வளாகத்தில், காலை 10.15 மணிக்கு, Andrea de Soveral, Ambrogio Francesco Ferro, Matteo Moreira மற்றும், 27 தோழர்கள், கிறிஸ்டோபர், அந்தோனி, யோவான், Faustino Míguez; Angelo da Acri ஆகிய முத்திப்பேறு பெற்றவர்களைப் புனிதர்கள் என அறிவிக்கும் திருப்பலியை நிறைவேற்றுவார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-09-29 00:29:45]


பக்க இலக்கங்களை அழுத்தி எல்லா செய்திகளையும் பார்வையிடவும்