வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



கர்தினால் நிக்கோல்ஸ் - எந்த ஒரு நாடும் தனித்து வாழமுடியாது

எந்த ஒரு நாடும் தனித்து வாழமுடியாது என்று, வெஸ்ட்மின்ஸ்டர் பேராயரும், ஐரோப்பிய ஆயர் பேரவைகள் கூட்டமைப்பின் துணைத் தலைவருமான கர்தினால் வின்சென்ட் நிக்கோல்ஸ் அவர்கள், செய்தியாளர்களிடம் கூறினார். Brexit நாள் என்றழைக்கப்படும் மார்ச் 29, இப்புதனன்று, பிரித்தானியா, ஐரோப்பிய ஒன்றியத்திலிருந்து பிரிந்துசெல்வதற்கு தன் ஒப்புதலை அளித்துள்ளதைத் தொடர்ந்து, கர்தினால் நிக்கோல்ஸ் அவர்கள், செய்தியாளர்களிடம் பேசுகையில், இந்த முடிவு, பிரித்தானிய மக்களிடையே கலப்படமான ஓர் உணர்வை உருவாகியுள்ளது என்று கூறினார். இளையோரை மையப்படுத்தி இஸ்பெயின் நாட்டின் பார்சலோனா நகரில் நடைபெறும் ஒரு கூட்டத்தில் கலந்துகொள்ள சென்றுள்ள கர்தினால் நிக்கோல்ஸ் அவர்கள், அடுத்த ஈராண்டுகள், பிரித்தானிய அரசு எடுக்கும் ஒவ்வொரு முடிவும் முக்கியம் வாய்ந்ததாக இருக்கும் என்பதைச் சுட்டிக்காட்டினார். ஏனைய நாடுகளிலிருந்து தனித்து இயங்குவதால், பிரித்தானியா பாதுகாப்புடன் இருக்கும் என்ற கற்பனையை உடைக்க, அண்மையில் இலண்டனில் நிகழ்ந்த தாக்குதல் போதுமான எச்சரிக்கையாக அமைந்தது என்று, கர்தினால் நிக்கோல்ஸ் அவர்கள், தன் பேட்டியில் குறிப்பிட்டார். இலண்டனில், 82 நொடிகள் மட்டுமே நடந்த இத்தாக்குதலில், துயரமான உண்மைகள் அதிகம் நிகழ்ந்தன என்றாலும், தாக்குதல் நிகழ்ந்ததும், அருகிலிருந்த மருத்துவமனையின் மருத்துவர்களும், பணியாளர்களும், தங்கள் பாதுகாப்பை பெரிதாகக் கருதாமல், சம்பவ இடத்திற்கு விரைந்து சென்று உயிர்களைக் காக்க போராடியது, நம்பிக்கை தருகிறது என்று கர்தினால் நிக்கோல்ஸ் தன் பேட்டியில் எடுத்துரைத்தார். (ஆதாரம் : வத்திக்கான் வானொலி) [2017-03-31 00:59:28]


தவக்காலச் சிந்தனை : அக்கறை கொள்ளுதல்

இந்த தவக்காலத்திலே, இயேசு கிறிஸ்து, நம்மீது அக்கறை கொண்டு தன் உயிரை ஈந்த அந்த மாபெரும் தியாகத்தினை சிறப்பாக சிந்தித்துப் பார்க்கின்றோம். வேகமாக நகரும் இக்காலகட்டத்தில், நம்மைச் சுற்றி இருப்பவர்கள் மீது நாம் காட்டும் அக்கறை குறைந்து வருகின்றது. நமது வாழ்வு எந்த ஒரு பிரச்சனையுமின்றி சீராக பயணிக்கும் வரை, அடுத்திருப்பவர்களின் பிரச்சனைகள் நம்மை எவ்விதத்திலும் பாதிப்பதில்லை. இத்தகைய போக்கு நம்மை சுயநலவாதிகளாக மாற்றி, பிறரிடமிருந்து நம்மை பிரித்து விடுகின்றது. அதனைத் தவிர்த்து பிறரைப் பற்றிய சிந்தனைக்கு இடம் தருவோம். பிறருடைய துன்பங்களையும், தேவைகளையும் நமது போன்று ஏற்று, உதவி செய்ய முன்வருவோம். அடுத்திருப்பவர்கள்மீது நாம் காட்டும் அக்கறை, நமது நலனுக்காக உதவி செய்பவர்கள் இருக்கின்றார்கள் என்ற ஒரு நம்பிக்கையை அவர்கள் மனதில் விதைக்கட்டும். (அ.சகோ. செலூக்காஸ் சே.ச.) (ஆதாரம் : வத்திக்கான் வானொலி) [2017-03-31 00:51:53]


இரக்கத்தின் சாட்சிகளாக குடும்பங்கள்- திருத்தந்தையின் அழைப்பு

'தயவுசெய்து', 'நன்றி' 'நான் வருத்தப்படுகிறேன்' என்ற வார்த்தைகளின் பயன்பாடு நம் குடும்பங்களில் வளர்ந்தால் எவ்வளவு நலமாக இருக்கும் என்ற தன் விருப்பத்தை, திருத்தந்தை பிரான்சிஸ் அவர்கள், கத்தோலிக்க உலகினருக்கு எழுதியுள்ள ஒரு மடலில் கூறியுள்ளார். 2018ம் ஆண்டு, ஆகஸ்ட் 21ம் தேதி முதல், 26ம் தேதி முடிய, அயர்லாந்து நாட்டின், டப்ளின் (Dublin) நகரில், குடும்பங்களின் 9வது உலக மாநாடு நடைபெறவிருப்பதையொட்டி, திருத்தந்தை வழங்கியுள்ள செய்தி, மார்ச் 30, இவ்வியாழனன்று திருப்பீடத்தில் வெளியிடப்பட்டது. "குடும்பத்தின் நற்செய்தி: உலகின் மகிழ்வு" என்ற மையக்கருத்துடன், குடும்பங்களின் உலக மாநாடு நடைபெறும் என்பதை இச்செய்தியில் கூறியுள்ள திருத்தந்தை, 'அன்பின் மகிழ்வு' என்ற தலைப்பில் தான் வெளியிட்ட திருத்தூது அறிவுரை மடலை, குடும்பங்கள் வாசித்து, சந்திக்குமாறு அழைப்பு விடுத்துள்ளார். விவிலியம் இவ்வுலகிற்கு தொடர்ந்து மகிழ்வைத் தருகிறதா? குடும்பம் இவ்வுலகிற்கு நற்செய்தியாக தொடர்ந்து விளங்குகிறதா? என்ற கேள்விகளை, தன் செய்தியில் எழுப்பியுள்ள திருத்தந்தை, இவ்விரு கேள்விகளுக்கும், 'ஆம்' என்ற பதிலை ஆணித்தரமாகக் கூறித்யுள்ளார். நாம் அண்மையில் சிறப்பித்த இரக்கத்தின் சிறப்பு யூபிலியைத் தொடர்ந்து, இரக்கம் வெளிப்படும் மிகச் சிறந்த சாட்சிகளாக குடும்பங்கள் விளங்குவதை தான் விரும்புவதாகவும், குடும்பங்கள் இரக்கத்தின் அடையாளங்கள் என்பதை டப்ளின் மாநாடு மீண்டும் நிலைநாட்டும் என்பதை தான் நம்புவதாகவும் திருத்தந்தை இச்செய்தியில் கூறியுள்ளார். தன்னைப்பற்றிய சிந்தனைகளிலேயே மூழ்கியிராமல், வெளியேறிச் செல்லும் திருஅவை, காயப்பட்டவர்களைக் கண்டு, கடந்துசெல்லாமல் இரக்கம் காட்டும் உள்ளம் கொண்டிருக்கவேண்டும் என்பதே, திருஅவையைக் குறித்து தான் காணும் கனவு என்பதையும் திருத்தந்தை இச்செய்தியில் குறிப்பிட்டுள்ளார். குடும்பங்களின் உலக மாநாட்டிற்காக உழைக்கும் அயர்லாந்து மக்களுக்காகவும், குறிப்பாக, டப்ளின் மக்களுக்காகவும் தான் சிறப்பாக செபிப்பதாகவும், நாசரேத்து குடும்பம் இம்மாநாட்டின் பணிகள் அனைத்தையும் ஆசீர்வதிக்க வேண்டும் என்றும், திருத்தந்தை இச்செய்தியின் இறுதியில் கூறியுள்ளார். (ஆதாரம் : வத்திக்கான் வானொலி) [2017-03-31 00:43:18]


மிகக் குறைந்த வயதில் புனிதர் பட்டம் பெறும் தனிப்பெருமை

பாத்திமா அன்னையின் நூற்றாண்டு நிறைவு சிறப்பிக்கப்படும் இவ்வேளையில், அன்னையின் காட்சியைக் கண்ட அருளாளர்கள் பிரான்சிஸ்க்கோ, ஜசிந்தா இருவரும் புனிதர்களாக உயர்த்தப்பட்டால், இந்த நூற்றாண்டு விழா முழுமை பெறும் என்று, Leiria-Fatima மறைமாவட்டத்தின் ஆயர், António Augusto dos Santos Marto அவர்கள் செய்தியாளர்களிடம் கூறினார். மார்ச் 23, கடந்த வியாழனன்று, அருளாளர்கள் பிரான்சிஸ்கோ, ஜசிந்தா இருவரின் பரிந்துரையால் நிகழ்ந்த ஒரு புதுமையை ஏற்றுக்கொண்ட திருத்தந்தை பிரான்சிஸ் அவர்கள், அவ்விரு சிறாரையும் புனிதர்களாக உயர்த்தும் வழிமுறைகளுக்கு ஒப்புதல் அளித்ததைக் குறித்து தன் மகிழ்வை வெளியிட்ட ஆயர், Santos Marto அவர்கள், இவ்விருவரையும் புனிதராக உயர்த்தும் நாளையும், திருத்தந்தை விரைவில் அறிவிப்பார் என்று தான் எதிர்பார்ப்பதாகக் கூறினார். 10 வயது நிறைந்த பிரான்சிஸ்கோவும், 9 வயது நிறைந்த ஜசிந்தாவும் புனிதர்களாக உயர்த்தப்படும்போது, கிறிஸ்துவுக்காக தங்கள் உயிரைத் துறந்த குழந்தை மறைசாட்சிகள் அல்லாமல், திருஅவையில், மிகக் குறைந்த வயதில் புனிதர் பட்டம் பெற்றவர்கள் என்ற பெருமையை இவர்கள் இருவரும் பெறுவர் என்று, ஆயர் Santos Marto அவர்கள், செய்தியாளர்களிடம் கூறினார். ஏப்ரல் 20ம் தேதி, வத்திக்கானில், கர்தினால்களின் கூட்டம் நடைபெறும் வேளையில், பாத்திமா அன்னையைக் காட்சி கண்ட இரு அருளாளர்களின் புனிதர் பட்ட தேதியை திருத்தந்தை அறிவிக்கக்கூடும் என்று தான் எதிர்பார்ப்பதாகவும், அதுவரை பொறுமையுடன் காத்திருப்பதே சிறப்பு என்றும், ஆயர் Santos Marto அவர்கள், செய்தியாளர்கள் கூட்டத்தில் குறிப்பிட்டார். (ஆதாரம் : CNA/EWTN / வத்திக்கான் வானொலி) [2017-03-30 00:27:27]


கிறிஸ்தவர்களும், இஸ்லாமியரும் ஆபிரகாமின் குழந்தைகள்

உடன்பிறந்த உணர்வுடன் நாம் மேற்கொள்ளும் சந்திப்புக்கள், உரையாடல்கள் அனைத்தும் எனக்கு மிகவும் விருப்பமான செயல்கள் என்று திருத்தந்தை பிரான்சிஸ் அவர்கள், தன்னைச் சந்திக்க வந்திருந்த கிறிஸ்தவ, இஸ்லாமிய பிரதிநிதிகளிடம் கூறினார். பலசமய உரையாடல் திருப்பீட அவையும், ஈராக் நாட்டின் இஸ்லாமியப் பிரதிநிதிகள் குழுவும் இணைந்து, உரோம் நகரில் மேற்கொண்டுள்ள ஓர் உரையாடலில் பங்கேற்க வந்திருந்த பிரதிநிதிகளை, இப்புதன் காலை திருப்பீடத்தில் சந்தித்த திருத்தந்தை, உடன்பிறந்த உணர்வு மட்டுமே, உலகில் அமைதியை உறுதி செய்யும் என்று கூறினார். கிறிஸ்தவர்களும், இஸ்லாமியரும் ஒரே இறைவன் என்ற நம்பிக்கையை பகிர்ந்துகொள்வது மட்டுமல்லாமல், ஆபிரகாமின் குழந்தைகள் என்ற பாரம்பரியத்தையும் நாம் பகிர்ந்து வருகிறோம் என்று திருத்தந்தை இச்சந்திப்பில் கூறினார். மேலும், "நம்பிக்கையிலிருந்து ஊற்றெடுக்கும் அமைதி, ஒரு கொடை: கடவுள் எப்போதும் நம்மருகே இருந்து, நம்மை அன்புகூருகிறார் என்ற வரம் அது" என்ற சொற்கள், திருத்தந்தையின் டுவிட்டர் செய்தியாக இப்புதனன்று வெளியாயின. (ஆதாரம் : வத்திக்கான் வானொலி) [2017-03-30 00:19:50]


மலர்ந்தது முதல் மடியும் வரை மனித வாழ்வின் மதிப்பு

'கருவில் உருவானது முதல் மரணம் வரை, மனித வாழ்வெனும் புனிதக் கொடையை அக்கறையுடன் எடுத்துச் செல்வதே, அனைத்து வகையான வன்முறைகளையும் தடுப்பதற்கான சிறந்த வழி' என தன் டுவிட்டர் பக்கத்தில் இத்திங்களன்று எழுதியுள்ளார், திருத்தந்தை பிரான்சிஸ். எச்சூழலிலும் மனித வாழ்வு மதிக்கப்பட்டு, போற்றிப் பாதுகாக்கப்பட வேண்டும் என்பதை திருஅவை தொடர்ந்து வலியுறுத்தி வருகின்றது என்பது குறிப்பிடத்தக்கது. மேலும், இத்திங்களன்று காலை, திருப்பீடத்தில், மேற்கு கானடாவிலிருந்து 'அத் லிமினா' சந்திப்பையொட்டி வந்திருந்த ஆயர்களை சந்தித்து உரையாடினார் திருத்தந்தை பிரான்சிஸ். 5 ஆண்டிற்கு ஒருமுறை திருத்தந்தையையும், புனித பேதுரு கல்லறையையும் சந்திக்க, ஆயர்கள் உரோம் நகர் வருவதே 'அத் லிமினா' சந்திப்பு என அழைக்கப்படுகிறது. இத்திங்களன்று, மேற்கு கானடா பகுதியிலிருந்து, 22 ஆயர்கள், ஓர் அப்போஸ்தலிக்க நிர்வாகி, ஆயர் பேரவைப் பொதுச்செயலர் ஆகியோரை திருப்பீடத்தில் சந்தித்து உரையாடினார் திருத்தந்தை பிரான்சிஸ். (ஆதாரம் : வத்திக்கான் வானொலி) [2017-03-28 16:53:12]


தவக்கால சிந்தனை.. வீழ்ந்தோரைத் தூக்கிவிடுவோம்

உடல் நலமற்று வீழ்ந்துகிடந்த ஒருவரை குணமாக்கி தூக்கிவிடுகின்றார், இயேசு. நாம் வாழும் இந்த சமுதாயத்தில் அநேகர் வீழ்ந்துகிடக்கின்றனர். வறுமையினால் பாதிக்கப்பட்டு, அடிப்படை வசதிகள் இன்றி வீழ்ந்துகிடக்கின்றனர், ஏழைகள். போர்களினாலும், உள்நாட்டு பிரச்சனைகளினாலும், வாழ இடமின்றி வீழ்ந்துகிடக்கின்றனர், புலம்பெயர்ந்தோர். போதைக்கு அடிமைப்பட்டு, தன் கடமைகளை மறந்து, இளையோரும், குடும்பத்தலைவர்களும் வீழ்ந்துகிடக்கின்றனர். சமுதாயத்தினால் புறக்கணிக்கப்பட்டு, வாழ்க்கைச் சுமை தாங்காமல் வீழ்ந்துகிடக்கின்றனர், திருநங்கைகள். இவர்கள் சந்திக்கின்ற பிரச்சனைகளும், மனத்துயரங்களும், கணக்கிட இயலாதவை. இவர்களை தூக்கிவிட, இயேசு நமக்கு அழைப்புவிடுகின்றார். தேவையில் இருப்பவர்கள், கேட்டவுடன் உதவுவது, மனிதம்; தேவையை உணர்ந்து உதவுவது, புனிதம். எனவே தேவைகளை உணர்ந்து வீழ்ந்துகிடப்பவர்களை தூக்கிவிட முயல்வோம் (அ.சகோ. செலூக்காஸ் சே.ச.). (ஆதாரம் : வத்திக்கான் வானொலி ) [2017-03-28 16:47:05]


இதயத்தை கையில் தாங்கி திருத்தந்தைக்கு அளிக்கப்பட்ட வரவேற்பு

இஸ்பெயின் நாட்டின் Almería எனுமிடத்தில், இச்சனிக்கிழமையன்று இடம்பெற்ற அருளாளர் பட்டமளிப்பு விழா குறித்து தன் மூவேளை செப உரையின் இறுதியில் எடுத்துரைத்தார், திருத்தந்தை பிரான்சிஸ். இஸ்பெயின் நாட்டின் உள்நாட்டுப்போரின்போது, 1936ம் ஆண்டு, மறைசாட்சிகளாக கொல்லப்பட்ட José Alvarez-Benavides y de la Torre என்பவரும், அவரின் உடன் உழைப்பாளர்கள் 114 பேரும் அருளாளர்களாக அறிவிக்கப்பட்டுள்ளது, அன்பெனும் கலாச்சாரத்தை கட்டியெழுப்ப, நமக்கெல்லாம் ஓர் எடுத்துக்காட்டாக இருக்கட்டும் என்றார் திருத்தந்தை பிரான்சிஸ். மறைசாட்சிகளாக கொல்லப்பட்ட இந்த அருள்பணியாளர்கள், துறவியர் மற்றும் பொதுநிலையினர், இயேசுவிற்காகவும், அமைதியின் நற்செய்திக்காகவும், சகோதரத்துவ ஒப்புரவிற்காகவும் வீரத்துவ சாட்சிகளாக விளங்குகிறார்கள் என்றார் திருத்தந்தை. தன் மூவேளை செப உரையின் இறுதியில், மிலான் நகர மக்களுக்கு தன் நன்றியையையும் வெளியிட்டார் திருத்தந்தை. தான் சனிக்கிழமையன்று மேற்கொண்ட திருப்பயணத்தின்போது, மிலான் நகர மக்கள் தங்கள் இதயங்களை கையில் தாங்கியவர்களாக, தனக்கு இன்முக வரவேற்பு அளித்தனர் என உருவக மொழியில் அவர்களை பாராட்டிப் பேசினார் திருத்தந்தை. உரோம் புனித பேதுரு வளாகத்தில் இஞ்ஞாயிறன்று திருத்தந்தை வழங்கிய மூவேளை செப உரையில், ஏறத்தாழ 40,000 பேர் குழுமியிருந்து திருத்தந்தைக்கு செவிமடுத்தனர். (ஆதாரம் : வத்திக்கான் வானொலி) [2017-03-28 16:37:57]


தவக்காலச் சிந்தனை – முழுமையானப் பார்வை பெறவேண்டும்

இஞ்ஞாயிறு நற்செய்தியில் நாம் சந்திக்கும் பார்வை இழந்த மனிதர், உடலளவில் மட்டுமல்லாமல், உள்ளத்திலும் பார்வை பெறுகிறார். இதற்கு நேர் மாறாக, உடலளவில் தெளிவான பார்வை கொண்டிருந்ததாக எண்ணிக்கொண்டிருந்த பரிசேயர்கள், படிப்படியாகத் தங்கள் அகத்தில் பார்வை இழப்பதையும், யோவான் கூறியுள்ளார். இவ்விரு துருவங்களுக்கும் இடையே, பார்வை பெற்ற மனிதரின் பெற்றோர், அரைகுறையாய் பெறும் பார்வையைக் குறித்தும், யோவான் பாடங்கள் சொல்லித் தருகிறார். தங்கள் மகன் பார்வையற்றிருந்தபோது, அதை இறைவனின் சித்தம் என்று ஏற்றுக்கொண்ட அந்த பெற்றோர், பார்வை பெற்று, இறைவனின் புதுமைக்கு ஒரு சாட்சியாக நின்ற தங்கள் மகனை ஏற்றுக்கொள்வதற்குத் தயங்கினர். பரிசேயரின் சட்ட திட்டங்கள், அவ்வளவு தூரம், அவர்களைப் பயமுறுத்தி, பார்வை இழக்கச் செய்திருந்தது. பார்வையற்றவர், பிறந்தது முதல், தன் பெற்றோரையோ, பரிசேயர்களையோ பார்த்ததில்லை. பார்வைபெற்ற அன்றுதான், முதல் முறையாக, தன் பெற்றோரையும், பரிசேயரையும் அவர் பார்க்கிறார். தன் பெற்றோரது பயத்தைக் கண்டு அவர் பரிதாபப்பட்டிருப்பார். அதற்கும் மேலாக, அவருடைய பரிதாபத்தை அதிகம் பெற்றவர்கள் அந்த பரிசேயர்கள். கடவுளுக்கும், ஆலயத்திற்கும் மிக நெருக்கத்தில் வாழும் இவர்கள், கடவுளைக் காணமுடியாத குருடர்களாய் இருக்கிறார்களே என்று, அவர் பரிதாபப்பட்டிருப்பார். பார்வை பெற்றவரை, கோவிலிலிருந்து, யூத சமூகத்திலிருந்து வெளியேற்றினர், பரிசேயர்கள். அதுவரை ஒதுங்கியிருந்த இயேசு, இப்போது அவரைச் சந்தித்தார். அச்சந்திப்பில், அம்மனிதரின் சாட்சியம் இன்னும் ஆழப்பட்டது. முழுமை அடைந்தது. தனக்கு புதுமை செய்தவர், 'இயேசு' என்றும், 'இறைவாக்கினர்' என்றும் (யோவான் 9:15,17) படிப்படியாக ஏற்றுக்கொள்ளும் அளவு, அக ஒளி பெற்ற அவர், இறுதியில், இயேசுவைச் சந்தித்தபோது, அவரது அகம் முழுவதும் இறை ஒளியால் நிறைந்தது. இயேசுவின் முன் "ஆண்டவரே, நம்பிக்கை கொள்கிறேன்" (யோவான் 9:38) என்று முழுமையாய் சரணடைகிறார். (ஆதாரம் : வத்திக்கான் வானொலி) [2017-03-27 01:24:56]


அமெரிக்க கர்தினால் கீலெர் மறைவுக்கு திருத்தந்தை இரங்கல்

அமெரிக்க ஐக்கிய நாட்டின் பால்டிமோர் முன்னாள் பேராயர் கர்தினால் வில்லியம் ஹென்ரி கீலெர்(William Henry Keeler) அவர்கள், மரணமடைந்ததையொட்டி, தனது அனுதாபங்களைத் தெரிவிக்கும் இரங்கல் தந்தியை அனுப்பியுள்ளார், திருத்தந்தை பிரான்சிஸ். பால்டிமோரின் தற்போதைய பேராயர் வில்லியம் லோரி அவர்களுக்கு, இத்தந்திச் செய்தியை அனுப்பியுள்ள திருத்தந்தை, உலகளாவியத் திருஅவைக்கும், தலத்திருஅவைக்கும், கர்தினால் கீலெர் அவர்கள் ஆற்றியுள்ள சிறப்பான பணிகளுக்கு, நன்றியும், பாராட்டும் தெரிவித்துள்ளார். மார்ச் 23, இவ்வியாழன் அதிகாலையில், Catonsvilleலிலுள்ள புனித மார்ட்டீன் வயதானவர் இல்லத்தில், தனது 86வது வயதில் மரணமடைந்தார் கர்தினால் கீலெர். இவரின் அடக்கச் சடங்கு, மார்ச் 28ம் தேதி நடைபெறும். 2007ம் ஆண்டில் பணி ஓய்வு பெற்ற கர்தினால் கீலெர் அவர்கள், 1992ம் ஆண்டு முதல் 1995ம் ஆண்டு வரை, அமெரிக்க ஐக்கிய நாட்டு ஆயர் பேரவையின் தலைவராகப் பணியாற்றியுள்ளார். 1931ம் ஆண்டில் பிறந்த இவர், 1989ம் ஆண்டில் பால்டிமோர் பேராயராகவும், 1994ம் ஆண்டில் கர்தினாலாகவும் உயர்த்தப்பட்டார். 2005ம் ஆண்டில் வத்திக்கானில், முன்னாள் திருத்தந்தை 16ம் பெனடிக்ட் அவர்கள் தேர்ந்தெடுக்கப்பட்ட கான்கிளேவ் அவையிலும் கலந்துகொண்டார், கர்தினால் கீலெர். கர்தினால் கீலெர் அவர்களின் இறப்போடு, திருஅவையில் மொத்த கர்தினால்களின் எண்ணிக்கை 223. இவர்களில் எண்பது வயதுக்குட்பட்ட, திருத்தந்தையைத் தேர்ந்தெடுக்கும் தகுதியுடைய கர்தினால்களின் எண்ணிக்கை 117. (ஆதாரம் : வத்திக்கான் வானொலி) [2017-03-25 01:25:38]


பக்க இலக்கங்களை அழுத்தி எல்லா செய்திகளையும் பார்வையிடவும்