வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



நம் துன்பங்களை சுமப்பதுடன், ஆறுதலையும் தருகிறார் இயேசு

தன் பாடுகளின் வழியாக, நம் துன்ப துயரங்களை ஏற்றுக்கொண்ட இயேசு, துன்பத்தின் அர்த்தத்தை அறிந்தவராக, நம்மைப் புரிந்துகொண்டு, ஆறுதல்படுத்தி பலப்படுத்துவார்' என இச்செவ்வாய்க்கிழமை டுவிட்டர் பக்கத்தில் எழுதியுள்ளார் திருத்தந்தை பிரான்சிஸ். மேலும், இச்செவ்வாய்க்கிழமையன்று, C-9 என்ற பெயரில் தனக்கு ஆலோசனை வழங்கும் கர்தினால்கள் அவைக் கூட்டத்தில் திருத்தந்தை கலந்துகொண்டதால், வேறு எவரையும் இந்நாளில் அவர் சந்திக்கவில்லை. கர்தினால்களின் இந்த உயர்மட்ட அவையிலுள்ள 9 அங்கத்தினர்களும், இந்நாளில் திருத்தந்தை நிறைவேற்றிய காலைத் திருப்பலியிலும் கலந்துகொண்டனர். C-9 என்ற இந்த உயர் மட்ட குழுவில், ஆசியாவிலிருந்து, மும்பை பேராயர் கர்தினால் ஆஸ்வால்டு கிரேசியஸ் அவர்களும் அங்கத்தினராக உள்ளார். (ஆதாரம் : வத்திக்கான் வானொலி) [2017-06-15 02:14:22]


அயர்லாந்தில் புனித அன்னை தெரேசாவின் புனிதப்பொருள் பயணம்

இரக்கத்தின் சிறப்பு யூபிலி ஆண்டில் புனிதராக உயர்த்தப்பட்ட புனித அன்னை தெரேசாவின் இரத்தத் துளிகள் பதிந்த ஒரு துணி, புனிதப் பொருளாக, ஜூன் 8 இவ்வியாழன் முதல், அயர்லாந்து நாட்டின் பல்வேறு நகரங்களுக்கு, பவனியாக எடுத்துச் செல்லப்படுகிறது. ஜூன் 8 வியாழன் மாலை 7.30 மணிக்கு Armagh நகரிலுள்ள புனித பேட்ரிக் பேராலயத்தை அடைந்த புனிதப் பொருள், இவ்வெள்ளியன்று Newry நகருக்கும், ஜூன் 12 Belfast நகருக்கும் பயணமாகும் என்று அறிவிக்கப்பட்டுள்ளது. 1910ம் ஆண்டு, மாசிடோனியா நாட்டில், ஆக்னெஸ் என்ற இயற்பெயருடன் பிறந்த அன்னை தெரேசா அவர்கள், தன் 18வது வயதில், அயர்லாந்து நாட்டில், லொரேட்டோ அருள் சகோதரிகள் சபையில் இணைந்து, 1929ம் ஆண்டு, இந்தியாவுக்கு கல்விப் பணியாற்ற சென்றார். வறியோர் நடுவே உழைப்பதற்கென, பிறரன்பு மறைப்பணியாளர் சகோதரிகள் துறவு சபையை 1950ம் ஆண்டு நிறுவி, 1997ம் ஆண்டு இறையடி சேர்ந்தார். 2016ம் ஆண்டு செப்டம்பர் மாதம் திருத்தந்தை பிரான்சிஸ் அவர்களால் புனிதராக உயர்த்தப்பட்ட புனித அன்னை தெரேசா அவர்களின் புனிதப் பொருள், அயர்லாந்தில் தன் பயணத்தை நிறைவு செய்து, Newry நகரில் உள்ள பேராலயத்தில் நிரந்தரமாகப் பாதுகாக்கப்படும் என்று அறிவிக்கப்பட்டுள்ளது. (ஆதாரம் : The Irish News / வத்திக்கான் வானொலி) [2017-06-13 00:10:15]


சீனாவில் தொடரும் கோவில் இடிப்புகளும் கைதுகளும்

. மத்திய சீனாவின் Henan மாவட்டத்தில் உள்ள கிறிஸ்தவக் கோவில் ஒன்றை இடித்து அழிவுக்குள்ளாகியுள்ள அந்நாட்டு காவல்துறை, 40 கிறிஸ்தவ விசுவாசிகளையும் கைது செய்துள்ளது. பொதுத் தெரு ஒன்றைப் பயன்படுத்துவதற்கான வரியைக் கட்டவில்லை என்ற காரணம் காட்டி, இந்த அத்துமீறல் செயலையும், கைதையும் நிறைவேற்றியுள்ளது சீன காவல்துறை. காவல்துறையினர், அரசு அதிகாரிகள் என 300 பேர் கொண்ட குழுவொன்று மேற்கொண்ட இந்த கோவில் இடிப்பு நிகழ்ச்சியினைத் தொடர்ந்து, கைது செய்யப்பட்ட அக்கோவிலின் மதபோதகரும், விசுவாசிகள் சிலரும் இன்னும் சிறையிலேயே வைக்கப்பட்டுள்ளனர். (ஆதாரம் : AsiaNews/வத்திக்கான் வானொலி) [2017-06-10 21:29:00]


நிலநடுக்கத்தால் பாதிக்கப்பட்ட குழந்தைகளுடன் திருத்தந்தை

திருப்பீடச் செயலர், கர்தினால் பியெத்ரோ பரோலின், மற்றும் திருப்பீட உயர் அதிகாரிகளுடன் இச்சனிக்கிழமையன்று காலை, இத்தாலிய அரசுத்தலைவர் மாளிகை சென்று அரசுத்தலைவரைச் சந்தித்தார், திருத்தந்தை பிரான்சிஸ். உள்ளூர் நேரம் காலை 11 மணிக்கு, இத்தாலிய அரசுத்தலைவர் மாளிகைக்குச் சென்ற திருத்தந்தையை, மாளிகை வளாகத்தில் வந்து நின்று, வரவேற்று, உள்ளே அழைத்துச் சென்றார், அரசுத்தலைவர், செர்ஜியோ மாத்தரெல்லா (Sergio Mattarella). திருத்தந்தைக்கு, இராணுவ மரியாதையுடன் கூடிய வரவேற்பு வழங்கப்பட்டு, இரு நாட்டு தேசியப் பண்களும் பாடப்பட்டப்பின், அரசு மாளிகைக்குள் திருத்தந்தையும், அரசுத்தலைவரும் சென்று தனிப்பட்ட முறையில் பேச்சு வார்த்தைகளை மேற்கொண்டனர். இதன்பின், இத்தாலிய அரசு உயர்மட்ட அதிகாரிகள் திருத்தந்தைக்கு அறிமுகம் செய்துவைக்கப்பட்டபின், திருத்தந்தையுடன் சென்ற திருப்பீட உயர்மட்டக் குழுவினரும் இத்தாலிய அரசுத்தலைவருக்கு அறிமுகம் செய்துவைக்கப்பட, பின்னர், திருத்தந்தையும், அரசுத்தலைவரும் அரசு மாளிகையில் உள்ள சிறு கோவிலில் சிறிது நேரம் செலவிட்டனர். மத்திய இத்தாலியின் நிலநடுக்கத்தால் பாதிக்கப்பட்ட குழந்தைகளில் ஏறத்தாழ 200 பேரை, அரசு மாளிகைத் தோட்டத்தில் சந்தித்து உரையாடினார், திருத்தந்தை பிரான்சிஸ். (ஆதாரம் : வத்திக்கான் வானொலி) [2017-06-10 21:20:02]


"அமைதிக்காக ஆராதனை" பீடத்தை அர்ச்சித்த திருத்தந்தை

திருத்தந்தை பிரான்சிஸ் அவர்களின் வேண்டுகோளுக்கேற்ப, ஜூன் 8, இவ்வியாழனன்று, 'உலக அமைதிக்காக ஒரு நிமிடம்' என்ற முயற்சி, உலகெங்கும் கடைபிடிக்கப்பட்டதைப்போல, உரோம் நேரம் பிற்பகல் 1 மணிக்கு, கடைபிடிக்கப்பட்டது. 2014ம் ஆண்டு, ஜூன் 8ம் தேதி, இஸ்ரேல் அரசுத் தலைவர் ஷிமோன் பேரெஸ் அவர்களும், பாலஸ்தீனிய அரசுத்தலைவர் மஹ்மூத் அப்பாஸ் அவர்களும் வத்திக்கான் தோட்டத்தில் திருத்தந்தை பிரான்சிஸ் அவர்களுடன் சேர்ந்து, உலக அமைதிக்காக செபித்தனர். வரலாற்றி சிறப்பு மிக்க இந்நிகழ்வை நினைவுகூரும் வகையில், ஒவ்வோர் ஆண்டும், ஜூன் 8ம் தேதி பிற்பகல் 1 மணிக்கு, அனைத்து மதத்தினரும் தாங்கள் இருக்கும் இடங்களிலேயே ஒரு நிமிடம் செபிக்கும்படி "அமைதிக்காக ஒரு நிமிடம்" என்ற முயற்சியை திருத்தந்தை அறிமுகம் செய்தார். மேலும், தென் கொரியாவில் உள்ள மரியன்னை திருத்தலம் ஒன்றில் வைக்கப்படவுள்ள ஒரு பீடத்தை திருத்தந்தை பிரான்சிஸ் அவர்கள், இப்புதன் மறைக்கல்வி உரைக்குப் பின்னர் அர்ச்சித்தார். "உலக ஒற்றுமை, அமைதிக்காக ஆண்டவருக்கு ஆராதனை" என்ற பெயரில் போலந்து நாட்டில் துவக்கப்பட்ட ஒரு முயற்சியின் தொடர்ச்சியாக, இடைவிடாத ஆராதனைக்கென இந்த பீடம் உருவாக்கப்பட்டுள்ளது. உலகின் 12 நாடுகளில் தொடர் ஆராதனை நடக்கும் நோக்கத்துடன் செயல்படும் இந்த இயக்கத்தினர், தென் கொரியாவின் Namyang நகரில் உள்ள செபமாலை அன்னை திருத்தலத்தில் இப்பீடத்தை நிறுவவுள்ளனர். இதற்கிடையே, "பணிவும், மேன்மை உள்ளமும், வலுவற்றோரின் புண்ணியங்கள் அல்ல, மாறாக, அவை, உறுதி மிக்கோரின் புண்ணியங்கள்" என்ற சொற்கள், திருத்தந்தை பிரான்சிஸ் அவர்களின் டுவிட்டர் பக்கத்தில் ஜூன் 8, இவ்வியாழனன்று வெளியாயின. (ஆதாரம் : வத்திக்கான் வானொலி) [2017-06-09 17:43:00]


பாசமுள்ள பார்வையில்.. ஒரு தாயின் இறை நம்பிக்கை

உரோம் நகரின் மருத்துவமனை ஒன்றில் சிகிச்சை பெற்றுவரும் எண்பது வயது நிரம்பிய தாய் ஒருவர், அங்குப் பணியாற்றும் செவிலியர் ஒருவரிடம் இவ்வாறு பகிர்ந்துகொண்டுள்ளார். நான் எனது ஐந்து வயதில் தந்தையை இழந்தேன். அதன்பின், என் தாய், தனியாளாக, என்னை மிகவும் கஷ்டப்பட்டு அன்போடு வளர்த்து ஆளாக்கினார். பருவம் அடைந்து அழகிய இளம் பெண்ணாக வளர்ந்துவந்த நான், ஒருவரை அன்புகூர்ந்தேன். அவரும் என்மீது மிகுந்த பாசம் காட்டுவதுபோல் இருந்தது. அந்த நம்பிக்கையில் என்னை அவரிடம் இழந்தேன். நான் கருவுற்றுள்ளேன் எனக் கூறியபோது, அவர் எனக்கு இந்தக் குழந்தை வேண்டாம் என ஒதுங்கிச் சென்றுவிட்டார். திருமணமாகாமல் குழந்தைக்குத் தாயான என்னை, எனது ஊரில், பலரும் பலவாறு ஏளனமாகப் பேசினார்கள். என் தாய் எல்லாவற்றையும் தாங்கிக்கொண்டு, என்னையும், நான் பெற்றெடுத்த பெண் குழந்தையையும் ஏற்றார். என் தாயோடு நாங்கள் வாழ்ந்தோம். என் பிள்ளையை வளர்த்து, காவல்துறை பணிக்குப் படிக்க வைத்தேன். நான் என் வாழ்வின் துன்பநேரங்களில், ஓர் ஆலயம் சென்று, சிலுவையில் தொங்கும் இயேசுவிடம் செபிப்பேன். அவர்தான் எனக்கு இத்தனை காலமும் என்னை அற்புதமாய் வழிநடத்தி வருகிறார். என் மகள் அன்று உரோம் பன்னாட்டு விமான நிலையத்தில் வேலையில் சேருவதற்காக நேர்காணலுக்குச் சென்றாள். அப்போது தனது வாகனத்தை நிறுத்துவதற்காகச் சென்ற என் மகள், இன்னொருவர் அந்த இடத்திற்கு வந்ததும், காத்து இருந்தாள். அந்த மனிதர் தனது வாகனத்தை அந்த இடத்தில் நிறுத்திவிட்டு, என் மகளிடம், நீ இப்போது எங்கே செல்கிறாய் எனக் கேட்டுள்ளார். அவளும் விவரத்தைச் சொல்ல, அங்குப் போய் என் பெயரைச் சொல் என்றுமட்டும் சொல்லி அவர் சென்றுவிட்டார். அந்த மனிதர் யார் என்றே என் மகளுக்குத் தெரியாது. எனக்கும் தெரியாது. என் மகளும் அவ்வாறே சொல்ல, உடனடியாக என் மகளுக்கு வேலையும் கிடைத்தது. இப்போது என் மகள் அந்த விமான நிலைய காவல்துறை பணியில் வேலை செய்கிறாள். என் மகள் நேர்காணலுக்குச் சென்ற அந்த நாள் முழுவதும், நான் இயேசுவிடம் மிக உருக்கமாகச் செபித்துக் கொண்டிருந்தேன். இந்தத் தாயின் பகிர்வைக் கேட்கும்போது, நம்மிலுள்ள இறை நம்பிக்கையும் ஆழமாகிறதல்லவா! (ஆதாரம் : வத்திக்கான் வானொலி) [2017-06-09 01:39:57]


ஜூன் 8, இவ்வியாழன் "அமைதிக்காக ஒரு நிமிடம்" முயற்சி

திருத்தந்தை பிரான்சிஸ் அவர்கள், ஜூன் 7 இப்புதனன்று வழங்கிய புதன் பொது மறைக்கல்வியின் இறுதியில், ஜூன் 8ம் தேதி இவ்வியாழனன்று நடைபெறும் 'அமைதிக்காக ஒரு நிமிடம்' என்ற செப முயற்சியில், மக்கள் தன்னுடன் இணைந்து உலக அமைதிக்காகச் செபிக்குமாறு விண்ணப்பம் செய்தார். "அமைதிக்காக ஒரு நிமிடம்" என்ற முயற்சி, ஜூன் 8, இவ்வியாழன் பிற்பகல் 1 மணிக்கு கடைபிடிக்கப்படும் என்று ஆர்ஜன்டீனா ஆயர் பேரவை அறிவித்துள்ளது. 2014ம் ஆண்டு, ஜூன் 8ம் தேதி, இஸ்ரேல் அரசுத் தலைவர் இரமோன் பீரிஸ் அவர்களும், பாலஸ்தீனிய அரசுத்தலைவர் மஹ்மூத் அப்பாஸ் அவர்களும் வத்திக்கான் தோட்டத்தில் திருத்தந்தை பிரான்சிஸ் அவர்களுடன் சேர்ந்து, உலக அமைதிக்காக செபித்தனர். இந்த நிகழ்வை நினைவுகூரும் வகையில், ஆர்ஜன்டீனா ஆயர் பேரவை, ஒவ்வோர் ஆண்டும், ஜூன் 8ம் தேதி பிற்பகல் 1 மணிக்கு, அனைத்து மதத்தினரும் தங்கள் வழிகளில் ஒரு நிமிடம் செபிக்கும்படி "அமைதிக்காக ஒரு நிமிடம்" என்ற முயற்சியை அறிமுகம் செய்துள்ளது. இல்லங்களில், பள்ளிகளில், தொழிற்சாலைகளில், அலுவலகங்களில் இருக்கும் அனைவரும், அவரவர் நாடுகளின் நேரத்திற்கு ஏற்ப, பிற்பகல் ஒரு மணிக்கு, ஒரு நிமிடம் அமைதிக்காக செபிக்கும்படி ஆர்ஜன்டீனா ஆயர்கள் அழைப்பு விடுத்துள்ளனர். ஆர்ஜன்டீனா ஆயர்களின் இந்த முயற்சிக்கு, அனைத்துலக கத்தோலிக்கப் பணி அமைப்பு, மற்றும் அகில உலக கத்தோலிக்கப் பெண்கள் நிறுவனம் ஆகிய அமைப்புக்கள் ஆதரவு அளித்து வருகின்றனர் என்று பீதேஸ் (Fides) செய்தி கூறுகிறது. (ஆதாரம் : Fides / வத்திக்கான் வானொலி) [2017-06-07 19:05:00]


மறைபரப்புப் பணிகளுக்கு தூய ஆவியாரின் உதவிகள்

எக்காலத்தையும் விட தற்போது, கிறிஸ்தவ மறைசாட்சிகளின் என்ணிக்கை பெருமளவில் இருப்பதாக இச்சனிக்கிழமை மாலை இடம்பெற்ற அருங்கொடை மறுமலர்ச்சி இயக்கத்தின் பொன்விழாக் கூட்டத்தில் உரையாற்றினார், திருத்தந்தை பிரான்சிஸ். தூய ஆவியார் பெருவிழாவுக்கு முந்தைய திருவிழிப்பு வழிபாட்டில் அருங்கொடை இயக்கத்தினரை, உரோம் Circo Massimo திடலில் சந்தித்தத் திருத்தந்தை பிரான்சிஸ் அவர்கள், கத்தோலிக்கர், ஆர்த்தடாக்ஸ் சபையினர், எவாஞ்சலிக்கல் சபையினர் என்ற எவ்வித பாகுபாடுமின்றி, கிறிஸ்தவர் என்ற ஒரே காரணத்திற்காக, விசுவாசிகள் பெருமளவில் கொலைச் செய்யப்பட்டுவரும் இன்றைய சூழலில், கிறிஸ்தவ ஒன்றிப்பு என்பது எக்காலத்தையும் விட அதிகம் அதிகமாகத் தேவைப்படுகின்றது என்றார். கிறிஸ்தவ சபைகளுக்குள் வேறுபாடுகள் இருப்பினும், ஒப்புரவுடன்கூடிய பன்முகத்தன்மையைக் கொண்டவர்களாக, இயேசுவே ஆண்டவர் எனவும், அமைதி என்பது இயலக்கூடியதே எனவும், நற்செய்தியை நாம் இணைந்து அறிவிக்க முடியும் எனவும் கூறினார் திருத்தந்தை பிரான்சிஸ். கிறிஸ்தவ மறுமலர்ச்சி இயக்கத்தின் ஐம்பதாவது ஆண்டுக் கொண்டாடப்படுவது குறித்தும் எடுத்துரைத்த திருத்தந்தை பிரான்சிஸ் அவர்கள், உதவித் தேவைப்படுபவர்களுக்கு ஆற்றும் பணியில் அனைத்துக் கிறிஸ்தவ சபைகளும் செபத்திலும் செயல்பாடுகளிலும் ஒன்றிணைந்து நடைபோடுவார்களாக எனவும் கூறினார். இரண்டாம் வத்திக்கான் பொதுச்சங்கம் நிறைவுற்ற இரண்டு ஆண்டுகளுக்குப்பின், 1967ம் ஆண்டு பிப்ரவரி 17ம் தேதியன்று, அமெரிக்க ஐக்கிய நாட்டில் மாணவர் குழு ஒன்று ஆன்மீகத் தியானத்தில் ஈடுபட்டது. அத்தியானத்தில் அம்மாணவர்களுக்கு ஏற்பட்ட அனுபவத்தின் பயனாக ஆரம்பிக்கப்பட்டதே அருங்கொடை மறுமலர்ச்சி இயக்கம். இன்று இது, உலகளாவிய இயக்கமாக மாறி, 12 கோடிக்கு மேற்பட்டவர்களை உறுப்பினர்களாகக் கொண்டுள்ளது. (ஆதாரம் : வத்திக்கான் வானொலி) [2017-06-07 01:05:58]


மறைபரப்புப் பணிகளுக்கு தூய ஆவியாரின் உதவிகள்

எக்காலத்தையும் விட தற்போது, கிறிஸ்தவ மறைசாட்சிகளின் என்ணிக்கை பெருமளவில் இருப்பதாக இச்சனிக்கிழமை மாலை இடம்பெற்ற அருங்கொடை மறுமலர்ச்சி இயக்கத்தின் பொன்விழாக் கூட்டத்தில் உரையாற்றினார், திருத்தந்தை பிரான்சிஸ். தூய ஆவியார் பெருவிழாவுக்கு முந்தைய திருவிழிப்பு வழிபாட்டில் அருங்கொடை இயக்கத்தினரை, உரோம் Circo Massimo திடலில் சந்தித்தத் திருத்தந்தை பிரான்சிஸ் அவர்கள், கத்தோலிக்கர், ஆர்த்தடாக்ஸ் சபையினர், எவாஞ்சலிக்கல் சபையினர் என்ற எவ்வித பாகுபாடுமின்றி, கிறிஸ்தவர் என்ற ஒரே காரணத்திற்காக, விசுவாசிகள் பெருமளவில் கொலைச் செய்யப்பட்டுவரும் இன்றைய சூழலில், கிறிஸ்தவ ஒன்றிப்பு என்பது எக்காலத்தையும் விட அதிகம் அதிகமாகத் தேவைப்படுகின்றது என்றார். கிறிஸ்தவ சபைகளுக்குள் வேறுபாடுகள் இருப்பினும், ஒப்புரவுடன்கூடிய பன்முகத்தன்மையைக் கொண்டவர்களாக, இயேசுவே ஆண்டவர் எனவும், அமைதி என்பது இயலக்கூடியதே எனவும், நற்செய்தியை நாம் இணைந்து அறிவிக்க முடியும் எனவும் கூறினார் திருத்தந்தை பிரான்சிஸ். கிறிஸ்தவ மறுமலர்ச்சி இயக்கத்தின் ஐம்பதாவது ஆண்டுக் கொண்டாடப்படுவது குறித்தும் எடுத்துரைத்த திருத்தந்தை பிரான்சிஸ் அவர்கள், உதவித் தேவைப்படுபவர்களுக்கு ஆற்றும் பணியில் அனைத்துக் கிறிஸ்தவ சபைகளும் செபத்திலும் செயல்பாடுகளிலும் ஒன்றிணைந்து நடைபோடுவார்களாக எனவும் கூறினார். இரண்டாம் வத்திக்கான் பொதுச்சங்கம் நிறைவுற்ற இரண்டு ஆண்டுகளுக்குப்பின், 1967ம் ஆண்டு பிப்ரவரி 17ம் தேதியன்று, அமெரிக்க ஐக்கிய நாட்டில் மாணவர் குழு ஒன்று ஆன்மீகத் தியானத்தில் ஈடுபட்டது. அத்தியானத்தில் அம்மாணவர்களுக்கு ஏற்பட்ட அனுபவத்தின் பயனாக ஆரம்பிக்கப்பட்டதே அருங்கொடை மறுமலர்ச்சி இயக்கம். இன்று இது, உலகளாவிய இயக்கமாக மாறி, 12 கோடிக்கு மேற்பட்டவர்களை உறுப்பினர்களாகக் கொண்டுள்ளது. (ஆதாரம் : வத்திக்கான் வானொலி) [2017-06-07 01:02:32]


வத்திக்கான் வளாகத்தில் தூய ஆவியார் பெருவிழா திருப்பலி

தூய ஆவியார் வருகைப் பெருவிழாவாகிய ஜூன் 4, இஞ்ஞாயிறு காலை 10.30 மணிக்கு வத்திக்கான் தூய பேதுரு வளாகத்தில் கூட்டுத்திருப்பலி நிறைவேற்றுவார் திருத்தந்தை பிரான்சிஸ். மேலும், இஞ்ஞாயிறன்று சிறப்பிக்கப்படும் தூய ஆவியார் பெருவிழாவுக்குத் தயாரிப்பாக, உலகளாவிய கத்தோலிக்க அருங்கொடை மறுமலர்ச்சி இயக்கத்தினர், உரோம் Circo Massimo திடலில், இச்சனிக்கிழமை மாலை திருவிழிப்பு வழிபாட்டை நடத்துகின்றனர். மாலை நான்கு மணிக்குத் தொடங்கும் இவ்வழிபாட்டில், மாலை ஆறு மணிக்கு திருத்தந்தை கலந்துகொள்கிறார். இரண்டாம் வத்திக்கான் பொதுச்சங்கம் நிறைவுற்ற இரண்டு ஆண்டுகளுக்குப்பின், 1967ம் ஆண்டு பிப்ரவரி 17ம் தேதியன்று, அமெரிக்க ஐக்கிய நாட்டில் மாணவர் குழு ஒன்று ஆன்மீகத் தியானத்தில் ஈடுபட்டது. அத்தியானத்தில் அம்மாணவர்களுக்கு ஏற்பட்ட அனுபவத்தின் பயனாக ஆரம்பிக்கப்பட்டதே அருங்கொடை மறுமலர்ச்சி இயக்கம். இன்று இது, உலகளாவிய இயக்கமாக மாறி, 12 கோடிக்கு மேற்பட்டவர்களை உறுப்பினர்களாகக் கொண்டுள்ளது. மே 31, இப்புதனன்று உரோம் நகரில் தொடங்கிய உலகளாவிய கத்தோலிக்க அருங்கொடை மறுமலர்ச்சி இயக்கத்தின் பொன் விழா மாநாட்டில், ஏறக்குறைய 130 நாடுகளைச் சேர்ந்த முப்பதாயிரத்திற்கும் அதிகமானோர் பங்கேற்கின்றனர். ஜூன் 4, வருகிற ஞாயிறு சிறப்பிக்கப்படும் தூய ஆவியார் வருகைப் பெருவிழாவுடன் இம்மாநாடு நிறைவடையும். (ஆதாரம் : வத்திக்கான் வானொலி) [2017-06-05 01:45:25]


பக்க இலக்கங்களை அழுத்தி எல்லா செய்திகளையும் பார்வையிடவும்